໘. ອາວຣຓນີວຣຓສຸຕ຺ຕວຓ຺ຓນາ

໒໑໙. ອຏ຺ຐເມ ປຎ຺ຎາຍ ທຸພ຺ພລີກຣຓາຕິ ປຎ຺ຎາຍ ມນ຺ທຠາວກຣາ. ນີວຣຓານຎ຺ຫິ ອຠິຓ຺ຫຸປ຺ປາເທ ສຕິ ອນ຺ຕຣນ຺ຕຣາ ອຸປ຺ປຊ຺ຊມານາ ປຎ຺ຎາ ທຸພ຺ພລາ ໂຫຕິ ມນ຺ທາ ອວິສທາ.

ປຎ຺ຈ ນີວຣຓາ ຕສ຺ມິໍ ສມເຍ ນ ໂຫນ຺ຕິ. ສຕ຺ຕໂພຊ຺ຌງ຺ຄາ ຕສ຺ມິໍ ສມເຍ ຠາວນາປາຣິປູຣິໍ ຄຈ຺ຉນ຺ຕີຕິ ອຣິຍສາວກສ຺ສ ຫິ ສປ຺ປາຍຘມ຺ມສ຺ສວນໍ ສຸຓນ຺ຕສ຺ສ ປຎ຺ຈ ນີວຣຓາ ທູເຣ ໂຫນ຺ຕິ. ໂສ ສເຈ ຕສ຺ມິໍເຍວ ຐາເນ ວິເສສໍ ນິພ຺ພຕ຺ເຕຕຸໍ ສກ຺ໂກຕິ, ເອວມສ຺ສ ສຕ຺ຕ ໂພຊ຺ຌງ຺ຄາ ຠາວນາປາຣິປູຣິໍ ຄຈ຺ຉນ຺ຕິ. ໂນ ເຈ ສກ຺ໂກຕິ, ຕໂຕ ວຸຏ຺ຐາຍ ຣຕ຺ຕິຏ຺ຐານທິວາຏ຺ຐານໍ ຄໂຕ ຕເມວ ປີຕິໍ ອວິຊຫນ຺ໂຕ ປຎ຺ຈ ນີວຣເຓ ວິກ຺ຂມ຺ເຠຕ຺ວາ ວິເສສໍ ນິພ຺ພຕ຺ເຕສ຺ສຕິ. ຕຕ຺ຖ ອສກ຺ໂກນ຺ໂຕປິ ຍາວ ສຕ຺ຕທິວສພ຺ຠນ຺ຕຣາ ຕເມວ ປີຕິໍ ອວິຊຫນ຺ໂຕ ນີວຣເຓ ວິກ຺ຂມ຺ເຠຕ຺ວາ ວິເສສໍ ນິພ຺ພຕ຺ເຕສ຺ສຕີຕິ ອິທໍ ສນ຺ຘາເຍຕໍ ວຸຕ຺ຕໍ. ຘມ຺ມສ຺ສວນວເສນ ສກິໍ ປີຕິປາໂມຊ຺ຊປກ຺ຂິຍາ ປຏິລທ຺ຘໂພຊ຺ຌງ຺ຄາ ຫິ ກມ຺ມາຣາມຕາທີນິ ອາຄມ຺ມ ນສ຺ສນ຺ຕິ, ຕຖາຣູປໍ ປນ ອຸຕຸສປ຺ປາຍາທິໍ ລຠິຕ຺ວາ ປຸນ ອຸປ຺ປຊ຺ຊນ຺ຕາປິ ຕສ຺ມິໍ ສມເຍ ຠາວນາປາຣິປູຣິໍ ຄຈ຺ຉນ຺ຕິ ອິຈ຺ເຈວ ວຸຈ຺ຈຕິ.