໔. ອຎ຺ຎຕິຕ຺ຖິຍສຸຕ຺ຕວຓ຺ຓນາ

໒໔. ຈຕຸຕ຺ເຖ ປາວິສີຕິ ປວິຏ຺ໂຐ. ໂສ ຈ ນ ຕາວ ປວິຏ຺ໂຐ, ‘‘ປວິສິສ຺ສາມີ’’ຕິ ນິກ຺ຂນ຺ຕຕ຺ຕາ ປນ ເອວໍ ວຸຕ຺ໂຕ. ຍຖາ ກິໍ? ຍຖາ ‘‘ຄາມໍ ຄມິສ຺ສາມີ’’ຕິ ນິກ຺ຂນ຺ຕປຸຣິໂສ ຕໍ ຄາມໍ ອປ຺ປຕ຺ໂຕປິ ‘‘ກຫໍ ອິຕ຺ຖນ຺ນາໂມ’’ຕິ ວຸຕ຺ເຕ ‘‘ຄາມໍ ຄໂຕ’’ຕິ ວຸຈ຺ຈຕິ, ເອວໍ. ອຕິປ຺ປໂຄຕິ ຕທາ ກິຣ ເຖຣສ຺ສ ອຕິປ຺ປໂຄເຍວ ນິກ຺ຂນ຺ຕທິວໂສ ອໂຫສິ, ອຕິປ຺ປໂຄເຍວ ນິກ຺ຂນ຺ຕຠິກ຺ຂູ ໂພຘິຍງ຺ຄເຓ ເຈຕິຍງ຺ຄເຓ ນິວາສນປາຣຸປນຏ຺ຐາເນຕິ ອິເມສຸ ຐາເນສຸ ຍາວ ຠິກ຺ຂາຈາຣເວລາ ໂຫຕິ, ຕາວ ປປຎ຺ຈໍ ກໂຣນ຺ຕິ. ເຖຣສ຺ສ ປນ ‘‘ຍາວ ຠິກ຺ຂາຈາຣເວລາ ໂຫຕິ, ຕາວ ປຣິພ຺ພາຊເກຫິ ສທ຺ຘິໍ ເອກທ຺ເວກຖາວາເຣ ກຣິສ຺ສາມີ’’ຕິ ຈິນ຺ຕຍໂຕ ຍໍນູນາຫນ຺ຕິ ເອຕທໂຫສິ. ປຣິພ຺ພາຊການໍ ອາຣາໂມຕິ ໂສ ກິຣ ອາຣາໂມ ທກ຺ຂິຓທ຺ວາຣສ຺ສ ຈ ເວຬຸວນສ຺ສ ຈ ອນ຺ຕຣາ ອໂຫສິ. ອິຘາຕິ ອິເມສຸ ຈຕູສຸ ວາເທສຸ. ກິໍວາທີ ກິມກ຺ຂາຍີຕິ ກິໍ ວທຕິ ກິໍ ອາຈິກ຺ຂຕິ, ກິໍ ເອຕ຺ຖ ສມຓສ຺ສ ໂຄຕມສ຺ສ ທສ຺ສນນ຺ຕິ ປຸຈ຺ຉນ຺ຕິ. ຘມ຺ມສ຺ສ ຈານຸຘມ຺ມໍ ພ຺ຍາກເຣຍ຺ຍາມາຕິ, ໂຠຕາ ໂຄຕເມນ ຍໍ ວຸຕ຺ຕໍ ກາຣຓໍ, ຕສ຺ສ ອນຸກາຣຓໍ ກເຖຍ຺ຍາມ. ສຫຘມ຺ມິໂກ ວາທານຸປາໂຕຕິ ປເຣຫິ ວຸຕ຺ຕກາຣເຓນ ສກາຣໂຓ ຫຸຕ຺ວາ ສມຓສ຺ສ ໂຄຕມສ຺ສ ວາທານຸປາໂຕ ວາທປ຺ປວຕ຺ຕິ ວິຎ຺ຎູຫິ ຄຣຫິຕພ຺ພໍ ກາຣຓໍ ໂກຈິ ອປ຺ປມຕ຺ຕໂກປິ ກຖໍ ນາຄຈ຺ເຉຍ຺ຍ? ອິທໍ ວຸຕ຺ຕໍ ໂຫຕິ – ກຖໍ ສພ຺ພາກາເຣນປິ ສມຓສ຺ສ ໂຄຕມສ຺ສ ວາເທ ຄາຣຍ຺ຫໍ ກາຣຓໍ ນ ຠເວຍ຺ຍາຕິ?

ອິຕິ ວທນ຺ຕິ ຜສ຺ສປຈ຺ຈຍາ ທຸກ຺ຂນ຺ຕິ ເອວໍ ວທນ຺ໂຕຕິ ອຕ຺ໂຖ. ຕຕ຺ຣາຕິ ເຕສຸ ຈຕູສຸ ວາເທສຸ. ເຕ ວຕ ອຎ຺ຎຕ຺ຣ ຜສ຺ສາຕິ ອິທໍ ‘‘ຕທປິ ຜສ຺ສປຈ຺ຈຍາ’’ຕິ ປຏິຎ຺ຎາຍ ສາຘກວຈນໍ. ຍສ຺ມາ ຫິ ນ ວິນາ ຜສ຺ເສນ ທຸກ຺ຂປຏິສໍເວທນາ ອຕ຺ຖິ, ຕສ຺ມາ ຊານິຕພ຺ພເມຕໍ ຍຖາ ‘‘ຕທປິ ຜສ຺ສປຈ຺ຈຍາ’’ຕິ ອຍເມຕ຺ຖ ອຘິປ຺ປາໂຍ.

ສາຘຸ, ສາຘຸ, ອານນ຺ທາຕິ ອຍໍ ສາຘຸກາໂຣ ສາຣິປຸຕ຺ຕຕ຺ເຖຣສ຺ສ ທິນ຺ໂນ, ອານນ຺ທຕ຺ເຖເຣນ ປນ ສທ຺ຘິໍ ຠຄວາ ອາມນ຺ເຕສິ. ເອກມິທາຫນ຺ຕິ ເອຕ຺ຖ ອິຘາຕິ ນິປາຕມຕ຺ຕໍ, ເອກໍ ສມຍນ຺ຕິ ອຕ຺ໂຖ. ອິທໍ ວຈນໍ ‘‘ນ ເກວລໍ ສາຣິປຸຕ຺ໂຕວ ຣາຊຄຫໍ ປວິຏ຺ໂຐ, ອຫມ຺ປິ ປາວິສິໍ. ນ ເກວລຎ຺ຈ ຕສ຺ເສວາຍໍ ວິຕກ຺ໂກ ອຸປ຺ປນ຺ໂນ, ມຍ຺ຫມ຺ປິ ອຸປ຺ປຊ຺ຊິ. ນ ເກວລຎ຺ຈ ຕສ຺ເສວ ສາ ຕິຕ຺ຖິເຍຫິ ສທ຺ຘິໍ ກຖາ ຊາຕາ, ມຍ຺ຫມ຺ປິ ຊາຕປຸພ຺ພາ’’ຕິ ທສ຺ສນຕ຺ຖໍ ວຸຕ຺ຕໍ.

ອຈ຺ຉຣິຍໍ ອພ຺ຠຸຕນ຺ຕິ ອຸຠຍມ຺ເປຕໍ ວິມ຺ຫຍທີປນເມວ. ວຈນຕ຺ໂຖ ປເນຕ຺ຖ ອຈ຺ຉຣໍ ປຫຣິຕຸໍ ຍຸຕ຺ຕນ຺ຕິ ອຈ຺ຉຣິຍໍ. ອຠູຕປຸພ຺ພໍ ຠູຕນ຺ຕິ ອພ຺ຠຸຕໍ. ເອເກນ ປເທນາຕິ ‘‘ຜສ຺ສປຈ຺ຈຍາ ທຸກ຺ຂ’’ນ຺ຕິ ອິມິນາ ເອເກນ ປເທນ. ເອເຕນ ຫິ ສພ຺ພວາທານໍ ປຏິກ຺ເຂປຕ຺ໂຖ ວຸຕ຺ໂຕ. ເອເສວຕ຺ໂຖຕິ ເອໂສເຍວ ຜສ຺ສປຈ຺ຈຍາ ທຸກ຺ຂນ຺ຕິ ປຏິຈ຺ຈສມຸປ຺ປາທຕ຺ໂຖ. ຕຎ຺ເຎເວຕ຺ຖ ປຏິຠາຕູຕິ ຕຎ຺ເຎເວຕ຺ຖ ອຸປຏ຺ຐາຕຸ. ອິທານິ ເຖໂຣ ຊຣາມຣຓາທິກາຍ ປຏິຈ຺ຈສມຸປ຺ປາທກຖາຍ ຕໍ ອຕ຺ຖຄມ຺ຠີຣຎ຺ເຈວ ຄມ຺ຠີຣາວຠາສຎ຺ຈ ກໂຣນ຺ໂຕ ສເຈ ມໍ, ຠນ຺ເຕຕິອາທິໍ ວຕ຺ວາ ຍໍມູລກາ ກຖາ ອຸປ຺ປນ຺ນາ, ຕເທວ ປທໍ ຄເຫຕ຺ວາ ວິວຏ຺ຏໍ ທສ຺ເສນ຺ໂຕ ຉນ຺ນໍຕ຺ເວວາຕິອາທິມາຫ. ເສສໍ ອຸຕ຺ຕານເມວາຕິ. ຈຕຸຕ຺ຖໍ.