໗. ອປ຺ປຏິວິທິຕສຸຕ຺ຕວຓ຺ຓນາ

໗. ສຕ຺ຕເມ ຘມ຺ມາຕິ ຈຕຸສຈ຺ຈຘມ຺ມາ. ອປ຺ປຏິວິທິຕາຕິ ຎາເຓນ ອປ຺ປຏິວິທ຺ຘາ. ປຣວາເທສູຕິ ທ຺ວາສຏ຺ຐິທິຏ຺ຐິຄຕວາເທສຸ. ເຕ ຫິ ອິໂຕ ປເຣສໍ ຕິຕ຺ຖິຍານໍ ວາທຕ຺ຕາ ປຣວາທາ ນາມ. ນີຍເຣຕິ ອຕ຺ຕໂນ ຘມ຺ມຕາຍປິ ຄຈ຺ຉນ຺ຕິ, ປເຣນປິ ນີຍນ຺ຕິ. ຕຕ຺ຖ ສຍເມວ ສສ຺ສຕາທີນິ ຄຓ຺ຫນ຺ຕາ ຄຈ຺ຉນ຺ຕິ ນາມ, ປຣສ຺ສ ວຈເນນ ຕານິ ຄຓ຺ຫນ຺ຕາ ນີຍນ຺ຕິ ນາມ. ກາໂລ ເຕສໍ ປພຸຊ຺ຌິຕຸນ຺ຕິ ເຕສໍ ປຸຄ຺ຄລານໍ ປພຸຊ຺ຌິຕຸໍ ອຍໍ ກາໂລ. ໂລກສ຺ມິຎ຺ຫິ ພຸທ຺ໂຘ ອຸປ຺ປນ຺ໂນ, ຘມ຺ໂມ ເທສິຍຕິ, ສງ຺ໂຆ ສຸປ຺ປຏິປນ຺ໂນ, ປຏິປທາ ຠທ຺ທິກາ, ອິເມ ຈ ປນ ມຫາຊນາ ວຏ຺ເຏ ສຸຕ຺ຕາ ນປ຺ປພຸຊ຺ຌນ຺ຕີຕິ ເທວຕາ ອາຫ. ສມ຺ພຸທ຺ຘາຕິ ສມ຺ມາ ເຫຕຸນາ ກາຣເຓນ ພຸທ຺ຘາ. ຈຕ຺ຕາໂຣ ຫິ ພຸທ຺ຘາ – ສພ຺ພຎ຺ຎຸພຸທ຺ໂຘ, ປຈ຺ເຈກພຸທ຺ໂຘ, ຈຕຸສຈ຺ຈພຸທ຺ໂຘ, ສຸຕພຸທ຺ໂຘຕິ. ຕຕ຺ຖ ສມຕິໍສປາຣມິໂຍ ປູເຣຕ຺ວາ ສມ຺ມາສມ຺ໂພຘິໍ ປຕ຺ໂຕ ສພ຺ພຎ຺ຎຸພຸທ຺ໂຘ ນາມ. ກປ຺ປສຕສຫສ຺ສາຘິການິ ທ຺ເວ ອສງ຺ຂ຺ເຍຍ຺ຍານິ ປາຣມິໂຍ ປູເຣຕ຺ວາ ສຍມ຺ຠຸຕໍ ປຕ຺ໂຕ ປຈ຺ເຈກພຸທ຺ໂຘ ນາມ. ອວເສສາ ຂີຓາສວາ ຈຕຸສຈ຺ຈພຸທ຺ຘາ ນາມ. ພຫຸສ຺ສຸໂຕ ສຸຕພຸທ຺ໂຘ ນາມ. ອິມສ຺ມິໍ ອຕ຺ເຖ ຕໂຍປິ ປຸຣິມາ ວຏ຺ຏນ຺ຕິ. ສມ຺ມທຎ຺ຎາຕິ ສມ຺ມາ ເຫຕຸນາ ກາຣເຓນ ຊານິຕ຺ວາ. ຈຣນ຺ຕິ ວິສເມ ສມນ຺ຕິ ວິສເມ ວາ ໂລກສນ຺ນິວາເສ ວິສເມ ວາ ສຕ຺ຕນິກາເຍ ວິສເມ ວາ ກິເລສຊາເຕ ສມໍ ຈຣນ຺ຕີຕິ.

ອປ຺ປຏິວິທິຕສຸຕ຺ຕວຓ຺ຓນາ ນິຏ຺ຐິຕາ.