໒-໕໕. ສມາຘິມູລກຐິຕິສຸຕ຺ຕາທິວຓ຺ຓນາ

໖໖໓-໗໑໖. ທຸຕິຍາທີສຸ ນ ສມາຘິສ຺ມິໍ ຐິຕິກຸສໂລຕິ ຌານໍ ຐເປຕຸໍ ອກຸສໂລ, ສຕ຺ຕຏ຺ຐອຈ຺ຉຣາມຕ຺ຕໍ ຌານໍ ຐເປຕຸໍ ນ ສກ຺ໂກຕິ. ນ ສມາຘິສ຺ມິໍ ວຸຏ຺ຐານກຸສໂລຕິ ຌານໂຕ ວຸຏ຺ຐາຕຸໍ ອກຸສໂລ, ຍຖາປຣິຈ຺ເຉເທນ ວຸຏ຺ຐາຕຸໍ ນ ສກ຺ໂກຕິ. ນ ສມາຘິສ຺ມິໍ ກລ຺ລິຕກຸສໂລຕິ ຈິຕ຺ຕໍ ຫາເສຕ຺ວາ ກລ຺ລໍ ກາຕຸໍ ອກຸສໂລ. ນ ສມາຘິສ຺ມິໍ ອາຣມ຺ມຓກຸສໂລຕິ ກສິຓາຣມ຺ມເຓສຸ ອກຸສໂລ. ນ ສມາຘິສ຺ມິໍ ໂຄຈຣກຸສໂລຕິ ກມ຺ມຏ຺ຐານໂຄຈເຣ ເຈວ ຠິກ຺ຂາຈາຣໂຄຈເຣ ຈ ອກຸສໂລ. ນ ສມາຘິສ຺ມິໍ ອຠິນີຫາຣກຸສໂລຕິ ກມ຺ມຏ຺ຐານໍ ອຠິນີຫຣິຕຸໍ ອກຸສໂລ. ນ ສມາຘິສ຺ມິໍ ສກ຺ກຈ຺ຈກາຣີຕິ ຌານໍ ອປ຺ເປຕຸໍ ສກ຺ກຈ຺ຈກາຣີ ນ ໂຫຕິ. ນ ສມາຘິສ຺ມິໍ ສາຕຈ຺ຈກາຣີຕິ ຌານປ຺ປນາຍ ສຕຕກາຣີ ນ ໂຫຕິ, ກທາຈິເທວ ກໂຣຕິ. ນ ສມາຘິສ຺ມິໍ ສປ຺ປາຍກາຣີຕິ ສມາຘິສ຺ສ ສປ຺ປາເຍ ອຸປກາຣກຘມ຺ເມ ປູເຣຕຸໍ ນ ສກ຺ໂກຕິ. ຕໂຕ ປຣໍ ສມາປຕ຺ຕິອາທີຫິ ປເທຫິ ໂຍເຊຕ຺ວາ ຈຕຸກ຺ກາ ວຸຕ຺ຕາ. ເຕສໍ ອຕ຺ໂຖ ວຸຕ຺ຕນເຍເນວ ເວທິຕພ຺ໂພ. ສກລໍ ປເນຕ຺ຖ ຌານສໍຍຸຕ຺ຕໍ ໂລກິຍຊ຺ຌານວເສເນວ ກຖິຕນ຺ຕິ.

ຌານສໍຍຸຕ຺ຕວຓ຺ຓນາ ນິຏ຺ຐິຕາ.

ອິຕິ ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ຂນ຺ຘວຄ຺ຄວຓ຺ຓນາ ນິຏ຺ຐິຕາ.

ສໍຍຸຕ຺ຕນິກາຍ-ອຏ຺ຐກຖາຍ ທຸຕິໂຍ ຠາໂຄ.