໑. ນທີສຸຕ຺ຕວຓ຺ຓນາ

໙໓. ປຸປ຺ຜວຄ຺ຄສ຺ສ ປຐເມ ປພ຺ພເຕຍ຺ຍາຕິ ປພ຺ພເຕ ປວຕ຺ຕາ. ໂອຫາຣິນີຕິ ໂສເຕ ປຕິຕປຕິຕານິ ຕິຓປຓ຺ຓກຏ຺ຐາທີນິ ເຫຏ຺ຐາຫາຣິນີ. ທູຣງ຺ຄມາຕິ ນິກ຺ຂນ຺ຕຏ຺ຐານໂຕ ປຏ຺ຐາຍ ຈຕຸປຎ຺ຈໂຍຊນສຕຄາມິນີ. ສີຆໂສຕາຕິ ຈຓ຺ຑໂສຕາ. ກາສາຕິອາທີນິ ສພ຺ພານິ ຕິຓຊາຕານິ. ຣຸກ຺ຂາຕິ ເອຣຓ຺ຑາທໂຍ ທຸພ຺ພລຣຸກ຺ຂາ. ເຕ ນໍ ອຊ຺ໂຌລມ຺ເພຍ຺ຍຸນ຺ຕິ ເຕ ຕີເຣ ຊາຕາປິ ໂອນມິຕ຺ວາ ອຄ຺ເຄຫິ ອຸທກໍ ຜຸສນ຺ເຕຫິ ອຘິໂອລມ຺ເພຍ຺ຍຸໍ, ອຸປຣິ ລມ຺ເພຍ຺ຍຸນ຺ຕິ ອຕ຺ໂຖ. ປລຸຊ຺ເຊຍ຺ຍຸນ຺ຕິ ສມູລມຕ຺ຕິກາຍ ສທ຺ຘິໍ ສີເສ ປເຕຍ຺ຍຸໍ. ໂສ ເຕຫິ ອຊ຺ໂຌຕ຺ຖໂຏ ວາລຸກມຕ຺ຕິໂກທເກຫິ ມຸຂໍ ປວິສນ຺ເຕຫິ ມຫາວິນາສໍ ປາປຸເຓຍ຺ຍ.

ເອວເມວ ໂຂຕິ ເອຕ຺ຖ ໂສເຕ ປຕິຕປຸຣິໂສ ວິຍ ວຏ຺ຏສນ຺ນິສ຺ສິໂຕ ພາລປຸຖຸຊ຺ຊໂນ ທຏ຺ຐພ຺ໂພ, ອຸຠໂຕຕີເຣ ກາສາທໂຍ ວິຍ ທຸພ຺ພລປຎ຺ຈກ຺ຂນ຺ຘາ, ‘‘ອິເມ ຄຫິຕາປິ ມໍ ຕາເຣຕຸໍ ນ ສກ຺ຂິສ຺ສນ຺ຕີ’’ຕິ ຕສ຺ສ ປຸຣິສສ຺ສ ອຊານິຕ຺ວາ ຄຫຓໍ ວິຍ ອິເມ ຂນ຺ຘາ ‘‘ນ ມຍ຺ຫໍ ສຫາຍາ’’ຕິ ພາລປຸຖຸຊ຺ຊນສ຺ສ ອຊານິຕ຺ວາ ຈຕູຫິ ຄາເຫຫິ ຄຫຓໍ, ຄຫິຕຄຫິຕານໍ ປລຸຊ຺ຊນຕ຺ຕາ ປຸຣິສສ຺ສ ພ຺ຍສນປ຺ປຕ຺ຕິ ວິຍ ຈຕູຫິ ຄາເຫຫິ ຄຫິຕານໍ ຂນ຺ຘານໍ ວິປຣິຓາເມ ພາລປຸຖຸຊ຺ຊນສ຺ສ ໂສກາທິພ຺ຍສນປ຺ປຕ຺ຕິ ເວທິຕພ຺ພາ. ປຐມໍ.