໑໒. ຘມ຺ມກຖິກວຄ຺ໂຄ

໑-໒. ອວິຊ຺ຊາສຸຕ຺ຕາທິວຓ຺ຓນາ

໑໑໓-໑໑໔. ຘມ຺ມກຖິກວຄ຺ຄສ຺ສ ປຐເມ ເອຕ຺ຕາວຕາ ຈ ອວິຊ຺ຊາຄໂຕ ໂຫຕີຕິ ຍາວຕາ ອິມາຍ ຈຕູສຸ ສຈ຺ເຈສຸ ອຎ຺ຎາຓຠູຕາຍ ອວິຊ຺ຊາຍ ສມນ຺ນາຄໂຕ, ເອຕ຺ຕາວຕາ ອວິຊ຺ຊາຄໂຕ ໂຫຕີຕິ ອຕ຺ໂຖ. ທຸຕິເຍປິ ເອເສວ ນໂຍ. ປຐມທຸຕິຍານິ.

໓. ຘມ຺ມກຖິກສຸຕ຺ຕວຓ຺ຓນາ

໑໑໕. ຕຕິເຍ ປຐເມນ ຘມ຺ມກຖິໂກ, ທຸຕິເຍນ ເສຂຠູມິ, ຕຕິເຍນ ອເສຂຠູມີຕິ ເອວໍ ຘມ຺ມກຖິກໍ ປຸຈ຺ຉິເຕນ ວິເສເສຕ຺ວາ ທ຺ເວ ຠູມິໂຍ ກຖິຕາ. ຕຕິຍໍ.

໔. ທຸຕິຍຘມ຺ມກຖິກສຸຕ຺ຕວຓ຺ຓນາ

໑໑໖. ຈຕຸຕ຺ເຖ ຕິສ຺ສນ຺ນມ຺ປິ ປຸຈ຺ຉານໍ ຕີຓິ ວິສ຺ສຊ຺ຊນານິ ກຖິຕານິ. ຈຕຸຕ຺ຖໍ.

໕-໙. ພນ຺ຘນສຸຕ຺ຕາທິວຓ຺ຓນາ

໑໑໗-໑໒໑. ປຎ຺ຈເມ ອຕີຣທສ຺ສີຕິ ຕີຣໍ ວຸຈ຺ຈຕິ ວຏ຺ຏໍ, ຕໍ ນ ປສ຺ສຕິ. ອປາຣທສ຺ສີຕິ ປາຣໍ ວຸຈ຺ຈຕິ ນິພ຺ພານໍ, ຕໍ ນ ປສ຺ສຕິ. ພທ຺ໂຘຕິ ກິເລສພນ຺ຘເນນ ພທ຺ໂຘ ຫຸຕ຺ວາ ຊີຍຕິ ຈ ມີຍຕິ ຈ ອສ຺ມາ ໂລກາ ປຣໍ ໂລກໍ ຄຈ຺ຉຕີຕິ. ອິມສ຺ມິໍ ສຸຕ຺ເຕ ວຏ຺ຏທຸກ຺ຂໍ ກຖິຕນ຺ຕິ. ຉຏ຺ຐາທີນິ ອຸຕ຺ຕານຕ຺ຖາເນວ. ປຎ຺ຈມາທີນິ.

໑໐. ສີລວນ຺ຕສຸຕ຺ຕວຓ຺ຓນາ

໑໒໒. ທສເມ ອນິຈ຺ຈໂຕຕິອາທີສຸ ຫຸຕ຺ວາ ອຠາວາກາເຣນ ອນິຈ຺ຈໂຕ, ປຏິປີຬນາກາເຣນ ທຸກ຺ຂໂຕ, ອາພາຘຏ຺ເຐນ ໂຣຄໂຕ, ອນ຺ໂຕໂທສຏ຺ເຐນ ຄຓ຺ຑໂຕ, ເຕສໍ ເຕສໍ ຄຓ຺ຑານໍ ປຈ຺ຈຍຠາເວນ ວາ ຂຓນຏ຺ເຐນ ວາ ສລ຺ລໂຕ ທຸກ຺ຂຏ຺ເຐນ ອຆໂຕ, ວິສຠາຄມຫາຠູຕສມຸຏ຺ຐານອາພາຘປຈ຺ຈຍຏ຺ເຐນ ອາພາຘໂຕ, ອສກຏ຺ເຐນ ປຣໂຕ, ປລຸຊ຺ຊນຏ຺ເຐນ ປໂລກໂຕ, ສຕ຺ຕສຸຎ຺ຎຕຏ຺ເຐນ ສຸຎ຺ຎໂຕ, ອຕ຺ຕາຠາເວນ ອນຕ຺ຕໂຕ. ເອວເມຕ຺ຖ ‘‘ອນິຈ຺ຈໂຕ ປໂລກໂຕ’’ຕິ ທ຺ວີຫິ ປເທຫິ ອນິຈ຺ຈມນສິກາໂຣ, ‘‘ສຸຎ຺ຎໂຕ ອນຕ຺ຕໂຕ’’ຕິ ທ຺ວີຫິ ອນຕ຺ຕມນສິກາໂຣ, ເສເສຫິ ທຸກ຺ຂມນສິກາໂຣ ວຸຕ຺ໂຕຕິ ເວທິຕພ຺ໂພ. ເສສເມຕ຺ຖ ອຸຕ຺ຕານເມວ. ທສມໍ.

໑໑. ສຸຕວນ຺ຕສຸຕ຺ຕວຓ຺ຓນາ

໑໒໓. ຕຖາ ເອກາທສເມ. ທສມສ຺ມິຎ຺ຫິ ‘‘ສີລວຕາ’’ຕິ ຈຕຸປາຣິສຸທ຺ຘິສີລໍ ວຸຕ຺ຕໍ, ອິຘ ສຸຕວຕາຕິ ກມ຺ມຏ຺ຐານສຸຕໍ ອິທເມວ ນານາກຣຓໍ. ເອກາທສມໍ.

໑໒-໑໓. ກປ຺ປສຸຕ຺ຕາທິວຓ຺ຓນາ

໑໒໔-໑໒໕. ທ຺ວາທສມເຕຣສມານິ ຣາຫຸໂລວາທສທິສາເນວາຕິ. ທ຺ວາທສມເຕຣສມານິ.

ຘມ຺ມກຖິກວຄ຺ໂຄ ທ຺ວາທສໂມ.