໙. ສຸປຓ຺ຓສໍຍຸຕ຺ຕວຓ຺ຓນາ

໓໙໒-໔໓໗. ສຸປຓ຺ຓສໍຍຸຕ຺ເຕ ປຕ຺ຕານໍ ວຓ຺ຓວນ຺ຕຕາຍ ຄຣຸຬາ ສຸປຓ຺ຓາຕິ ວຸຕ຺ຕາ. ອິຘາປິ ປຐມສຸຕ຺ຕໍ ປຸຣິມນເຍເນວ ອຏ຺ຐຸປ຺ປຕ຺ຕິຍໍ ວຸຕ຺ຕໍ. ຫຣນ຺ຕີຕິ ອຸທ຺ຘຣນ຺ຕິ. ອຸທ຺ຘຣມານາ ຈ ປນ ເຕ ອຕ຺ຕນາ ຫີເນ ວາ ສເມ ວາ ອຸທ຺ຘຣິຕຸໍ ສກ຺ໂກນ຺ຕິ, ນ ອຕ຺ຕນາ ປຓີຕຕເຣ. ສຕ຺ຕວິຘາ ຫິ ອນຸທ຺ຘຣຓີຍນາຄາ ນາມ ປຓີຕຕຣາ ກມ຺ພລສ຺ສຕຣາ ຘຕຣຏ຺ຐາ ສຕ຺ຕສີທນ຺ຕຣວາສິໂນ ປຖວິຏ຺ຐກາ ປພ຺ພຕຏ຺ຐກາ ວິມານຏ຺ຐກາຕິ. ຕຕ຺ຣ ອຓ຺ຑຊາທີນໍ ຊລາພຸຊາທໂຍ ປຓີຕຕຣາ, ເຕ ເຕຫິ ອນຸທ຺ຘຣຓີຍາ. ກມ຺ພລສ຺ສຕຣາ ປນ ນາຄເສນາປຕິໂນ, ເຕ ຍຕ຺ຖ ກຕ຺ຖຈິ ທິສ຺ວາ ໂຍ ໂກຈິ ສຸປຓ຺ໂຓ ອຸທ຺ຘຣິຕຸໍ ນ ສກ຺ໂກຕິ. ຘຕຣຏ຺ຐາ ປນ ນາຄຣາຊາໂນ, ເຕປິ ໂກຈິ ອຸທ຺ຘຣິຕຸໍ ນ ສກ຺ໂກຕິ. ເຍ ປນ ສຕ຺ຕສີທນ຺ຕເຣ ມຫາສມຸທ຺ເທ ວສນ຺ຕິ, ເຕ ຍສ຺ມາ ກຕ຺ຖຈິ ວິກມ຺ປນໍ ກາຕຸໍ ນ ສກ຺ກາ, ຕສ຺ມາ ໂກຈິ ອຸທ຺ຘຣິຕຸໍ ນ ສກ຺ໂກຕິ. ປຖວິຏ຺ຐກາທີນໍ ນິລີຍໂນກາໂສ ອຕ຺ຖິ, ຕສ຺ມາ ເຕປິ ອຸທ຺ຘຣິຕຸໍ ນ ສກ຺ໂກຕິ. ເຍ ປນ ມຫາສມຸທ຺ເທ ອູມິປິຏ຺ເຐ ວສນ຺ຕິ, ເຕ ໂຍ ໂກຈິ ສໂມ ວາ ປຓີຕຕໂຣ ວາ ສຸປຓ຺ໂຓ ອຸທ຺ຘຣິຕຸໍ ສກ຺ໂກຕິ. ເສສໍ ນາຄສໍຍຸຕ຺ເຕ ວຸຕ຺ຕນຍເມວາຕິ.

ສຸປຓ຺ຓສໍຍຸຕ຺ຕວຓ຺ຓນາ ນິຏ຺ຐິຕາ.