໒. ອຠິສມຍສໍຍຸຕ຺ຕໍ

໑. ນຂສິຂາສຸຕ຺ຕວຓ຺ຓນາ

໗໔. ອຠິສມຍສໍຍຸຕ຺ຕສ຺ສ ປຐເມ ນຂສິຂາຍນ຺ຕິ ມໍສຏ຺ຐາເນນ ວິມຸຕ຺ເຕ ນຂຄ຺ເຄ. ນຂສິຂາ ຈ ນາມ ໂລກິຍານໍ ມຫຕີປິ ໂຫຕິ, ສຕ຺ຖຸ ປນ ຣຕ຺ຕຸປ຺ປລປຕ຺ຕໂກຏິ ວິຍ ສຸຂຸມາ. ກຖໍ ປເນຕ຺ຖ ປໍສຸ ປຕິຏ຺ຐິໂຕຕິ? ອຘິຏ຺ຐານພເລນ. ຠຄວຕາ ຫິ ອຕ຺ຖໍ ຎາເປຕຸກາເມນ ອຘິຏ຺ຐານພເລນ ຕຕ຺ຖ ປຕິຏ຺ຐາປິໂຕ. ສຕິມໍ ກລນ຺ຕິ ມຫາປຖວິຍາ ປໍສຸໍ ສຕໂກຏ຺ຐາເສ ກຕ຺ວາ ຕໂຕ ເອກໂກຏ຺ຐາສໍ. ປຣໂຕປິ ເອເສວ ນໂຍ. ອຠິສເມຕາວິໂນຕິ ປຎ຺ຎາຍ ອຣິຍສຈ຺ຈານິ ອຠິສເມຕ຺ວາ ຐິຕສ຺ສ. ປຸຣິມໍ ທຸກ຺ຂກ຺ຂນ຺ຘໍ ປຣິກ຺ຂີຓໍ ປຣິຍາທິຓ຺ຓໍ ອຸປນິຘາຍາຕິ ເອຕເທວ ພຫຸຕຣໍ ທຸກ຺ຂໍ, ຍທິທໍ ປຣິກ຺ຂີຓນ຺ຕິ ເອວໍ ປຐມໍ ວຸຕ຺ຕໍ ທຸກ຺ຂກ຺ຂນ຺ຘໍ ອຸປນິຘາຍ, ຎາເຓນ ຕໍ ຕສ຺ສ ສນ຺ຕິເກ ຐເປຕ຺ວາ ອຸປປຣິກ຺ຂິຍມາເນຕິ ອຕ຺ໂຖ. ກຕມໍ ປເນຕ຺ຖ ປຸຣິມທຸກ຺ຂໍ ນາມ? ຍໍ ປຣິກ຺ຂີຓໍ. ກຕມໍ ປນ ປຣິກ຺ຂີຓໍ? ຍໍ ປຐມມຄ຺ຄສ຺ສ ອຠາວິຕຕ຺ຕາ ອຸປ຺ປຊ຺ເຊຍ຺ຍ. ກຕມໍ ປນ ອຸປນິຘາຍ? ຍໍ ສຕ຺ຕສຸ ອຕ຺ຕຠາເວສຸ ອປາເຍ ອຏ຺ຐມຎ຺ຈ ປຏິສນ຺ຘິໍ ອາທິໍ ກຕ຺ວາ ຍຕ຺ຖ ກຕ຺ຖຈິ ອຸປ຺ປຊ຺ເຊຍ຺ຍ, ສພ຺ພໍ ຕໍ ປຣິກ຺ຂີຓນ຺ຕິ ເວທິຕພ຺ພໍ. ສຕ຺ຕກ຺ຂຕ຺ຕຸນ຺ຕິ ສຕ຺ຕ ວາເຣ, ສຕ຺ຕສຸ ອຕ຺ຕຠາເວສູຕິ ອຕ຺ໂຖ. ປຣມຕາຕິ ອິທມສ຺ສ ປຣໍ ປມາຓນ຺ຕິ ທສ຺ເສຕິ. ມຫຕ຺ຖິໂຍຕິ ມຫໂຕ ອຕ຺ຖສ຺ສ ນິປ຺ຜາທໂກ. ປຐມໍ.

໒. ໂປກ຺ຂຣຓີສຸຕ຺ຕວຓ຺ຓນາ

໗໕. ທຸຕິເຍ ໂປກ຺ຂຣຓີຕິ ວາປີ. ອຸພ຺ເພເຘນາຕິ ຄມ຺ຠີຣຕາຍ. ສມຕິຕ຺ຕິກາຕິ ມຸຂວຏ຺ຏິສມາ. ກາກເປຍ຺ຍາຕິ ສກ຺ກາ ໂຫຕິ ຕີເຣ ຐິເຕນ ກາເກນ ປກຕິຍາປິ ມຸຂຕຸຓ຺ຑິກໍ ໂອຕາເຣຕ຺ວາ ປາຕຸໍ. ທຸຕິຍໍ.

໓. ສໍເຠຊ຺ຊອຸທກສຸຕ຺ຕາທິວຓ຺ຓນາ

໗໖-໗໗. ຕຕິເຍ ຍຕ຺ຖິມາຕິ ຍສ຺ມິໍ ສມ຺ຠິຊ຺ຊຏ຺ຐາເນ ອິມາ. ສໍສນ຺ທນ຺ຕີຕິ ສມາຄນ຺ຕ຺ວາ ສນ຺ທນ຺ຕິ. ສເມນ຺ຕີຕິ ສມາຄຈ຺ຉນ຺ຕິ. ທ຺ເວ ວາ ຕິ ວາຕິ ທ຺ເວ ວາ ຕີຓິ ວາ. ອຸທກຜຸສິຕານີຕິ ອຸທກພິນ຺ທູນິ. ສໍເຠຊ຺ຊອຸທກນ຺ຕິ ອຎ຺ຎາຫິ ນທີຫິ ສທ຺ຘິໍ ສມ຺ຠິນ຺ນຏ຺ຐາເນ ອຸທກໍ. ຈຕຸຕ຺ຖໍ ອຸຕ຺ຕານຕ຺ຖເມວ. ຕຕິຍຈຕຸຕ຺ຖານິ.

໕. ປຖວີສຸຕ຺ຕາທິວຓ຺ຓນາ

໗໘-໘໔. ປຎ຺ຈເມ ມຫາປຖວິຍາຕິ ຈກ຺ກວາຬພ຺ຠນ຺ຕຣາຍ ມຫາປຖວິຍາ ອຸທ຺ຘຣິຕ຺ວາ. ໂກລຏ຺ຐິມຕ຺ຕິໂຍຕິ ປທຣຏ຺ຐິປມາຓາ. ຄຸຬິກາຕິ ມຕ຺ຕິກຄຸຬິກາ. ອຸປນິກ຺ຂິເປຍ຺ຍາຕິ ເອກສ຺ມິໍ ຐາເນ ຐເປຍ຺ຍ. ຉຏ຺ຐາທີສຸ ວຸຕ຺ຕນເຍເນວ ອຕ຺ໂຖ ເວທິຕພ຺ໂພ. ປຣິໂຍສາເນ ປນ ອຎ຺ຎຕິຕ຺ຖິຍສມຓພ຺ຣາຫ຺ມຓປຣິພ຺ພາຊການໍ ອຘິຄໂມຕິ ພາຫິຣການໍ ສພ຺ໂພປິ ຄຸຓາຘິຄໂມ ປຐມມຄ຺ເຄນ ອຘິຄຕຄຸຓານໍ ສຕຠາຄມ຺ປິ ສຫສ຺ສຠາຄມ຺ປິ ສຕສຫສ຺ສຠາຄມ຺ປິ ນ ອຸປຄຈ຺ຉຕີຕິ. ປຎ຺ຈມາທີນິ.

ອຠິສມຍສໍຍຸຕ຺ຕວຓ຺ຓນາ ນິຏ຺ຐິຕາ.