໒. ອຸຓ຺ຓາຠພ຺ຣາຫ຺ມຓສຸຕ຺ຕວຓ຺ຓນາ

໕໑໒. ທຸຕິເຍ ໂຄຈຣວິສຍນ຺ຕິ ໂຄຈຣຠູຕໍ ວິສຍໍ. ອຎ຺ຎມຎ຺ຎສ຺ສາຕິ ຈກ຺ຂຸ ໂສຕສ຺ສ, ໂສຕໍ ວາ ຈກ຺ຂຸສ຺ສາຕິ ເອວໍ ເອກໍ ເອກສ຺ສ ໂຄຈຣວິສຍໍ ນ ປຈ຺ຈນຸໂຠຕິ. ສເຈ ຫິ ນີລາທິເຠທໍ ຣູປາຣມ຺ມຓໍ ສໂມຘາເນຕ຺ວາ ໂສຕິນ຺ທ຺ຣິຍສ຺ສ ອຸປເນຍ຺ຍ – ‘‘ອິງ຺ຆ ຕ຺ວໍ ຕາວ ນໍ ວວຕ຺ຖເປຫິ ວິຠາເວຫິ ‘ກິນ຺ນາເມຕໍ ອາຣມ຺ມຓ’’’ນ຺ຕິ. ຈກ຺ຂຸວິຎ຺ຎາຓໍ ວິນາປິ ມຸເຂນ ອຕ຺ຕໂນ ຘມ຺ມຕາຍ ເອວໍ ວເທຍ຺ຍ – ‘‘ອເຣ, ອນ຺ຘພາລ, ວສ຺ສສຕມ຺ປິ ວສ຺ສສຫສ຺ສມ຺ປິ ວສ຺ສສຕສຫສ຺ສມ຺ປິ ປຣິຘາວມາໂນ ອຎ຺ຎຕ຺ຣ ມຍາ ກຸຫິໍ ເອຕສ຺ສ ຊານນກໍ ລຠິສ຺ສສິ, ຕໍ ອາຫຣ, ຈກ຺ຂຸປສາເທ ອຸປເນຫິ, ອຫເມຕໍ ອາຣມ຺ມຓໍ ຊານິສ຺ສາມິ – ຍທິ ວາ ນີລໍ, ຍທິ ວາ ປີຕກໍ. ນ ຫິ ເອໂສ ອຎ຺ຎສ຺ສ ວິສໂຍ, ມຍ຺ຫເມເວໂສ ວິສໂຍ’’ຕິ. ເສສທ຺ວາເຣສຸປິ ເອເສວ ນໂຍ. ເອວເມຕານິ ອຎ຺ຎມຎ຺ຎສ຺ສ ໂຄຈຣວິສຍໍ ນ ປຈ຺ຈນຸໂຠນ຺ຕິ ນາມ.

ກິໍ ປຏິສຣຓນ຺ຕິ ເອເຕສໍ ກິໍ ປຏິສຣຓໍ, ກິໍ ເອຕານິ ປຏິສຣນ຺ຕີຕິ ປຸຈ຺ຉຕິ. ມໂນ ປຏິສຣຓນ຺ຕິ ຊວນມໂນ ປຏິສຣຓໍ. ມໂນວ ເນສນ຺ຕິ ມໂນທ຺ວາຣິກຊວນມໂນວ ເອເຕສໍ ໂຄຈຣວິສຍໍ ຣຊ຺ຊນາທິວເສນ ອນຸໂຠຕິ. ຈກ຺ຂຸວິຎ຺ຎາຓຎ຺ຫິ ຣູປທສ຺ສນມຕ຺ຕເມວ, ເອຕ຺ຖ ຣຊ຺ຊນໍ ວາ ທຸສ຺ສນໍ ວາ ມຸຍ຺ຫນໍ ວາ ນຕ຺ຖິ. ເອກສ຺ມິໍ ປນ ທ຺ວາເຣ ຊວນໍ ຣຊ຺ຊຕິ ວາ ທຸສ຺ສຕິ ວາ ມຸຍ຺ຫຕິ ວາ. ໂສຕວິຎ຺ຎາຓາທີສຸປິ ເອເສວ ນໂຍ.

ຕຕ຺ຣາຍໍ ອຸປມາ – ປຎ຺ຈ ກິຣ ທຸພ຺ພລໂຠຊກາ ຣາຊານໍ ເສວິຕ຺ວາ ກິຈ຺ເຉນ ກສິເຣນ ເອກສ຺ມິໍ ປຎ຺ຈກຸລິເກ ຄາເມ ປຣິຕ຺ຕກໍ ອາຍໍ ລຠິໍສຸ. ເຕສໍ ຕຕ຺ຖ ມຈ຺ຉຠາໂຄ ມໍສຠາໂຄ, ອທ຺ທຸກຫາປໂຓ ວາ ໂຍຕ຺ຕກຫາປໂຓ ວາ ມາສກຫາປໂຓ ວາ ອຏ຺ຐກຫາປໂຓ ວາ ໂສຬສກຫາປໂຓ ວາ ຈຕຸສຏ຺ຐິກຫາປໂຓ ວາ ທຓ຺ໂຑຕິ ເອຕ຺ຕກມຕ຺ຕເມວ ປາປຸຓາຕິ, ສຕວຕ຺ຖຸກໍ ປຎ຺ຈສຕວຕ຺ຖຸກໍ ສຫສ຺ສວຕ຺ຖຸກໍ ມຫາພລິໍ ຣາຊາວ ຄຓ຺ຫາຕິ.

ຕຕ຺ຖ ປຎ຺ຈກຸລິກຄາມາ ວິຍ ປຎ຺ຈປສາທາ ທຏ຺ຐພ຺ພາ, ປຎ຺ຈ ທຸພ຺ພລໂຠຊກາ ວິຍ ປຎ຺ຈວິຎ຺ຎາຓານິ; ຣາຊາ ວິຍ ຊວນໍ, ທຸພ຺ພລໂຠຊການໍ ປຣິຕ຺ຕກອາຍປາປຸຓນໍ ວິຍ ຈກ຺ຂຸວິຎ຺ຎາຓາທີນໍ ຣູປທສ຺ສນາທິມຕ຺ຕໍ, ຣຊ຺ຊນາທິ ປນ ເອເຕສຸ ນຕ຺ຖິ. ຣຎ຺ໂຎ ມຫາພລິຄ຺ຄຫຓໍ ວິຍ ເຕສຸ ທ຺ວາເຣສຸ ຊວນສ຺ສ ຣຊ຺ຊນາທີນິ ເວທິຕພ຺ພານິ. ເອວເມຕ຺ຖ ມໂນຕິ ກຸສລາກຸສລຊວນໍ ວຸຕ຺ຕໍ.

ສຕິ ປຏິສຣຓນ຺ຕິ ມຄ຺ຄສຕິ ປຏິສຣຓໍ. ຊວນມໂນ ຫິ ມຄ຺ຄສຕິໍ ປຏິສຣຕິ. ວິມຸຕ຺ຕີຕິ ຜລວິມຸຕ຺ຕິ. ປຏິສຣຓນ຺ຕິ ຜລວິມຸຕ຺ຕິຍາ ນິພ຺ພານໍ ປຏິສຣຓໍ. ຕຎ຺ຫິ ສາ ປຏິສຣຕິ. ນາສກ຺ຂິ ປຎ຺ຫສ຺ສ ປຣິຍນ຺ຕໍ ຄເຫຕຸນ຺ຕິ ປຎ຺ຫສ຺ສ ປຣິຈ຺ເຉທໍ ປມາຓໍ ຄເຫຕຸໍ ນາສກ຺ຂິ, ອປ຺ປຏິສຣຓໍ ຘມ຺ມໍ ‘‘ສປ຺ປຏິສຣຓ’’ນ຺ຕິ ປຸຈ຺ຉິ. ນິພ຺ພານໍ ນາເມຕໍ ອປ຺ປຏິສຣຓໍ, ນ ກິຎ຺ຈິ ປຏິສຣຕິ. ນິພ຺ພາໂນຄຘນ຺ຕິ ນິພ຺ພານພ຺ຠນ຺ຕຣໍ ນິພ຺ພານໍ ອນຸປວິຏ຺ຐໍ. ພ຺ຣຫ຺ມຈຣິຍນ຺ຕິ ມຄ຺ຄພ຺ຣຫ຺ມຈຣິຍໍ. ນິພ຺ພານປຣາຍຓນ຺ຕິ ນິພ຺ພານໍ ປຣໍ ອຍນມສ຺ສ ປຣາ ຄຕິ, ນ ຕໂຕ ປຣໍ ຄຈ຺ຉຕີຕິ ອຕ຺ໂຖ. ນິພ຺ພານໍ ປຣິໂຍສານໍ ອວສານໍ ອສ຺ສາຕິ ນິພ຺ພານປຣິໂຍສານໍ.

ມູລຊາຕາ ປຕິຏ຺ຐິຕາຕິ ມຄ຺ເຄນ ອາຄຕສທ຺ຘາ ວຸຈ຺ຈຕິ. ອິມມ຺ຫິ ເຈ, ຠິກ຺ຂເວ, ສມເຍຕິ ກິໍ ສນ຺ຘາຍາຫ? ຌານອນາຄາມິຕໍ. ຕສ຺ມິຎ຺ຫິ ສມເຍ ພ຺ຣາຫ຺ມຓສ຺ສ ປຐມມຄ຺ເຄນ ປຎ຺ຈ ອກຸສລຈິຕ຺ຕານິ ປຫີນານິ, ປຐມຊ຺ຌາເນນ ປຎ຺ຈ ນີວຣຓານີຕິ ຌານອນາຄາມິຏ຺ຐາເນ ຐິໂຕ. ໂສ ອປຣິຫີນຊ຺ຌາໂນ ກາລໍ ກຕ຺ວາ ຕຕ຺ເຖວ ປຣິນິພ຺ພາເຍຍ຺ຍ. ສເຈ ປນສ຺ສ ປຸຕ຺ຕທາຣໍ ອນຸສາສນ຺ຕສ຺ສ ກມ຺ມນ຺ເຕ ວິຈາເຣນ຺ຕສ຺ສ ຌານໍ ນສ຺ສຕິ, ນຏ຺ເຐ ຌາເນ ຄຕິ ອນິພທ຺ຘາ ໂຫຕິ, ອນຏ຺ເຐ ປນ ນິພທ຺ຘາຕິ ອິມໍ ຌານອນາຄາມິຕໍ ສນ຺ຘາຍ ເອວມາຫ.