໒. ທຸຕິຍວຄ຺ໂຄ

໑. ສສີສກສຸຕ຺ຕວຓ຺ຓນາ

໒໑໒. ປາຣທາຣິກວຕ຺ຖຸສ຺ມິໍ ໂສ ສຕ຺ໂຕ ປຣສ຺ສ ຣກ຺ຂິຕໂຄປິຕໍ ສສ຺ສາມິກໍ ຜສ຺ສໍ ຜຸສນ຺ໂຕ ມີຬ຺ຫສຸເຂນ ກາມສຸເຂນ ຈິຕ຺ຕໍ ຣມຍິຕ຺ວາ ກມ຺ມສຠາຄຕາຍ ຄູຖຜສ຺ສໍ ຜຸສນ຺ໂຕ ທຸກ຺ຂມນຸຠວິຕຸໍ ຕຕ຺ຖ ນິພ຺ພຕ຺ໂຕ. ປຐມໍ.

໒. ຄູຖຂາທສຸຕ຺ຕວຓ຺ຓນາ

໒໑໓. ທຸຏ຺ຐພ຺ຣາຫ຺ມຓວຕ຺ຖຸ ປາກຏເມວ. ທຸຕິຍໍ.

໓. ນິຈ຺ຉວິຕ຺ຖິສຸຕ຺ຕວຓ຺ຓນາ

໒໑໔. ນິຈ຺ຉວິຕ຺ຖິວຕ຺ຖຸສ຺ມິໍ ຍສ຺ມາ ມາຕຸຄາໂມ ນາມ ອຕ຺ຕໂນ ຜສ຺ເສ ອນິສ຺ສໂຣ, ສາ ຈ ຕໍ ສາມິກສ຺ສ ສນ຺ຕກໍ ຜສ຺ສໍ ເຖເນຕ຺ວາ ປເຣສໍ ອຠິຣຕິໍ ອຸປ຺ປາເທສິ, ຕສ຺ມາ ກມ຺ມສຠາຄຕາຍ ສຸຂສມ຺ຜສ຺ສາ ວຏ຺ຏິຕ຺ວາ ທຸກ຺ຂສມ຺ຜສ຺ສໍ ອນຸຠວິຕຸໍ ນິຈ຺ຉວິຕ຺ຖີ ຫຸຕ຺ວາ ອຸປ຺ປນ຺ນາ. ຕຕິຍໍ.

໔. ມງ຺ຄຸລິຕ຺ຖິສຸຕ຺ຕວຓ຺ຓນາ

໒໑໕. ມງ຺ຄຸລິຕ຺ຖິວຕ຺ຖຸສ຺ມິໍ ມງ຺ຄຸລິນ຺ຕິ ວິຣູປໍ ທຸທ຺ທສິກໍ ພີຠຈ຺ຉໍ. ສາ ກິຣ ຍກ຺ຂທາສິກມ຺ມໍ ກໂຣນ຺ຕີ ‘‘ອິມິນາ ຈ ອິມິນາ ຈ ເອວໍ ພລິກມ຺ເມ ກເຕ ອຍໍ ນາມ ຕຸມ຺ຫາກໍ ວຑ຺ຒິ ຠວິສ຺ສຕີ’’ຕິ ມຫາຊນສ຺ສ ຄນ຺ຘປຸປ຺ຜາທີນິ ວຎ຺ຈນາຍ ຄເຫຕ຺ວາ ມຫາຊນໍ ທຸທ຺ທິຏ຺ຐິໍ ມິຈ຺ຉາທິຏ຺ຐິໍ ຄຓ຺ຫາເປສິ, ຕສ຺ມາ ຕາຍ ກມ຺ມສຠາຄຕາຍ ຄນ຺ຘປຸປ຺ຜາທີນໍ ເຖນິຕຕ຺ຕາ ທຸຄ຺ຄນ຺ຘາ, ທຸທ຺ທສ຺ສນສ຺ສ ຄາຫິຕຕ຺ຕາ ທຸທ຺ທສິກາ ວິຣູປາ ພີຠຈ຺ຉາ ຫຸຕ຺ວາ ນິພ຺ພຕ຺ຕາ. ຈຕຸຕ຺ຖໍ.

໕. ໂອກິລິນີສຸຕ຺ຕວຓ຺ຓນາ

໒໑໖. ໂອກິລິນີວຕ຺ຖຸສ຺ມິໍ ອຸປ຺ປກ຺ກໍ ໂອກິລິນິໍ ໂອກິຣິນິນ຺ຕິ ສາ ກິຣ ອງ຺ຄາຣຈິຕເກ ນິປນ຺ນາ ວິປ຺ຜນ຺ທມານາ ວິປຣິວຕ຺ຕມານາ ປຈ຺ຈຕິ, ຕສ຺ມາ ອຸປ຺ປກ຺ກາ ເຈວ ໂຫຕິ ອຸຓ຺ເຫນ ອຄ຺ຄິນາ ປກ຺ກສຣີຣາ, ໂອກິລິນີ ຈ ກິລິນ຺ນສຣີຣາ, ພິນ຺ທູນິສ຺ສາ ສຣີຣໂຕ ປຄ຺ຆຣນ຺ຕິ, ໂອກິຣິນີ ຈ ອງ຺ຄາຣສມ຺ປຣິກິຓ຺ຓາ. ຕສ຺ສາ ຫິ ເຫຏ຺ຐໂຕປິ ກິໍສຸກປຸປ຺ຜວຓ຺ຓາ ອງ຺ຄາຣາ, ອຸຠຍປສ຺ເສສຸປິ, ອາກາສໂຕປິສ຺ສາ ອຸປຣິ ປຕນ຺ຕິ. ເຕນ ວຸຕ຺ຕໍ – ‘‘ອຸປ຺ປກ຺ກໍ ໂອກິລິນິໍ ໂອກິຣິນິ’’ນ຺ຕິ. ສາ ອິສ຺ສາປກຕາ ສປຕ຺ຕິໍ ອງ຺ຄາຣກຏາເຫນ ໂອກິຣີຕິ ຕສ຺ສ ກິຣ ຣຎ຺ໂຎ ເອກາ ນາຏກິນີ ອງ຺ຄາຣກຏາຫໍ ສມີເປ ຐເປຕ຺ວາ ຄຕ຺ຕໂຕ ອຸທກໍ ປຸຎ຺ຉຕິ, ປາຓິນາ ຈ ເສທໍ ກໂຣຕິ. ຣາຊາປິ ຕາຍ ສທ຺ຘິໍ ກຖຎ຺ຈ ກໂຣຕິ, ປຣິຕຸຏ຺ຐາກາຣຎ຺ຈ ທສ຺ເສຕິ. ອຄ຺ຄມເຫສີ ຕໍ ອສຫມານາ ອິສ຺ສາປກຕາ ຫຸຕ຺ວາ ອຈິຣປກ຺ກນ຺ຕສ຺ສ ຣຎ຺ໂຎ ຕໍ ອງ຺ຄາຣກຏາຫໍ ຄເຫຕ຺ວາ ຕສ຺ສາ ອຸປຣິ ອງ຺ຄາເຣ ໂອກິຣິ. ສາ ຕໍ ກມ຺ມໍ ກຕ຺ວາ ຕາທິສໍເຍວ ວິປາກໍ ປຈ຺ຈນຸຠວິຕຸໍ ເປຕໂລເກ ນິພ຺ພຕ຺ຕາ. ປຎ຺ຈມໍ.

໖. ອສີສກສຸຕ຺ຕວຓ຺ຓນາ

໒໑໗. ໂຈຣຆາຕວຕ຺ຖຸສ຺ມິໍ ໂສ ຣຎ຺ໂຎ ອາຓາຍ ທີຆຣຕ຺ຕໍ ໂຈຣານໍ ສີສານິ ຉິນ຺ທິຕ຺ວາ ເປຕໂລເກ ນິພ຺ພຕ຺ຕນ຺ໂຕ ອສີສກໍ ກພນ຺ຘໍ ຫຸຕ຺ວາ ນິພ຺ພຕ຺ຕິ. ຉຏ຺ຐໍ.

໗-໑໑. ປາປຠິກ຺ຂຸສຸຕ຺ຕາທິວຓ຺ຓນາ

໒໑໘-໒໒໒. ຠິກ຺ຂຸວຕ຺ຖຸສ຺ມິໍ ປາປຠິກ຺ຂູຕິ ລາມກຠິກ຺ຂຸ. ໂສ ກິຣ ໂລກສ຺ສ ສທ຺ຘາເທຍ຺ເຍ ຈຕ຺ຕາໂຣ ປຈ຺ຈເຍ ປຣິຠຸຎ຺ຊິຕ຺ວາ ກາຍວຈີທ຺ວາເຣຫິ ອສໍຍໂຕ ຠິນ຺ນາຊີໂວ ຈິຕ຺ຕເກຬິໍ ກີຬນ຺ໂຕ ວິຈຣິ. ຕໂຕ ເອກໍ ພຸທ຺ຘນ຺ຕຣໍ ນິຣເຍ ປຈ຺ຈິຕ຺ວາ ເປຕໂລເກ ນິພ຺ພຕ຺ຕນ຺ໂຕ ຠິກ຺ຂຸສທິເສເນວ ອຕ຺ຕຠາເວນ ນິພ຺ພຕ຺ຕິ. ຠິກ຺ຂຸນີສິກ຺ຂມານາສາມເຓຣສາມເຓຣີວຕ຺ຖູສຸປິ ອຍເມວ ວິນິຈ຺ຉໂຍ. ສຕ຺ຕມາທີນິ.

ລກ຺ຂຓສໍຍຸຕ຺ຕວຓ຺ຓນາ ນິຏ຺ຐິຕາ.