໗. ອນຸຣຸທ຺ຘສຸຕ຺ຕວຓ຺ຓນາ

໒໓໐. ເອວໍ ເມ ສຸຕນ຺ຕິ ອນຸຣຸທ຺ຘສຸຕ຺ຕໍ. ຕຕ຺ຖ ເອວມາຫໍສູຕິ ຕສ຺ສ ອຸປາສກສ຺ສ ອຜາສຸກກາໂລ ອໂຫສິ, ຕທາ ອຸປສງ຺ກມິຕ຺ວາ ເອວມາຫໍສຸ. ອປຓ຺ຓກນ຺ຕິ ອວິຣາຘິຕໍ. ເອກຕ຺ຖາຕິ ອປ຺ປມາຓາຕິ ວາ ມຫຄ຺ຄຕາຕິ ວາ ຌານເມວ ຈິຕ຺ເຕກຄ຺ຄຕາເຍວ ເອວໍ ວຸຈ຺ຈຕີຕິ ອິມໍ ສນ຺ຘາຍ ເອວມາຫ.

໒໓໑. ຍາວຕາ ເອກໍ ຣຸກ຺ຂມູລໍ ມຫຄ຺ຄຕນ຺ຕິ ຜຣິຕ຺ວາ ອຘິມຸຈ຺ຈິຕ຺ວາ ວິຫຣຕີຕິ ເອກຣຸກ຺ຂມູລປມາຓຏ຺ຐານໍ ກສິຓນິມິຕ຺ເຕນ ໂອຕ຺ຖຣິຕ຺ວາ ຕສ຺ມິໍ ກສິຓນິມິຕ຺ເຕ ມຫຄ຺ຄຕຊ຺ຌານໍ ຜຣິຕ຺ວາ ອຘິມຸຈ຺ຈິຕ຺ວາ ວິຫຣຕິ. ມຫຄ຺ຄຕນ຺ຕິ ປນສ຺ສ ອາໂຠໂຄ ນຕ຺ຖິ, ເກວລໍ ມຫຄ຺ຄຕຊ຺ຌານປວຕ຺ຕິວເສນ ປເນຕໍ ວຸຕ຺ຕໍ. ເອສ ນໂຍ ສພ຺ພຕ຺ຖ. ອິມິນາ ໂຂ ເອຕໍ ຄຫປຕິ ປຣິຍາເຍນາຕິ ອິມິນາ ກາຣເຓນ. ເອຕ຺ຖ ຫິ ອປ຺ປມາຓາຕິ ວຸຕ຺ຕານໍ ພ຺ຣຫ຺ມວິຫາຣານໍ ນິມິຕ຺ຕໍ ນ ວຑ຺ຒຕິ, ອຸຄ຺ຆາຏນໍ ນ ຊາຍຕິ, ຕານິ ຌານານິ ອຠິຎ຺ຎານໍ ວາ ນິໂຣຘສ຺ສ ວາ ປາທການິ ນ ໂຫນ຺ຕິ, ວິປສ຺ສນາປາທການິ ປນ ວຏ຺ຏປາທການິ ຠໂວກ຺ກມນານິ ຈ ໂຫນ຺ຕິ. ‘‘ມຫຄ຺ຄຕາ’’ຕິ ວຸຕ຺ຕານໍ ປນ ກສິຓຊ຺ຌານານໍ ນິມິຕ຺ຕໍ ວຑ຺ຒຕິ, ອຸຄ຺ຆາຏນໍ ຊາຍຕິ, ສມຕິກ຺ກມາ ໂຫນ຺ຕິ, ອຠິຎ຺ຎາປາທການິ ນິໂຣຘປາທການິ ວຏ຺ຏປາທການິ ຠໂວກ຺ກມນານິ ຈ ໂຫນ຺ຕິ. ເອວມິເມ ຘມ຺ມາ ນານຕ຺ຖາ, ອປ຺ປມາຓາ ມຫຄ຺ຄຕາຕິ ເອວໍ ນານາພ຺ຍຎ຺ຊນາ ຈ.

໒໓໒. ອິທານິ ມຫຄ຺ຄຕສມາປຕ຺ຕິໂຕ ນີຫຣິຕ຺ວາ ຠວູປປຕ຺ຕິກາຣຓໍ ທສ຺ເສນ຺ໂຕ ຈຕສ຺ໂສ ໂຂ ອິມາຕິອາທິມາຫ. ປຣິຕ຺ຕາຠາຕິ ຜຣິຕ຺ວາ ຊານນ຺ຕສ຺ສ ອຍມາໂຠໂຄ ອຕ຺ຖິ, ປຣິຕ຺ຕາເຠສຸ ປນ ເທເວສຸ ນິພ຺ພຕ຺ຕິກາຣຓໍ ຌານໍ ຠາເວນ຺ໂຕ ເອວໍ ວຸຕ຺ໂຕ. ເອສ ນໂຍ ສພ຺ພຕ຺ຖ. ປຣິຕ຺ຕາຠາ ສິຍາ ສໍກິລິຏ຺ຐາຠາ ໂຫນ຺ຕິ ສິຍາ ປຣິສຸທ຺ຘາຠາ, ອປ຺ປມາຓາຠາ ສິຍາ ສໍກິລິຏ຺ຐາຠາ ໂຫນ຺ຕິ ສິຍາ ປຣິສຸທ຺ຘາຠາ. ກຖໍ? ສຸປ຺ປມຕ຺ເຕ ວາ ສຣາວມຕ຺ເຕ ວາ ກສິຓປຣິກມ຺ມໍ ກຕ຺ວາ ສມາປຕ຺ຕິໍ ນິພ຺ພຕ຺ເຕຕ຺ວາ ປຎ຺ຈຫາກາເຣຫິ ອາຈິຓ຺ຓວສິຠາໂວ ປຈ຺ຈນີກຘມ຺ມານໍ ສຸຏ຺ຐຸ ອປຣິໂສຘິຕຕ຺ຕາ ທຸພ຺ພລເມວ ສມາປຕ຺ຕິໍ ວຬຎ຺ຊິຕ຺ວາ ອປ຺ປຄຸຓຊ຺ຌາເນ ຐິໂຕ ກາລໍ ກຕ຺ວາ ປຣິຕ຺ຕາເຠສຸ ນິພ຺ພຕ຺ຕຕິ, ວຓ຺ໂຓ ປນສ຺ສ ປຣິຕ຺ໂຕ ເຈວ ໂຫຕິ ສໍກິລິຏ຺ໂຐ ຈ. ປຎ຺ຈຫິ ປນາກາເຣຫິ ອາຈິຓ຺ຓວສິຠາໂວ ປຈ຺ຈນີກຘມ຺ມານໍ ສຸຏ຺ຐຸ ປຣິໂສຘິຕຕ຺ຕາ ສຸວິສຸທ຺ຘໍ ສມາປຕ຺ຕິໍ ວຬຎ຺ຊິຕ຺ວາ ປຄຸຓຊ຺ຌາເນ ຐິໂຕ ກາລໍ ກຕ຺ວາ ປຣິຕ຺ຕາເຠສຸ ນິພ຺ພຕ຺ຕຕິ, ວຓ຺ໂຓ ປນສ຺ສ ປຣິຕ຺ໂຕ ເຈວ ໂຫຕິ ປຣິສຸທ຺ໂຘ ຈ. ເອວໍ ປຣິຕ຺ຕາຠາ ສິຍາ ສໍກິລິຏ຺ຐາຠາ ໂຫນ຺ຕິ ສິຍາ ປຣິສຸທ຺ຘາຠາ. ກສິເຓ ປນ ວິປຸລປຣິກມ຺ມໍ ກຕ຺ວາ ສມາປຕ຺ຕິໍ ນິພ຺ພຕ຺ເຕຕ຺ວາ ປຎ຺ຈຫາກາເຣຫິ ອາຈິຓ຺ຓວສິຠາໂວຕິ ສພ຺ພໍ ປຸຣິມສທິສເມວ ເວທິຕພ຺ພໍ. ເອວໍ ອປ຺ປມາຓາຠາ ສິຍາ ສໍກິລິຏ຺ຐາຠາ ໂຫນ຺ຕິ ສິຍາ ປຣິສຸທ຺ຘາຠາຕິ.

ວຓ຺ຓນານຕ຺ຕນ຺ຕິ ສຣີຣວຓ຺ຓສ຺ສ ນານຕ຺ຕໍ. ໂນ ຈ ອາຠານານຕ຺ຕນ຺ຕິ ອາໂລເກ ນານຕ຺ຕໍ ນ ປຎ຺ຎາຍຕິ. ອຈ຺ຈິນານຕ຺ຕນ຺ຕິ ທີຆຣສ຺ສອຓຸຖູລວເສນ ອຈ຺ຈິຍາ ນານຕ຺ຕໍ.

ຍຕ຺ຖ ຍຕ຺ຖາຕິ ອຸຍ຺ຍານວິມານກປ຺ປຣຸກ຺ຂນທີຕີຣໂປກ຺ຂຣຓີຕີເຣສຸ ຍຕ຺ຖ ຍຕ຺ຖ. ອຠິນິວິສນ຺ຕີຕິ ວສນ຺ຕິ. ອຠິຣມນ຺ຕີຕິ ຣມນ຺ຕິ ນ ອຸກ຺ກຓ຺ຐນ຺ຕິ. ກາເຊນາຕິ ຍາຄຸຠຕ຺ຕເຕລຜາຓິຕມຈ຺ຉມໍສກາເຊສຸ ເຍນ ເກນຈິ ກາເຊນ. ‘‘ກາເຈນາຕິ’’ປິ ປາໂຐ, ອຍເມວ ອຕ຺ໂຖ. ປິຏເກນາຕິ ປຈ຺ຉິຍາ. ຕຕ຺ຖ ຕຕ຺ເຖວາຕິ ສປ຺ປິມຘຸຜາຓິຕາທີນໍ ສຸລຠຏ຺ຐານໂຕ ໂລຓປູຕິມຈ຺ຉາທີນໍ ອຸສ຺ສນ຺ນຏ຺ຐານໍ ນີຕາ ‘‘ປຸພ຺ເພ ອມ຺ຫາກໍ ວສນຏ຺ຐານໍ ຜາສຸກໍ, ຕຕ຺ຖ ສຸຂໍ ວສິມ຺ຫາ, ອິຘ ໂລຓໍ ວາ ໂນ ພາຘຕິ ປູຕິມຈ຺ຉຄນ຺ໂຘ ວາ ສີສໂຣຄໍ ອຸປ຺ປາເທຕີ’’ຕິ ເອວໍ ຈິຕ຺ຕໍ ອນຸປ຺ປາເທຕ຺ວາ ຕຕ຺ຖ ຕຕ຺ເຖວ ຣມນ຺ຕິ.

໒໓໔. ອາຠາຕິ ອາຠາສມ຺ປນ຺ນາ. ຕທງ຺ເຄນາຕິ ຕສ຺ສາ ຠວູປປຕ຺ຕິຍາ ອງ຺ເຄນ, ຠວູປປຕ຺ຕິກາຣເຓນາຕິ ອຕ຺ໂຖ. ອິທານິ ຕໍ ກາຣຓໍ ປຸຈ຺ຉນ຺ໂຕ ໂກ ນຸ ໂຂ, ຠນ຺ເຕຕິອາທິມາຫ.

ກາຍທຸຏ຺ຐຸລ຺ລນ຺ຕິ ກາຍາລສິຍຠາໂວ. ຌາຍໂຕຕິ ຊລໂຕ.

໒໓໕. ທີຆຣຕ຺ຕໍ ໂຂ ເມຕິ ເຖໂຣ ກິຣ ປາຣມິໂຍ ປູເຣນ຺ໂຕ ອິສິປພ຺ພຊ຺ຊໍ ປພ຺ພຊິຕ຺ວາ ສມາປຕ຺ຕິໍ ນິພ຺ພຕ຺ເຕຕ຺ວາ ນິຣນ຺ຕຣໍ ຕີຓິ ອຕ຺ຕຠາວສຕານິ ພ຺ຣຫ຺ມໂລເກ ປຏິລຠິ, ຕໍ ສນ຺ຘາເຍຕໍ ອາຫ. ວຸຕ຺ຕມ຺ປິ ເຈຕໍ –

‘‘ອໂວກິຓ຺ຓໍ ຕີຓິ ສຕໍ, ຍໍ ປພ຺ພຊິໍ ອິສິປພ຺ພຊ຺ຊໍ;

ອສງ຺ຂຕໍ ຄເວສນ຺ໂຕ, ປຸພ຺ເພ ສຎ຺ຈຣິຕໍ ມມ’’ນ຺ຕິ.

ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ອນຸຣຸທ຺ຘສຸຕ຺ຕວຓ຺ຓນາ ນິຏ຺ຐິຕາ.