໑-໒. ອິຈ຺ຉານງ຺ຄລສຸຕ຺ຕາທິວຓ຺ຓນາ

໙໘໗-໙໘໘. ທຸຕິຍວຄ຺ຄສ຺ສ ປຐເມ ເອວໍ ພ຺ຍາກເຣຍ຺ຍາຖາຕິ ກສ຺ມາ ອຕ຺ຕໂນ ວິຫາຣສມາປຕ຺ຕິໍ ອາຈິກ຺ຂຕິ? ອຸປາຣມ຺ຠໂມຈນຕ຺ຖໍ. ສເຈ ຫິ ເຕ ‘‘ນ ຊານາມາ’’ຕິ ວເທຍ຺ຍຸໍ, ອຖ ເນສໍ ຕິຕ຺ຖິຍາ ‘‘ຕຸມ຺ເຫ ‘ອສຸກສມາປຕ຺ຕິຍາ ນາມ ໂນ ສຕ຺ຖາ ເຕມາສໍ ວິຫາສີ’ຕິປິ ນ ຊານາຖ, ອຖ ກສ຺ມາ ນໍ ອຸປຏ຺ຐຫນ຺ຕາ ວິຫຣຖາ’’ຕິ ອຸປາຣມ຺ຠໍ ອາໂຣເປຍ຺ຍຸໍ, ຕໂຕ ໂມຈນຕ຺ຖໍ ເອວມາຫ.

ອຖ ກສ຺ມາ ຍຖາ ອຎ຺ຎຕ຺ຖ ‘‘ສໂຕວ ອສ຺ສສຕິ, ທີຆໍ ວາ ອສ຺ສສນ຺ໂຕ’’ຕິ (ທີ. ນິ. ໒.໓໗໔; ມ. ນິ. ໑.໑໐໗; ສໍ. ນິ. ໕.໙໗໗) ເອວ-ວາກາໂຣ ວຸຕ຺ໂຕ. ເອວໍ ອິຘ ນ ວຸຕ຺ໂຕຕິ? ເອກນ຺ຕສນ຺ຕຕ຺ຕາ. ອຎ຺ເຎສຎ຺ຫິ ອສ຺ສາໂສ ວາ ປາກໂຏ ໂຫຕິ ປສ຺ສາໂສ ວາ, ຠຄວໂຕ ອຸຠຍມ຺ເປຕໍ ປາກຏເມວ ນິຈ຺ຈໍ ອຸປຏ຺ຐິຕສ຺ສຕິຕາຍາຕິ ເອກນ຺ຕສນ຺ຕຕ຺ຕາ ນ ວຸຕ຺ໂຕ. ອຖ ‘‘ສິກ຺ຂາມີ’’ຕິ ອວຕ຺ວາ ກສ຺ມາ ‘‘ອສ຺ສສາມີ’’ຕິ ເອຕ຺ຕກເມວ ວຸຕ຺ຕນ຺ຕິ? ສິກ຺ຂິຕພ຺ພາຠາວາ. ສຕ຺ຕ ຫິ ເສຂາ ສິກ຺ຂິຕພ຺ພຠາວາ ເສຂາ ນາມ, ຂີຓາສວາ ສິກ຺ຂິຕພ຺ພາຠາວາ ອເສຂາ ນາມ, ຕຖາຄຕາ ອສິກ຺ຂິຕພ຺ພາ ອເສກ຺ຂາ ນາມ ນຕ຺ຖິ ເຕສໍ ສິກ຺ຂິຕພ຺ພກິຈ຺ຈນ຺ຕິ ສິກ຺ຂິຕພ຺ພາຠາວາ ນ ວຸຕ຺ຕໍ. ທຸຕິຍໍ ອຸຕ຺ຕານເມວ.