໑. ປຐມວຄ຺ໂຄ

໑. ທາຣຸຓສຸຕ຺ຕວຓ຺ຓນາ

໑໕໗. ລາຠສກ຺ກາຣສໍຍຸຕ຺ຕສ຺ສ ປຐເມ ທາຣຸໂຓຕິ ຖທ຺ໂຘ. ລາຠສກ຺ກາຣສິໂລໂກຕິ ເອຕ຺ຖ ລາໂຠ ນາມ ຈຕຸປຈ຺ຈຍລາໂຠ. ສກ຺ກາໂຣຕິ ເຕສໍເຍວ ສຸກຕານໍ ສຸສງ຺ຂຕານໍ ລາໂຠ. ສິໂລໂກຕິ ວຓ຺ຓໂຆໂສ. ກຏຸໂກຕິ ຕິຂິໂຓ. ຜຣຸໂສຕິ ຂໂຣ. ອນ຺ຕຣາຍິໂກຕິ ອນ຺ຕຣາຍກໂຣ. ປຐມໍ.

໒. ພຬິສສຸຕ຺ຕວຓ຺ຓນາ

໑໕໘. ທຸຕິເຍ ພາຬິສິໂກຕິ ພຬິສໍ ຄເຫຕ຺ວາ ຈຣມາໂນ ມຈ຺ຉຆາຕໂກ. ອາມິສຄຕນ຺ຕິ ອາມິສມກ຺ຂິຕໍ. ອາມິສຈກ຺ຂູຕິ ອາມິເສ ຈກ຺ຂຸ ທສ຺ສນໍ ອສ຺ສາຕິ ອາມິສຈກ຺ຂຸ. ຄິລພຬິໂສຕິ ຄິລິຕພຬິໂສ. ອນຍໍ ອາປນ຺ໂນຕິ ທຸກ຺ຂໍ ປຕ຺ໂຕ. ພ຺ຍສນໍ ອາປນ຺ໂນຕິ ວິນາສໍ ປຕ຺ໂຕ. ຍຖາກາມກຣຓີໂຍຕິ ຍຖາກາເມນ ຍຖາຣຸຈິຍາ ຍເຖວ ນໍ ພາຬິສິໂກ ອິຈ຺ຉຕິ, ຕເຖວສ຺ສ ກຕ຺ຕພ຺ໂພຕິ ອຕ຺ໂຖ. ຍຖາກາມກຣຓີໂຍ ປາປິມໂຕຕິ ຍຖາ ກິເລສມາຣສ຺ສ ກາໂມ, ເອວໍ ກຕ຺ຕພ຺ໂພ, ນິຣຍໍ ວາ ຕິຣຈ຺ຉານໂຍນິໍ ວາ ເປຕ຺ຕິວິສຍໍ ວາ ປາເປຕພ຺ໂພ. ທຸຕິຍໍ.

໓-໔. ກຸມ຺ມສຸຕ຺ຕາທິວຓ຺ຓນາ

໑໕໙-໑໖໐. ຕຕິເຍ ມຫາກຸມ຺ມກຸລນ຺ຕິ ມຫນ຺ຕໍ ອຏ຺ຐິກຈ຺ຉປກຸລໍ. ອຄມາສີຕິ ‘‘ເອຕ຺ຖ ອທ຺ຘາ ກິຎ຺ຈິ ຂາທິຕພ຺ພໍ ອຕ຺ຖິ, ຕໍ ມຈ຺ຉຣາຍນ຺ໂຕ ມໍ ເອສ ນິວາເຣຕີ’’ຕິ ສຎ຺ຎາຍ ອຄມາສິ. ປປຕາຍາຕິ ປປຕາ ວຸຈ຺ຈຕິ ທີຆຣຊ຺ຊຸກພທ຺ໂຘ ອຍກນ຺ຕໂກສເກ ທຓ຺ຑກໍ ປເວເສຕ຺ວາ ຄຫິໂຕ ກຓ຺ຓິກສລ຺ລສຓ຺ຐາໂນ, ອຍກຓ຺ຏໂກ, ຍສ຺ມິໍ ເວເຄນ ປຕິຕ຺ວາ ກຏາເຫ ລຄ຺ຄມຕ຺ເຕ ທຓ຺ຑໂກ ນິກ຺ຂມຕິ, ຣຊ຺ຊຸໂກ ເອກາພທ຺ໂຘ ຄຈ຺ຉເຕວ. ໂສ ກຸມ຺ໂມຕິ ໂສ ວິທ຺ຘກຸມ຺ໂມ. ເຍນ ໂສ ກຸມ຺ໂມຕິ ອຸທກສທ຺ທໍ ສຸຕ຺ວາ ສາສງ຺ກຏ຺ຐານໍ ຠວິສ຺ສຕີຕິ ນິວຕ຺ຕິຕ຺ວາ ເຍນ ໂສ ອຕ຺ຖກາໂມ ກຸມ຺ໂມ. ນ ທານິ ຕ຺ວໍ ອມ຺ຫາກນ຺ຕິ ອິທານິ ຕ຺ວໍ ອມິຕ຺ຕຫຕ຺ຖໍ ຄໂຕ, ນ ອມ຺ຫາກໍ ສນ຺ຕໂກຕິ ອຕ຺ໂຖ. ເອວໍ ສລ຺ລປນ຺ຕານໍເຍວ ຈ ເນສໍ ນາວາຍ ຐິໂຕ ລຸທ຺ໂທ ຣຊ຺ຊຸກໍ ອາກຑ຺ຒິຕ຺ວາ ກຸມ຺ມໍ ຄເຫຕ຺ວາ ຍຖາກາມໍ ອກາສິ. ເສສເມຕ຺ຖ ອິໂຕ ອນນ຺ຕຣສຸຕ຺ເຕ ຈ ອຸຕ຺ຕານເມວ. ຕຕິຍຈຕຸຕ຺ຖານິ.

໕. ມີຬ຺ຫກສຸຕ຺ຕວຓ຺ຓນາ

໑໖໑. ປຎ຺ຈເມ ມີຬ຺ຫກາຕິ ຄູຖປາຓກາ. ຄູຖາທີຕິ ຄູຖຠກ຺ຂາ. ຄູຖປູຣາຕິ ອນ຺ໂຕ ຄູເຖນ ຠຣິຕາ. ປຸຓ຺ຓາ ຄູຖສ຺ສາຕິ ອິທໍ ປຸຣິມສ຺ເສວ ອຕ຺ຖທີປນໍ. ອຕິມຎ຺ເຎຍ຺ຍາຕິ ປຈ຺ຉິມປາເທ ຠູມິຍໍ ຐເປຕ຺ວາ ປຸຣິມປາເທ ຄູຖສ຺ສ ອຸປຣິ ອາໂຣເປຕ຺ວາ ຐິຕາ ‘‘ອຫມ຺ຫິ ຄູຖາທີ’’ຕິ ຠຓນ຺ຕີ ອຕິມຎ຺ເຎຍ຺ຍ. ປິຓ຺ຑປາໂຕ ຈສ຺ສ ປູໂຣຕິ ອປໂຣປິສ຺ສ ປຕ຺ຕປູໂຣ ປຓີຕປິຓ຺ຑປາໂຕ ຠເວຍ຺ຍ. ປຎ຺ຈມໍ.

໖. ອສນິສຸຕ຺ຕວຓ຺ຓນາ

໑໖໒. ຉຏ຺ເຐ ກໍ, ຠິກ຺ຂເວ, ອສນິວິຈກ຺ກນ຺ຕິ, ຠິກ຺ຂເວ, ກໍ ປຸຄ຺ຄລໍ ມຕ຺ຖເກ ປຕິຕ຺ວາ ມທ຺ທມານໍ ສຸກ຺ກາສນິຈກ຺ກໍ ອາຄຈ຺ຉຕຸ. ອປ຺ປຕ຺ຕມານສນ຺ຕິ ອນຘິຄຕາຣຫຕ຺ຕໍ. ອິຕິ ຠຄວາ ນ ສຕ຺ຕານໍ ທຸກ຺ຂກາມຕາຍ, ອາທີນວໍ ປນ ທສ຺ເສຕຸໍ ເອວມາຫ. ອສນິຈກ຺ກຎ຺ຫິ ມຕ຺ຖເກ ປຕິຕໍ ເອກເມວ ອຕ຺ຕຠາວໍ ນາເສຕິ, ລາຠສກ຺ກາຣສິໂລເກນ ປຣິຍາທິຓ຺ຓຈິຕ຺ໂຕ ນິຣຍາທີສຸ ອນນ຺ຕທຸກ຺ຂໍ ອນຸໂຠຕິ. ຉຏ຺ຐໍ.

໗. ທິທ຺ຘສຸຕ຺ຕວຓ຺ຓນາ

໑໖໓. ສຕ຺ຕເມ ທິທ຺ຘຄເຕນາຕິ ຄຕທິທ຺ເຘນ. ວິສລ຺ເລນາຕິ ວິສມກ຺ຂິເຕນ. ສລ຺ເລນາຕິ ສຕ຺ຕິຍາ. ສຕ຺ຕມໍ.

໘. ສິງ຺ຄາລສຸຕ຺ຕວຓ຺ຓນາ

໑໖໔. ອຏ຺ຐເມ ສິງ຺ຄາໂລຕິ ຊຣສິງ຺ຄາໂລ. ຍຖາ ຫິ ສຸວຓ຺ຓວຓ຺ໂຓປິ ກາໂຍ ປູຕິກາໂຍ ຕ຺ເວວ, ຕໍຂຓໍ ຄຬິຕມ຺ປິ ຈ ມຸຕ຺ຕໍ ປູຕິມຸຕ຺ຕນ຺ຕ຺ເວວ ວຸຈ຺ຈຕິ, ເອວໍ ຕທຫຸຊາໂຕປິ ສິງ຺ຄາໂລ ຊຣສິງ຺ຄາໂລຕ຺ເວວ ວຸຈ຺ຈຕິ. ອຸກ຺ກຓ຺ຏເກນ ນາມາຕິ ເອວໍນາມເກນ ໂຣເຄນ. ໂສ ກິຣ ສີຕກາເລ ອຸປ຺ປຊ຺ຊຕິ. ຕສ຺ມິໍ ອຸປ຺ປນ຺ເນ ສກລສຣີຣໂຕ ໂລມານິ ປຕນ຺ຕິ, ສກລສຣີຣໍ ນິລ຺ໂລມໍ ຫຸຕ຺ວາ, ສມນ຺ຕໂຕ ຜຸຏຕິ, ວາຕພ຺ຠາຫຕາ ວຓາ ຣຸຊ຺ຊນ຺ຕິ. ຍຖາ ອຸມ຺ມຕ຺ຕກສຸນເຂນ ທຏ຺ໂຐ ປຸຣິໂສ ອນວຏ຺ຐິໂຕວ ຠມຕິ, ເອວໍ ຕສ຺ມິໍ ອຸປ຺ປນ຺ເນ ຠມິຕພ຺ໂພ ໂຫຕິ, ອສຸກຏ຺ຐາເນ ໂສຕ຺ຖິ ຠວິສ຺ສຕີຕິ ນ ປຎ຺ຎາຍຕິ. ອຏ຺ຐມໍ.

໙. ເວຣມ຺ຠສຸຕ຺ຕວຓ຺ຓນາ

໑໖໕. ນວເມ ເວຣມ຺ຠວາຕາຕິ ເອວໍນາມກາ ມຫາວາຕາ. ກີທິເສ ປນ ຐາເນ ເຕ ວາຕາ ວາຍນ຺ຕີຕິ? ຍຕ຺ຖ ຐິຕສ຺ສ ຈຕ຺ຕາໂຣ ທີປາ ອຸປ຺ປລິນິປຕ຺ຕມຕ຺ຕາ ຫຸຕ຺ວາ ປຎ຺ຎາຍນ຺ຕິ. ໂຍ ປກ຺ຂີ ຄຈ຺ຉຕີຕິ ນວວຸຏ຺ເຐ ເທເວ ວິຣວນ຺ໂຕ ວາຕສກຸໂຓ ຕຕ຺ຖ ຄຈ຺ຉຕິ, ຕໍ ສນ຺ຘາເຍຕໍ ວຸຕ຺ຕໍ. ອຣກ຺ຂິເຕເນວ ກາເຍນາຕິອາທີສຸ ຫຕ຺ຖປາເທ ກີຬາເປນ຺ໂຕ ຂນ຺ຘຏ຺ຐິໍ ວາ ນາເມນ຺ໂຕ ກາຍໍ ນ ຣກ຺ຂຕິ ນາມ, ນານາວິຘໍ ທຸຏ຺ຐຸລ຺ລກຖໍ ກເຖນ຺ໂຕ ວາຈໍ ນ ຣກ຺ຂຕິ ນາມ, ກາມວິຕກ຺ກາທໂຍ ວິຕກ຺ເກນ຺ໂຕ ຈິຕ຺ຕໍ ນ ຣກ຺ຂຕິ ນາມ. ອນຸປຏ຺ຐິຕາຍ ສຕິຍາຕິ ກາຍຄຕາສຕິໍ ອນຸປຏ຺ຐເປຕ຺ວາ. ນວມໍ.

໑໐. ສຄາຖກສຸຕ຺ຕວຓ຺ຓນາ

໑໖໖. ທສເມ ອສກ຺ກາເຣນ ຈູຠຍນ຺ຕິ ອສກ຺ກາເຣນ ຈ ອຸຠເຍນ. ສມາຘີຕິ ອຣຫຕ຺ຕຜລສມາຘິ. ໂສ ຫິ ເຕນ ນ ວິກມ຺ປຕິ. ອປ຺ປມາຓວິຫາຣິໂນຕິ ອປ຺ປມາເຓນ ຜລສມາຘິນາ ວິຫຣນ຺ຕສ຺ສ. ສາຕຕິກນ຺ຕິ ສຕຕກາຣິໍ. ສຸຂຸມໍທິຏ຺ຐິວິປສ຺ສກນ຺ຕິ ອຣຫຕ຺ຕມຄ຺ຄທິຏ຺ຐິຍາ ສຸຂຸມທິຏ຺ຐິຜລສມາປຕ຺ຕິອຕ຺ຖາຍ ວິປສ຺ສນໍ ປຏ຺ຐເປຕ຺ວາ ອາຄຕຕ຺ຕາ ວິປສ຺ສກໍ. ອຸປາທານກ຺ຂຍາຣາມນ຺ຕິ ອຸປາທານກ຺ຂຍສງ຺ຂາເຕ ນິພ຺ພາເນ ຣຕໍ. ອາຫຸ ສປ຺ປຸຣິໂສ ອິຕີຕິ ສປ຺ປຸຣິໂສຕິ ກເຖນ຺ຕີຕິ. ທສມໍ.

ປຐໂມ ວຄ຺ໂຄ.