໘. ໂກສມ຺ພິສຸຕ຺ຕວຓ຺ຓນາ

໖໘. ອຏ຺ຐເມ ອຎ຺ຎຕ຺ເຣວາຕິ ເອກຈ຺ໂຈ ຫິ ປຣສ຺ສ ສທ຺ທຫິຕ຺ວາ ຍໍ ເອສ ຠຓຕິ, ຕໍ ຠູຕນ຺ຕິ ຄຓ຺ຫາຕິ. ອປຣສ຺ສ ນິສີທິຕ຺ວາ ຈິນ຺ເຕນ຺ຕສ຺ສ ຍໍ ກາຣຓໍ ຣຸຈ຺ຈຕິ, ໂສ ‘‘ອຕ຺ຖິ ເອຕ’’ນ຺ຕິ ຣຸຈິຍາ ຄຓ຺ຫາຕິ. ເອໂກ ‘‘ຈິຣກາລໂຕ ປຏ຺ຐາຍ ເອວໍ ອນຸສ຺ສໂວ ອຕ຺ຖິ, ຠູຕເມຕ’’ນ຺ຕິ ອນຸສ຺ສເວນ ຄຓ຺ຫາຕິ. ອຎ຺ຎສ຺ສ ວິຕກ຺ກຍໂຕ ເອກໍ ກາຣຓໍ ອຸປຏ຺ຐາຕິ, ໂສ ‘‘ອຕ຺ເຖຕ’’ນ຺ຕິ ອາກາຣປຣິວິຕກ຺ເກນ ຄຓ຺ຫາຕິ. ອປຣສ຺ສ ຈິນ຺ຕຍໂຕ ເອກາ ທິຏ຺ຐິ ອຸປ຺ປຊ຺ຊຕິ, ຍາຍສ຺ສ ຕໍ ກາຣຓໍ ນິຊ຺ຌາຍນ຺ຕສ຺ສ ຂມຕິ, ໂສ ‘‘ອຕ຺ເຖຕ’’ນ຺ຕິ ທິຏ຺ຐິນິຊ຺ຌານກ຺ຂນ຺ຕິຍາ ຄຓ຺ຫາຕິ. ເຖໂຣ ປນ ປຎ຺ຈປິ ເອຕານິ ກາຣຓານິ ປຏິກ຺ຂິປິຕ຺ວາ ປຈ຺ຈກ຺ຂຎາເຓນ ປຏິວິທ຺ຘຠາວໍ ປຸຈ຺ຉນ຺ໂຕ ອຎ຺ຎຕ຺ເຣວ, ອາວຸໂສ ມຸສິລ, ສທ຺ຘາຍາຕິອາທິມາຫ. ຕຕ຺ຖ ອຎ຺ຎຕ຺ເຣວາຕິ ສທ຺ຘາທີນິ ກາຣຓານິ ຐເປຕ຺ວາ, ວິນາ ເອເຕຫິ ກາຣເຓຫີຕິ ອຕ຺ໂຖ. ຠວນິໂຣໂຘ ນິພ຺ພານນ຺ຕິ ປຎ຺ຈກ຺ຂນ຺ຘນິໂຣໂຘ ນິພ຺ພານໍ.

ຕຸຓ຺ຫີ ອໂຫສີຕິ ເຖໂຣ ຂີຓາສໂວ, ອຫໍ ປນ ຂີຓາສໂວຕິ ວາ ນ ວາຕິ ວາ ອວຕ຺ວາ ຕຸຓ຺ຫີເຍວ ອໂຫສິ. ອາຍສ຺ມາ ນາຣໂທ ອາຍສ຺ມນ຺ຕໍ ປວິຏ຺ຐໍ ເອຕທໂວຈາຕິ ກສ຺ມາ ອໂວຈ? ໂສ ກິຣ ຈິນ຺ເຕສິ – ‘‘ຠວນິໂຣໂຘ ນິພ຺ພານໍ ນາມາຕິ ເສເຂຫິປິ ຊານິຕພ຺ໂພ ປຎ຺ໂຫ ເອສ, ອຍໍ ປນ ເຖໂຣ ອິມໍ ເຖຣໍ ອເສຂຠູມິຍາ ກາເຣຕິ, ອິມໍ ຐານໍ ຊານາເປສ຺ສາມີ’’ຕິ ເອຕໍ ອໂວຈ.

ສມ຺ມປ຺ປຎ຺ຎາຍ ສຸທິຏ຺ຐນ຺ຕິ ສຫ ວິປສ຺ສນາຍ ມຄ຺ຄປຎ຺ຎາຍ ສຸຏ຺ຐຸ ທິຏ຺ຐໍ. ນ ຈມ຺ຫິ ອຣຫນ຺ຕິ ອນາຄາມິມຄ຺ເຄ ຐິຕຕ຺ຕາ ອຣຫໍ ນ ໂຫມີຕິ ທີເປຕິ. ຍໍ ປນສ຺ສ ອິທານິ ‘‘ຠວນິໂຣໂຘ ນິພ຺ພານ’’ນ຺ຕິ ຎາຓໍ, ຕໍ ເອກູນວີສຕິຍາ ປຈ຺ຈເວກ຺ຂຓຎາເຓຫິ ວິມຸຕ຺ຕໍ ປຈ຺ຈເວກ຺ຂຓຎາຓໍ. ອຸທປາໂນຕິ ວີສຕິໍສຫຕ຺ຖຄມ຺ຠີໂຣ ປານີຍກູໂປ. ອຸທກວາຣໂກຕິ ອຸທກອຸສ຺ສິຎ຺ຈນວາຣໂກ. ອຸທກນ຺ຕິ ຫິ ໂຂ ຎາຓໍ ອສ຺ສາຕິ ຕີເຣ ຐິຕສ຺ສ ໂອໂລກຍໂຕ ເອວໍ ຎາຓໍ ຠເວຍ຺ຍ. ນ ຈ ກາເຍນ ຜຸສິຕ຺ວາຕິ ອຸທກໍ ປນ ນີຫຣິຕ຺ວາ ກາເຍນ ຜຸສິຕ຺ວາ ວິຫຣິຕຸໍ ນ ສກ຺ກຸເຓຍ຺ຍ. ອຸທປາເນ ອຸທກທສ຺ສນໍ ວິຍ ຫິ ອນາຄາມິໂນ ນິພ຺ພານທສ຺ສນໍ, ຆມ຺ມາຠິຕຕ຺ຕປຸຣິໂສ ວິຍ ອນາຄາມີ, ອຸທກວາຣໂກ ວິຍ ອຣຫຕ຺ຕມຄ຺ໂຄ, ຍຖາ ຆມ຺ມາຠິຕຕ຺ຕປຸຣິໂສ ອຸທປາເນ ອຸທກໍ ປສ຺ສຕິ. ເອວໍ ອນາຄາມີ ປຈ຺ຈເວກ຺ຂຓຎາເຓນ ‘‘ອຸປຣິ ອຣຫຕ຺ຕຜລສມໂຍ ນາມ ອຕ຺ຖີ’’ຕິ ຊານາຕິ. ຍຖາ ປນ ໂສ ປຸຣິໂສ ອຸທກວາຣກສ຺ສ ນຕ຺ຖິຕາຍ ອຸທກໍ ນີຫຣິຕ຺ວາ ກາເຍນ ຜຸສິຕຸໍ ນ ລຠຕິ, ເອວໍ ອນາຄາມີ ອຣຫຕ຺ຕມຄ຺ຄສ຺ສ ນຕ຺ຖິຕາຍ ນິພ຺ພານໍ ອາຣມ຺ມຓໍ ກຕ຺ວາ ອຣຫຕ຺ຕຜລສມາປຕ຺ຕິໍ ອປ຺ເປຕ຺ວາ ນິສີທິຕຸໍ ນ ລຠຕິ. ອຏ຺ຐມໍ.