໗. ມຫາສຬາຍຕນິກສຸຕ຺ຕວຓ຺ຓນາ

໔໒໘. ເອວໍ ເມ ສຸຕນ຺ຕິ ມຫາສຬາຍຕນິກສຸຕ຺ຕໍ. ຕຕ຺ຖ ມຫາສຬາຍຕນິກນ຺ຕິ ມຫນ຺ຕານໍ ຉນ຺ນໍ ອາຍຕນານໍ ໂຊຕກໍ ຘມ຺ມປຣິຍາຍໍ.

໔໒໙. ອຊານນ຺ຕິ ສຫວິປສ຺ສເນນ ມຄ຺ເຄນ ອຊານນ຺ໂຕ. ອຸປຈຍໍ ຄຈ຺ຉນ຺ຕີຕິ ວຸຑ຺ຒິໍ ຄຈ຺ຉນ຺ຕິ, ວສິຠາວໍ ຄຈ຺ຉນ຺ຕີຕິ ອຕ຺ໂຖ. ກາຍິກາຕິ ປຎ຺ຈທ຺ວາຣິກທຣຖາ. ເຈຕສິກາຕິ ມໂນທ຺ວາຣິກທຣຖາ. ສນ຺ຕາປາທີສຸປິ ເອເສວ ນໂຍ.

໔໓໐. ກາຍສຸຂນ຺ຕິ ປຎ຺ຈທ຺ວາຣິກສຸຂໍ. ເຈໂຕສຸຂນ຺ຕິ ມໂນທ຺ວາຣິກສຸຂໍ. ເອຕ຺ຖ ຈ ປຎ຺ຈທ຺ວາຣິກຊວເນນ ສມາປຊ຺ຊນໍ ວາ ວຸຏ຺ຐານໍ ວາ ນຕ຺ຖິ, ອຸປ຺ປນ຺ນມຕ຺ຕກເມວ ໂຫຕິ. ມໂນທ຺ວາຣິເກນ ສພ຺ພໍ ໂຫຕິ. ອຍຎ຺ຈ ມຄ຺ຄວຸຏ຺ຐານສ຺ສ ປຈ຺ຈຍຠູຕາ ພລວວິປສ຺ສນາ, ສາປິ ມໂນທ຺ວາຣິເກເນວ ໂຫຕິ.

໔໓໑. ຕຖາຠູຕສ຺ສາຕິ ກຸສລຈິຕ຺ຕສມ຺ປຍຸຕ຺ຕເຈໂຕສຸຂສມງ຺ຄີຠູຕສ຺ສ. ປຸພ຺ເພວ ໂຂ ປນສ຺ສາຕິ ອສ຺ສ ຠິກ຺ຂຸໂນ ວາຈາກມ຺ມນ຺ຕາຊີວາ ປຸພ຺ພສຸທ຺ຘິກາ ນາມ ອາທິໂຕ ປຏ຺ຐາຍ ປຣິສຸທ຺ຘາວ ໂຫນ຺ຕິ. ທິຏ຺ຐິສງ຺ກປ຺ປວາຍາມສຕິສມາຘິສງ຺ຂາຕານິ ປນ ປຎ຺ຈງ຺ຄານິ ສພ຺ພຕ຺ຖກກາຣາປກງ຺ຄານິ ນາມ. ເອວໍ ໂລກຸຕ຺ຕຣມຄ຺ໂຄ ອຏ຺ຐງ຺ຄິໂກ ວາ ສຕ຺ຕງ຺ຄິໂກ ວາ ໂຫຕິ.

ວິຕຓ຺ຑວາທີ ປນ ‘‘ຍາ ຍຖາຠູຕສ຺ສ ທິຏ຺ຐີ’’ຕິ ອິມເມວ ສຸຕ຺ຕປເທສໍ ຄເຫຕ຺ວາ ‘‘ໂລກຸຕ຺ຕຣມຄ຺ໂຄ ປຎ຺ຈງ຺ຄິໂກ’’ຕິ ວທຕິ. ໂສ – ‘‘ເອວມສ຺ສາຍໍ ອຣິໂຍ ອຏ຺ຐງ຺ຄິໂກ ມຄ຺ໂຄ ຠາວນາປາຣິປູຣິໍ ຄຈ຺ຉຕີ’’ຕິ ອິມິນາ ອນນ຺ຕຣວຈເນເນວ ປຏິເສຘິຕພ຺ໂພ. ອຸຕ຺ຕຣິ ຈ ເອວໍ ສຎ຺ຎາເປຕພ຺ໂພ – ໂລກຸຕ຺ຕຣມຄ຺ໂຄ ປຎ຺ຈງ຺ຄິໂກ ນາມ ນຕ຺ຖິ, ອິມານິ ປນ ປຎ຺ຈ ສພ຺ພຕ຺ຖກກາຣາປກງ຺ຄານິ ມຄ຺ຄກ຺ຂເຓ ວິຣຕິວເສນ ປູເຣນ຺ຕິ. ‘‘ຍາ ຈຕູຫິ ວຈີທຸຈ຺ຈຣິເຕຫິ ອາຣຕິ ວິຣຕີ’’ຕິ ເອວໍ ວຸຕ຺ຕວິຣຕີສຸ ຫິ ມິຈ຺ຉາວາຈໍ ປຊຫຕິ, ສມ຺ມາວາຈໍ ຠາເວຕິ, ເອວໍ ສມ຺ມາວາຈໍ ຠາເວນ຺ຕສ຺ສ ອິມານິ ປຎ຺ຈງ຺ຄິການິ ນ ວິນາ, ສເຫວ ວິຣຕິຍາ ປູເຣນ຺ຕິ. ສມ຺ມາກມ຺ມນ຺ຕາຊີເວສຸປິ ເອເສວ ນໂຍ. ອິຕິ ວຈີກມ຺ມາທີນິ ອາທິໂຕ ປຏ຺ຐາຍ ປຣິສຸທ຺ຘາເນວ ວຏ຺ຏນ຺ຕິ. ອິມານິ ປນ ປຎ຺ຈ ສພ຺ພຕ຺ຖກກາຣາປກງ຺ຄານິ ວິຣຕິວເສນ ປຣິປູເຣນ຺ຕີຕິ ປຎ຺ຈງ຺ຄິໂກ ມຄ຺ໂຄ ນາມ ນຕ຺ຖິ. ສຸຠທ຺ທສຸຕ຺ເຕປິ (ທີ. ນິ. ໒.໒໑໔) ເຈຕໍ ວຸຕ຺ຕໍ – ‘‘ຍສ຺ມິໍ ໂຂ, ສຸຠທ຺ທ, ຘມ຺ມວິນເຍ ອຣິໂຍ ອຏ຺ຐງ຺ຄິໂກ ມຄ຺ໂຄ’’ຕິ. ອຎ຺ເຎສຸ ຈ ອເນເກສຸ ສຸຕ຺ຕສເຕສຸ ອຏ຺ຐງ຺ຄິໂກວ ມຄ຺ໂຄ ອາຄໂຕຕິ.

໔໓໓. ຈຕ຺ຕາໂຣປິ ສຕິປຏ຺ຐານາຕິ ມຄ຺ຄສມ຺ປຍຸຕ຺ຕາວ ຈຕ຺ຕາໂຣ ສຕິປຏ຺ຐານາ. ສມ຺ມປ຺ປຘານາທີສຸປິ ເອເສວ ນໂຍ. ຍຸຄນນ຺ຘາຕິ ເອກກ຺ຂຓິກຍຸຄນນ຺ຘາ. ເອເຕຫິ ອຎ຺ຎສ຺ມິໍ ຂເຓ ສມາປຕ຺ຕິ, ອຎ຺ຎສ຺ມິໍ ວິປສ຺ສນາຕິ. ເອວໍ ນານາຂຓິກາປິ ໂຫນ຺ຕິ, ອຣິຍມຄ຺ເຄ ປນ ເອກກ຺ຂຓິກາ.

ວິຊ຺ຊາ ຈ ວິມຸຕ຺ຕິ ຈາຕິ ອຣຫຕ຺ຕມຄ຺ຄວິຊ຺ຊາ ຈ ຜລວິມຸຕ຺ຕິ ຈ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ມຫາສຬາຍຕນິກສຸຕ຺ຕວຓ຺ຓນາ ນິຏ຺ຐິຕາ.