໘. ອຸທ຺ເທສວິຠງ຺ຄສຸຕ຺ຕວຓ຺ຓນາ

໓໑໓. ເອວໍ ເມ ສຸຕນ຺ຕິ ອຸທ຺ເທສວິຠງ຺ຄສຸຕ຺ຕໍ. ຕຕ຺ຖ ອຸທ຺ເທສວິຠງ຺ຄນ຺ຕິ ອຸທ຺ເທສຎ຺ຈ ວິຠງ຺ຄຎ຺ຈ, ມາຕິກຎ຺ຈ ວິຠຊນຎ຺ຈາຕິ ອຕ຺ໂຖ. ອຸປປຣິກ຺ເຂຍ຺ຍາຕິ ຕຸເລຍ຺ຍ ຕີເຣຍ຺ຍ ປຣິຄ຺ຄຓ຺ເຫຍ຺ຍ ປຣິຈ຺ຉິນ຺ເທຍ຺ຍ. ພຫິທ຺ຘາຕິ ພຫິທ຺ຘາອາຣມ຺ມເຓສຸ. ອວິກ຺ຂິຕ຺ຕໍ ອວິສຏນ຺ຕິ ນິກນ຺ຕິວເສນ ອາຣມ຺ມເຓ ຕິຏ຺ຐມານໍ ວິກ຺ຂິຕ຺ຕໍ ວິສຏໍ ນາມ ໂຫຕິ, ຕໍ ປຏິເສເຘນ຺ໂຕ ເອວມາຫ. ອຊ຺ຌຕ຺ຕໍ ອສຓ຺ຐິຕນ຺ຕິ ໂຄຈຣຊ຺ຌຕ຺ເຕ ນິກນ຺ຕິວເສນ ອສຓ຺ຐິຕໍ. ອນຸປາທາຍ ນ ປຣິຕສ຺ເສຍ຺ຍາຕິ ອນຸປາທິຍິຕ຺ວາ ອຄ຺ຄເຫຕ຺ວາ ຕໍ ວິຎ຺ຎາຓໍ ນ ປຣິຕສ຺ເສຍ຺ຍ. ຍຖາ ວິຎ຺ຎາຓໍ ພຫິທ຺ຘາ ອວິກ຺ຂິຕ຺ຕໍ ອວິສຏໍ, ອຊ຺ຌຕ຺ຕໍ ອສຓ຺ຐິຕໍ ອນຸປາທາຍ ນ ປຣິຕສ຺ເສຍ຺ຍ, ເອວໍ ຠິກ຺ຂຸ ອຸປປຣິກ຺ເຂຍ຺ຍາຕິ ວຸຕ຺ຕໍ ໂຫຕິ. ຊາຕິຊຣາມຣຓທຸກ຺ຂສມຸທຍສມ຺ຠໂວຕິ ຊາຕິຊຣາມຣຓສ຺ສ ເຈວ ອວເສສສ຺ສ ຈ ທຸກ຺ຂສ຺ສ ນິພ຺ພຕ຺ຕິ ນ ໂຫຕີຕິ ອຕ຺ໂຖ.

໓໑໖. ຣູປນິມິຕ຺ຕານຸສາຣີຕິ ຣູປນິມິຕ຺ຕໍ ອນຸສ຺ສຣຕິ ອນຸຘາວຕີຕິ ຣູປນິມິຕ຺ຕານຸສາຣີ.

໓໑໘. ເອວໍ ໂຂ, ອາວຸໂສ, ອຊ຺ຌຕ຺ຕໍ ອສຓ຺ຐິຕນ຺ຕິ ນິກນ຺ຕິວເສນ ອສຓ຺ຐິຕໍ. ນິກນ຺ຕິວເສນ ຫິ ອຕິຏ຺ຐມານໍ ຫານຠາຄິຍໍ ນ ໂຫຕິ, ວິເສສຠາຄິຍເມວ ໂຫຕິ.

໓໒໐. ອນຸປາທາ ປຣິຕສ຺ສນາຕິ ສຕ຺ຖາຣາ ຂນ຺ຘິຍວຄ຺ເຄ ‘‘ອຸປາທາປຣິຕສ຺ສນຎ຺ຈ ໂວ, ຠິກ຺ຂເວ, ເທເສສ຺ສາມິ ອນຸປາທາອປຣິຕສ຺ສນຎ຺ຈາ’’ຕິ (ສໍ. ນິ. ໓.໗) ເອວໍ ຄເຫຕ຺ວາ ປຣິຕສ຺ສນາ, ອຄ຺ຄເຫຕ຺ວາວ ອປຣິຕສ຺ສນາ ຈ ກຖິຕາ, ຕໍ ມຫາເຖໂຣ ອຸປາທາປຣິຕສ຺ສນເມວ ອນຸປາທາປຣິຕສ຺ສນນ຺ຕິ ກຕ຺ວາ ທສ຺ເສນ຺ໂຕ ເອວມາຫ. ກຖໍ ປເນສາ ອນຸປາທາປຣິຕສ຺ສນາ ໂຫຕີຕິ. ອຸປາທາຕພ຺ພສ຺ສ ອຠາວໂຕ. ຍທິ ຫິ ໂກຈິ ສງ຺ຂາໂຣ ນິຈ຺ໂຈ ວາ ຘຸໂວ ວາ ອຕ຺ຕາ ວາ ອຕ຺ຕນິໂຍ ວາຕິ ຄເຫຕພ຺ພຍຸຕ຺ຕໂກ ອຠວິສ຺ສ, ອຍໍ ປຣິຕສ຺ສນາ ອຸປາທາປຣິຕສ຺ສນາວ ອສ຺ສ. ຍສ຺ມາ ປນ ເອວໍ ອຸປາທາຕພ຺ໂພ ສງ຺ຂາໂຣ ນາມ ນຕ຺ຖິ, ຕສ຺ມາ ຣູປໍ ອຕ຺ຕາຕິອາທິນາ ນເຍນ ຣູປາທໂຍ ອຸປາທິນ຺ນາປິ ອນຸປາທິນ຺ນາວ ໂຫນ຺ຕິ. ເອວເມສາ ທິຏ຺ຐິວເສນ ອຸປາທາປຣິຕສ຺ສນາປິ ສມານາ ອຕ຺ຖໂຕ ອນຸປາທາປຣິຕສ຺ສນາເຍວ ນາມ ໂຫຕີຕິ ເວທິຕພ຺ພາ.

ອຎ຺ຎຖາ ໂຫຕີຕິ ປຣິວຕ຺ຕຕິ ປກຕິຊຫເນນ ນສ຺ສຕິ, ຣູປວິປຣິຓາມານຸປຣິວຕ຺ຕີຕິ ‘‘ມມ ຣູປໍ ວິປຣິຓຕ’’ນ຺ຕິ ວາ, ‘‘ຍໍ ອຫຸ, ຕໍ ວຕ ເມ ນຕ຺ຖີ’’ຕິ ວາ ອາທິນາ (ມ. ນິ. ໑.໒໔໒) ນເຍນ ກມ຺ມວິຎ຺ຎາຓໍ ຣູປສ຺ສ ເຠທານຸປຣິວຕ຺ຕິ ໂຫຕິ. ວິປຣິຓາມານຸປຣິວຕ຺ຕຊາຕິ ວິປຣິຓາມສ຺ສ ອນຸປຣິວຕ຺ຕນໂຕ ວິປຣິຓາມາຣມ຺ມຓຈິຕ຺ຕໂຕ ຊາຕາ. ປຣິຕສ຺ສນາ ຘມ຺ມສມຸປ຺ປາທາຕິ ຕຓ຺ຫາປຣິຕສ຺ສນາ ຈ ອກຸສລຘມ຺ມສມຸປ຺ປາທາ ຈ. ຈິຕ຺ຕໍ ປຣິຍາທາຍ ຕິຏ຺ຐນ຺ຕີຕິ ກຸສລຈິຕ຺ຕໍ ປຣິຍາທິຍິຕ຺ວາ ຄເຫຕ຺ວາ ເຂເປຕ຺ວາ ຕິຏ຺ຐນ຺ຕິ. ອຸຕ຺ຕາສວາຕິ ຠຍຕາເສນປິ ສອຸຕ຺ຕາໂສ ຕຓ຺ຫາຕາເສນປິ ສອຸຕ຺ຕາໂສ. ວິຆາຕວາຕິ ສວິຆາໂຕ ສທຸກ຺ໂຂ. ອເປກ຺ຂວາຕິ ສາລໂຍ ສສິເນໂຫ. ເອວໍ ໂຂ, ອາວຸໂສ, ອນຸປາທາ ປຣິຕສ຺ສນາ ໂຫຕີຕິ ເອວໍ ມຓິກຣຓ຺ຑກສຎ຺ຎາຍ ຕຸຈ຺ຉກຣຓ຺ຑກໍ ຄເຫຕ຺ວາ ຕສ຺ມິໍ ນຏ຺ເຐ ປຈ຺ຉາ ວິຆາຕໍ ອາປຊ຺ຊນ຺ຕສ຺ສ ວິຍ ປຈ຺ຉາ ອຄ຺ຄເຫຕ຺ວາ ປຣິຕສ຺ສນາ ໂຫຕິ.

໓໒໑. ນ ຈ ຣູປວິປຣິຓາມານຸປຣິວຕ຺ຕີຕິ ຂີຓາສວສ຺ສ ກມ຺ມວິຎ຺ຎາຓເມວ ນຕ຺ຖິ, ຕສ຺ມາ ຣູປເຠທານຸປຣິວຕ຺ຕິ ນ ໂຫຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ອຸທ຺ເທສວິຠງ຺ຄສຸຕ຺ຕວຓ຺ຓນາ ນິຏ຺ຐິຕາ.