໑໐. ອຸປສ຺ສຍສຸຕ຺ຕວຓ຺ຓນາ

໑໕໓. ທສເມ ອາຍາມ, ຠນ຺ເຕຕິ ກສ຺ມາ ຠິກ຺ຂຸນີອຸປສ຺ສຍຄມນໍ ຍາຈຕິ? ນ ລາຠສກ຺ກາຣເຫຕຸ, ກມ຺ມຏ຺ຐານຕ຺ຖິກາ ປເນຕ຺ຖ ຠິກ຺ຂຸນິໂຍ ອຕ຺ຖິ, ຕາ ອຸສ຺ສຸກ຺ກາເປຕ຺ວາ ກມ຺ມຏ຺ຐານໍ ກຖາເປສ຺ສາມີຕິ ຍາຈຕິ. ນນຸ ຈ ໂສ ສຍມ຺ປິ ເຕປິຏໂກ ພຫຸສ຺ສຸໂຕ, ກິໍ ສຍໍ ກເຖຕຸໍ ນ ສກ຺ໂກຕີຕິ? ໂນ ນ ສກ຺ໂກຕິ. ພຸທ຺ຘປຏິຠາຄສ຺ສ ປນ ສາວກສ຺ສ ກຖໍ ສທ຺ຘາຕພ຺ພໍ ມຎ຺ຎິສ຺ສນ຺ຕີຕິ ຍາຈຕິ. ພຫຸກິຈ຺ໂຈ ຕ຺ວໍ ພຫຸກຣຓີໂຍຕິ ກິໍ ເຖໂຣ ນວກມ຺ມາທິປສຸໂຕ, ເຍນ ນໍ ເອວມາຫາຕິ? ໂນ, ສຕ຺ຖຣິ ປນ ປຣິນິພ຺ພຸເຕ ຈຕສ຺ໂສ ປຣິສາ ອານນ຺ທຕ຺ເຖຣໍ ອຸປສງ຺ກມິຕ຺ວາ, ‘‘ຠນ຺ເຕ, ອິທານິ ກສ຺ສ ປຕ຺ຕຈີວຣໍ ຄເຫຕ຺ວາ ຈຣຖ, ກສ຺ສ ປຣິເວຓໍ ສມ຺ມຊ຺ຊຖ, ກສ຺ສ ມຸໂຂທກໍ ເທຖາ’’ຕິ ໂຣທນ຺ຕິ ປຣິເທວນ຺ຕິ. ເຖໂຣ ‘‘ອນິຈ຺ຈາ ສງ຺ຂາຣາ, ວຸທ຺ຘສຣີເຣປິ ນິລ຺ລຊ຺ໂຊວ ມຈ຺ຈຸຣາຊາ ປຫຣິ. ເອສາ ສງ຺ຂາຣານໍ ຘມ຺ມຕາ, ມາ ໂສຈິຕ຺ຖ, ມາ ປຣິເທວິຕ຺ຖາ’’ຕິ ປຣິສໍ ສຎ຺ຎາເປຕິ. ອິທມສ຺ສ ພຫຸກິຈ຺ຈໍ. ຕໍ ສນ຺ຘາຍ ເຖໂຣ ເອວມາຫ. ສນ຺ທສ຺ເສສີຕິ ປຏິປຕ຺ຕິຄຸຓໍ ທສ຺ເສສິ. ສມາທເປສີຕິ ຄຓ຺ຫາເປສິ. ສມຸຕ຺ເຕເຊສີຕິ ສມຸສ຺ສາເຫສິ. ສມ຺ປຫໍເສສີຕິ ປຏິລທ຺ຘຄຸເຓນ ໂມທາເປສິ.

ຖຸລ຺ລຕິສ຺ສາຕິ ສຣີເຣນ ຖູລາ, ນາເມນ ຕິສ຺ສາ. ເວເທຫມຸນິໂນຕິ ປຓ຺ຑິຕມຸນິໂນ. ປຓ຺ຑິໂຕ ຫິ ຎາຓສງ຺ຂາເຕນ ເວເທນ ອີຫຕິ ສພ຺ພກິຈ຺ຈານິ ກໂຣຕິ, ຕສ຺ມາ ‘‘ເວເທໂຫ’’ຕິ ວຸຈ຺ຈຕິ. ເວເທໂຫ ຈ ໂສ ມຸນິ ຈາຕິ, ເວເທຫມຸນິ. ຘມ຺ມໍ ຠາສິຕພ຺ພໍ ມຎ຺ຎຕີຕິ ຕິປິຏກຘຣສ຺ສ ຘມ຺ມຠຓ຺ຑາຄາຣິກສ຺ສ ສມ຺ມຸເຂ ສຍໍ ອຣຎ຺ຎວາສີ ປໍສຸກູລິໂກ ສມາໂນ ‘‘ຘມ຺ມກຖິໂກ ອຫ’’ນ຺ຕິ ຘມ຺ມໍ ຠາສິຕພ຺ພໍ ມຎ຺ຎຕິ. ອິທໍ ກິໍ ປນ, ກຖໍ ປນາຕິ? ອວຊານມານາ ຠຓຕິ. ອສ຺ໂສສີຕິ ອຎ຺ເຎນ ອາຄນ຺ຕ຺ວາ ອາໂຣຈິຕວເສນ ອສ຺ໂສສິ. ອາຄເມຫິ ຕ຺ວໍ, ອາວຸໂສຕິ ຕິຏ຺ຐ ຕ຺ວໍ, ອາວຸໂສ. ມາ ເຕ ສງ຺ໂຆ ອຸຕ຺ຕຣິ ອຸປປຣິກ຺ຂີຕິ ມາ ຠິກ຺ຂຸສງ຺ໂຆ ອຕິເຣກໂອກາເສ ຕໍ ອຸປປຣິກ຺ຂີຕິ. ອິທໍ ວຸຕ຺ຕໍ ໂຫຕິ – ‘‘ອານນ຺ເທນ ພຸທ຺ຘປຏິຠາໂຄ ສາວໂກ ວາຣິໂຕ, ເອກາ ຠິກ຺ຂຸນີ ນ ວາຣິຕາ, ຕາຍ ສທ຺ຘິໍ ສນ຺ຖໂວ ວາ ສິເນໂຫ ວາ ຠວິສ຺ສຕີ’’ຕິ ມາ ຕໍ ສງ຺ໂຆ ເອວໍ ອມຎ຺ຎີຕິ.

ອິທານິ ອຕ຺ຕໂນ ພຸທ຺ຘປຏິຠາຄຠາວໍ ທີເປນ຺ໂຕ ຕໍ ກິໍ ມຎ຺ຎສິ, ອາວຸໂສຕິອາທິມາຫ? ສຕ຺ຕຣຕນນ຺ຕິ ສຕ຺ຕຫຕ຺ຖປ຺ປມາຓໍ. ນາຄນ຺ຕິ ຫຕ຺ຖິໍ. ອຑ຺ຒຏ຺ຐຣຕນໍ ວາຕິ ອຑ຺ຒຣຕເນນ ອູນອຏ຺ຐຣຕນໍ, ປຸຣິມປາທໂຕ ປຏ຺ຐາຍ ຍາວ ກຸມ຺ຠາ ວິທຕ຺ຖາຘິກສຕ຺ຕຫຕ຺ຖຸພ຺ເພຘນ຺ຕິ ອຕ຺ໂຖ. ຕາລປຕ຺ຕິກາຍາຕິ ຕຣຸຓຕາລປຓ຺ເຓນ. ຈວິຕ຺ຖາຕິ ຈຸຕາ, ນ ມຕາ ວາ ນຏ຺ຐາ ວາ, ພຸທ຺ຘປຏິຠາຄສ຺ສ ປນ ສາວກສ຺ສ ອຸປວາທໍ ວຕ຺ວາ ມຫາກສ຺ສປຕ຺ເຖເຣ ຉຫິ ອຠິຎ຺ຎາຫິ ສີຫນາທໍ ນທນ຺ເຕ ຕສ຺ສາ ກາສາວານິ ກຓ຺ຏກສາຂາ ວິຍ ກຈ຺ຉຸສາຂາ ວິຍ ຈ ສຣີຣໍ ຂາທິຕຸໍ ອາຣທ຺ຘານິ, ຕານິ ຫາເຣຕ຺ວາ ເສຕການິ ນິວຕ຺ຖກ຺ຂເຓເຍວສ຺ສາ ຈິຕ຺ຕສ຺ສາໂທ ອຸທປາທີຕິ. ທສມໍ.