໔. ອຈ຺ເຈນ຺ຕິສຸຕ຺ຕວຓ຺ຓນາ

໔. ຈຕຸຕ຺ເຖ ອຈ຺ເຈນ຺ຕີຕິ ອຕິກ຺ກມນ຺ຕິ. ກາລາຕິ ປຸເຣຠຕ຺ຕາທໂຍ ກາລາ. ຕຣຍນ຺ຕິ ຣຕ຺ຕິໂຍຕິ ຣຕ຺ຕິໂຍ ອຕິກ຺ກມມານາ ປຸຄ຺ຄລໍ ມຣຓູປຄມນາຍ ຕຣຍນ຺ຕິ ສີຆໍ ສີຆໍ ຄມຍນ຺ຕິ. ວໂຍຄຸຓາຕິ ປຐມມຊ຺ຌິມປຈ຺ຉິມວຍານໍ ຄຸຓາ, ຣາສໂຍຕິ ອຕ຺ໂຖ. ‘‘ອນຸຊານາມິ, ຠິກ຺ຂເວ, ອຫຕານໍ ວຕ຺ຖານໍ ທິຄຸຓໍ ສງ຺ຆາຏິ’’ນ຺ຕິ (ມຫາວ. ໓໔໘) ເອຕ຺ຖ ຫິ ປຏລຏ຺ໂຐ ຄຸຓຏ຺ໂຐ. ‘‘ສຕຄຸຓາ ທກ຺ຂິຓາ ປາຏິກງ຺ຂິຕພ຺ພາ’’ຕິ (ມ. ນິ. ໓.໓໗໙) ເອຕ຺ຖ ອານິສໍສຏ຺ໂຐ. ‘‘ອນ຺ຕໍ ອນ຺ຕຄຸຓ’’ນ຺ຕິ ເອຕ຺ຖ ໂກຏ຺ຐາສຏ຺ໂຐ. ‘‘ກຍິຣາ ມາລາຄຸເຓ ພຫູ’’ຕິ (ຘ. ປ. ໕໓) ເອຕ຺ຖ ຣາສຏ຺ໂຐ. ‘‘ປຎ຺ຈ ກາມຄຸຓາ’’ຕິ ເອຕ຺ຖ ພນ຺ຘນຏ຺ໂຐ. ອິຘ ປນ ຣາສຏ຺ໂຐ ຄຸຓຏ຺ໂຐ. ຕສ຺ມາ ວໂຍຄຸຓາຕິ ວໂຍຣາສໂຍ ເວທິຕພ຺ພາ. ອນຸປຸພ຺ພໍ ຊຫນ຺ຕີຕິ ອນຸປຏິປາຏິຍາ ປຸຄ຺ຄລໍ ຊຫນ຺ຕິ. ມຊ຺ຌິມວເຍ ຐິຕໍ ຫິ ປຐມວໂຍ ຊຫຕິ, ປຈ຺ຉິມວເຍ ຐິຕໍ ທ຺ເວ ປຐມມຊ຺ຌິມາ ຊຫນ຺ຕິ, ມຣຓກ຺ຂເຓ ປນ ຕໂຍປິ ວຍາ ຊຫນ຺ເຕວ. ເອຕໍ ຠຍນ຺ຕິ ເອຕໍ ກາລານໍ ອຕິກ຺ກມນໍ, ຣຕ຺ຕິທິວານໍ ຕຣິຕຠາໂວ, ວໂຍຄຸຓານໍ ຊຫນຠາໂວຕິ ຕິວິຘໍ ຠຍໍ. ເສສໍ ປຸຣິມສທິສເມວາຕິ.

ອຈ຺ເຈນ຺ຕິສຸຕ຺ຕວຓ຺ຓນາ ນິຏ຺ຐິຕາ.