໖. ໂອວາທສຸຕ຺ຕວຓ຺ຓນາ

໑໔໙. ຉຏ຺ເຐ ອຫໍ ວາຕິ ກສ຺ມາ ອາຫ? ເຖຣໍ ອຕ຺ຕໂນ ຐາເນ ຐປນຕ຺ຖໍ. ກິໍ ສາຣິປຸຕ຺ຕໂມຄ຺ຄລ຺ລານາ ນຕ຺ຖີຕິ? ອຕ຺ຖິ. ເອວໍ ປນສ຺ສ ອໂຫສິ ‘‘ອິເມ ນ ຈິຣໍ ຐສ຺ສນ຺ຕິ, ກສ຺ສໂປ ປນ ວີສວສ຺ສສຕາຍຸໂກ, ໂສ ມຍິ ປຣິນິພ຺ພຸເຕ ສຕ຺ຕປຓ຺ຓິຄຸຫາຍໍ ນິສີທິຕ຺ວາ ຘມ຺ມວິນຍສງ຺ຄຫໍ ກຕ຺ວາ ມມ ສາສນໍ ປຎ຺ຈວສ຺ສສຫສ຺ສປຣິມາຓກາລປວຕ຺ຕນກໍ ກຣິສ຺ສຕິ, ອຕ຺ຕໂນ ຕໍ ຐາເນ ຐເປມິ, ເອວໍ ຠິກ຺ຂູ ກສ຺ສປສ຺ສ ສຸສ຺ສູສິຕພ຺ພໍ ມຎ຺ຎິສ຺ສນ຺ຕີ’’ຕິ. ຕສ຺ມາ ເອວມາຫ. ທຸພ຺ພຈາຕິ ທຸກ຺ເຂນ ວຕ຺ຕພ຺ພາ. ໂທວຈສ຺ສກຣເຓຫີຕິ ທຸພ຺ພຈຠາວກຣເຓຫິ. ອປ຺ປທກ຺ຂິຓຄ຺ຄາຫິໂນຕິ ອນຸສາສນິໍ ສຸຕ຺ວາ ປທກ຺ຂິຓໍ ນ ຄຓ຺ຫນ຺ຕິ ຍຖານຸສິຏ຺ຐໍ ນ ປຏິປຊ຺ຊນ຺ຕິ, ອປ຺ປຏິປຊ຺ຊນ຺ຕາ ວາມຄາຫິໂນ ນາມ ຊາຕາຕິ ທສ຺ເສຕິ. ອຈ຺ຈາວທນ຺ເຕຕິ ອຕິກ຺ກມ຺ມ ວທນ຺ເຕ, ສຸຕປຣິຍຕ຺ຕິໍ ນິສ຺ສາຍ ອຕິວິຍ ວາທໍ ກໂຣນ຺ເຕຕິ ອຕ຺ໂຖ. ໂກ ພຫຸຕຣໍ ຠາສິສ຺ສຕີຕິ ຘມ຺ມໍ ກເຖນ຺ໂຕ ໂກ ພຫຸໍ ຠາສິສ຺ສຕິ, ກິໍ ຕ຺ວໍ, ອຸທາຫຸ ອຫນ຺ຕິ? ໂກ ສຸນ຺ທຣຕຣນ຺ຕິ, ເອໂກ ພຫຸໍ ຠາສນ຺ໂຕ ອສຫິຕໍ ອມຘຸຣໍ ຠາສຕິ, ເອໂກ ສຫິຕໍ ມຘຸຣໍ, ຕໍ ສນ຺ຘາຍາຫ ‘‘ໂກ ສຸນ຺ທຣຕຣ’’ນ຺ຕິ? ເອໂກ ປນ ພຫຸຎ຺ຈ ສຸນ຺ທຣຎ຺ຈ ກເຖນ຺ໂຕ ຈິຣໍ ນ ຠາສຕິ, ລຫຸຎ຺ເຎວ ອຸຏ຺ຐາຕິ, ເອໂກ ອທ຺ຘານໍ ປາເປຕິ, ຕໍ ສນ຺ຘາຍາຫ ‘‘ໂກ ຈິຣຕຣ’’ນ຺ຕິ? ຉຏ຺ຐໍ.