໙. ມານກາມສຸຕ຺ຕວຓ຺ຓນາ

໙. ນວເມ ມານກາມສ຺ສາຕິ ມານໍ ກາເມນ຺ຕສ຺ສ ອິຈ຺ຉນ຺ຕສ຺ສ. ທໂມຕິ ເອວຣູປສ຺ສ ປຸຄ຺ຄລສ຺ສ ສມາຘິປກ຺ຂິໂກ ທໂມ ນຕ຺ຖີຕິ ວທຕິ. ‘‘ສຈ຺ເຈນ ທນ຺ໂຕ ທມສາ ອຸເປໂຕ, ເວທນ຺ຕຄູ ວຸສິຕພ຺ຣຫ຺ມຈຣິໂຍ’’ຕິ (ສໍ. ນິ. ໑.໑໙໕) ເອຕ຺ຖ ຫິ ອິນ຺ທ຺ຣິຍສໍວໂຣ ທໂມຕິ ວຸຕ຺ໂຕ. ‘‘ຍທິ ສຈ຺ຈາ ທມາ ຈາຄາ, ຂນ຺ຕ຺ຍາ ຠິຍ຺ໂຍຘ ວິຊ຺ຊຕີ’’ຕິ (ສໍ. ນິ. ໑.໒໔໖; ສຸ. ນິ. ໑໙໑) ເອຕ຺ຖ ປຎ຺ຎາ. ‘‘ທາເນນ ທເມນ ສໍຍເມນ ສຈ຺ຈວຊ຺ເຊນ ອຕ຺ຖິ ປຸຎ຺ຎໍ, ອຕ຺ຖິ ປຸຎ຺ຎສ຺ສ ອາຄໂມ’’ຕິ (ສໍ. ນິ. ໔.໓໖໕) ເອຕ຺ຖ ອຸໂປສຖກມ຺ມໍ. ‘‘ສກ຺ຂິສ຺ສສິ ໂຂ ຕ຺ວໍ, ປຸຓ຺ຓ, ອິມິນາ ທມູປສເມນ ສມນ຺ນາຄໂຕ ສຸນາປຣນ຺ຕສ຺ມິໍ ຊນປເທ ວິຫຣິຕຸ’’ນ຺ຕິ (ສໍ. ນິ. ໔.໘໘; ມ. ນິ. ໓.໓໙໖) ເອຕ຺ຖ ອຘິວາສນຂນ຺ຕິ. ອິມສ຺ມິໍ ປນ ສຸຕ຺ເຕ ທໂມຕິ ສມາຘິປກ຺ຂິກຘມ຺ມານໍ ເອຕໍ ນາມໍ. ເຕເນວາຫ – ‘‘ນ ໂມນມຕ຺ຖິ ອສມາຫິຕສ຺ສາ’’ຕິ. ຕຕ຺ຖ ໂມນນ຺ຕິ ຈຕຸມຄ຺ຄຎາຓໍ, ຕຎ຺ຫິ ມຸນາຕີຕິ ໂມນໍ, ຈຕຸສຈ຺ຈຘມ຺ເມ ຊານາຕີຕິ ອຕ຺ໂຖ. ມຈ຺ຈຸເຘຍ຺ຍສ຺ສາຕິ ເຕຠູມກວຏ຺ຏສ຺ສ. ຕຎ຺ຫິ ມຈ຺ຈຸໂນ ປຕິຏ຺ຐານຏ຺ເຐນ ມຈ຺ຈຸເຘຍ຺ຍນ຺ຕິ ວຸຈ຺ຈຕິ. ປາຣນ຺ຕິ ຕສ຺ເສວ ປາຣໍ ນິພ຺ພານໍ. ຕເຣຍ຺ຍາຕິ ປຏິວິຊ຺ເຌຍ຺ຍ ປາປຸເຓຍ຺ຍ ວາ. ອິທໍ ວຸຕ຺ຕໍ ໂຫຕິ – ເອໂກ ອຣຎ຺ເຎ ວິຫຣນ຺ໂຕ ປມຕ຺ໂຕ ປຸຄ຺ຄໂລ ມຈ຺ຈຸເຘຍ຺ຍສ຺ສ ປາຣໍ ນ ຕເຣຍ຺ຍ ນ ປຏິວິຊ຺ເຌຍ຺ຍ ນ ປາປຸເຓຍ຺ຍາຕິ.

ມານໍ ປຫາຍາຕິ ອຣຫຕ຺ຕມຄ຺ເຄນ ນວວິຘມານໍ ປຊຫິຕ຺ວາ. ສຸສມາຫິຕຕ຺ໂຕຕິ ອຸປຈາຣປ຺ປນາສມາຘີຫິ ສຸຏ຺ຐຸ ສມາຫິຕຕ຺ໂຕ. ສຸເຈຕໂສຕິ ຎາຓສມ຺ປຍຸຕ຺ຕຕາຍ ສຸນ຺ທຣຈິຕ຺ໂຕ. ຎາຓວິປ຺ປຍຸຕ຺ຕຈິຕ຺ເຕນ ຫິ ສຸເຈຕໂສຕິ ນ ວຸຈ຺ຈຕິ, ຕສ຺ມາ ຎາຓສມ຺ປຍຸຕ຺ເຕນ ສຸເຈຕໂສ ຫຸຕ຺ວາຕິ ອຕ຺ໂຖ. ສພ຺ພຘິ ວິປ຺ປມຸຕ຺ໂຕຕິ ສພ຺ເພສຸ ຂນ຺ຘາຍຕນາທີສຸ ວິປ຺ປມຸຕ຺ໂຕ ຫຸຕ຺ວາ. ຕເຣຍ຺ຍາຕິ ເອຕ຺ຖ ເຕຠູມກວຏ຺ຏໍ ສມຕິກ຺ກມນ຺ໂຕ ນິພ຺ພານໍ ປຏິວິຊ຺ຌນ຺ໂຕ ຕຣຕີຕິ ປຏິເວຘຕຣຓໍ ນາມ ວຸຕ຺ຕໍ. ອິຕິ ອິມາຍ ຄາຖາຍ ຕິສ຺ໂສ ສິກ຺ຂາ ກຖິຕາ ໂຫນ຺ຕິ. ກຖໍ – ມາໂນ ນາມາຍໍ ສີລເຠທໂນ, ຕສ຺ມາ ‘‘ມານໍ ປຫາຍາ’’ຕິ ອິມິນາ ອຘິສີລສິກ຺ຂາ ກຖິຕາ ໂຫຕິ. ‘‘ສຸສມາຫິຕຕ຺ໂຕ’’ຕິ ອິມິນາ ອຘິຈິຕ຺ຕສິກ຺ຂາ. ‘‘ສຸເຈຕໂສ’’ຕິ ເອຕ຺ຖ ຈິຕ຺ເຕນ ປຎ຺ຎາ ທສ຺ສິຕາ, ຕສ຺ມາ ອິມິນາ ອຘິປຎ຺ຎາສິກ຺ຂາ ກຖິຕາ. ອຘິສີລຎ຺ຈ ນາມ ສີເລ ສຕິ ໂຫຕິ, ອຘິຈິຕ຺ຕໍ ຈິຕ຺ເຕ ສຕິ, ອຘິປຎ຺ຎາ ປຎ຺ຎາຍ ສຕິ. ຕສ຺ມາ ສີລໍ ນາມ ປຎ຺ຈປິ ທສປິ ສີລານິ, ປາຕິໂມກ຺ຂສໍວໂຣ ອຘິສີລໍ ນາມາຕິ ເວທິຕພ຺ພໍ. ອຏ຺ຐ ສມາປຕ຺ຕິໂຍ ຈິຕ຺ຕໍ, ວິປສ຺ສນາປາທກຊ຺ຌານໍ ອຘິຈິຕ຺ຕໍ. ກມ຺ມສ຺ສກຕຎາຓໍ ປຎ຺ຎາ, ວິປສ຺ສນາ ອຘິປຎ຺ຎາ. ອນຸປ຺ປນ຺ເນປິ ຫິ ພຸທ຺ຘຸປ຺ປາເທ ປວຕ຺ຕຕີຕິ ປຎ຺ຈສີລໍ ທສສີລໍ ສີລເມວ, ປາຕິໂມກ຺ຂສໍວຣສີລໍ ພຸທ຺ຘຸປ຺ປາເທເຍວ ປວຕ຺ຕຕີຕິ ອຘິສີລໍ. ຈິຕ຺ຕປຎ຺ຎາສຸປິ ເອເສວ ນໂຍ. ອປິຈ ນິພ຺ພານໍ ປຕ຺ຖຍນ຺ເຕນ ສມາທິນ຺ນໍ ປຎ຺ຈສີລມ຺ປິ ທສສີລມ຺ປິ ອຘິສີລເມວ. ສມາປນ຺ນາ ອຏ຺ຐ ສມາປຕ຺ຕິໂຍປິ ອຘິຈິຕ຺ຕເມວ. ສພ຺ພມ຺ປິ ວາ ໂລກິຍສີລໍ ສີລເມວ, ໂລກຸຕ຺ຕຣໍ ອຘິສີລໍ. ຈິຕ຺ຕປຎ຺ຎາສຸປິ ເອເສວ ນໂຍຕິ. ອິຕິ ອິມາຍ ຄາຖາຍ ສໂມຘາເນຕ຺ວາ ຕິສ຺ໂສ ສິກ຺ຂາ ສກລສາສນໍ ກຖິຕໍ ໂຫຕີຕິ.

ມານກາມສຸຕ຺ຕວຓ຺ຓນາ ນິຏ຺ຐິຕາ.