໔. ປຐມສຣຓານິສກ຺ກສຸຕ຺ຕວຓ຺ຓນາ

໑໐໒໐. ຈຕຸຕ຺ເຖ ອິຘ ມຫານາມ ເອກຈ຺ໂຈ ປຸຄ຺ຄໂລຕິ ອິທໍ ນ ເກວລໍ ສຣຓານິ ເອວ ອປາຍໂຕ ມຸຕ຺ໂຕ, ອິເມປິ ປຸຄ຺ຄລາ ມຸຕ຺ຕາຕິ ທສ຺ເສຕຸໍ ອາຣທ຺ຘໍ. ມຕ຺ຕໂສ ນິຊ຺ຌານໍ ຂມນ຺ຕີຕິ ປມາເຓນ ຈ ໂອໂລກນໍ ຂມນ຺ຕິ. ອິມິນາ ຘມ຺ມານຸສາຣິມຄ຺ຄຏ຺ຐປຸຄ຺ຄລໍ ທສ຺ເສຕິ. ອຄນ຺ຕາ ນິຣຍນ຺ຕິ ມຄ຺ຄຏ຺ຐປຸຄ຺ຄໂລ ຫິ ອປາຍໂຕ ປຣິມຸຕ຺ໂຕຕິ ວາ ປຣິມຸຈ຺ຈິສ຺ສຕີຕິ ວາ ວຕ຺ຕຸໍ ນ ວຏ຺ຏຕິ, ປຣິມຸຈ຺ຈຕີຕິ ປນ ວຕ຺ຕຸໍ ວຏ຺ຏຕິ. ຍສ຺ມາ ຈ ປຣິມຸຈ຺ຈຕິ, ຕສ຺ມາ ຄນ຺ຕາ ນາມ ນ ໂຫຕີຕິ, ‘‘ອຄນ຺ຕາ’’ຕິ ວຸຕ຺ໂຕ, ນ ຄຈ຺ຉຕີຕິ ອຕ຺ໂຖ. ສທ຺ຘາມຕ຺ຕໍ ເປມມຕ຺ຕນ຺ຕິ ອິມິນາ ສທ຺ຘານຸສາຣິມຄ຺ຄຏ຺ຐປຸຄ຺ຄລໍ ທສ຺ເສຕິ. ມຫາສາລາຕິ ສມີເປ ຐິເຕວ ຈຕ຺ຕາໂຣ ມຫາສາຣຣຸກ຺ເຂ ທສ຺ເສນ຺ໂຕ ອາຫ. ມຣຓກາເລ ສິກ຺ຂໍ ສມາທິຍີຕິ ມຣຓສມເຍ ຕີສຸ ສິກ຺ຂາສຸ ປຣິປູຣກາຣີ ອໂຫສີຕິ ທສ຺ເສຕິ.