໖. ລາຠສກ຺ກາຣສໍຍຸຕ຺ຕໍ

໑. ປຐມວຄ຺ໂຄ

໑. ທາຣຸຓສຸຕ຺ຕວຓ຺ຓນາ

໑໕໗. ລາຠສກ຺ກາຣສໍຍຸຕ຺ຕສ຺ສ ປຐເມ ທາຣຸໂຓຕິ ຖທ຺ໂຘ. ລາຠສກ຺ກາຣສິໂລໂກຕິ ເອຕ຺ຖ ລາໂຠ ນາມ ຈຕຸປຈ຺ຈຍລາໂຠ. ສກ຺ກາໂຣຕິ ເຕສໍເຍວ ສຸກຕານໍ ສຸສງ຺ຂຕານໍ ລາໂຠ. ສິໂລໂກຕິ ວຓ຺ຓໂຆໂສ. ກຏຸໂກຕິ ຕິຂິໂຓ. ຜຣຸໂສຕິ ຂໂຣ. ອນ຺ຕຣາຍິໂກຕິ ອນ຺ຕຣາຍກໂຣ. ປຐມໍ.

໒. ພຬິສສຸຕ຺ຕວຓ຺ຓນາ

໑໕໘. ທຸຕິເຍ ພາຬິສິໂກຕິ ພຬິສໍ ຄເຫຕ຺ວາ ຈຣມາໂນ ມຈ຺ຉຆາຕໂກ. ອາມິສຄຕນ຺ຕິ ອາມິສມກ຺ຂິຕໍ. ອາມິສຈກ຺ຂູຕິ ອາມິເສ ຈກ຺ຂຸ ທສ຺ສນໍ ອສ຺ສາຕິ ອາມິສຈກ຺ຂຸ. ຄິລພຬິໂສຕິ ຄິລິຕພຬິໂສ. ອນຍໍ ອາປນ຺ໂນຕິ ທຸກ຺ຂໍ ປຕ຺ໂຕ. ພ຺ຍສນໍ ອາປນ຺ໂນຕິ ວິນາສໍ ປຕ຺ໂຕ. ຍຖາກາມກຣຓີໂຍຕິ ຍຖາກາເມນ ຍຖາຣຸຈິຍາ ຍເຖວ ນໍ ພາຬິສິໂກ ອິຈ຺ຉຕິ, ຕເຖວສ຺ສ ກຕ຺ຕພ຺ໂພຕິ ອຕ຺ໂຖ. ຍຖາກາມກຣຓີໂຍ ປາປິມໂຕຕິ ຍຖາ ກິເລສມາຣສ຺ສ ກາໂມ, ເອວໍ ກຕ຺ຕພ຺ໂພ, ນິຣຍໍ ວາ ຕິຣຈ຺ຉານໂຍນິໍ ວາ ເປຕ຺ຕິວິສຍໍ ວາ ປາເປຕພ຺ໂພ. ທຸຕິຍໍ.

໓-໔. ກຸມ຺ມສຸຕ຺ຕາທິວຓ຺ຓນາ

໑໕໙-໑໖໐. ຕຕິເຍ ມຫາກຸມ຺ມກຸລນ຺ຕິ ມຫນ຺ຕໍ ອຏ຺ຐິກຈ຺ຉປກຸລໍ. ອຄມາສີຕິ ‘‘ເອຕ຺ຖ ອທ຺ຘາ ກິຎ຺ຈິ ຂາທິຕພ຺ພໍ ອຕ຺ຖິ, ຕໍ ມຈ຺ຉຣາຍນ຺ໂຕ ມໍ ເອສ ນິວາເຣຕີ’’ຕິ ສຎ຺ຎາຍ ອຄມາສິ. ປປຕາຍາຕິ ປປຕາ ວຸຈ຺ຈຕິ ທີຆຣຊ຺ຊຸກພທ຺ໂຘ ອຍກນ຺ຕໂກສເກ ທຓ຺ຑກໍ ປເວເສຕ຺ວາ ຄຫິໂຕ ກຓ຺ຓິກສລ຺ລສຓ຺ຐາໂນ, ອຍກຓ຺ຏໂກ, ຍສ຺ມິໍ ເວເຄນ ປຕິຕ຺ວາ ກຏາເຫ ລຄ຺ຄມຕ຺ເຕ ທຓ຺ຑໂກ ນິກ຺ຂມຕິ, ຣຊ຺ຊຸໂກ ເອກາພທ຺ໂຘ ຄຈ຺ຉເຕວ. ໂສ ກຸມ຺ໂມຕິ ໂສ ວິທ຺ຘກຸມ຺ໂມ. ເຍນ ໂສ ກຸມ຺ໂມຕິ ອຸທກສທ຺ທໍ ສຸຕ຺ວາ ສາສງ຺ກຏ຺ຐານໍ ຠວິສ຺ສຕີຕິ ນິວຕ຺ຕິຕ຺ວາ ເຍນ ໂສ ອຕ຺ຖກາໂມ ກຸມ຺ໂມ. ນ ທານິ ຕ຺ວໍ ອມ຺ຫາກນ຺ຕິ ອິທານິ ຕ຺ວໍ ອມິຕ຺ຕຫຕ຺ຖໍ ຄໂຕ, ນ ອມ຺ຫາກໍ ສນ຺ຕໂກຕິ ອຕ຺ໂຖ. ເອວໍ ສລ຺ລປນ຺ຕານໍເຍວ ຈ ເນສໍ ນາວາຍ ຐິໂຕ ລຸທ຺ໂທ ຣຊ຺ຊຸກໍ ອາກຑ຺ຒິຕ຺ວາ ກຸມ຺ມໍ ຄເຫຕ຺ວາ ຍຖາກາມໍ ອກາສິ. ເສສເມຕ຺ຖ ອິໂຕ ອນນ຺ຕຣສຸຕ຺ເຕ ຈ ອຸຕ຺ຕານເມວ. ຕຕິຍຈຕຸຕ຺ຖານິ.

໕. ມີຬ຺ຫກສຸຕ຺ຕວຓ຺ຓນາ

໑໖໑. ປຎ຺ຈເມ ມີຬ຺ຫກາຕິ ຄູຖປາຓກາ. ຄູຖາທີຕິ ຄູຖຠກ຺ຂາ. ຄູຖປູຣາຕິ ອນ຺ໂຕ ຄູເຖນ ຠຣິຕາ. ປຸຓ຺ຓາ ຄູຖສ຺ສາຕິ ອິທໍ ປຸຣິມສ຺ເສວ ອຕ຺ຖທີປນໍ. ອຕິມຎ຺ເຎຍ຺ຍາຕິ ປຈ຺ຉິມປາເທ ຠູມິຍໍ ຐເປຕ຺ວາ ປຸຣິມປາເທ ຄູຖສ຺ສ ອຸປຣິ ອາໂຣເປຕ຺ວາ ຐິຕາ ‘‘ອຫມ຺ຫິ ຄູຖາທີ’’ຕິ ຠຓນ຺ຕີ ອຕິມຎ຺ເຎຍ຺ຍ. ປິຓ຺ຑປາໂຕ ຈສ຺ສ ປູໂຣຕິ ອປໂຣປິສ຺ສ ປຕ຺ຕປູໂຣ ປຓີຕປິຓ຺ຑປາໂຕ ຠເວຍ຺ຍ. ປຎ຺ຈມໍ.

໖. ອສນິສຸຕ຺ຕວຓ຺ຓນາ

໑໖໒. ຉຏ຺ເຐ ກໍ, ຠິກ຺ຂເວ, ອສນິວິຈກ຺ກນ຺ຕິ, ຠິກ຺ຂເວ, ກໍ ປຸຄ຺ຄລໍ ມຕ຺ຖເກ ປຕິຕ຺ວາ ມທ຺ທມານໍ ສຸກ຺ກາສນິຈກ຺ກໍ ອາຄຈ຺ຉຕຸ. ອປ຺ປຕ຺ຕມານສນ຺ຕິ ອນຘິຄຕາຣຫຕ຺ຕໍ. ອິຕິ ຠຄວາ ນ ສຕ຺ຕານໍ ທຸກ຺ຂກາມຕາຍ, ອາທີນວໍ ປນ ທສ຺ເສຕຸໍ ເອວມາຫ. ອສນິຈກ຺ກຎ຺ຫິ ມຕ຺ຖເກ ປຕິຕໍ ເອກເມວ ອຕ຺ຕຠາວໍ ນາເສຕິ, ລາຠສກ຺ກາຣສິໂລເກນ ປຣິຍາທິຓ຺ຓຈິຕ຺ໂຕ ນິຣຍາທີສຸ ອນນ຺ຕທຸກ຺ຂໍ ອນຸໂຠຕິ. ຉຏ຺ຐໍ.

໗. ທິທ຺ຘສຸຕ຺ຕວຓ຺ຓນາ

໑໖໓. ສຕ຺ຕເມ ທິທ຺ຘຄເຕນາຕິ ຄຕທິທ຺ເຘນ. ວິສລ຺ເລນາຕິ ວິສມກ຺ຂິເຕນ. ສລ຺ເລນາຕິ ສຕ຺ຕິຍາ. ສຕ຺ຕມໍ.

໘. ສິງ຺ຄາລສຸຕ຺ຕວຓ຺ຓນາ

໑໖໔. ອຏ຺ຐເມ ສິງ຺ຄາໂລຕິ ຊຣສິງ຺ຄາໂລ. ຍຖາ ຫິ ສຸວຓ຺ຓວຓ຺ໂຓປິ ກາໂຍ ປູຕິກາໂຍ ຕ຺ເວວ, ຕໍຂຓໍ ຄຬິຕມ຺ປິ ຈ ມຸຕ຺ຕໍ ປູຕິມຸຕ຺ຕນ຺ຕ຺ເວວ ວຸຈ຺ຈຕິ, ເອວໍ ຕທຫຸຊາໂຕປິ ສິງ຺ຄາໂລ ຊຣສິງ຺ຄາໂລຕ຺ເວວ ວຸຈ຺ຈຕິ. ອຸກ຺ກຓ຺ຏເກນ ນາມາຕິ ເອວໍນາມເກນ ໂຣເຄນ. ໂສ ກິຣ ສີຕກາເລ ອຸປ຺ປຊ຺ຊຕິ. ຕສ຺ມິໍ ອຸປ຺ປນ຺ເນ ສກລສຣີຣໂຕ ໂລມານິ ປຕນ຺ຕິ, ສກລສຣີຣໍ ນິລ຺ໂລມໍ ຫຸຕ຺ວາ, ສມນ຺ຕໂຕ ຜຸຏຕິ, ວາຕພ຺ຠາຫຕາ ວຓາ ຣຸຊ຺ຊນ຺ຕິ. ຍຖາ ອຸມ຺ມຕ຺ຕກສຸນເຂນ ທຏ຺ໂຐ ປຸຣິໂສ ອນວຏ຺ຐິໂຕວ ຠມຕິ, ເອວໍ ຕສ຺ມິໍ ອຸປ຺ປນ຺ເນ ຠມິຕພ຺ໂພ ໂຫຕິ, ອສຸກຏ຺ຐາເນ ໂສຕ຺ຖິ ຠວິສ຺ສຕີຕິ ນ ປຎ຺ຎາຍຕິ. ອຏ຺ຐມໍ.

໙. ເວຣມ຺ຠສຸຕ຺ຕວຓ຺ຓນາ

໑໖໕. ນວເມ ເວຣມ຺ຠວາຕາຕິ ເອວໍນາມກາ ມຫາວາຕາ. ກີທິເສ ປນ ຐາເນ ເຕ ວາຕາ ວາຍນ຺ຕີຕິ? ຍຕ຺ຖ ຐິຕສ຺ສ ຈຕ຺ຕາໂຣ ທີປາ ອຸປ຺ປລິນິປຕ຺ຕມຕ຺ຕາ ຫຸຕ຺ວາ ປຎ຺ຎາຍນ຺ຕິ. ໂຍ ປກ຺ຂີ ຄຈ຺ຉຕີຕິ ນວວຸຏ຺ເຐ ເທເວ ວິຣວນ຺ໂຕ ວາຕສກຸໂຓ ຕຕ຺ຖ ຄຈ຺ຉຕິ, ຕໍ ສນ຺ຘາເຍຕໍ ວຸຕ຺ຕໍ. ອຣກ຺ຂິເຕເນວ ກາເຍນາຕິອາທີສຸ ຫຕ຺ຖປາເທ ກີຬາເປນ຺ໂຕ ຂນ຺ຘຏ຺ຐິໍ ວາ ນາເມນ຺ໂຕ ກາຍໍ ນ ຣກ຺ຂຕິ ນາມ, ນານາວິຘໍ ທຸຏ຺ຐຸລ຺ລກຖໍ ກເຖນ຺ໂຕ ວາຈໍ ນ ຣກ຺ຂຕິ ນາມ, ກາມວິຕກ຺ກາທໂຍ ວິຕກ຺ເກນ຺ໂຕ ຈິຕ຺ຕໍ ນ ຣກ຺ຂຕິ ນາມ. ອນຸປຏ຺ຐິຕາຍ ສຕິຍາຕິ ກາຍຄຕາສຕິໍ ອນຸປຏ຺ຐເປຕ຺ວາ. ນວມໍ.

໑໐. ສຄາຖກສຸຕ຺ຕວຓ຺ຓນາ

໑໖໖. ທສເມ ອສກ຺ກາເຣນ ຈູຠຍນ຺ຕິ ອສກ຺ກາເຣນ ຈ ອຸຠເຍນ. ສມາຘີຕິ ອຣຫຕ຺ຕຜລສມາຘິ. ໂສ ຫິ ເຕນ ນ ວິກມ຺ປຕິ. ອປ຺ປມາຓວິຫາຣິໂນຕິ ອປ຺ປມາເຓນ ຜລສມາຘິນາ ວິຫຣນ຺ຕສ຺ສ. ສາຕຕິກນ຺ຕິ ສຕຕກາຣິໍ. ສຸຂຸມໍທິຏ຺ຐິວິປສ຺ສກນ຺ຕິ ອຣຫຕ຺ຕມຄ຺ຄທິຏ຺ຐິຍາ ສຸຂຸມທິຏ຺ຐິຜລສມາປຕ຺ຕິອຕ຺ຖາຍ ວິປສ຺ສນໍ ປຏ຺ຐເປຕ຺ວາ ອາຄຕຕ຺ຕາ ວິປສ຺ສກໍ. ອຸປາທານກ຺ຂຍາຣາມນ຺ຕິ ອຸປາທານກ຺ຂຍສງ຺ຂາເຕ ນິພ຺ພາເນ ຣຕໍ. ອາຫຸ ສປ຺ປຸຣິໂສ ອິຕີຕິ ສປ຺ປຸຣິໂສຕິ ກເຖນ຺ຕີຕິ. ທສມໍ.

ປຐໂມ ວຄ຺ໂຄ.

໒. ທຸຕິຍວຄ຺ໂຄ

໑-໒. ສຸວຓ຺ຓປາຕິສຸຕ຺ຕາທິວຓ຺ຓນາ

໑໖໗-໑໖໘. ທຸຕິຍວຄ຺ຄສ຺ສ ປຐເມ ສມ຺ປຊານມຸສາ ຠາສນ຺ຕນ຺ຕິ ອປ຺ປມຕ຺ຕເກນປິ ກາຣເຓນ ສມ຺ປຊານເມວ ມຸສາ ຠາສນ຺ຕໍ. ‘‘ສີລໍ ປູເຣສ຺ສາມີ’’ຕິ ສໍວິຫິຕຠິກ຺ຂຸໍ ສິເນຣຸມຕ຺ໂຕປິ ປຈ຺ຈຍຣາສິ ຈາເລຕຸໍ ນ ສກ຺ໂກຕິ. ຍທາ ປນ ສີລໍ ປຫາຍ ສກ຺ກາຣນິສ຺ສິໂຕ ໂຫຕິ, ຕທາ ກຸຓ຺ຑກມຸຏ຺ຐິເຫຕຸປິ ມຸສາ ຠາສຕິ, ອຎ຺ຎໍ ວາ ອກິຈ຺ຈໍ ກໂຣຕິ. ທຸຕິຍໍ ອຸຕ຺ຕານເມວາຕິ. ປຐມທຸຕິຍານິ.

໓-໑໐. ສຸວຓ຺ຓນິກ຺ຂສຸຕ຺ຕາທິວຓ຺ຓນາ

໑໖໙. ຕຕິຍາທີສຸ ສຸວຓ຺ຓນິກ຺ຂສ຺ສາຕິ ເອກສ຺ສ ກຎ຺ຈນນິກ຺ຂສ຺ສ. ສິງ຺ຄີນິກ຺ຂສ຺ສາຕິ ສິງ຺ຄີສຸວຓ຺ຓນິກ຺ຂສ຺ສ. ປຖວິຍາຕິ ຈກ຺ກວາຬພ຺ຠນ຺ຕຣາຍ ມຫາປຖວິຍາ. ອາມິສກິຎ຺ຈິກ຺ຂເຫຕູຕິ ກສ຺ສຈິເທວ ອາມິສສ຺ສ ເຫຕຸ ອນ຺ຕມໂສ ກຸຓ຺ຑກມຸຏ຺ຐິໂນປິ. ຊີວິຕເຫຕູຕິ ອຏວິຍໍ ໂຈເຣຫິ ຄເຫຕ຺ວາ ຊີວິເຕ ໂວໂຣປິຍມາເນ ຕສ຺ສປິ ເຫຕຸ. ຊນປທກລ຺ຍາຓິຍາຕິ ຊນປເທ ອຸຕ຺ຕມິຕ຺ຖິຍາ. ຕຕິຍາທີນິ.

ທຸຕິໂຍ ວຄ຺ໂຄ.

໓. ຕຕິຍວຄ຺ໂຄ

໑-໒. ມາຕຸຄາມສຸຕ຺ຕາທິວຓ຺ຓນາ

໑໗໐-໑໗໑. ຕຕິຍວຄ຺ຄສ຺ສ ປຐເມ ນ ຕສ຺ສ, ຠິກ຺ຂເວ, ມາຕຸຄາໂມຕິ ນ ຕສ຺ສ ຣໂຫ ເອກກສ຺ສ ນິສິນ຺ນສ຺ສ ເຕນ ຘມ຺ເມນ ອຕ຺ຖິໂກປິ ມາຕຸຄາໂມ ຈິຕ຺ຕໍ ປຣິຍາທາຕຸໍ ສກ຺ໂກຕິ, ຍສ຺ສ ລາຠສກ຺ກາຣສິໂລໂກ ຈິຕ຺ຕໍ ປຣິຍາທາຕຸໍ ສກ຺ໂກຕີຕິ, ອຕ຺ໂຖ. ທຸຕິຍໍ ອຸຕ຺ຕານເມວາຕິ. ປຐມທຸຕິຍານິ.

໓-໖. ເອກປຸຕ຺ຕກສຸຕ຺ຕາທິວຓ຺ຓນາ

໑໗໒-໑໗໕. ຕຕິເຍ ສທ຺ຘາຕິ ໂສຕາປນ຺ນາ. ເສສເມຕ຺ຖ ອຸຕ຺ຕານເມວ. ຕຖາ ຈຕຸຕ຺ເຖ ປຎ຺ຈເມ ຉຏ຺ເຐ ຈ. ຕຕິຍາທີນິ.

໗. ຕຕິຍສມຓພ຺ຣາຫ຺ມຓສຸຕ຺ຕວຓ຺ຓນາ

໑໗໖. ສຕ຺ຕເມ ສມຸທຍນ຺ຕິອາທີສຸ ສຫ ປຸພ຺ພກມ຺ເມນ ອຕ຺ຕຠາໂວ ໂກລປຸຕ຺ຕິຍໍ ວຓ຺ຓໂປກ຺ຂຣຕາ ກລ຺ຍາຓວາກ຺ກຣຓຕາ ຘຸຕຄຸຓາວີກຣຓໍ ຈີວຣຘາຣຓໍ ປຣິວາຣສມ຺ປຕ຺ຕີຕິ ເອວມາທິ ລາຠສກ຺ກາຣສ຺ສ ສມຸທໂຍ ນາມ, ຕໍ ສມຸທຍສຈ຺ຈວເສນ ນປ຺ປຊານາຕິ, ນິໂຣໂຘ ຈ ປຏິປທາ ຈ ນິໂຣຘສຈ຺ຈມຄ຺ຄສຈ຺ຈວເສເນວ ເວທິຕພ຺ພາ. ສຕ຺ຕມໍ.

໘. ຉວິສຸຕ຺ຕວຓ຺ຓນາ

໑໗໗. ອຏ຺ຐເມ ຍສ຺ມາ ລາຠສກ຺ກາຣສິໂລໂກ ນຣກາທີສຸ, ນິພ຺ພຕ຺ເຕນ຺ໂຕ ສກລມ຺ປິ ອິມໍ ອຕ຺ຕຠາວໍ ນາເສຕິ, ອິຘາປິ ມຣຓມ຺ປິ ມຣຓມຕ຺ຕມ຺ປິ ທຸກ຺ຂໍ ອາວຫຕິ, ຕສ຺ມາ ຉວິໍ ຉິນ຺ທຕີຕິອາທິ ວຸຕ຺ຕໍ. ອຏ຺ຐມໍ.

໙. ຣຊ຺ຊຸສຸຕ຺ຕວຓ຺ຓນາ

໑໗໘. ນວເມ ວາຬຣຊ຺ຊຸຍາຕິ ສຸຕ຺ຕາທິມຍາ ຣຊ຺ຊຸ ມຸທຸກາ ໂຫຕິ ວາຬຣຊ຺ຊຸ ຂຣາ ຜຣຸສາ, ຕສ຺ມາ ອຍເມວ ຄຫິຕາ. ນວມໍ.

໑໐. ຠິກ຺ຂຸສຸຕ຺ຕວຓ຺ຓນາ

໑໗໙. ທສເມ ທິຏ຺ຐຘມ຺ມສຸຂວິຫາຣາຕິ ຜລສມາປຕ຺ຕິສຸຂວິຫາຣາ. ເຕສາຫມສ຺ສາຕິ ເຕສໍ ອຫໍ ອສ຺ສ. ຂີຓາສໂວ ຫິ ລາຠີ ປຸຎ຺ຎສມ຺ປນ຺ໂນ ຍາຄຸຂຊ຺ຊກາທີນິ ຄເຫຕ຺ວາ ອາຄຕາຄຕານໍ ອນຸໂມທນໍ ກໂຣນ຺ໂຕ ຘມ຺ມໍ ເທເສນ຺ໂຕ ປຎ຺ຫໍ ວິສ຺ສຊ຺ເຊນ຺ໂຕ ຜລສມາປຕ຺ຕິໍ ອປ຺ເປຕ຺ວາ ນິສີທິຕຸໍ ໂອກາສໍ ນ ລຠຕິ, ຕໍ ສນ຺ຘາຍ ວຸຕ຺ຕນ຺ຕິ. ທສມໍ.

ຕຕິໂຍ ວຄ຺ໂຄ.

໔. ຈຕຸຕ຺ຖວຄ຺ໂຄ

໑-໔. ຠິນ຺ທິສຸຕ຺ຕາທິວຓ຺ຓນາ

໑໘໐-໑໘໓. ຈຕຸຕ຺ຖວຄ຺ຄສ຺ສ ປຐມໍ ອຸຕ຺ຕານເມວ. ທຸຕິຍາທີສຸ ກຸສລມູລນ຺ຕິ ອໂລຠາທິຕິວິຘກຸສລຘມ຺ໂມ. ສຸກ຺ໂກ ຘມ຺ໂມຕິ ຕສ຺ເສວ ປຣິຍາຍເທສນາ. ອຍໍ ປເນຕ຺ຖ ສງ຺ເຂປຕ຺ໂຖ – ຍສ຺ສ ກຸສລມູລາທິສງ຺ຂາຕສ຺ສ ອນວຊ຺ຊຘມ຺ມສ຺ສ ອສມຸຈ຺ຉິນ຺ນຕ຺ຕາ ເທວທຕ຺ໂຕ ສຄ຺ເຄ ວາ ນິພ຺ພຕ຺ເຕຍ຺ຍ, ມຄ຺ຄຜລານິ ວາ ອຘິຄຈ຺ເຉຍ຺ຍ, ສ຺ວາສ຺ສ ສມຸຈ຺ເຉທມຄມາ ສພ຺ພໂສ ສມຸຈ຺ຉິນ຺ໂນ ວິນຏ຺ໂຐ. ປຐມາທີນິ.

໕. ອຈິຣປກ຺ກນ຺ຕສຸຕ຺ຕວຓ຺ຓນາ

໑໘໔. ປຎ຺ຈເມ ປຣາຠວາຍາຕິ ອວຑ຺ຒິຍາ ວິນາສາຍ. ອສ຺ສຕຣີຕິ ວຬວາຍ ກຸຈ຺ຉິສ຺ມິໍ ຄທ຺ຣຠສ຺ສ ຊາຕາ. ອຕ຺ຕວຘາຍ ຄພ຺ຠໍ ຄຓ຺ຫາຕີຕິ ຕໍ ອສ຺ເສນ ສທ຺ຘິໍ ສມ຺ປໂຍເຊນ຺ຕິ, ສາ ຄພ຺ຠໍ ຄຓ຺ຫິຕ຺ວາ ກາເລ ສມ຺ປຕ຺ເຕ ວິຊາຍິຕຸໍ ນ ສກ຺ໂກຕິ, ປາເທຫິ ຠູມິຍໍ ປຫຣນ຺ຕີ ຕິຏ຺ຐຕິ, ອຖສ຺ສາ ຈຕ຺ຕາໂຣ ປາເທ ຈຕູສຸ ຂາຓຸເກສຸ ພນ຺ຘິຕ຺ວາ ກຸຈ຺ຉິໍ ຜາເລຕ຺ວາ ໂປຕໍ ນີຫຣນ຺ຕິ, ສາ ຕຕ຺ເຖວ ມຣຕິ. ເຕເນຕໍ ວຸຕ຺ຕໍ. ປຎ຺ຈມໍ.

໖. ປຎ຺ຈຣຖສຕສຸຕ຺ຕວຓ຺ຓນາ

໑໘໕. ຉຏ຺ເຐ ຠຕ຺ຕາຠິຫາໂຣຕິ ອຠິຫຣິຕພ຺ພໍ ຠຕ຺ຕໍ. ຕສ຺ສ ປນ ປມາຓໍ ທສ຺ເສຕຸໍ ປຎ຺ຈ ຈ ຖາລິປາກສຕານີຕິ ວຸຕ຺ຕໍ. ຕຕ຺ຖ ເອໂກ ຖາລິປາໂກ ທສນ຺ນໍ ປຸຣິສານໍ ຠຕ຺ຕໍ ຄຓ຺ຫາຕິ. ນາສາຍ ປິຕ຺ຕໍ ຠິນ຺ເທຍ຺ຍຸນ຺ຕິ ອຈ຺ຉປິຕ຺ຕໍ ວາ ມຈ຺ຉປິຕ຺ຕໍ ວາສ຺ສ ນາສປຸເຏ ປກ຺ຂິເປຍ຺ຍໍ. ຉຏ຺ຐໍ.

໗-໑໓. ມາຕຸສຸຕ຺ຕາທິວຓ຺ຓນາ

໑໘໖-໑໘໗. ສຕ຺ຕເມ ມາຕຸປິ ເຫຕູຕິ ‘‘ສເຈ ມຸສາ ຠຓສິ, ມາຕຣໍ ເຕ ວິສ຺ສຊ຺ເຊສ຺ສາມ. ໂນ ເຈ ຠຓສິ, ນ ວິສ຺ສຊ຺ເຊສ຺ສາມາ’’ຕິ ເອວໍ ໂຈເຣຫິ ອຏວິຍໍ ປຸຈ຺ຉມາໂນ ຕສ຺ສາ ໂຈຣຫຕ຺ຖຄຕາຍ ມາຕຸຍາປິ ເຫຕຸ ສມ຺ປຊານມຸສາ ນ ຠາເສຍ຺ຍາຕິ ອຕ຺ໂຖ. ອິໂຕ ປເຣສຸປິ ເອເສວ ນໂຍຕິ. ສຕ຺ຕມາທີນິ.

ລາຠສກ຺ກາຣສໍຍຸຕ຺ຕວຓ຺ຓນາ ນິຏ຺ຐິຕາ.