໗. ປຈ຺ຈຍສຸຕ຺ຕວຓ຺ຓນາ

໒໗-໒໘. ສຕ຺ຕເມ ປຏິປາຏິຍາ ວຸຕ຺ເຕສຸ ປຣິໂຍສານປທໍ ຄເຫຕ຺ວາ ກຕມຎ຺ຈ, ຠິກ຺ຂເວ, ຊຣາມຣຓນ຺ຕິອາທິ ວຸຕ຺ຕໍ. ເອວໍ ປຈ຺ຈຍໍ ປຊານາຕີຕິ ເອວໍ ທຸກ຺ຂສຈ຺ຈວເສນ ປຈ຺ຈຍໍ ຊານາຕິ. ປຈ຺ຈຍສມຸທຍາທໂຍປິ ສມຸທຍສຈ຺ຈາທີນໍເຍວ ວເສນ ເວທິຕພ຺ພາ. ທິຏ຺ຐິສມ຺ປນ຺ໂນຕິ ມຄ຺ຄທິຏ຺ຐິຍາ ສມ຺ປນ຺ໂນ. ທສ຺ສນສມ຺ປນ຺ໂນຕິ ຕສ຺ເສວ ເວວຈນໍ. ອາຄໂຕ ອິມໍ ສທ຺ຘມ຺ມນ຺ຕິ ມຄ຺ຄສທ຺ຘມ຺ມໍ ອາຄໂຕ. ປສ຺ສຕີຕິ ມຄ຺ຄສທ຺ຘມ຺ມເມວ ປສ຺ສຕິ. ເສກ຺ເຂນ ຎາເຓນາຕິ ມຄ຺ຄຎາເຓເນວ. ເສກ຺ຂາຍ ວິຊ຺ຊາຍາຕິ ມຄ຺ຄວິຊ຺ຊາຍ ເອວ. ຘມ຺ມໂສຕໍ ສມາປນ຺ໂນຕິ ມຄ຺ຄສງ຺ຂາຕເມວ ຘມ຺ມໂສຕໍ ສມາປນ຺ໂນ. ອຣິໂຍຕິ ປຸຖຸຊ຺ຊນຠູມິໍ ອຕິກ຺ກນ຺ໂຕ. ນິພ຺ເພຘິກປຎ຺ໂຎຕິ ນິພ຺ເພຘິກປຎ຺ຎາຍ ສມນ຺ນາຄໂຕ. ອມຕທ຺ວາຣໍ ອາຫຈ຺ຈ ຕິຏ຺ຐຕີຕິ ອມຕໍ ນາມ ນິພ຺ພານໍ, ຕສ຺ສ ທ຺ວາຣໍ ອຣິຍມຄ຺ຄໍ ອາຫຈ຺ຈ ຕິຏ຺ຐຕີຕິ. ອຏ຺ຐມໍ ອຸຕ຺ຕານເມວ. ສຕ຺ຕມອຏ຺ຐມານິ.