໖. ສກຸຓຄ຺ຆິສຸຕ຺ຕວຓ຺ຓນາ

໓໗໒. ຉຏ຺ເຐ ສກຸຓຄ຺ຆີຕິ ສກຸຓໍ ຫນຕີຕິ ສກຸຓຄ຺ຆິ, ເສນສ຺ເສຕໍ ອຘິວຈນໍ. ສຫສາ ອຊ຺ຌປຕ຺ຕາຕິ ໂລຠສາຫເສນ ປຕ຺ຕາ. ອລກ຺ຂິກາຕິ ນິສ຺ສິຣິກາ. ອປ຺ປປຸຎ຺ຎາຕິ ປຣິຕ຺ຕປຸຎ຺ຎາ. ສເຈຊ຺ຊ ມຍນ຺ຕິ ສເຈ ອຊ຺ຊ ມຍໍ. ນງ຺ຄລກຏ຺ຐກຣຓນ຺ຕິ ນງ຺ຄເລນ ກສິກຣຓໍ, ອຘຸນາ ກຏ຺ຐໍ ເຂຕ຺ຕຏ຺ຐານນ຺ຕິ ອຕ຺ໂຖ. ເລຑ຺ຑຸຏ຺ຐານນ຺ຕິ ເລຑ຺ຑູນໍ ຐານໍ. ສໍວທມານາຕິ ສມ຺ມາ ວທມານາ, ອຕ຺ຕໂນ ພລສ຺ສ ສຸຏ຺ຐຸ ວຓ຺ຓໍ ວທມານາຕິ ອຕ຺ໂຖ. ມຫນ຺ຕໍ ເລຑ຺ຑຸໍ ອຠິຣຸຫິຕ຺ວາຕິ ອຸທ຺ຘນສຓ຺ຐາເນນ ຐິເຕສຸ ຕີສຸ ເລຑ຺ຑູສຸ ‘‘ອິໂຕ ເສເນ ອາຄຈ຺ຉນ຺ເຕ ອິໂຕ ນິກ຺ຂມິສ຺ສາມິ, ອິໂຕ ອາຄຈ຺ຉນ຺ເຕ ອິໂຕ’’ຕິ ສລ຺ລກ຺ເຂຕ຺ວາ ເຕສຸ ເອກໍ ເລຑ຺ຑຸໍ ອຠິຣຸຫິຕ຺ວາ ອຏ຺ຐາສິ ອວທມາໂນ. ສນ຺ນຍ຺ຫາຕິ ຂຸຣປ຺ປໍ ສນ຺ນຍ຺ຫມາໂນ ວິຍ ສນ຺ນຍ຺ຫິຕ຺ວາ ສຸຏ຺ຐຸ ຐເປຕ຺ວາ. ພຫຸອາຄໂຕ ໂຂ ມ຺ຍາຍນ຺ຕິ ‘‘ມຍ຺ຫໍ ອຕ຺ຖາຍ ອຍໍ ພຫຸຕໍ ຐານໍ ອາຄໂຕ, ອປ຺ປໍ ອວສິຏ຺ຐໍ, ອິທານິ ມໍ ຄຓ຺ຫິສ຺ສຕີ’’ຕິ ຎຕ຺ວາ ທາຣຸຄຸໂຬ ວິຍ ວິນິວຕ຺ຕິຕ຺ວາ ຕສ຺ເສວ ເລຑ຺ຑຸສ຺ສ ອນ຺ຕເຣ ປຈ຺ຈຸປາທິ, ປຏິປນ຺ໂນ ປວິຏ຺ໂຐຕິ ອຕ຺ໂຖ. ອຸຣໍ ປຈ຺ຈຕາເຬສີຕິ ‘‘ເອກປ຺ປຫາເຣເນວ ລາປສ຺ສ ສີສໍ ຉິນ຺ທິຕ຺ວາ ຄເຫສ຺ສາມີ’’ຕິ ປກ຺ຂນ຺ທຕ຺ຕາ ເວຄໍ ສນ຺ຘາເຣຕຸໍ ອສກ຺ໂກນ຺ໂຕ ຕສ຺ມິໍ ເລຑ຺ຑຸສ຺ມິໍ ອຸຣໍ ປຕາເຬສິ. ຕາວເທວສ຺ສ ຫທຍມໍສໍ ຜາລິຍິຕ຺ຖ. ອຖ ລາໂປ ‘‘ທິຏ຺ຐາ ວຕ ສຕ຺ຕຸໂນ ປິຏ຺ຐີ’’ຕິ ຫຏ຺ຐຕຸຏ຺ໂຐ ຕສ຺ສ ຫທເຍ ອປຣາປຣໍ ຈງ຺ກມິ.