໔. ຊມ຺ພຸຂາທກສໍຍຸຕ຺ຕໍ

໑. ນິພ຺ພານປຎ຺ຫາສຸຕ຺ຕວຓ຺ຓນາ

໓໑໔. ຊມ຺ພຸຂາທກສໍຍຸຕ຺ເຕ ຊມ຺ພຸຂາທໂກ ປຣິພ຺ພາຊໂກຕິ ເອວໍນາໂມ ເຖຣສ຺ສ ຠາຄິເນຍ຺ໂຍ ຉນ຺ນປຣິພ຺ພາຊໂກ. ໂຍ ໂຂ ອາວຸໂສ ຣາຄກ຺ຂໂຍຕິ ນິພ຺ພານໍ ອາຄມ຺ມ ຣາໂຄ ຂີຍຕິ, ຕສ຺ມາ ນິພ຺ພານໍ ຣາຄກ຺ຂໂຍຕິ ວຸຈ຺ຈຕິ. ໂທສໂມຫກ຺ຂເຍສຸປິ ເອເສວ ນໂຍ.

ໂຍ ປນ ອິມິນາວ ສຸຕ຺ເຕນ ກິເລສກ຺ຂຍມຕ຺ຕໍ ນິພ຺ພານນ຺ຕິ ວເທຍ຺ຍ, ໂສ ວຕ຺ຕພ຺ໂພ ‘‘ກສ຺ສ ກິເລສານໍ ຂໂຍ, ກິໍ ອຕ຺ຕໂນ, ອຸທາຫຸ ປເຣສ’’ນ຺ຕິ? ອທ຺ຘາ ‘‘ອຕ຺ຕໂນ’’ຕິ ວກ຺ຂຕິ. ຕໂຕ ປຸຈ຺ຉິຕພ຺ໂພ ‘‘ໂຄຕ຺ຣຠຸຎາຓສ຺ສ ກິໍ ອາຣມ຺ມຓ’’ນ຺ຕິ? ຊານມາໂນ ‘‘ນິພ຺ພານ’’ນ຺ຕິ ວກ຺ຂຕິ. ກິໍ ປນ ໂຄຕ຺ຣຠຸຎາຓກ຺ຂເຓ ກິເລສາ ຂີຓາ ຂີຍນ຺ຕິ ຂີຍິສ຺ສນ຺ຕີຕິ? ‘‘ຂີຓາ’’ຕິ ວາ ‘‘ຂີຍນ຺ຕີ’’ຕິ ວາ ນ ວຕ຺ຕພ຺ພາ, ‘‘ຂີຍິສ຺ສນ຺ຕີ’’ຕິ ປນ ວຕ຺ຕພ຺ພາຕິ. ກິໍ ປນ ເຕສຸ ອຂີເຓສຸເຍວ ກິເລເສສຸ ໂຄຕ຺ຣຠຸຎາຓໍ ກິເລສກ຺ຂຍໍ ອາຣມ຺ມຓໍ ກໂຣຕີຕິ? ອທ຺ຘາ ເອວໍ ວຸຕ຺ເຕ ນິຣຸຕ຺ຕໂຣ ຠວິສ຺ສຕິ.

ມຄ຺ຄຎາເຓນາປິ ເຈຕໍ ໂຍເຊຕພ຺ພໍ. ມຄ຺ຄກ຺ຂເຓປິ ຫິ ກິເລສາ ‘‘ຂີຓາ’’ຕິ ວາ ‘‘ຂີຍິສ຺ສນ຺ຕີ’’ຕິ ວາ ນ ວຕ຺ຕພ຺ພາ, ‘‘ຂີຍນ຺ຕີ’’ຕິ ປນ ວຕ຺ຕພ຺ພາ, ນ ຈ ອຂີເຓສຸເຍວ ກິເລເສສຸ ກິເລສກ຺ຂໂຍ ອາຣມ຺ມຓໍ ໂຫຕິ, ຕສ຺ມາ ສມ຺ປຏິຈ຺ຉິຕພ຺ພເມຕໍ. ຍໍ ອາຄມ຺ມ ຣາຄາທໂຍ ຂີຍນ຺ຕິ, ຕໍ ນິພ຺ພານໍ. ຕໍ ປເນຕໍ ‘‘ຣູປິໂນ ຘມ຺ມາ ອຣູປິໂນ ຘມ຺ມາ’’ຕິອາທີສຸ (ຘ. ສ. ທຸກມາຕິກາ ໑໑) ທຸເກສຸ ອຣູປິໂນ ຘມ຺ມາຕິ ສງ຺ຄຫິຕຕ຺ຕາ ນ ກິເລສກ຺ຂຍມຕ຺ຕເມວາຕິ.

໒. ອຣຫຕ຺ຕປຎ຺ຫາສຸຕ຺ຕວຓ຺ຓນາ

໓໑໕. ອຣຫຕ຺ຕປຎ຺ຫພ຺ຍາກຣເຓ ຍສ຺ມາ ອຣຫຕ຺ຕໍ ຣາຄໂທສໂມຫານໍ ຂີຓນ຺ເຕ ອຸປ຺ປຊ຺ຊຕິ, ຕສ຺ມາ ‘‘ຣາຄກ຺ຂໂຍ ໂທສກ຺ຂໂຍ ໂມຫກ຺ຂໂຍ’’ຕິ ວຸຕ຺ຕໍ.

໓-໑໕. ຘມ຺ມວາທີປຎ຺ຫາສຸຕ຺ຕາທິວຓ຺ຓນາ

໓໑໖-໓໒໘. ເຕ ໂລເກ ສຸຄຕາຕິ ເຕ ຣາຄາທໂຍ ປຫາຍ ຄຕຕ຺ຕາ ສຸຏ຺ຐຸ ຄຕາຕິ ສຸຄຕາ. ທຸກ຺ຂສ຺ສ ໂຂ ອາວຸໂສ ປຣິຎ຺ຎຕ຺ຖນ຺ຕິ ວຏ຺ຏທຸກ຺ຂສ຺ສ ປຣິຊານນຕ຺ຖໍ. ທຸກ຺ຂຕາຕິ ທຸກ຺ຂສຠາໂວ. ທຸກ຺ຂທຸກ຺ຂຕາຕິອາທີສຸ ທຸກ຺ຂສງ຺ຂາໂຕ ທຸກ຺ຂສຠາໂວ ທຸກ຺ຂທຸກ຺ຂຕາ. ເສສປທທ຺ວເຍປິ ເອເສວ ນໂຍ.

໑໖. ທຸກ຺ກຣປຎ຺ຫາສຸຕ຺ຕວຓ຺ຓນາ

໓໒໙. ອຠິຣຕີຕິ ປພ຺ພຊ຺ຊາຍ ອນຸກ຺ກຓ຺ຐນຕາ. ນຈິຣໍ ອາວຸໂສຕິ ອາວຸໂສ ຘມ຺ມານຸຘມ຺ມປ຺ປຏິປນ຺ໂນ ຠິກ຺ຂຸ ‘‘ປາໂຕ ອນຸສິຏ຺ໂຐ ສາຍໍ ວິເສສມຘິຄມິສ຺ສຕິ, ສາຍໍ ອນຸສິຏ຺ໂຐ ປາໂຕ ວິເສສມຘິຄມິສ຺ສຕີ’’ຕິ (ມ. ນິ. ໒.໓໔໕) ວຸຕ຺ຕຕ຺ຕາ ຆເຏນ຺ໂຕ ວາຍມນ຺ໂຕ ນຈິຣສ຺ສໍ ລຫຸເຍວ ອຣຫໍ ອສ຺ສ, ອຣຫຕ຺ເຕ ປຕິຏ຺ຐເຫຍ຺ຍາຕິ ທສ຺ເສຕິ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຊມ຺ພຸຂາທກສໍຍຸຕ຺ຕວຓ຺ຓນາ ນິຏ຺ຐິຕາ.