໖. ມຫາກມ຺ມວິຠງ຺ຄສຸຕ຺ຕວຓ຺ຓນາ

໒໙໘. ເອວໍ ເມ ສຸຕນ຺ຕິ ມຫາກມ຺ມວິຠງ຺ຄສຸຕ຺ຕໍ. ຕຕ຺ຖ ໂມຆນ຺ຕິ ຕຸຈ຺ຉໍ ອຜລໍ. ສຈ຺ຈນ຺ຕິ ຕຖໍ ຠູຕໍ. ອິທຎ຺ຈ ເອເຕນ ນ ສມ຺ມຸຂາ ສຸຕໍ, ອຸປາລິສຸຕ຺ເຕ (ມ. ນິ. ໒.໕໖) ປນ – ‘‘ມໂນກມ຺ມໍ ມຫາສາວຊ຺ຊຕຣໍ ປຎ຺ຎເປມິ ປາປສ຺ສ ກມ຺ມສ຺ສ ກິຣິຍາຍ ປາປສ຺ສ ກມ຺ມສ຺ສ ປວຕ຺ຕິຍາ, ໂນ ຕຖາ ກາຍກມ຺ມໍ ໂນ ຕຖາ ວຈີກມ຺ມ’’ນ຺ຕິ ຠຄວຕາ ວຸຕ຺ຕໍ ອຕ຺ຖິ, ສາ ກຖາ ຕິຕ຺ຖິຍານໍ ອນ຺ຕເຣ ປາກຏາ ຊາຕາ, ຕໍ ຄເຫຕ຺ວາ ເອສ ວທຕິ. ອຕ຺ຖິ ຈ ສາ ສມາປຕ຺ຕີຕິ ອິທໍ – ‘‘ກຖໍ ນຸ ໂຂ, ໂຠ, ອຠິສຎ຺ຎານິໂຣໂຘ ໂຫຕີ’’ຕິ ໂປຏ຺ຐປາທສຸຕ຺ເຕ (ທີ. ນິ. ໑.໔໐໖ ອາທໂຍ) ອຸປ຺ປນ຺ນໍ ອຠິສຎ຺ຎານິໂຣຘກຖໍ ສນ຺ຘາຍ ວທຕິ. ນ ກິຎ຺ຈິ ເວທິຍຕີຕິ ເອກເວທນມ຺ປິ ນ ເວທິຍຕິ. ອຕ຺ຖິ ຈ ໂຂຕິ ເຖໂຣ ນິໂຣຘສມາປຕ຺ຕິໍ ສນ຺ຘາຍ ອນຸຊານາຕິ. ປຣິຣກ຺ຂິຕພ຺ພນ຺ຕິ ຄຣຫໂຕ ໂມຈເນນ ຣກ຺ຂິຕພ຺ພໍ. ສຎ຺ເຈຕນາ ອສ຺ສ ອຕ຺ຖີຕິ ສຎ຺ເຈຕນິກໍ, ສາຠິສນ຺ຘິກໍ ສຎ຺ເຈຕນິກກມ຺ມໍ ກຕ຺ວາຕິ ອຕ຺ໂຖ. ທຸກ຺ຂໍ ໂສຕິ ເຖໂຣ ‘‘ອກຸສລເມວ ສນ຺ຘາຍ ປຣິພ຺ພາຊໂກ ປຸຈ຺ຉຕີ’’ຕິ ສຎ຺ຎາຍ ເອວໍ ວທຕິ.

ທສ຺ສນມ຺ປິ ໂຂ ອຫນ຺ຕິ ຠຄວາ ຈຕຸຣງ຺ເຄປິ ອນ຺ຘກາເຣ ສມນ຺ຕາ ໂຍຊນຏ຺ຐາເນ ຕິລມຕ຺ຕມ຺ປິ ສງ຺ຂາຣໍ ມໍສຈກ຺ຂຸນາວ ປສ຺ສຕິ, ອຍຎ຺ຈ ປຣິພ຺ພາຊໂກ ນ ທູເຣ ຄາວຸຕມຕ຺ຕພ຺ຠນ຺ຕເຣ ວສຕິ, ກສ຺ມາ ຠຄວາ ເອວມາຫາຕິ? ສມາຄມທສ຺ສນໍ ສນ຺ຘາເຍວມາຫ.

໒໙໙. ອຸທາຍີຕິ ລາລຸທາຍີ. ຕໍ ທຸກ຺ຂສ຺ມິນ຺ຕິ ສພ຺ພໍ ຕໍ ທຸກ຺ຂເມວ. ອິຕິ ອິມໍ ວຏ຺ຏທຸກ຺ຂໍ ກິເລສທຸກ຺ຂໍ ສງ຺ຂາຣທຸກ຺ຂໍ ສນ຺ຘາຍ ‘‘ສເຈ ຠາສິຕໍ ຠເວຍ຺ຍ ຠຄວາ’’ຕິ ປຸຈ຺ຉຕິ.

໓໐໐. ອຸມ຺ມງ຺ຄນ຺ຕິ ປຎ຺ຫາອຸມ຺ມງ຺ຄໍ. ອຸມ຺ມຸຊ຺ຊມາໂນຕິ ສີສໍ ນີຫຣມາໂນ. ອໂຍນິໂສ ອຸມ຺ມຸຊ຺ຊິສ຺ສຕີຕິ ອນຸປາເຍນ ສີສໍ ນີຫຣິສ຺ສຕິ. ອິທຎ຺ຈ ປນ ຠຄວາ ຊານນ຺ໂຕ ເນວ ທິພ຺ພຈກ຺ຂຸນາ ນ ເຈໂຕປຣິຍຎາເຓນ ນ ສພ຺ພຎ຺ຎຸຕຎາເຓນ ຊານິ, ອຘິປ຺ປາເຍເນວ ປນ ອຎ຺ຎາສິ. ກເຖນ຺ຕສ຺ສ ຫິ ອຘິປ຺ປາໂຍ ນາມ ສຸວິຊາໂນ ໂຫຕິ, ກເຖຕຸກາໂມ ຄີວໍ ປຄ຺ຄຓ຺ຫາຕິ, ຫນຸກໍ ຈາເລຕິ, ມຸຂມສ຺ສ ຜນ຺ທຕິ, ສນ຺ນິສີທິຕຸໍ ນ ສກ຺ໂກຕິ. ຠຄວາ ຕສ຺ສ ຕໍ ອາກາຣໍ ທິສ຺ວາ ‘‘ອຍໍ ອຸທາຍີ ສນ຺ນິສີທິຕຸໍ ນ ສກ຺ໂກຕິ, ຍໍ ອຠູຕໍ, ຕເທວ ກເຖສ຺ສຕີ’’ຕິ ໂອໂລເກຕ຺ວາວ ອຎ຺ຎາສິ. ອາທິໍ ເຍວາຕິອາທິມ຺ຫິເຍວ. ຕິສ຺ໂສ ເວທນາຕິ ‘‘ກິໍ ໂສ ເວທິຍຕີ’’ຕິ? ປຸຈ຺ຉນ຺ເຕນ ‘‘ຕິສ຺ໂສ ເວທນາ ປຸຈ຺ຉາມີ’’ຕິ ເອວໍ ວວຕ຺ຖເປຕ຺ວາວ ຕິສ຺ໂສ ເວທນາ ປຸຈ຺ຉິຕາ. ສຸຂເວທນິຍນ຺ຕິ ສຸຂເວທນາຍ ປຈ຺ຈຍຠູຕໍ. ເສເສສຸປິ ເອເສວ ນໂຍ.

ເອຕ຺ຖ ຈ ກາມາວຈຣກຸສລໂຕ ໂສມນສ຺ສສຫຄຕຈິຕ຺ຕສມ຺ປຍຸຕ຺ຕາ ຈຕສ຺ໂສ ເຈຕນາ, ເຫຏ຺ຐາ ຕິກຊ຺ຌານເຈຕນາຕິ ເອວໍ ປຏິສນ຺ຘິປວຕ຺ເຕສຸ ສຸຂເວທນາຍ ຊນນໂຕ ສຸຂເວທນິຍໍ ກມ຺ມໍ ນາມ. ກາມາວຈຣຎ຺ເຈຕ຺ຖ ປຏິສນ຺ຘິຍໍເຍວ ເອກນ຺ເຕນ ສຸຂໍ ຊເນຕິ, ປວຕ຺ເຕ ອິຏ຺ຐມຊ຺ຌຕ຺ຕາຣມ຺ມເຓ ອທຸກ຺ຂມສຸຂມ຺ປິ.

ອກຸສລເຈຕນາ ປຏິສນ຺ຘິປວຕ຺ເຕສຸ ທຸກ຺ຂສ຺ເສວ ຊນນໂຕ ທຸກ຺ຂເວທນິຍໍ ກມ຺ມໍ ນາມ. ກາຍທ຺ວາເຣ ປວຕ຺ເຕເຍວ ເຈຕໍ ເອກນ຺ເຕນ ທຸກ຺ຂໍ ຊເນຕິ, ອຎ຺ຎຕ຺ຖ ອທຸກ຺ຂມສຸຂມ຺ປິ, ສາ ປນ ເວທນາ ອນິຏ຺ຐານິຏ຺ຐມຊ຺ຌຕ຺ເຕສຸເຍວ ອາຣມ຺ມເຓສຸ ອຸປ຺ປຊ຺ຊນໂຕ ທຸກ຺ຂາຕ຺ເວວ ສງ຺ຂໍ ຄຕາ.

ກາມາວຈຣກຸສລໂຕ ປນ ອຸເປກ຺ຂາສຫຄຕຈິຕ຺ຕສມ຺ປຍຸຕ຺ຕາ ຈຕສ຺ໂສ ເຈຕນາ, ຣູປາວຈຣກຸສລໂຕ ຈຕຸຕ຺ຖຊ຺ຌານເຈຕນາຕິ ເອວໍ ປຏິສນ຺ຘິປວຕ຺ເຕສຸ ຕຕິຍເວທນາຍ ຊນນໂຕ ອທຸກ຺ຂມສຸຂເວທນິຍໍ ກມ຺ມໍ ນາມ. ເອຕ຺ຖ ຈ ກາມາວຈຣໍ ປຏິສນ຺ຘິຍໍເຍວ ເອກນ຺ເຕນ ອທຸກ຺ຂມສຸຂໍ ຊເນຕິ, ປວຕ຺ເຕ ອິຏ຺ຐາຣມ຺ມເຓ ສຸຂມ຺ປິ. ອປິຈ ສຸຂເວທນິຍກມ຺ມໍ ປຏິສນ຺ຘິປວຕ຺ຕິວເສນ ວຏ຺ຏຕິ, ຕຖາ ອທຸກ຺ຂມສຸຂເວທນິຍໍ, ທຸກ຺ຂເວທນິຍໍ ປວຕ຺ຕິວເສເນວ ວຏ຺ຏຕິ. ເອຕສ຺ສ ປນ ວເສນ ສພ຺ພໍ ປວຕ຺ຕິວເສເນວ ວຏ຺ຏຕິ.

ເອຕສ຺ສ ຠຄວາຕິ ເຖໂຣ ຕຖາຄເຕນ ມຫາກມ຺ມວິຠງ຺ຄກຖນຕ຺ຖໍ ອາລໂຍ ທສ຺ສິໂຕ, ຕຖາຄຕໍ ຍາຈິຕ຺ວາ ມຫາກມ຺ມວິຠງ຺ຄຎາຓໍ ຠິກ຺ຂຸສງ຺ຆສ຺ສ ປາກຏໍ ກຣິສ຺ສາມີຕິ ຈິນ຺ເຕຕ຺ວາ ອນຸສນ຺ຘິກຸສລຕາຍ ເອວມາຫ. ຕຕ຺ຖ ມຫາກມ຺ມວິຠງ຺ຄນ຺ຕິ ມຫາກມ຺ມວິຠຊນໍ. ກຕເມ ຈຕ຺ຕາໂຣ…ເປ… ອິຘານນ຺ທ, ເອກຈ຺ໂຈ ປຸຄ຺ຄໂລ…ເປ… ນິຣຍໍ ອຸປປຊ຺ຊຕີຕິ ອິທໍ ນ ມຫາກມ຺ມວິຠງ຺ຄຎາຓຠາຊນໍ, ມຫາກມ຺ມວິຠງ຺ຄຎາຓຠາຊນຕ຺ຖາຍ ປນ ມາຕິກາຏ຺ຐປນໍ.

໓໐໑. ອິຘານນ຺ທ, ເອກຈ຺ໂຈ ສມໂຓ ວາຕິ ປາຏິເຍກ຺ໂກ ອນຸສນ຺ຘິ. ອິທຎ຺ຫິ ຠຄວາ – ‘‘ທິພ຺ພຈກ຺ຂຸກາ ສມຓພ຺ຣາຫ຺ມຓາ ອິທໍ ອາຣມ຺ມຓໍ ກຕ຺ວາ ອິມໍ ປຈ຺ຈຍໍ ລຠິຕ຺ວາ ອິທໍ ທສ຺ສນໍ ຄຓ຺ຫນ຺ຕີ’’ຕິ ປກາສນຕ຺ຖໍ ອາຣຠິ. ຕຕ຺ຖ ອາຕປ຺ປນ຺ຕິອາທີນິ ປຎ຺ຈປິ ວີຣິຍສ຺ເສວ ນາມານິ. ເຈໂຕສມາຘິນ຺ຕິ ທິພ຺ພຈກ຺ຂຸສມາຘິໍ. ປສ຺ສຕີຕິ ‘‘ໂສ ສຕ຺ໂຕ ກຸຫິໍ ນິພ຺ພຕ຺ໂຕ’’ຕິ ໂອໂລເກນ຺ໂຕ ປສ຺ສຕິ. ເຍ ອຎ຺ຎຖາຕິ ເຍ ‘‘ທສນ຺ນໍ ກຸສລານໍ ກມ຺ມປຖານໍ ປູຣິຕຕ຺ຕາ ນິຣຍໍ ອຸປປຊ຺ຊຕີ’’ຕິ ຊານນ຺ຕິ, ມິຈ຺ຉາ ເຕສໍ ຎາຓນ຺ຕິ ວທຕິ. ອິມິນາ ນເຍນ ສພ຺ພວາເຣສຸ ອຕ຺ໂຖ ເວທິຕພ຺ໂພ. ວິທິຕນ຺ຕິ ປາກຏໍ. ຖາມສາຕິ ທິຏ຺ຐິຖາເມນ. ປຣາມາສາຕິ ທິຏ຺ຐິປຣາມາເສນ. ອຠິນິວິສ຺ສ ໂວຫຣຕີຕິ ອຘິຏ຺ຐຫິຕ຺ວາ ອາທິຍິຕ຺ວາ ໂວຫຣຕິ.

໓໐໒. ຕຕ຺ຣານນ຺ທາຕິ ອິທມ຺ປິ ນ ມຫາກມ຺ມວິຠງ຺ຄຎາຓສ຺ສ ຠາຊນໍ, ອຖ ຂ຺ວາສ຺ສ ມາຕິກາຏ຺ຐປນເມວ. ເອຕ຺ຖ ປນ ເອເຕສໍ ທິພ຺ພຈກ຺ຂຸການໍ ວຈເນ ເອຕ຺ຕກາ ອນຸຎ຺ຎາຕາ, ເອຕ຺ຕກາ ອນນຸຎ຺ຎາຕາຕິ ອິທໍ ທສ຺ສິຕໍ. ຕຕ຺ຖ ຕຕ຺ຣາຕິ ເຕສຸ ຈຕູສຸ ສມຓພ຺ຣາຫ຺ມເຓສຸ. ອິທມສ຺ສາຕິ ອິທໍ ວຈນໍ ອສ຺ສ. ອຎ຺ຎຖາຕິ ອຎ຺ເຎນາກາເຣນ. ອິຕິ ອິເມສໍ ສມຓພ຺ຣາຫ຺ມຓານໍ ວາເທ ທ຺ວີສຸ ຐາເນສຸ ອນຸຎ຺ຎາຕາ, ຕີສຸ ອນນຸຎ຺ຎາຕາຕິ ເອວໍ ສພ຺ພຕ຺ຖ ອນຸຎ຺ຎາ ນານຸຎ຺ຎາ ເວທິຕພ຺ພາ.

໓໐໓. ເອວໍ ທິພ຺ພຈກ຺ຂຸການໍ ວຈເນ ອນຸຎ຺ຎາ ຈ ອນນຸຎ຺ຎາ ຈ ທສ຺ເສຕ຺ວາ ອິທານິ ມຫາກມ຺ມວິຠງ຺ຄຎາຓໍ ວິຠຊນ຺ໂຕ ຕຕ຺ຣານນ຺ທ, ຍ຺ວາຍໍ ປຸຄ຺ຄໂລຕິອາທິມາຫ.

ປຸພ຺ເພ ວາສ຺ສ ຕໍ ກຕໍ ໂຫຕີຕິ ຍໍ ອິມິນາ ທິພ຺ພຈກ຺ຂຸເກນ ກມ຺ມໍ ກໂຣນ຺ໂຕ ທິຏ຺ໂຐ, ຕໂຕ ປຸພ຺ເພ ກຕໍ. ປຸພ຺ເພ ກເຕນປິ ຫິ ນິຣເຍ ນິພ຺ພຕ຺ຕຕິ, ປຈ຺ຉາ ກເຕນປິ ນິພ຺ພຕ຺ຕຕິ, ມຣຓກາເລ ວາ ປນ – ‘‘ຂນ຺ໂທ ເສຏ຺ໂຐ ສິໂວ ເສຏ຺ໂຐ, ປິຕາມໂຫ ເສຏ຺ໂຐ, ອິສ຺ສຣາທີຫິ ວາ ໂລໂກ ວິສຏ຺ໂຐ’’ຕິອາທິນາ ມິຈ຺ຉາທສ຺ສເນນປິ ນິພ຺ພຕ຺ຕເຕວ. ທິຏ຺ເຐວ ຘມ຺ເມຕິ ຍໍ ຕຕ຺ຖ ທິຏ຺ຐຘມ຺ມເວທນີຍໍ ໂຫຕິ, ຕສ຺ສ ທິຏ຺ເຐວ ຘມ຺ເມ, ຍໍ ອຸປປຊ຺ຊເວທນີຍໍ, ຕສ຺ສ ອຸປປຊ຺ຊິຕ຺ວາ, ຍໍ ອປຣາປຣິຍເວທນີຍໍ, ຕສ຺ສ ອປຣສ຺ມິໍ ປຣິຍາເຍ ວິປາກໍ ປຏິສໍເວເທຕິ.

ອິຕິ ອຍໍ ສມໂຓ ວາ ພ຺ຣາຫ຺ມໂຓ ວາ ເອກໍ ກມ຺ມຣາສິໍ ເອກຎ຺ຈ ວິປາກຣາສິໍ ອທ຺ທສ, ສມ຺ມາສມ຺ພຸທ຺ໂຘ ອິມິນາ ອທິຏ຺ເຐ ຕໂຍ ກມ຺ມຣາສີ, ທ຺ເວ ຈ ວິປາກຣາສີ ອທ຺ທສ. ອິມິນາ ປນ ທິຏ຺ເຐ ອທິຏ຺ເຐ ຈ ຈຕ຺ຕາໂຣ ກມ຺ມຣາສີ ຕໂຍ ຈ ວິປາກຣາສີ ອທ຺ທສ. ອິມານິ ສຕ຺ຕ ຐານານິ ຊານນຎາຓໍ ຕຖາຄຕສ຺ສ ມຫາກມ຺ມວິຠງ຺ຄຎາຓໍ ນາມ. ທຸຕິຍວາເຣ ທິພ຺ພຈກ຺ຂຸເກນ ກິຎ຺ຈິ ນ ທິຏ຺ຐໍ, ຕຖາຄເຕນ ປນ ຕໂຍ ກມ຺ມຣາສີ, ທ຺ເວ ຈ ວິປາກຣາສີ ທິຏ຺ຐາຕິ. ອິມານິປິ ປຎ຺ຈ ປຈ຺ຈຕ຺ຕຏ຺ຐານານິ ຊານນຎາຓໍ ຕຖາຄຕສ຺ສ ມຫາກມ຺ມວິຠງ຺ຄຎາຓໍ ນາມ. ເສສວາຣທ຺ວເຍປິ ເອເສວ ນໂຍ.

ອຠພ຺ພນ຺ຕິ ຠູຕວິຣຫິຕໍ ອກຸສລໍ. ອຠພ຺ພາຠາສນ຺ຕິ ອຠພ຺ພໍ ອາຠາສຕິ ອຠິຠວຕິ ປຏິພາຫຕີຕິ ອຕ຺ໂຖ. ພຫຸກສ຺ມິຎ຺ຫິ ອກຸສລກມ຺ເມ ອາຍູຫິເຕ ພລວກມ຺ມໍ ທຸພ຺ພລກມ຺ມສ຺ສ ວິປາກໍ ປຏິພາຫິຕ຺ວາ ອຕ຺ຕໂນ ວິປາກສ຺ສ ໂອກາສໍ ກໂຣຕິ ອິທໍ ອຠພ຺ພຎ຺ເຈວ ອຠພ຺ພາຠາສຎ຺ຈ. ກຸສລໍ ປນ ອາຍູຫິຕ຺ວາ ອາສນ຺ເນ ອກຸສລໍ ກຕໍ ໂຫຕິ, ຕໍ ກຸສລສ຺ສ ວິປາກໍ ປຏິພາຫິຕ຺ວາ ອຕ຺ຕໂນ ວິປາກສ຺ສ ໂອກາສໍ ກໂຣຕິ, ອິທໍ ອຠພ຺ພໍ ຠພ຺ພາຠາສໍ. ພຫຸມ຺ຫິ ກຸສເລ ອາຍູຫິເຕປິ ພລວກມ຺ມໍ ທຸພ຺ພລກມ຺ມສ຺ສ ວິປາກໍ ປຏິພາຫິຕ຺ວາ ອຕ຺ຕໂນ ວິປາກສ຺ສ ໂອກາສໍ ກໂຣຕິ, ອິທໍ ຠພ຺ພຎ຺ເຈວ ຠພ຺ພາຠາສຎ຺ຈ. ອກຸສລໍ ປນ ອາຍູຫິຕ຺ວາ ອາສນ຺ເນ ກຸສລໍ ກຕໍ ໂຫຕິ, ຕໍ ອກຸສລສ຺ສ ວິປາກໍ ປຏິພາຫິຕ຺ວາ ອຕ຺ຕໂນ ວິປາກສ຺ສ ໂອກາສໍ ກໂຣຕິ, ອິທໍ ຠພ຺ພໍ ອຠພ຺ພາຠາສໍ.

ອປິຈ ອຸປຏ຺ຐານາກາເຣນເປຕ຺ຖ ອຕ຺ໂຖ ເວທິຕພ຺ໂພ. ອິທຎ຺ຫິ ວຸຕ຺ຕໍ ໂຫຕິ, ອຠພ຺ພໂຕ ອາຠາສຕິ ອຸປຏ຺ຐາຕີຕິ ອຠພ຺ພາຠາສໍ. ຕຕ຺ຖ ‘‘ຍ຺ວາຍໍ ປຸຄ຺ຄໂລ ອິຘ ປາຓາຕິປາຕີ’’ຕິອາທິນາ ນເຍນ ຈຕ຺ຕາໂຣ ປຸຄ຺ຄລາ ວຸຕ຺ຕາ, ເຕສຸ ປຐມສ຺ສ ກມ຺ມໍ ອຠພ຺ພໍ ອຠພ຺ພາຠາສໍ, ຕຎ຺ຫິ ອກຸສລຕ຺ຕາ ອຠພ຺ພໍ, ຕສ຺ສ ຈ ນິຣເຍ ນິພ຺ພຕ຺ຕຕ຺ຕາ ຕຕ຺ຖ ນິພ຺ພຕ຺ຕິກາຣຓຠູຕໍ ອກຸສລໍ ຫຸຕ຺ວາ ອຸປຏ຺ຐາຕິ. ທຸຕິຍສ຺ສ ກມ຺ມໍ ອຠພ຺ພໍ ຠພ຺ພາຠາສໍ, ຕຎ຺ຫິ ອກຸສລຕ຺ຕາ ອຠພ຺ພໍ. ຕສ຺ສ ປນ ສຄ຺ເຄ ນິພ຺ພຕ຺ຕຕ຺ຕາ ອຎ຺ຎຕິຕ຺ຖິຍານໍ ສຄ຺ເຄ ນິພ຺ພຕ຺ຕິກາຣຓຠູຕໍ ກຸສລໍ ຫຸຕ຺ວາ ອຸປຏ຺ຐາຕິ. ອິຕຣສ຺ມິມ຺ປິ ກມ຺ມທ຺ວເຍ ເອເສວ ນໂຍ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ມຫາກມ຺ມວິຠງ຺ຄສຸຕ຺ຕວຓ຺ຓນາ ນິຏ຺ຐິຕາ.