໙. ປິຓ຺ຑປາຕປາຣິສຸທ຺ຘິສຸຕ຺ຕວຓ຺ຓນາ

໔໓໘. ເອວໍ ເມ ສຸຕນ຺ຕິ ປິຓ຺ຑປາຕປາຣິສຸທ຺ຘິສຸຕ຺ຕໍ. ຕຕ຺ຖ ປຏິສລ຺ລານາຕິ ຜລສມາປຕ຺ຕິໂຕ.

ວິປ຺ປສນ຺ນານີຕິ ໂອກາສວເສເນຕໍ ວຸຕ຺ຕໍ. ຜລສມາປຕ຺ຕິໂຕ ຫິ ວຸຏ຺ຐິຕສ຺ສ ປຎ຺ຈຫິ ປສາເທຫິ ປຕິຏ຺ຐິໂຕກາໂສ ວິປ຺ປສນ຺ໂນ ໂຫຕິ, ຉວິວຓ຺ໂຓ ປຣິສຸທ຺ໂຘ. ຕສ຺ມາ ເອວມາຫ. ສຸຎ຺ຎຕວິຫາເຣນາຕິ ສຸຎ຺ຎຕຜລສມາປຕ຺ຕິວິຫາເຣນ. ມຫາປຸຣິສວິຫາໂຣຕິ ພຸທ຺ຘປຈ຺ເຈກພຸທ຺ຘຕຖາຄຕມຫາສາວການໍ ມຫາປຸຣິສານໍ ວິຫາໂຣ. ເຍນ ຈາຫໍ ມຄ຺ເຄນາຕິອາທີສຸ ວິຫາຣໂຕ ປຏ຺ຐາຍ ຍາວ ຄາມສ຺ສ ອິນ຺ທຂີລາ ເອສ ປວິຏ຺ຐມຄ຺ໂຄ ນາມ, ອນ຺ໂຕຄາມໍ ປວິສິຕ຺ວາ ເຄຫປຏິປາຏິຍາ ຈຣິຕ຺ວາ ຍາວ ນຄຣທ຺ວາເຣນ ນິກ຺ຂມນາ ເອສ ຈຣິຕພ຺ພປເທໂສ ນາມ, ພຫິ ອິນ຺ທຂີລໂຕ ປຏ຺ຐາຍ ຍາວ ວິຫາຣາ ເອສ ປຏິກ຺ກນ຺ຕມຄ຺ໂຄ ນາມ. ປຏິຆໍ ວາປິ ເຈຕໂສຕິ ຈິຕ຺ເຕ ປຏິຫຎ຺ຎນກິເລສຊາຕໍ ກິຎ຺ຈິ ອຕ຺ຖິ ນຕ຺ຖີຕິ. ອໂຫຣຕ຺ຕານຸສິກ຺ຂິນາຕິ ທິວສຎ຺ຈ ຣຕ຺ຕິຎ຺ຈ ອນຸສິກ຺ຂນ຺ເຕນ.

໔໔໐. ປຫີນາ ນຸ ໂຂ ເມ ປຎ຺ຈ ກາມຄຸຓາຕິອາທີສຸ ເອກຠິກ຺ຂຸສ຺ສ ປຈ຺ຈເວກ຺ຂຓາ ນານາ, ນານາຠິກ຺ຂູນໍ ປຈ຺ຈເວກ຺ຂຓາ ນານາຕິ. ກຖໍ? ເອໂກ ຫິ ຠິກ຺ຂຸ ປຈ຺ຉາຠຕ຺ຕໍ ປິຓ຺ຑປາຕປຏິກ຺ກນ຺ໂຕ ປຕ຺ຕຈີວຣໍ ປຏິສາເມຕ຺ວາ ວິວິຕ຺ໂຕກາເສ ນິສິນ຺ໂນ ປຈ຺ຈເວກ຺ຂຕິ ‘‘ປຫີນາ ນຸ ໂຂ ເມ ປຎ຺ຈກາມຄຸຓາ’’ຕິ. ໂສ ‘‘ອປ຺ປຫີນາ’’ຕິ ຎຕ຺ວາ ວີຣິຍໍ ປຄ຺ຄຍ຺ຫ ອນາຄາມິມຄ຺ເຄນ ປຎ຺ຈກາມຄຸຓິກຣາຄໍ ສມຸຄ຺ຆາເຏຕ຺ວາ ມຄ຺ຄານນ຺ຕຣໍ ຜລໍ ຜລານນ຺ຕຣໍ ມຄ຺ຄໍ ຕໂຕ ວຸຏ຺ຐາຍ ປຈ຺ຈເວກ຺ຂນ຺ໂຕ ‘‘ປຫີນາ’’ຕິ ປຊານາຕິ. ນີວຣຓາທີສຸປິ ເອເສວ ນໂຍ. ເອເຕສໍ ປນ ອຣຫຕ຺ຕມຄ຺ເຄນ ປຫານາທີນິ ໂຫນ຺ຕິ, ເອວໍ ເອກຠິກ຺ຂຸສ຺ສ ນານາປຈ຺ຈເວກ຺ຂຓາ ໂຫຕິ. ເອຕາສຸ ປນ ປຈ຺ຈເວກ຺ຂຓາສຸ ອຎ຺ໂຎ ຠິກ຺ຂຸ ເອກໍ ປຈ຺ຈເວກ຺ຂຓໍ ປຈ຺ຈເວກ຺ຂຕິ, ອຎ຺ໂຎ ເອກນ຺ຕິ ເອວໍ ນານາຠິກ຺ຂູນໍ ນານາປຈ຺ຈເວກ຺ຂຓາ ໂຫຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ປິຓ຺ຑປາຕປາຣິສຸທ຺ຘິສຸຕ຺ຕວຓ຺ຓນາ ນິຏ຺ຐິຕາ.