໙. ເສທກສຸຕ຺ຕວຓ຺ຓນາ

໓໘໕. ນວເມ ສຸມ຺ເຠສູຕິ ເອວໍນາມເກ ຊນປເທ. ເມທກຖາລິກາຕິ ເອວໍ ອິຕ຺ຖິລິງ຺ຄວເສນ ລທ຺ຘນາມໍ. ມມໍ ຣກ຺ຂ, ອຫໍ ຕໍ ຣກ຺ຂິສ຺ສາມີຕິ ເອຕ຺ຖ ອຍໍ ຕສ຺ສ ລທ຺ຘິ – ອາຈຣິໂຍ ອຸກ຺ຂິຕ຺ຕວໍສໍ ສຸຄ຺ຄຫິຕໍ ອຄຓ຺ຫນ຺ໂຕ, ອນ຺ເຕວາສິເກນ ປກ຺ຂນ຺ຕປກ຺ຂນ຺ຕທິສໍ ອຄຈ຺ຉນ຺ໂຕ, ສພ຺ພກາລຎ຺ຈ ວໍສຄ຺ຄໍ ອນຸລ຺ໂລເກນ຺ໂຕ ອນ຺ເຕວາສິກໍ ນ ຣກ຺ຂຕິ ນາມ, ເອວໍ ອຣກ຺ຂິໂຕ ອນ຺ເຕວາສິໂກ ປຕິຕ຺ວາ ຈຸຓ຺ຓວິຈຸຓ຺ຓໍ ໂຫຕິ. ວໍສໍ ປນ ສຸຄ຺ຄຫິຕໍ ຄຓ຺ຫນ຺ໂຕ, ເຕນ ປກ຺ຂນ຺ຕປກ຺ຂນ຺ຕທິສໍ ຄຈ຺ຉນ຺ໂຕ, ສພ຺ພກາລຎ຺ຈ ວໍສຄ຺ຄໍ ອຸລ຺ໂລເກນ຺ໂຕ ຕໍ ຣກ຺ຂຕິ ນາມ. ອນ຺ເຕວາສິໂກປິ ອິໂຕ ຈິໂຕ ຈ ປກ຺ຂນ຺ທິຕ຺ວາ ມິໂຄ ວິຍ ກີຬນ຺ໂຕ ອາຈຣິຍໍ ນ ຣກ຺ຂຕິ ນາມ. ເອວຎ຺ຫິ ສຕິ ຕິຂິຓວໍສໂກຏິ ອາຈຣິຍສ຺ສ ຄລວາຏເກ ວາ ນລາເຏ ວາ ຐປິຕາ ຐິຕຏ຺ຐານໍ ຠິນ຺ທິຕ຺ວາ ຄຈ຺ເຉຍ຺ຍ. ອາຈາຣສມ຺ປນ຺ນຕາຍ ປນ ຍໂຕ ວໍໂສ ນມຕິ, ຕໂຕ ອນາເມນ຺ໂຕ ຕໍ ອາກຑ຺ເຒນ຺ໂຕ ວິຍ ເອກໂຕຠາຄິຍໍ ກຕ຺ວາ ວາຕູປຖມ຺ຠໍ ຄາຫາເປຕ຺ວາ ສຕິໍ ສູປຏ຺ຐິຕໍ ກຕ຺ວາ ນິຈ຺ຈໂລວ ນິສີທນ຺ໂຕ ອາຈຣິຍໍ ຣກ຺ຂຕິ ນາມາຕິ.

ຕ຺ວໍ ອາຈຣິຍ ອຕ຺ຕານໍ ຣກ຺ຂ, ອຫໍ ອຕ຺ຕານໍ ຣກ຺ຂິສ຺ສາມີຕິ ເອຕ຺ຖ ອຍມຘິປ຺ປາໂຍ – ອາຈຣິໂຍ ວໍສໍ ສຸຄ຺ຄຫິຕໍ ຄຓ຺ຫນ຺ໂຕ, ອນ຺ເຕວາສິເກນ ປກ຺ຂນ຺ຕປກ຺ຂນ຺ຕທິສໍຄຈ຺ຉນ຺ໂຕ, ສພ຺ພກາລຎ຺ຈ ວໍສຄ຺ຄໍ ອຸລ຺ໂລເກນ຺ໂຕ, ອຕ຺ຕານເມວ ຣກ຺ຂຕິ, ນ ອນ຺ເຕວາສິກໍ. ອນ຺ເຕວາສິໂກປິ ກາຍມ຺ປິ ເອກໂຕຠາຄິຍໍ ກຕ຺ວາ ວາຕູປຖມ຺ຠໍ ຄາຫາເປຕ຺ວາ ສຕິໍ ສູປຏ຺ຐິຕໍ ກຕ຺ວາ ນິຈ຺ຈໂລວ ນິສີທມາໂນ ອຕ຺ຕານໍເຍວ ຣກ຺ຂຕິ ນາມ, ນ ອາຈຣິຍໍ.

ໂສ ຕຕ຺ຖ ຎາໂຍຕິ ຍໍ ເມທກຖາລິກາ ອາຫ. ໂສ ຕຕ຺ຖ ຎາໂຍ, ໂສ ອຸປາໂຍ, ຕໍ ກາຣຓນ຺ຕິ ອຕ຺ໂຖ. ສຕິປຏ຺ຐານໍ ເສວິຕພ຺ພນ຺ຕິ ຈຕຸພ຺ພິຘໍ ສຕິປຏ຺ຐານໍ ເສວິຕພ຺ພໍ. ອາເສວນາຍາຕິ ກມ຺ມຏ຺ຐານາເສວນາຍ. ເອວໍ ໂຂ, ຠິກ຺ຂເວ, ອຕ຺ຕານໍ ຣກ຺ຂນ຺ໂຕ ປຣໍ ຣກ຺ຂຕີຕິ ໂຍ ຠິກ຺ຂຸ ກມ຺ມາຣາມຕາທີນິ ປຫາຍ ຣຕ຺ຕິຏ຺ຐານທິວາຏ຺ຐາເນສຸ ມູລກມ຺ມຏ຺ຐານໍ ອາເສວນ຺ໂຕ ຠາເວນ຺ໂຕ ອຣຫຕ຺ຕໍ ປາປຸຓາຕິ, ອຖ ນໍ ປໂຣ ທິສ຺ວາ – ‘‘ຠທ຺ທໂກ ວຕາຍໍ, ຠິກ຺ຂຸ, ສມ຺ມາປຏິປນ຺ໂນ’’ຕິ ຕສ຺ມິໍ ຈິຕ຺ຕໍ ປສາເທຕ຺ວາ ສຄ຺ຄປຣາຍໂຓ ໂຫຕິ. ອຍໍ ອຕ຺ຕານໍ ຣກ຺ຂນ຺ໂຕ ປຣໍ ຣກ຺ຂຕິ ນາມ.

ຂນ຺ຕິຍາຕິ ອຘິວາສນຂນ຺ຕິຍາ. ອວິຫິໍສາຍາຕິ ສປຸພ຺ພຠາຄາຍ ກຣຸຓາຍ. ເມຕ຺ຕຈິຕ຺ຕຕາຍາຕິ ສປຸພ຺ພຠາຄາຍ ເມຕ຺ຕາຍ. ອນຸທຍຕາຍາຕິ ອນຸວຑ຺ຒິຍາ, ສປຸພ຺ພຠາຄາຍ ມຸທິຕາຍາຕິ ອຕ຺ໂຖ. ປຣໍ ຣກ຺ຂນ຺ໂຕ ອຕ຺ຕານໍ ຣກ຺ຂຕີຕິ ເອຕ຺ຖ ໂຍ ຠິກ຺ຂຸ ຣຕ຺ຕິຏ຺ຐານທິວາຏ຺ຐານໍ ຄໂຕ ຕີສຸ ພ຺ຣຫ຺ມວິຫາເຣສຸ ຕິກຈຕຸກ຺ກຊ຺ຌານານິ ນິພ຺ພຕ຺ເຕຕ຺ວາ ຌານໍ ປາທກໍ ກຕ຺ວາ ສງ຺ຂາເຣ ສມ຺ມສນ຺ໂຕ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓາຕິ. ອຍໍ ປຣໍ ຣກ຺ຂນ຺ໂຕ ອຕ຺ຕານໍ ຣກ຺ຂຕິ ນາມາຕິ ເວທິຕພ຺ໂພ.