໔. ອນມຕຄ຺ຄສໍຍຸຕ຺ຕໍ

໑. ປຐມວຄ຺ໂຄ

໑. ຕິຓກຏ຺ຐສຸຕ຺ຕວຓ຺ຓນາ

໑໒໔. ອນມຕຄ຺ຄສໍຍຸຕ຺ຕສ຺ສ ປຐເມ ອນມຕຄ຺ໂຄຕິ ອນຸ ອມຕຄ຺ໂຄ, ວສ຺ສສຕໍ ວສ຺ສສຫສ຺ສໍ ຎາເຓນ ອນຸຄນ຺ຕ຺ວາປິ ອມຕຄ຺ໂຄ ອວິທິຕຄ຺ໂຄ, ນາສ຺ສ ສກ຺ກາ ອິໂຕ ວາ ເອຕ຺ໂຕ ວາ ອຄ຺ຄໍ ຊານິຕຸໍ, ອປຣິຈ຺ຉິນ຺ນປຸພ຺ພາປຣໂກຏິໂກຕິ ອຕ຺ໂຖ. ສໍສາໂຣຕິ ຂນ຺ຘາທີນໍ ອວິຈ຺ຉິນ຺ນປ຺ປວຕ຺ຕາ ປຏິປາຏິ. ປຸພ຺ພາ ໂກຏິ ນ ປຎ຺ຎາຍຕີຕິ ປຸຣິມມຣິຍາທາ ນ ທິສ຺ສຕິ. ຍທຄ຺ເຄນ ຈສ຺ສ ປຸຣິມາ ໂກຏິ ນ ປຎ຺ຎາຍຕິ, ປຈ຺ຉິມາປິ ຕທຄ຺ເຄເນວ ນ ປຎ຺ຎາຍຕິ, ເວມຊ຺ເຌເຍວ ປນ ສຕ຺ຕາ ສໍສຣນ຺ຕິ. ປຣິຍາທານໍ ຄຈ຺ເຉຍ຺ຍາຕິ ອິທໍ ອຸປມາຍ ຂຸທ຺ທກຕ຺ຕາ ວຸຕ຺ຕໍ. ພາຫິຣສມຍສ຺ມິຎ຺ຫິ ອຕ຺ໂຖ ປຣິຕ຺ໂຕ ໂຫຕິ, ອຸປມາ ມຫຕີ. ‘‘ຫຕ຺ຖີ ວິຍ ອຍໍ ໂຄໂຓ, ໂຄໂຓ ວິຍ ສູກໂຣ, ສມຸທ຺ໂທ ວິຍ ຕຬາກ’’ນ຺ຕິ ຫິ ວຸຕ຺ເຕ ນ ເຕສໍ ຕາທິສໍ ປມາຓໍ ໂຫຕິ. ພຸທ຺ຘສມເຍ ປນ ອຸປມາ ປຣິຕ຺ຕາ, ອຕ຺ໂຖ ມຫາ. ປາຬິຍຎ຺ຫິ ເອໂກ ຊມ຺ພຸທີໂປ ຄຫິໂຕ, ເອວຣູປານໍ ປນ ຊມ຺ພຸທີປານໍ ສເຕປິ ສຫສ຺ເສປິ ສຕສຫສ຺ເສປິ ຕິຓາທີນິ ເຕນ ອຸປກ຺ກເມນ ປຣິຍາທານໍ ຄຈ຺ເຉຍ຺ຍຸໍ, ນ ຕ຺ເວວ ປຸຣິສສ຺ສ ມາຕຸ ມາຕໂຣຕິ. ທຸກ຺ຂໍ ປຈ຺ຈນຸຠູຕນ຺ຕິ ຕຸມ຺ເຫຫິ ທຸກ຺ຂໍ ອນຸຠູຕໍ. ຕິພ຺ພນ຺ຕິ ຕສ຺ເສວ ເວວຈນໍ. ພ຺ຍສນນ຺ຕິ ຎາຕິພ຺ຍສນາທິອເນກວິຘໍ. ກຏສີຕິ ສຸສານໍ, ປຖວີເຍວ ວາ. ສາ ຫິ ປຸນປ຺ປຸນໍ ມຣນ຺ເຕຫິ ສຣີຣນິກ຺ເຂເປນ ວຑ຺ຒິຕາ. ອລເມວາຕິ ຍຸຕ຺ຕເມວ. ປຐມໍ.

໒. ປຖວີສຸຕ຺ຕວຓ຺ຓນາ

໑໒໕. ທຸຕິເຍ ມຫາປຖວິນ຺ຕິ ຈກ຺ກວາຬປຣິຍນ຺ຕໍ ມຫາປຖວິໍ. ນິກ຺ຂິເປຍ຺ຍາຕິ ຕໍ ປຖວິໍ ຠິນ຺ທິຕ຺ວາ ວຸຕ຺ຕປ຺ປມາຓໍ ຄຸຬິກໍ ກຣິຕ຺ວາ ເອກມນ຺ຕໍ ຐເປຍ຺ຍ. ທຸຕິຍໍ.

໓. ອສ຺ສຸສຸຕ຺ຕວຓ຺ຓນາ

໑໒໖. ຕຕິເຍ ກນ຺ທນ຺ຕານນ຺ຕິ ສສທ຺ທໍ ຣຸທມານານໍ. ປສ຺ສນ຺ນນ຺ຕິ ສນ຺ທິຕໍ ປວຕ຺ຕໍ. ຈຕູສຸ ມຫາສມຸທ຺ເທສູຕິ ສິເນຣຸຣສ຺ມີຫິ ປຣິຈ຺ຉິນ຺ເນສຸ ຈຕູສຸ ມຫາສມຸທ຺ເທສຸ. ສິເນຣຸສ຺ສ ຫິ ປາຈີນປສ຺ສໍ ຣຊຕມຍໍ, ທກ຺ຂິຓປສ຺ສໍ ມຓິມຍໍ, ປຈ຺ຉິມປສ຺ສໍ ຜລິກມຍໍ, ອຸຕ຺ຕຣປສ຺ສໍ ສຸວຓ຺ຓມຍໍ. ປຸພ຺ພທກ຺ຂິຓປສ຺ເສຫິ ນິກ຺ຂນ຺ຕາ ຣຊຕມຓິຣສ຺ມິໂຍ ເອກໂຕ ຫຸຕ຺ວາ ມຫາສມຸທ຺ທປິຏ຺ເຐນ ຄນ຺ຕ຺ວາ ຈກ຺ກວາຬປພ຺ພຕໍ ອາຫຈ຺ຈ ຕິຏ຺ຐນ຺ຕິ, ທກ຺ຂິຓປຈ຺ຉິມປສ຺ເສຫິ ນິກ຺ຂນ຺ຕາ ມຓິຜລິກຣສ຺ມິໂຍ, ປຈ຺ຉິມຸຕ຺ຕຣປສ຺ເສຫິ ນິກ຺ຂນ຺ຕາ ຜລິກສຸວຓ຺ຓຣສ຺ມິໂຍ, ອຸຕ຺ຕຣປາຈີນປສ຺ເສຫິ ນິກ຺ຂນ຺ຕາ ສຸວຓ຺ຓຣຊຕຣສ຺ມິໂຍ ເອກໂຕ ຫຸຕ຺ວາ ມຫາສມຸທ຺ທປິຏ຺ເຐນ ຄນ຺ຕ຺ວາ ຈກ຺ກວາຬປພ຺ພຕໍ ອາຫຈ຺ຈ ຕິຏ຺ຐນ຺ຕິ. ຕາສໍ ຣສ຺ມີນໍ ອນ຺ຕເຣສຸ ຈຕ຺ຕາໂຣ ມຫາສມຸທ຺ທາ ໂຫນ຺ຕິ. ເຕ ສນ຺ຘາຍ ວຸຕ຺ຕໍ ‘‘ຈຕູສຸ ມຫາສມຸທ຺ເທສູ’’ຕິ. ຎາຕິພ຺ຍສນນ຺ຕິອາທີສຸ ພ຺ຍສນນ຺ຕິ ວິອສນໍ, ວິນາໂສຕິ ອຕ຺ໂຖ. ຎາຕີນໍ ພ຺ຍສນໍ ຎາຕິພ຺ຍສນໍ, ໂຠຄານໍ ພ຺ຍສນໍ ໂຠຄພ຺ຍສນໍ. ໂຣໂຄ ປນ ສຍເມວ ອາໂຣຄ຺ຍໍ ວິຍສຕິ ວິນາເສຕີຕິ ພ຺ຍສນໍ, ໂຣໂຄວ ພ຺ຍສນໍ ໂຣຄພ຺ຍສນໍ. ຕຕິຍໍ.

໔. ຂີຣສຸຕ຺ຕວຓ຺ຓນາ

໑໒໗. ຈຕຸຕ຺ເຖ ມາຕຸຖຎ຺ຎນ຺ຕິ ເອກນາມິກາຍ ມນຸສ຺ສມາຕຸ ຂີຣໍ. ອິເມສຎ຺ຫິ ສຕ຺ຕານໍ ຄຓ຺ຑຸປ຺ປາທກິປິລ຺ລິກາທີສຸ ວາ ມຈ຺ຉກຈ຺ຉປາທີສຸ ວາ ປກ຺ຂິຊາເຕສຸ ວາ ນິພ຺ພຕ຺ຕກາເລ ມາຕຸຂີຣເມວ ນຕ຺ຖິ, ອຊປສຸມຫິໍສາທີສຸ ນິພ຺ພຕ຺ຕກາເລ ຂີຣໍ ອຕ຺ຖິ, ຕຖາ ມນຸສ຺ເສສຸ. ຕຕ຺ຖ ອຊາທິກາເລ ຈ ມນຸສ຺ເສສຸ ຈາປິ ‘‘ເທວີ ສຸມນາ ຕິສ຺ສາ’’ຕິ ເອວໍ ນານານາມິການໍ ກຸຈ຺ຉິຍໍ ນິພ຺ພຕ຺ຕກາເລ ອຄ຺ຄເຫຕ຺ວາ ຕິສ຺ສາຕິ ເອກນາມິກາຍ ເອວ ມາຕຸ ກຸຈ຺ຉິຍໍ ນິພ຺ພຕ຺ຕກາເລ ປີຕໍ ຖຎ຺ຎໍ ຈຕູສຸ ມຫາສມຸທ຺ເທສຸ ອຸທກໂຕ ພຫຸຕຣນ຺ຕິ ເວທິຕພ຺ພໍ. ຈຕຸຕ຺ຖໍ.

໕. ປພ຺ພຕສຸຕ຺ຕວຓ຺ຓນາ

໑໒໘. ປຎ຺ຈເມ ສກ຺ກາ ປນ, ຠນ຺ເຕຕິ ໂສ ກິຣ ຠິກ຺ຂຸ ຈິນ຺ເຕສິ – ‘‘ສຕ຺ຖາ ອນມຕຄ຺ຄສ຺ສ ສໍສາຣສ຺ສ ທີຆຕມຕ຺ຕາ ‘ນ ສຸກຣໍ ນ ສຸກຣ’ນ຺ຕິ ກເຖຕິເຍວ, ກຖໍ ນຈ຺ຉິນ຺ທຕິ, ສກ຺ກາ ນຸ ໂຂ ອຸປມໍ ກາຣາເປຕຸ’’ນ຺ຕິ. ຕສ຺ມາ ເອວມາຫ. ກາສິເກນາຕິ ຕໂຍ ກປ຺ປາສໍສູ ເອກໂຕ ຄເຫຕ຺ວາ ກນ຺ຕິຕສຸຕ຺ຕມເຍນ ອຕິສຸຂຸມວຕ຺ເຖນ. ເຕນ ປນ ປຣິມຏ຺ເຐ ກິຕ຺ຕກໍ ຂີເຍຍ຺ຍາຕິ. ສາສປມຕ຺ຕໍ. ປຎ຺ຈມໍ.

໖. ສາສປສຸຕ຺ຕວຓ຺ຓນາ

໑໒໙. ຉຏ຺ເຐ ອາຍສໍ ນຄຣນ຺ຕິ ອາຍເສນ ປາກາເຣນ ປຣິກ຺ຂິຕ຺ຕໍ ນຄຣໍ, ນ ປນ ອນ຺ໂຕ ອາຍເສຫິ ເອກຠູມິກາທິປາສາເທຫິ ອາກິຓ຺ຓນ຺ຕິ ທຏ຺ຐພ຺ພໍ. ຉຏ຺ຐໍ.

໗. ສາວກສຸຕ຺ຕວຓ຺ຓນາ

໑໓໐. ສຕ຺ຕເມ ອນຸສ຺ສເຣຍ຺ຍຸນ຺ຕິ ເອເກນ ກປ຺ປສຕສຫສ຺ເສ ອນຸສ຺ສຣິເຕ ອປໂຣ ຕສ຺ສ ຐິຕຏ຺ຐານໂຕ ອຎ຺ຎໍ ສຕສຫສ຺ສໍ, ອຎ຺ໂຎປິ ອຎ຺ຎນ຺ຕິ ເອວໍ ຈຕ຺ຕາໂຣປິ ຈຕ຺ຕາຣິສຕສຫສ຺ສານິ ອນຸສ຺ສເຣຍ຺ຍຸໍ. ສຕ຺ຕມໍ.

໘-໙. ຄງ຺ຄາສຸຕ຺ຕາທິວຓ຺ຓນາ

໑໓໑-໑໓໒. ອຏ຺ຐເມ ຍາ ເອຕສ຺ມິໍ ອນ຺ຕເຣ ວາລິກາຕິ ຍາ ເອຕສ຺ມິໍ ອາຍາມໂຕ ປຎ຺ຈໂຍຊນສຕິເກ ອນ຺ຕເຣ ວາລິກາ. ນວເມ ວຕ຺ຕພ຺ພໍ ນຕ຺ຖິ. ອຏ຺ຐມນວມານິ.

໑໐. ປຸຄ຺ຄລສຸຕ຺ຕວຓ຺ຓນາ

໑໓໓. ທສເມ ອຏ຺ຐິກງ຺ກໂລຕິອາທີນິ ຕີຓິປິ ຣາສິເວວຈນາເນວ. ອິເມສໍ ປນ ສຕ຺ຕານໍ ສອຏ຺ຐິກາລໂຕ ອນຏ຺ຐິກາໂລວ ພຫຸຕໂຣ. ຄຓ຺ຑຸປ຺ປາທກາທິປາຓຠູຕານຎ຺ຫິ ເອເຕສໍ ອຏ຺ຐິເມວ ນຕ຺ຖິ, ມຈ຺ຉກຈ຺ຉປາທິຠູຕານໍ ປນ ອຏ຺ຐິເມວ ພຫຸຕຣໍ, ຕສ຺ມາ ອນຏ຺ຐິກາລຎ຺ຈ ພຫຸອຏ຺ຐິກາລຎ຺ຈ ອຄ຺ຄເຫຕ຺ວາ ສມຏ຺ຐິກາໂລວ ຄເຫຕພ຺ໂພ. ອຸຕ຺ຕໂຣ ຄິຊ຺ຌກູຏສ຺ສາຕິ ຄິຊ຺ຌກູຏສ຺ສ ອຸຕ຺ຕຣປສ຺ເສ ຐິໂຕ. ມຄຘານໍ ຄິຣິພ຺ພເຊຕິ ມຄຘຣຏ຺ຐສ຺ສ ຄິຣິພ຺ພເຊ, ຄິຣິປຣິກ຺ເຂເປ ຐິໂຕຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ. ທສມໍ.

ປຐໂມ ວຄ຺ໂຄ.

໒. ທຸຕິຍວຄ຺ໂຄ

໑. ທຸຄ຺ຄຕສຸຕ຺ຕວຓ຺ຓນາ

໑໓໔. ທຸຕິຍວຄ຺ຄສ຺ສ ປຐເມ ທຸຄ຺ຄຕນ຺ຕິ ທລິທ຺ທໍ ກປຓໍ. ທຸຣູເປຕນ຺ຕິ ທຸສ຺ສຓ຺ຐາເນຫິ ຫຕ຺ຖປາເທຫິ ອຸເປຕໍ. ປຐມໍ.

໒. ສຸຂິຕສຸຕ຺ຕວຓ຺ຓນາ

໑໓໕. ທຸຕິເຍ ສຸຂິຕນ຺ຕິ ສຸຂສມປ຺ປິຕໍ ມຫທ຺ຘນໍ ມຫາໂຠຄໍ. ສຸສຊ຺ຊິຕນ຺ຕິ ອລງ຺ກຕປຏິຍຕ຺ຕໍ ຫຕ຺ຖິກ຺ຂນ຺ຘຄຕໍ ມຫາປຣິວາຣໍ. ທຸຕິຍໍ.

໓. ຕິໍສມຕ຺ຕສຸຕ຺ຕວຓ຺ຓນາ

໑໓໖. ຕຕິເຍ ປາເວຍ຺ຍກາຕິ ປາເວຍ຺ຍເທສວາສິໂນ. ສພ຺ເພ ອາຣຎ຺ຎິກາຕິອາທີສຸ ຘຸຕງ຺ຄສມາທານວເສນ ເຕສໍ ອາຣຎ຺ຎິກາທິຠາໂວ ເວທິຕພ຺ໂພ. ສພ຺ເພ ສສໍໂຍຊນາຕິ ສພ຺ເພ ສພນ຺ຘນາ, ເກຈິ ໂສຕາປນ຺ນາ, ເກຈິ ສກທາຄາມິໂນ, ເກຈິ ອນາຄາມິໂນ. ເຕສຸ ຫິ ປຸຖຸຊ຺ຊໂນ ວາ ຂີຓາສໂວ ວາ ນຕ຺ຖິ. ຄຸນ຺ນນ຺ຕິອາທີສຸ ເສຕກາຬາທິວຓ຺ເຓສຸ ເອເກກວຓ຺ຓກາໂລວ ຄເຫຕພ຺ໂພ. ປາຣິປນ຺ຖກາຕິ ປຣິປນ຺ເຖ ຕິຏ຺ຐນກາ ປນ຺ຖຆາຕໂຈຣາ. ປາຣທາຣິກາຕິ ປຣທາຣຈາຣິຕ຺ຕໍ ອາປຊ຺ຊນກາ. ຕຕິຍໍ.

໔-໙. ມາຕຸສຸຕ຺ຕາທິວຓ຺ຓນາ

໑໓໗-໑໔໒. ຈຕຸຕ຺ຖາທີສຸ ລິງ຺ຄນິຍເມນ ເຈວ ຈກ຺ກວາຬນິຍເມນ ຈ ອຕ຺ໂຖ ເວທິຕພ຺ໂພ. ປຸຣິສານຎ຺ຫິ ມາຕຸຄາມກາໂລ, ມາຕຸຄາມານຎ຺ຈ ປຸຣິສກາໂລຕິ ເອວເມຕ຺ຖ ລິງ຺ຄນິຍໂມ. ອິມມ຺ຫາ ຈກ຺ກວາຬາ ສຕ຺ຕາ ປຣຈກ຺ກວາຬໍ, ປຣຈກ຺ກວາຬາ ຈ ອິມໍ ຈກ຺ກວາຬໍ ສໍສຣນ຺ຕິ. ເຕສຸ ອິມສ຺ມິໍ ຈກ຺ກວາເຬ ມາຕຸຄາມກາເລ ມາຕຸຠູຕຎ຺ເຎວ ທສ຺ເສນ຺ໂຕ ໂຍ ນມາຕາຠູຕປຸພ຺ໂພຕິ ອາຫ. ໂຍ ນປິຕາຠູຕປຸພ຺ໂພຕິອາທີສຸປິ ເອເສວ ນໂຍ. ຈຕຸຕ຺ຖາທີນິ.

໑໐. ເວປຸລ຺ລປພ຺ພຕສຸຕ຺ຕວຓ຺ຓນາ

໑໔໓. ທສເມ ຠູຕປຸພ຺ພນ຺ຕິ ອຕີຕກາເລ ເອກໍ ອປທານໍ ອາຫຣິຕ຺ວາ ທສ຺ເສຕິ. ສມຎ຺ຎາ ອຸທປາທີຕິ ປຎ຺ຎຕ຺ຕິ ອໂຫສິ. ຈຕູເຫນ ອາໂຣຫນ຺ຕີຕິ ອິທໍ ຖາມມຊ຺ຌິເມ ສນ຺ຘາຍ ວຸຕ຺ຕໍ. ອຄ຺ຄນ຺ຕິ ອຸຕ຺ຕມໍ. ຠທ຺ທຍຸຄນ຺ຕິ ສຸນ຺ທຣຍຸຄລໍ. ຕີເຫນ ອາໂຣຫນ຺ຕີຕິ ເອຕ຺ຕາວຕາ ກິຣ ທ຺ວິນ຺ນໍ ພຸທ຺ຘານໍ ອນ຺ຕເຣ ໂຍຊນໍ ປຖວີ ອຸສ຺ສນ຺ນາ, ໂສ ປພ຺ພໂຕ ຕິໂຍຊນຸພ຺ເພໂຘ ຊາໂຕ.

ອປ຺ປໍ ວາ ຠິຍ຺ໂຍຕິ ວສ຺ສສຕໂຕ ອຸຕ຺ຕຣິໍ ອປ຺ປໍ ທສ ວາ ວີສໍ ວາ ວສ຺ສານິ. ປຸນ ວສ຺ສສຕເມວ ຊີວນໂກ ນາມ ນຕ຺ຖິ, ອຸຕ຺ຕມໂກຏິຍາ ປນ ສຏ຺ຐິ ວາ ອສີຕິ ວາ ວສ຺ສານິ ຊີວນ຺ຕິ. ວສ຺ສສຕໍ ປນ ອປ຺ປຕ຺ວາ ປຎ຺ຈວສ຺ສທສວສ຺ສາທິກາເລ ມີຍມານາວ ພຫຸກາ. ເອຕ຺ຖ ຈ ກກຸສນ຺ໂຘ ຠຄວາ ຈຕ຺ຕາລີສວສ຺ສສຫສ຺ສາຍຸກກາເລ, ໂກຓາຄມໂນ ຕິໍສວສ຺ສສຫສ຺ສາຍຸກກາເລ ນິພ຺ພຕ຺ໂຕຕິ ອິທໍ ອນຸປຸພ຺ເພນ ປຣິຫີນສທິສໍ ກຕໍ, ນ ປນ ເອວໍ ປຣິຫີນໍ, ວຑ຺ຒິຕ຺ວາ ວຑ຺ຒິຕ຺ວາ ປຣິຫີນນ຺ຕິ ເວທິຕພ຺ພໍ. ກຖໍ? ກກຸສນ຺ໂຘ ຕາວ ຠຄວາ ອິມສ຺ມິໍເຍວ ກປ຺ເປ ຈຕ຺ຕາລີສວສ຺ສສຫສ຺ສາຍຸກກາເລ ນິພ຺ພຕ຺ໂຕ ອາຍຸປ຺ປມາຓໍ ປຎ຺ຈ ໂກຏ຺ຐາເສ ກຕ຺ວາ ຈຕ຺ຕາໂຣ ຐຕ຺ວາ ປຎ຺ຈເມ ວິຊ຺ຊມາເນເຍວ ປຣິນິພ຺ພຸໂຕ. ຕໍ ອາຍຸ ປຣິຫາຍມານໍ ທສວສ຺ສກາລໍ ປຕ຺ວາ ປຸນ ວຑ຺ຒມານໍ ອສງ຺ເຂຍ຺ຍໍ ຫຸຕ຺ວາ ຕໂຕ ປຣິຫາຍມານໍ ຕິໍສວສ຺ສສຫສ຺ສາຍຸກກາເລ ຐິຕໍ, ຕທາ ໂກຓາຄມໂນ ນິພ຺ພຕ຺ໂຕ. ຕສ຺ມິມ຺ປິ ຕເຖວ ປຣິນິພ຺ພຸເຕ ຕໍ ອາຍຸ ທສວສ຺ສກາລໍ ປຕ຺ວາ ປຸນ ວຑ຺ຒມານໍ ອສງ຺ເຂຍ຺ຍໍ ຫຸຕ຺ວາ ປຣິຫາຍິຕ຺ວາ ວີສວສ຺ສສຫສ຺ສກາເລ ຐິຕໍ, ຕທາ ກສ຺ສໂປ ຠຄວາ ນິພ຺ພຕ຺ໂຕ. ຕສ຺ມິມ຺ປິ ຕເຖວ ປຣິນິພ຺ພຸເຕ ຕໍ ອາຍຸ ທສວສ຺ສກາລໍ ປຕ຺ວາ ປຸນ ວຑ຺ຒມານໍ ອສງ຺ເຂຍ຺ຍໍ ຫຸຕ຺ວາ ປຣິຫາຍິຕ຺ວາ ວສ຺ສສຕກາລໍ ປຕ຺ຕໍ, ອຖ ອມ຺ຫາກໍ ສມ຺ມາສມ຺ພຸທ຺ໂຘ ນິພ຺ພຕ຺ໂຕ. ເອວໍ ອນຸປຸພ຺ເພນ ປຣິຫາຍິຕ຺ວາ ວຑ຺ຒິຕ຺ວາ ວຑ຺ຒິຕ຺ວາ ປຣິຫີນນ຺ຕິ ເວທິຕພ຺ພໍ. ຕຕ຺ຖ ຈ ຍໍ ອາຍຸປຣິມາເຓສຸ ມນ຺ເທສຸ ພຸທ຺ຘາ ນິພ຺ພຕ຺ຕນ຺ຕິ, ເຕສມ຺ປິ ຕເທວ ອາຍຸປຣິມາຓໍ ໂຫຕີຕິ. ທສມໍ.

ທຸຕິໂຍ ວຄ຺ໂຄ.

ອນມຕຄ຺ຄສໍຍຸຕ຺ຕວຓ຺ຓນາ ນິຏ຺ຐິຕາ.