໕. ສງ຺ຄາຣວສຸຕ຺ຕວຓ຺ຓນາ

໒໓໖. ປຎ຺ຈເມ ປເຄວາຕິ ປຐມຎ຺ເຎວ. ກາມຣາຄປຣິຍຸຏ຺ຐິເຕນາຕິ ກາມຣາຄຄຫິເຕນ. ກາມຣາຄປເຣເຕນາຕິ ກາມຣາຄານຸຄເຕນ. ນິສ຺ສຣຓນ຺ຕິ ຕິວິຘໍ ກາມຣາຄສ຺ສ ນິສ຺ສຣຓໍ ວິກ຺ຂມ຺ຠນນິສ຺ສຣຓໍ ຕທງ຺ຄນິສ຺ສຣຓໍ ສມຸຈ຺ເຉທນິສ຺ສຣຓນ຺ຕິ. ຕຕ຺ຖ ອສຸເຠ ປຐມຊ຺ຌານໍ ວິກ຺ຂມ຺ຠນນິສ຺ສຣຓໍ ນາມ, ວິປສ຺ສນາ ຕທງ຺ຄນິສ຺ສຣຓໍ ນາມ, ອຣຫຕ຺ຕມຄ຺ໂຄ ສມຸຈ຺ເຉທນິສ຺ສຣຓໍ ນາມ. ຕໍ ຕິວິຘມ຺ປິ ນປ຺ປຊານາຕີຕິ ອຕ຺ໂຖ. ອຕ຺ຕຕ຺ຖມ຺ປີຕິອາທີສຸ ອຣຫຕ຺ຕສງ຺ຂາໂຕ ອຕ຺ຕໂນ ອຕ຺ໂຖ ອຕ຺ຕຕ຺ໂຖ ນາມ, ປຈ຺ຈຍທາຍການໍ ອຕ຺ໂຖ ປຣຕ຺ໂຖ ນາມ, ສ຺ເວວ ທຸວິໂຘປິ ອຸຠຍຕ຺ໂຖ ນາມ. ອິມິນາ ນເຍນ ສພ຺ພວາເຣສຸ ອຕ຺ໂຖ ເວທິຕພ຺ໂພ.

ອຍໍ ປນ ວິເສໂສ – ພ຺ຍາປາທສ຺ສ ນິສ຺ສຣຓນ຺ຕິອາທີສຸ ຫິ ທ຺ເວວ ນິສ຺ສຣຓານິ ວິກ຺ຂມ຺ຠນນິສ຺ສຣຓຎ຺ຈ ສມຸຈ຺ເຉທນິສ຺ສຣຓຎ຺ຈ. ຕຕ຺ຖ ພ຺ຍາປາທສ຺ສ ຕາວ ເມຕ຺ຕາຍ ປຐມຊ຺ຌານໍ ວິກ຺ຂມ຺ຠນນິສ຺ສຣຓໍ, ອນາຄາມິມຄ຺ໂຄ ສມຸຈ຺ເຉທນິສ຺ສຣຓໍ. ຖິນມິທ຺ຘສ຺ສ ອາໂລກສຎ຺ຎາ ວິກ຺ຂມ຺ຠນນິສ຺ສຣຓໍ, ອຣຫຕ຺ຕມຄ຺ໂຄ ສມຸຈ຺ເຉທນິສ຺ສຣຓໍ. ອຸທ຺ຘຈ຺ຈກຸກ຺ກຸຈ຺ຈສ຺ສ ໂຍ ໂກຈິ ສມໂຖ ວິກ຺ຂມ຺ຠນນິສ຺ສຣຓໍ, ອຸທ຺ຘຈ຺ຈສ຺ສ ປເນຕ຺ຖ ອຣຫຕ຺ຕມຄ຺ໂຄ, ກຸກ຺ກຸຈ຺ຈສ຺ສ ອນາຄາມິມຄ຺ໂຄ ສມຸຈ຺ເຉທນິສ຺ສຣຓໍ. ວິຈິກິຈ຺ຉາຍ ຘມ຺ມວວຕ຺ຖານໍ ວິກ຺ຂມ຺ຠນນິສ຺ສຣຓໍ, ປຐມມຄ຺ໂຄ ສມຸຈ຺ເຉທນິສ຺ສຣຓໍ.

ຍາ ປເນຕ຺ຖ ເສຍ຺ຍຖາປິ ພ຺ຣາຫ຺ມຓ ອຸທປຕ຺ໂຕ ສໍສຏ຺ໂຐ ລາຂາຍ ວາຕິອາທິກາ ອຸປມາ ວຸຕ຺ຕາ, ຕາສຸ ອຸທປຕ຺ໂຕຕິ ອຸທກຠຣິຕາ ປາຕິ. ສໍສຏ຺ໂຐຕິ ວຓ຺ຓເຠທກຣຓວເສນ ສໍສຏ຺ໂຐ. ປກ຺ກຸຖິໂຕຕິ ກຸຖິໂຕ. ອຸສ຺ມຸທກຊາໂຕຕິ ອຸສຸມຊາໂຕ. ເສວາລປຓກປຣິໂຍນທ຺ໂຘຕິ ຕິລພີຊກາທິເຠເທນ ເສວາເລນ ວາ ນີລມຓ຺ຑູກປິຏ຺ຐິວຓ຺ເຓນ ວາ ອຸທກປິຏ຺ຐິໍ ຉາເທຕ຺ວາ ນິພ຺ພຕ຺ຕປຓເກນ ປຣິໂຍນທ຺ໂຘ. ວາເຕຣິໂຕຕິ ວາເຕນ ເອຣິໂຕ ກມ຺ປິໂຕ. ອາວິໂລຕິ ອປ຺ປສນ຺ໂນ. ລຸຬິໂຕຕິ ອສນ຺ນິສິນ຺ໂນ. ກລລີຠູໂຕຕິ ກທ຺ທມີຠູໂຕ. ອນ຺ຘກາເຣ ນິກ຺ຂິຕ຺ໂຕຕິ ໂກຏ຺ຐນ຺ຕຣາທິເຠເທ ອນາໂລກຏ຺ຐາເນ ຐປິໂຕ. ອິມສ຺ມິໍ ສຸຕ຺ເຕ ຠຄວາ ຕີຫິ ຠເວຫິ ເທສນໍ ນິວຕ຺ເຕຕ຺ວາ ອຣຫຕ຺ຕນິກູເຏນ ເທສນໍ ນິຏ຺ຐາເປສິ, ພ຺ຣາຫ຺ມໂຓ ປນ ສຣຓມຕ຺ເຕ ປຕິຏ຺ຐິໂຕ.