໒-໕໐. ປຓີຕຕຣສຸຕ຺ຕາທິວຓ຺ຓນາ

໓໔໓-໓໙໑. ທຸຕິຍາທີສຸ ໂວສ຺ສຏ຺ຐກາຍາຕິ ອຫິຕຸຓ຺ຑິກປຣິພຸທ຺ຘໍ ອຄເຓຕ຺ວາ ວິສ຺ສຏ຺ຐກາຍາ. ທ຺ວຍກາຣິໂນຕິ ທຸວິຘກາຣິໂນ, ກຸສລາກຸສລກາຣິໂນຕິ ອຕ຺ໂຖ. ສຈຊ຺ຊ ມຍນ຺ຕິ ສເຈ ອຊ຺ຊ ມຍໍ. ສຫພ຺ຍຕໍ ອຸປປຊ຺ຊຕີຕິ ສຫຠາວໍ ອາປຊ຺ຊຕິ. ຕຕ຺ຣສ຺ສ ອກຸສລໍ ອຸປປຕ຺ຕິຍາ ປຈ຺ຈໂຍ ໂຫຕິ, ກຸສລໍ ອຸປປນ຺ນານໍ ສມ຺ປຕ຺ຕິຍາ. ອນ຺ນນ຺ຕິ ຂາທນີຍໂຠຊນີຍໍ. ປານນ຺ຕິ ຍໍກິຎ຺ຈິ ປານກໍ. ວຕ຺ຖນ຺ຕິ ນິວາສນປາຣຸປນໍ. ຍານນ຺ຕິ ຉຕ຺ຕຸປາຫນໍ ອາທິໍ ກຕ຺ວາ ຍໍກິຎ຺ຈິ ຄມນປຈ຺ຈຍໍ. ມາລນ຺ຕິ ຍໍກິຎ຺ຈິ ສຸມນມາລາທິປຸປ຺ຜໍ. ຄນ຺ຘນ຺ຕິ ຍໍກິຎ຺ຈິ ຈນ຺ທນາທິຄນ຺ຘໍ. ວິເລປນນ຺ຕິ ຍໍກິຎ຺ຈິ ຉວິຣາຄກຣຓໍ. ເສຍ຺ຍາວສຖປທີເປຍ຺ຍນ຺ຕິ ມຎ຺ຈປີຐາທິເສຍ຺ຍໍ ເອກຠູມິກາທິອາວສຖໍ ວຏ຺ຏິເຕລາທິປທີປູປກຣຓຎ຺ຈ ເທຕີຕິ ອຕ຺ໂຖ. ເຕສຎ຺ຫິ ທີຆາຍຸກຕາຍ ຈ ວຓ຺ຓວນ຺ຕຕາຍ ຈ ສຸຂພຫຸລຕາຍ ຈ ປຕ຺ຖນໍ ກຕ຺ວາ ອິມໍ ທສວິຘໍ ທານວຕ຺ຖຸໍ ທຕ຺ວາ ຕໍ ສມ຺ປຕ຺ຕິໍ ອນຸຠວິຕຸໍ ຕຕ຺ຖ ນິພ຺ພຕ຺ຕນ຺ຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ນາຄສໍຍຸຕ຺ຕວຓ຺ຓນາ ນິຏ຺ຐິຕາ.