໕. ກຈ຺ຈານໂຄຕ຺ຕສຸຕ຺ຕວຓ຺ຓນາ

໑໕. ປຎ຺ຈເມ ສມ຺ມາທິຏ຺ຐິ ສມ຺ມາທິຏ຺ຐີຕິ ຍໍ ປຓ຺ຑິຕາ ເທວມນຸສ຺ສາ ເຕສຸ ເຕສຸ ຐາເນສຸ ສມ຺ມາທສ຺ສນໍ ວທນ຺ຕິ, ສພ຺ພມ຺ປິ ຕໍ ທ຺ວີຫິ ປເທຫິ ສງ຺ຂິປິຕ຺ວາ ປຸຈ຺ຉຕິ. ທ຺ວຍນິສ຺ສິໂຕຕິ ທ຺ເວ ໂກຏ຺ຐາເສ ນິສ຺ສິໂຕ. ເຍຠຸຍ຺ເຍນາຕິ ອິມິນາ ຐເປຕ຺ວາ ອຣິຍປຸຄ຺ຄເລ ເສສມຫາຊນໍ ທສ຺ເສຕິ. ອຕ຺ຖິຕນ຺ຕິ ສສ຺ສຕໍ. ນຕ຺ຖິຕນ຺ຕິ ອຸຈ຺ເຉທໍ. ໂລກສມຸທຍນ຺ຕິ ໂລໂກ ນາມ ສງ຺ຂາຣໂລໂກ, ຕສ຺ສ ນິພ຺ພຕ຺ຕິ. ສມ຺ມປ຺ປຎ຺ຎາຍ ປສ຺ສໂຕຕິ ສມ຺ມາປຎ຺ຎາ ນາມ ສວິປສ຺ສນາ ມຄ຺ຄປຎ຺ຎາ, ຕາຍ ປສ຺ສນ຺ຕສ຺ສາຕິ ອຕ຺ໂຖ. ຍາ ໂລເກ ນຕ຺ຖິຕາຕິ ສງ຺ຂາຣໂລເກ ນິພ຺ພຕ຺ເຕສຸ ຘມ຺ເມສຸ ປຎ຺ຎາຍນ຺ເຕສ຺ເວວ ຍາ ນຕ຺ຖີຕິ ອຸຈ຺ເຉທທິຏ຺ຐິ ອຸປ຺ປຊ຺ເຊຍ຺ຍ, ສາ ນ ໂຫຕີຕິ ອຕ຺ໂຖ. ໂລກນິໂຣຘນ຺ຕິ ສງ຺ຂາຣານໍ ຠງ຺ຄໍ. ຍາ ໂລເກ ອຕ຺ຖິຕາຕິ ສງ຺ຂາຣໂລເກ ຠິຊ຺ຊມາເນສຸ ຘມ຺ເມສຸ ປຎ຺ຎາຍນ຺ເຕສ຺ເວວ ຍາ ອຕ຺ຖີຕິ ສສ຺ສຕທິຏ຺ຐິ ອຸປ຺ປຊ຺ເຊຍ຺ຍ, ສາ ນ ໂຫຕີຕິ ອຕ຺ໂຖ.

ອປິຈ ໂລກສມຸທຍນ຺ຕິ ອນຸໂລມປຈ຺ຈຍາກາຣໍ. ໂລກນິໂຣຘນ຺ຕິ ປຏິໂລມປຈ຺ຈຍາກາຣໍ. ໂລກນິສ຺ສເຍ ປສ຺ສນ຺ຕສ຺ສາປິ ຫິ ປຈ຺ຈຍານໍ ອນຸຈ຺ເຉເທນ ປຈ຺ຈຍຸປ຺ປນ຺ນສ຺ສ ອນຸຈ຺ເຉທໍ ປສ຺ສໂຕ ຍາ ນຕ຺ຖີຕິ ອຸຈ຺ເຉທທິຏ຺ຐິ ອຸປ຺ປຊ຺ເຊຍ຺ຍ, ສາ ນ ໂຫຕິ. ປຈ຺ຈຍນິໂຣຘໍ ປສ຺ສນ຺ຕສ຺ສາປິ ປຈ຺ຈຍນິໂຣເຘນ ປຈ຺ຈຍຸປ຺ປນ຺ນນິໂຣຘໍ ປສ຺ສໂຕ ຍາ ອຕ຺ຖີຕິ ສສ຺ສຕທິຏ຺ຐິ ອຸປ຺ປຊ຺ເຊຍ຺ຍ, ສາ ນ ໂຫຕີຕິ ອຍມ຺ເປຕ຺ຖ ອຕ຺ໂຖ.

ອຸປຍຸປາທານາຠິນິເວສວິນິພນ຺ໂຘຕິ ອຸປເຍຫິ ຈ ອຸປາທາເນຫິ ຈ ອຠິນິເວເສຫິ ຈ ວິນິພນ຺ໂຘ. ຕຕ຺ຖ ອຸປຍາຕິ ທ຺ເວ ອຸປຍາ ຕຓ຺ຫຸປໂຍ ຈ ທິຏ຺ຐຸປໂຍ ຈ. ອຸປາທານາທີສຸປິ ເອເສວ ນໂຍ. ຕຓ຺ຫາທິຏ຺ຐິໂຍ ຫິ ຍສ຺ມາ ອຫໍ ມມນ຺ຕິອາທີຫິ ອາກາເຣຫິ ເຕຠູມກຘມ຺ເມ ອຸເປນ຺ຕິ ອຸປຄຈ຺ຉນ຺ຕິ, ຕສ຺ມາ ອຸປຍາຕິ ວຸຈ຺ຈນ຺ຕິ. ຍສ຺ມາ ປນ ເຕ ຘມ຺ເມ ອຸປາທິຍນ຺ຕິ ເຈວ ອຠິນິວິສນ຺ຕິ ຈ, ຕສ຺ມາ ອຸປາທານາຕິ ຈ ອຠິນິເວສາຕິ ຈ ວຸຈ຺ຈນ຺ຕິ. ຕາຫິ ຈາຍໍ ໂລໂກ ວິນິພນ຺ໂຘ. ເຕນາຫ ‘‘ອຸປຍຸປາທານາຠິນິເວສວິນິພນ຺ໂຘ’’ຕິ.

ຕຎ຺ຈາຍນ຺ຕິ ຕຎ຺ຈ ອຸປຍຸປາທານໍ ອຍໍ ອຣິຍສາວໂກ. ເຈຕໂສ ອຘິຏ຺ຐານນ຺ຕິ ຈິຕ຺ຕສ຺ສ ປຕິຏ຺ຐານຠູຕໍ. ອຠິນິເວສານຸສຍນ຺ຕິ ອຠິນິເວສຠູຕຎ຺ຈ ອນຸສຍຠູຕຎ຺ຈ. ຕຓ຺ຫາທິຏ຺ຐີສຸ ຫິ ອກຸສລຈິຕ຺ຕໍ ປຕິຏ຺ຐາຕິ, ຕາ ຈ ຕສ຺ມິໍ ອຠິນິວິສນ຺ຕິ ເຈວ ອນຸເສນ຺ຕິ ຈ, ຕສ຺ມາ ຕທຸຠຍໍ ເຈຕໂສ ອຘິຏ຺ຐານໍ ອຠິນິເວສານຸສຍນ຺ຕິ ຈ ອາຫ. ນ ອຸເປຕີຕິ ນ ອຸປຄຈ຺ຉຕິ. ນ ອຸປາທິຍຕີຕິ ນ ຄຓ຺ຫາຕິ. ນາຘິຏ຺ຐາຕີຕິ ນ ອຘິຏ຺ຐາຕິ, ກິນ຺ຕິ? ອຕ຺ຕາ ເມຕິ. ທຸກ຺ຂເມວາຕິ ປຎ຺ຈຸປາທານກ຺ຂນ຺ຘມຕ຺ຕເມວ. ນ ກງ຺ຂຕີຕິ ‘‘ທຸກ຺ຂເມວ ອຸປ຺ປຊ຺ຊຕິ, ທຸກ຺ຂໍ ນິຣຸຊ຺ຌຕິ, ນ ອຎ຺ໂຎ ເອຕ຺ຖ ສຕ຺ໂຕ ນາມ ອຕ຺ຖີ’’ຕິ ກງ຺ຂໍ ນ ກໂຣຕິ. ນ ວິຈິກິຈ຺ຉຕີຕິ ນ ວິຈິກິຈ຺ຉໍ ອຸປ຺ປາເທຕິ.

ອປຣປ຺ປຈ຺ຈຍາຕິ ນ ປຣປ຺ປຈ຺ຈເຍນ, ອຎ຺ຎສ຺ສ ອປຕ຺ຕິຍາເຍຕ຺ວາ ອຕ຺ຕປຈ຺ຈກ຺ຂຎາຓເມວສ຺ສ ເອຕ຺ຖ ໂຫຕີຕິ. ເອຕ຺ຕາວຕາ ໂຂ, ກຈ຺ຈານ, ສມ຺ມາທິຏ຺ຐິ ໂຫຕີຕິ ເອວໍ ສຕ຺ຕສຎ຺ຎາຍ ປຫີນຕ຺ຕາ ເອຕ຺ຕເກນ ສມ຺ມາທສ຺ສນໍ ນາມ ໂຫຕີຕິ ມິສ຺ສກສມ຺ມາທິຏ຺ຐິໍ ອາຫ. ອຍເມໂກ ອນ຺ໂຕຕິ ເອສ ເອໂກ ນິກູຏນ຺ໂຕ ລາມກນ຺ໂຕ ປຐມກໍ ສສ຺ສຕໍ. ອຍໍ ທຸຕິໂຍຕິ ເອສ ທຸຕິໂຍ ສພ຺ພໍ ນຕ຺ຖີຕິ ອຸປ຺ປຊ຺ຊນກທິຏ຺ຐິສງ຺ຂາໂຕ ນິກູຏນ຺ໂຕ ລາມກນ຺ໂຕ ທຸຕິຍໂກ ອຸຈ຺ເຉໂທຕິ ອຕ຺ໂຖ. ເສສເມຕ຺ຖ ອຸຕ຺ຕານເມວາຕິ. ປຎ຺ຈມໍ.