໘. ອານາປານສ຺ສຕິສຸຕ຺ຕວຓ຺ຓນາ

໑໔໔. ເອວໍ ເມ ສຸຕນ຺ຕິ ອານາປານສ຺ສຕິສຸຕ຺ຕໍ. ຕຕ຺ຖ ອຎ຺ເຎຫິ ຈາຕິ ຐເປຕ຺ວາ ປາຬິຍໍ ອາຄເຕ ທສ ເຖເຣ ອຎ຺ເຎຫິປິ ອຠິຎ຺ຎາເຕຫິ ພຫູຫິ ສາວເກຫິ ສທ຺ຘິໍ. ຕທາ ກິຣ ມຫາ ຠິກ຺ຂຸສງ຺ໂຆ ອໂຫສິ ອປຣິຈ຺ຉິນ຺ນຄຓໂນ.

ໂອວທນ຺ຕິ ອນຸສາສນ຺ຕີຕິ ອາມິສສງ຺ຄເຫນ ຘມ຺ມສງ຺ຄເຫນ ຈາຕິ ທ຺ວີຫິ ສງ຺ຄເຫຫິ ສງ຺ຄຓ຺ຫິຕ຺ວາ ກມ຺ມຏ຺ຐາໂນວາທານຸສາສນີຫິ ໂອວທນ຺ຕິ ຈ ອນຸສາສນ຺ຕິ ຈ. ເຕ ຈາຕິ ຈກາໂຣ ອາຄມສນ຺ຘິມຕ຺ຕໍ. ອຸຬາຣໍ ປຸພ຺ເພນາປຣໍ ວິເສສໍ ຊານນ຺ຕີຕິ ສີລປຣິປູຣຓາທິໂຕ ປຸພ຺ພວິເສສໂຕ ອຸຬາຣຕຣໍ ອປຣໍ ກສິຓປຣິກມ຺ມາທິວິເສສໍ ຊານນ຺ຕີຕິ ອຕ຺ໂຖ.

໑໔໕. ອາຣທ຺ໂຘຕິ ຕຸຏ຺ໂຐ. ອປ຺ປຕ຺ຕສ຺ສ ປຕ຺ຕິຍາຕິ ອປ຺ປຕ຺ຕສ຺ສ ອຣຫຕ຺ຕສ຺ສ ປາປຸຓນຕ຺ຖໍ. ເສສປທທ຺ວເຍປິ ອຍເມວ ອຕ຺ໂຖ. ໂກມຸທິໍ ຈາຕຸມາສິນິນ຺ຕິ ປຈ຺ຉິມກຕ຺ຕິກຈາຕຸມາສປຸຓ຺ຓມໍ. ສາ ຫິ ກຸມຸທານໍ ອຕ຺ຖິຕາຍ ໂກມຸທີ, ຈຕຸນ຺ນໍ ວສ຺ສິການໍ ມາສານໍ ປຣິໂຍສານຕ຺ຕາ ຈາຕຸມາສິນີຕິ ວຸຈ຺ຈຕິ. ອາຄເມສ຺ສາມີຕິ ອຸທິກ຺ຂິສ຺ສາມິ, ອຊ຺ຊ ອປວາເຣຕ຺ວາ ຍາວ ສາ ອາຄຈ຺ຉຕິ, ຕາວ ກຕ຺ຖຈິ ອຄນ຺ຕ຺ວາ ອິເຘວ ວສິສ຺ສາມີຕິ ອຕ຺ໂຖ. ອິຕິ ຠິກ຺ຂູນໍ ປວາຣຓສງ຺ຄຫໍ ອນຸຊານນ຺ໂຕ ເອວມາຫ.

ປວາຣຓສງ຺ຄໂຫ ນາມ ຎຕ຺ຕິທຸຕິເຍນ ກມ຺ເມນ ທິຍ຺ຍຕິ ກສ຺ສ ປເນສ ທິຍ຺ຍຕິ, ກສ຺ສ ນ ທິຍ຺ຍຕີຕິ. ອກາຣກສ຺ສ ຕາວ ພາລປຸຖຸຊ຺ຊນສ຺ສ ນ ທິຍ຺ຍຕິ, ຕຖາ ອາຣທ຺ຘວິປສ຺ສກສ຺ສ ເຈວ ອຣິຍສາວກສ຺ສ ຈ. ຍສ຺ສ ປນ ສມໂຖ ວາ ຕຣຸໂຓ ໂຫຕິ ວິປສ຺ສນາ ວາ, ຕສ຺ສ ທິຍ຺ຍຕິ. ຠຄວາປິ ຕທາ ຠິກ຺ຂູນໍ ຈິຕ຺ຕາຈາຣໍ ປຣິວີມໍສນ຺ໂຕ ສມຖວິປສ຺ສນານໍ ຕຣຸຓຠາວໍ ຎຕ຺ວາ – ‘‘ມຍິ ອຊ຺ຊ ປວາເຣນ຺ເຕ ທິສາສຸ ວສ຺ສໍວຸຏ຺ຐາ ຠິກ຺ຂູ ອິຘ ໂອສຣິສ຺ສນ຺ຕິ. ຕໂຕ ອິເມ ຠິກ຺ຂູ ວຸຑ຺ຒຕເຣຫິ ຠິກ຺ຂູຫິ ເສນາສເນ ຄຫິເຕ ວິເສສໍ ນິພ຺ພຕ຺ເຕຕຸໍ ນ ສກ຺ຂິສ຺ສນ຺ຕິ. ສເຈປິ ຈາຣິກໍ ປກ຺ກມິສ຺ສາມິ, ອິເມສໍ ວສນຏ຺ຐານໍ ທຸລ຺ລຠເມວ ຠວິສ຺ສຕິ. ມຍິ ປນ ອປວາເຣນ຺ເຕ ຠິກ຺ຂູປິ ອິມໍ ສາວຕ຺ຖິໍ ນ ໂອສຣິສ຺ສນ຺ຕິ, ອຫມ຺ປິ ຈາຣິກໍ ນ ປກ຺ກມິສ຺ສາມິ, ເອວໍ ອິເມສໍ ຠິກ຺ຂູນໍ ວສນຏ຺ຐານໍ ອປລິພຸທ຺ຘໍ ຠວິສ຺ສຕິ. ເຕ ອຕ຺ຕໂນ ອຕ຺ຕໂນ ວສນຏ຺ຐາເນ ຜາສຸ ວິຫຣນ຺ຕາ ສມຖວິປສ຺ສນາ ຖາມຊາຕາ ກຕ຺ວາ ວິເສສໍ ນິພ຺ພຕ຺ເຕຕຸໍ ສກ຺ຂິສ຺ສນ຺ຕີ’’ຕິ ໂສ ຕໍທິວສໍ ອປວາເຣຕ຺ວາ ກຕ຺ຕິກປຸຓ຺ຓມາຍໍ ປວາເຣສ຺ສາມີຕິ ຠິກ຺ຂູນໍ ປວາຣຓສງ຺ຄຫໍ ອນຸຊານິ. ປວາຣຓສງ຺ຄຫສ຺ມິຎ຺ຫິ ລທ຺ເຘ ຍສ຺ສ ນິສ຺ສຍປຏິປນ຺ນສ຺ສ ອາຈຣິຍຸປຊ຺ຌາຍາ ປກ຺ກມນ຺ຕິ, ໂສປິ ‘‘ສເຈ ປຕິຣູໂປ ນິສ຺ສຍທາຍໂກ ອາຄມິສ຺ສຕິ, ຕສ຺ສ ສນ຺ຕິເກ ນິສ຺ສຍໍ ຄຓ຺ຫິສ຺ສາມີ’’ຕິ ຍາວ ຄິມ຺ຫານໍ ປຈ຺ຉິມມາສາ ວສິຕຸໍ ລຠຕິ. ສເຈປິ ສຏ຺ຐິວສ຺ສາ ຠິກ຺ຂູ ອາຄຈ຺ຉນ຺ຕິ, ຕສ຺ສ ເສນາສນໍ ຄເຫຕຸໍ ນ ລຠນ຺ຕິ. ອຍຎ຺ຈ ປນ ປວາຣຓສງ຺ຄໂຫ ເອກສ຺ສ ທິນ຺ໂນປິ ສພ຺ເພສໍ ທິນ຺ໂນເຍວ ໂຫຕິ.

ສາວຕ຺ຖິໍ ໂອສຣນ຺ຕີຕິ ຠຄວຕາ ປວາຣຓສງ຺ຄໂຫ ທິນ຺ໂນຕິ ສຸຕສຸຕຏ຺ຐາເນເຍວ ຍຖາສຠາເວນ ເອກໍ ມາສໍ ວສິຕ຺ວາ ກຕ຺ຕິກປຸຓ຺ຓມາຍ ອຸໂປສຖໍ ກຕ຺ວາ ໂອສຣນ຺ເຕ ສນ຺ຘາຍ ອິທໍ ວຸຕ຺ຕໍ. ປຸພ຺ເພນາປຣນ຺ຕິ ອິຘ ຕຣຸຓສມຖວິປສ຺ສນາສຸ ກມ຺ມໍ ກຕ຺ວາ ສມຖວິປສ຺ສນາ ຖາມຊາຕາ ອກໍສຸ, ອຍໍ ປຸພ຺ເພ ວິເສໂສ ນາມ. ຕໂຕ ສມາຫິເຕນ ຈິຕ຺ເຕນ ສງ຺ຂາເຣ ສມ຺ມສິຕ຺ວາ ເກຈິ ໂສຕາປຕ຺ຕິຜລໍ…ເປ… ເກຈິ ອຣຫຕ຺ຕໍ ສຈ຺ຉິກຣິໍສຸ. ອຍໍ ອປໂຣ ອຸຬາໂຣ ວິເສໂສ ນາມ.

໑໔໖. ອລນ຺ຕິ ຍຸຕ຺ຕໍ. ໂຍຊນຄຓນານີຕິ ເອກໍ ໂຍຊນໍ ໂຍຊນເມວ, ທສປິ ໂຍຊນານິ ໂຍຊນາເນວ, ຕໂຕ ອຸທ຺ຘໍ ໂຍຊນຄຓນານີຕິ ວຸຈ຺ຈນ຺ຕິ. ອິຘ ປນ ໂຍຊນສຕມ຺ປິ ໂຍຊນສຫສ຺ສມ຺ປິ ອຘິປ຺ເປຕໍ. ປຸໂຏເສນາປີຕິ ປຸໂຏສໍ ວຸຈ຺ຈຕິ ປາເຖຍ຺ຍໍ. ຕໍ ປາເຖຍ຺ຍໍ ຄເຫຕ຺ວາປິ ອຸປສງ຺ກມິຕຸໍ ຍຸຕ຺ຕເມວາຕິ ອຕ຺ໂຖ. ‘‘ປຸຏໍເສນາ’’ຕິປິ ປາໂຐ, ຕສ຺ສຕ຺ໂຖ – ປຸໂຏ ອໍເສ ອສ຺ສາຕິ ປຸຏໍໂສ, ເຕນ ປຸຏໍເສນ, ອໍເສ ປາເຖຍ຺ຍປຸຏໍ ວຫນ຺ເຕນາປີຕິ ວຸຕ຺ຕໍ ໂຫຕິ.

໑໔໗. ອິທານິ ເອວຣູເປຫິ ຈຣເຓຫິ ສມນ຺ນາຄຕາ ເອຕ຺ຖ ຠິກ຺ຂູ ອຕ຺ຖີຕິ ທສ຺ເສຕຸໍ ສນ຺ຕິ, ຠິກ຺ຂເວຕິອາທິມາຫ. ຕຕ຺ຖ ຈຕຸນ຺ນໍ ສຕິປຏ຺ຐານານນ຺ຕິອາທີນິ ເຕສໍ ຠິກ຺ຂູນໍ ອຠິນິວິຏ຺ຐກມ຺ມຏ຺ຐານທສ຺ສນຕ຺ຖໍ ວຸຕ຺ຕານິ. ຕຕ຺ຖ ສຕ຺ຕຕິໍສ ໂພຘິປກ຺ຂິຍຘມ຺ມາ ໂລກິຍໂລກຸຕ຺ຕຣາ ກຖິຕາ. ຕຕ຺ຣ ຫິ ເຍ ຠິກ຺ຂູ ຕສ຺ມິໍ ຂເຓ ມຄ຺ຄໍ ຠາເວນ຺ຕິ, ເຕສໍ ໂລກຸຕ຺ຕຣາ ໂຫນ຺ຕິ. ອາຣທ຺ຘວິປສ຺ສການໍ ໂລກິຍາ. ອນິຈ຺ຈສຎ຺ຎາຠາວນານຸໂຍຄນ຺ຕິ ເອຕ຺ຖ ສຎ຺ຎາສີເສນ ວິປສ຺ສນາ ກຖິຕາ. ຍສ຺ມາ ປເນຕ຺ຖ ອານາປານກມ຺ມຏ຺ຐານວເສນ ອຠິນິວິຏ຺ຐາວ ພຫູ ຠິກ຺ຂູ, ຕສ຺ມາ ເສສກມ຺ມຏ຺ຐານານິ ສງ຺ເຂເປນ ກເຖຕ຺ວາ ອານາປານກມ຺ມຏ຺ຐານໍ ວິຕ຺ຖາເຣນ ກເຖນ຺ໂຕ ອານາປານສ຺ສຕິ, ຠິກ຺ຂເວຕິອາທິມາຫ. ອິທໍ ປນ ອານາປານກມ຺ມຏ຺ຐານໍ ສພ຺ພາກາເຣນ ວິສຸທ຺ຘິມຄ຺ເຄ ວິຕ຺ຖາຣິຕໍ, ຕສ຺ມາ ຕຕ຺ຖ ວຸຕ຺ຕນເຍເນວສ຺ສ ປາຬິຕ຺ໂຖ ຈ ຠາວນານໂຍ ຈ ເວທິຕພ຺ໂພ.

໑໔໙. ກາຍຎ຺ຎຕຣນ຺ຕິ ປຖວີກາຍາທີສຸ ຈຕູສຸ ກາເຍສຸ ອຎ຺ຎຕຣໍ ວທາມິ, ວາໂຍ ກາຍໍ ວທາມີຕິ ອຕ຺ໂຖ. ອຖ ວາ ຣູປາຍຕນໍ…ເປ… ກພຬີກາໂຣ ອາຫາໂຣຕິ ປຎ຺ຈວີສຕິ ຣູປໂກຏ຺ຐາສາ ຣູປກາໂຍ ນາມ. ເຕສຸ ອານາປານໍ ໂຜຏ຺ຐພ຺ພາຍຕເນ ສງ຺ຄຫິຕຕ຺ຕາ ກາຍຎ຺ຎຕຣໍ ໂຫຕິ, ຕສ຺ມາປິ ເອວມາຫ. ຕສ຺ມາຕິຫາຕິ ຍສ຺ມາ ຈຕູສຸ ກາເຍສຸ ອຎ຺ຎຕຣໍ ວາໂຍກາຍໍ, ປຎ຺ຈວີສຕິຣູປໂກຏ຺ຐາເສ ວາ ຣູປກາເຍ ອຎ຺ຎຕຣໍ ອານາປານໍ ອນຸປສ຺ສຕິ, ຕສ຺ມາ ກາເຍ ກາຍານຸປສ຺ສີຕິ ອຕ຺ໂຖ. ເອວໍ ສພ຺ພຕ຺ຖ ອຕ຺ໂຖ ເວທິຕພ຺ໂພ. ເວທນາຎ຺ຎຕຣນ຺ຕິ ຕີສຸ ເວທນາສຸ ອຎ຺ຎຕຣໍ, ສຸຂເວທນໍ ສນ຺ຘາເຍຕໍ ວຸຕ຺ຕໍ. ສາຘຸກໍ ມນສິກາຣນ຺ຕິ ປີຕິປຏິສໍເວທິຕາທິວເສນ ອຸປ຺ປນ຺ນໍ ສຸນ຺ທຣມນສິກາຣໍ. ກິໍ ປນ ມນສິກາໂຣ ສຸຂເວທນາ ໂຫຕີຕິ. ນ ໂຫຕິ, ເທສນາສີສໍ ປເນຕໍ. ຍເຖວ ຫິ ‘‘ອນິຈ຺ຈສຎ຺ຎາຠາວນານຸໂຍຄມນຸຍຸຕ຺ຕາ’’ຕິ ເອຕ຺ຖ ສຎ຺ຎານາເມນ ປຎ຺ຎາ ວຸຕ຺ຕາ, ເອວມິຘາປິ ມນສິກາຣນາເມນ ເວທນາ ວຸຕ຺ຕາຕິ ເວທິຕພ຺ພາ. ເອຕສ຺ມິໍ ຈຕຸກ຺ເກ ປຐມປເທ ປີຕິສີເສນ ເວທນາ ວຸຕ຺ຕາ, ທຸຕິຍປເທ ສຸຂນ຺ຕິ ສຣູເປເນວ ວຸຕ຺ຕາ. ຈິຕ຺ຕສງ຺ຂາຣປທທ຺ວເຍ ‘‘ສຎ຺ຎາ ຈ ເວທນາ ຈ ເຈຕສິກາ, ເອເຕ ຘມ຺ມາ ຈິຕ຺ຕປຏິພທ຺ຘາ ຈິຕ຺ຕສງ຺ຂາຣາ’’ຕິ (ປຏິ. ມ. ໑.໑໗໔) ວຈນໂຕ ‘‘ວິຕກ຺ກວິຈາເຣ ຐເປຕ຺ວາ ສພ຺ເພປິ ຈິຕ຺ຕສມ຺ປຍຸຕ຺ຕກາ ຘມ຺ມາ ຈິຕ຺ຕສງ຺ຂາເຣ ສງ຺ຄຫິຕາ’’ຕິ ວຈນໂຕ ຈິຕ຺ຕສງ຺ຂາຣນາເມນ ເວທນາ ວຸຕ຺ຕາ. ຕໍ ສພ຺ພໍ ມນສິກາຣນາເມນ ສງ຺ຄເຫຕ຺ວາ ອິຘ ‘‘ສາຘຸກໍ ມນສິກາຣ’’ນ຺ຕິ ອາຫ.

ເອວໍ ສນ຺ເຕປິ ຍສ຺ມາ ເອສາ ເວທນາ ອາຣມ຺ມຓໍ ນ ໂຫຕິ, ຕສ຺ມາ ເວທນານຸປສ຺ສນາ ນ ຍຸຊ຺ຊຕີຕິ. ໂນ ນ ຍຸຊ຺ຊຕິ, ສຕິປຏ຺ຐານວຓ຺ຓນາຍມ຺ປິ ຫິ ‘‘ຕໍຕໍສຸຂາທີນໍ ວຕ຺ຖຸໍ ອາຣມ຺ມຓໍ ກຕ຺ວາ ເວທນາວ ເວທຍຕິ, ຕໍ ປນ ເວທນາປວຕ຺ຕິໍ ອຸປາທາຍ ‘ອຫໍ ເວທຍາມີ’ຕິ ໂວຫາຣມຕ຺ຕໍ ໂຫຕີ’’ຕິ ວຸຕ຺ຕໍ. ອປິຈ ປີຕິປຏິສໍເວທີຕິອາທີນໍ ອຕ຺ຖວຓ຺ຓນາຍເມຕສ຺ສ ປຣິຫາໂຣ ວຸຕ຺ໂຕເຍວ. ວຸຕ຺ຕຎ຺ເຫຕໍ ວິສຸທ຺ຘິມຄ຺ເຄ –

‘‘ທ຺ວີຫາກາເຣຫິ ປີຕິ ປຏິສໍວິທິຕາ ໂຫຕິ ອາຣມ຺ມຓໂຕ ຈ ອສມ຺ໂມຫໂຕ ຈ. ກຖໍ ອາຣມ຺ມຓໂຕ ປີຕິ ປຏິສໍວິທິຕາ ໂຫຕິ? ສປ຺ປີຕິເກ ທ຺ເວ ຌາເນ ສມາປຊ຺ຊຕິ, ຕສ຺ສ ສມາປຕ຺ຕິກ຺ຂເຓ ຌານປຏິລາເຠນ ອາຣມ຺ມຓໂຕ ປີຕິ ປຏິສໍວິທິຕາ ໂຫຕິ ອາຣມ຺ມຓສ຺ສ ປຏິສໍວິທິຕຕ຺ຕາ. ກຖໍ ອສມ຺ໂມຫໂຕ (ປີຕິ ປຏິສໍວິທິຕາ ໂຫຕິ)? ສປ຺ປີຕິເກ ທ຺ເວ ຌາເນ ສມາປຊ຺ຊິຕ຺ວາ ວຸຏ຺ຐາຍ ຌານສມ຺ປຍຸຕ຺ຕໍ ປີຕິໍ ຂຍໂຕ ວຍໂຕ ສມ຺ມສຕິ, ຕສ຺ສ ວິປສ຺ສນາກ຺ຂເຓ ລກ຺ຂຓປຏິເວຘາ ອສມ຺ໂມຫໂຕ ປີຕິ ປຏິສໍວິທິຕາ ໂຫຕິ. ວຸຕ຺ຕມ຺ປິ ເຈຕໍ ປຏິສມ຺ຠິທາຍໍ ‘ທີຆໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ, ຕາຍ ສຕິຍາ, ເຕນ ຎາເຓນ ສາ ປີຕິ ປຏິສໍວິທິຕາ ໂຫຕີ’ຕິ. ເອເຕເນວ ນເຍນ ອວເສສປທານິປິ ອຕ຺ຖໂຕ ເວທິຕພ຺ພານີ’’ຕິ.

ອິຕິ ຍເຖວ ຌານປຏິລາເຠນ ອາຣມ຺ມຓໂຕ ປີຕິສຸຂຈິຕ຺ຕສງ຺ຂາຣາ ປຏິສໍວິທິຕາ ໂຫນ຺ຕິ, ເອວໍ ອິມິນາປິ ຌານສມ຺ປຍຸຕ຺ເຕນ ເວທນາສງ຺ຂາຕມນສິກາຣປຏິລາເຠນ ອາຣມ຺ມຓໂຕ ເວທນາ ປຏິສໍວິທິຕາ ໂຫຕິ. ຕສ຺ມາ ສຸວຸຕ຺ຕເມຕໍ ໂຫຕິ ‘‘ເວທນາສຸ ເວທນານຸປສ຺ສີ ຕສ຺ມິໍ ສມເຍ ຠິກ຺ຂຸ ວິຫຣຕີ’’ຕິ.

ນາຫໍ, ຠິກ຺ຂເວ, ມຸຏ຺ຐສ຺ສຕິສ຺ສ ອສມ຺ປຊານສ຺ສາຕິ ເອຕ຺ຖ ອຍມຘິປ຺ປາໂຍ – ຍສ຺ມາ ຈິຕ຺ຕປຏິສໍເວທີ ອສ຺ສສິສ຺ສາມີຕິອາທິນາ ນເຍນ ປວຕ຺ໂຕ ຠິກ຺ຂຸ ກິຎ຺ຈາປິ ອສ຺ສາສປສ຺ສາສນິມິຕ຺ຕໍ ອາຣມ຺ມຓໍ ກໂຣຕິ, ຕສ຺ສ ປນ ຈິຕ຺ຕສ຺ສ ອາຣມ຺ມເຓ ສຕິຎ຺ຈ ສມ຺ປຊຎ຺ຎຎ຺ຈ ອຸປຏ຺ຐເປຕ຺ວາ ປວຕ຺ຕນໂຕ ຈິຕ຺ເຕ ຈິຕ຺ຕານຸປສ຺ສີເຍວ ນາເມສ ໂຫຕິ. ນ ຫິ ມຸຏ຺ຐສ຺ສຕິສ຺ສ ອສມ຺ປຊານສ຺ສ ອານາປານສ຺ສຕິຠາວນາ ອຕ຺ຖິ. ຕສ຺ມາ ອາຣມ຺ມຓໂຕ ຈິຕ຺ຕປຏິສໍວິທິຕາທິວເສນ ຈິຕ຺ເຕ ຈິຕ຺ຕານຸປສ຺ສີ ຕສ຺ມິໍ ສມເຍ ຠິກ຺ຂຸ ວິຫຣຕີຕິ. ໂສ ຍໍ ຕໍ ອຠິຊ຺ຌາໂທມນສ຺ສານໍ ປຫານໍ, ຕໍ ປຎ຺ຎາຍ ທິສ຺ວາ ສາຘຸກໍ ອຊ຺ຌຸເປກ຺ຂິຕາ ໂຫຕີຕິ ເອຕ຺ຖ ອຠິຊ຺ຌາຍ ກາມຈ຺ຉນ຺ທນີວຣຓໍ, ໂທມນສ຺ສວເສນ ພ຺ຍາປາທນີວຣຓໍ ທສ຺ສິຕໍ. ອິທຎ຺ຫິ ຈຕຸກ຺ກໍ ວິປສ຺ສນາວເສເນວ ວຸຕ຺ຕໍ, ຘມ຺ມານຸປສ຺ສນາ ຈ ນີວຣຓປພ຺ພາທິວເສນ ຉພ຺ພິຘາ ໂຫຕິ, ຕສ຺ສາ ນີວຣຓປພ຺ພໍ ອາທິ, ຕສ຺ສປິ ອິທໍ ນີວຣຓທ຺ວຍໍ ອາທິ, ອິຕິ ຘມ຺ມານຸປສ຺ສນາຍ ອາທິໍ ທສ຺ເສຕຸໍ ‘‘ອຠິຊ຺ຌາໂທມນສ຺ສານ’’ນ຺ຕິ ອາຫ. ປຫານນ຺ຕິ ອນິຈ຺ຈານຸປສ຺ສນາຍ ນິຈ຺ຈສຎ຺ຎໍ ປຊຫຕີຕິ ເອວໍ ປຫານກຣຎາຓໍ ອຘິປ຺ເປຕໍ. ຕໍ ປຎ຺ຎາຍ ທິສ຺ວາຕິ ຕໍ ອນິຈ຺ຈວິຣາຄນິໂຣຘປຏິນິສ຺ສຄ຺ຄາຎາຓສງ຺ຂາຕໍ ປຫານຎາຓໍ ອປຣາຍ ວິປສ຺ສນາປຎ຺ຎາຍ, ຕມ຺ປິ ອປຣາຍາຕິ ເອວໍ ວິປສ຺ສນາປຣມ຺ປຣໍ ທສ຺ເສຕິ. ອຊ຺ຌຸເປກ຺ຂິຕາ ໂຫຕີຕິ ຍຎ຺ຈ ສມຖປຏິປນ຺ນໍ ອຊ຺ຌຸເປກ຺ຂຕິ, ຍຎ຺ຈ ເອກໂຕ ອຸປຏ຺ຐານໍ ອຊ຺ຌຸເປກ຺ຂຕີຕິ ທ຺ວິຘາ ອຊ຺ຌຸເປກ຺ຂຕິ ນາມ. ຕຕ຺ຖ ສຫຊາຕານມ຺ປິ ອຊ຺ຌຸເປກ຺ຂນາ ໂຫຕິ ອາຣມ຺ມຓສ຺ສປິ ອຊ຺ຌຸເປກ຺ຂນາ, ອິຘ ອາຣມ຺ມຓອຊ຺ຌຸເປກ຺ຂນາ ອຘິປ຺ເປຕາ. ຕສ຺ມາຕິຫ, ຠິກ຺ຂເວຕິ ຍສ຺ມາ ອນິຈ຺ຈານຸປສ຺ສີ ອສ຺ສສິສ຺ສາມີຕິອາທິນາ ນເຍນ ປວຕ຺ໂຕ ນ ເກວລໍ ນີວຣຓາທິຘມ຺ເມ, ອຠິຊ຺ຌາໂທມນສ຺ສສີເສນ ປນ ວຸຕ຺ຕານໍ ຘມ຺ມານໍ ປຫານຎາຓມ຺ປິ ປຎ຺ຎາຍ ທິສ຺ວາ ອຊ຺ຌຸເປກ຺ຂິຕາ ໂຫຕິ, ຕສ຺ມາ ‘‘ຘມ຺ເມສຸ ຘມ຺ມານຸປສ຺ສີ ຕສ຺ມິໍ ສມເຍ ຠິກ຺ຂຸ ວິຫຣຕີ’’ຕິ ເວທິຕພ຺ໂພ.

໑໕໐. ປວິຈິນຕີຕິ ອນິຈ຺ຈາທິວເສນ ປວິຈິນຕິ. ອິຕຣໍ ປທທ຺ວຍໍ ເອຕສ຺ເສວ ເວວຈນໍ. ນິຣາມິສາຕິ ນິກ຺ກິເລສາ. ປສ຺ສມ຺ຠຕີຕິ ກາຍິກເຈຕສິກທຣຖປຏິປ຺ປສ຺ສທ຺ຘິຍາ ກາໂຍປິ ຈິຕ຺ຕມ຺ປິ ປສ຺ສມ຺ຠຕິ. ສມາຘິຍຕີຕິ ສມ຺ມາ ຐປິຍຕິ, ອປ຺ປນາປຕ຺ຕໍ ວິຍ ໂຫຕິ. ອຊ຺ຌຸເປກ຺ຂິຕາ ໂຫຕີຕິ ສຫຊາຕອຊ຺ຌຸເປກ຺ຂນາຍ ອຊ຺ຌຸເປກ຺ຂິຕາ ໂຫຕິ.

ເອວໍ ຈຸທ຺ທສວິເຘນ ກາຍປຣິຄ຺ຄາຫກສ຺ສ ຠິກ຺ຂຸໂນ ຕສ຺ມິໍ ກາເຍ ສຕິ ສຕິສມ຺ໂພຊ຺ຌງ຺ໂຄ, ສຕິຍາ ສມ຺ປຍຸຕ຺ຕໍ ຎາຓໍ ຘມ຺ມວິຈຍສມ຺ໂພຊ຺ຌງ຺ໂຄ, ຕໍສມ຺ປຍຸຕ຺ຕເມວ ກາຍິກເຈຕສິກວີຣິຍໍ ວີຣິຍສມ຺ໂພຊ຺ຌງ຺ໂຄ, ປີຕິ, ປສ຺ສທ຺ຘິ, ຈິຕ຺ເຕກຄ຺ຄຕາ ສມາຘິສມ຺ໂພຊ຺ຌງ຺ໂຄ, ອິເມສໍ ຉນ຺ນໍ ສມ຺ໂພຊ຺ຌງ຺ຄານໍ ອໂນສກ຺ກນອນຕິວຕ຺ຕນສງ຺ຂາໂຕ ມຊ຺ຌຕ຺ຕາກາໂຣ ອຸເປກ຺ຂາສມ຺ໂພຊ຺ຌງ຺ໂຄ. ຍເຖວ ຫິ ສມປ຺ປວຕ຺ເຕສຸ ອສ຺ເສສຸ ສາຣຖິໂນ ‘‘ອຍໍ ໂອລີຍຕີ’’ຕິ ຕຸທນໍ ວາ, ‘‘ອຍໍ ອຕິຘາວຕີ’’ຕິ ອາກຑ຺ຒນໍ ວາ ນຕ຺ຖິ, ເກວລໍ ເອວໍ ປສ຺ສມານສ຺ສ ຐິຕາກາໂຣວ ໂຫຕິ, ເອວເມວ ອິເມສໍ ຉນ຺ນໍ ສມ຺ໂພຊ຺ຌງ຺ຄານໍ ອໂນສກ຺ກນອນຕິວຕ຺ຕນສງ຺ຂາໂຕ ມຊ຺ຌຕ຺ຕາກາໂຣ ອຸເປກ຺ຂາສມ຺ໂພຊ຺ຌງ຺ໂຄ ນາມ ໂຫຕິ. ເອຕ຺ຕາວຕາ ກິໍ ກຖິຕໍ? ເອກຈິຕ຺ຕກ຺ຂຓິກາ ນານາຣສລກ຺ຂຓາ ວິປສ຺ສນາສມ຺ໂພຊ຺ຌງ຺ຄາ ນາມ ກຖິຕາ.

໑໕໒. ວິເວກນິສ຺ສິຕນ຺ຕິອາທີນິ ວຸຕ຺ຕຕ຺ຖາເນວ. ເອຕ຺ຖ ປນ ອານາປານປຣິຄ຺ຄາຫິກາ ສຕິ ໂລກິຍາ ໂຫຕິ, ໂລກິຍາ ອານາປານາ ໂລກິຍສຕິປຏ຺ຐານໍ ປຣິປູເຣນ຺ຕິ, ໂລກິຍາ ສຕິປຏ຺ຐານາ ໂລກຸຕ຺ຕຣໂພຊ຺ຌງ຺ເຄ ປຣິປູເຣນ຺ຕິ, ໂລກຸຕ຺ຕຣາ ໂພຊ຺ຌງ຺ຄາ ວິຊ຺ຊາວິມຸຕ຺ຕິຜລນິພ຺ພານໍ ປຣິປູເຣນ຺ຕິ. ອິຕິ ໂລກິຍສ຺ສ ອາຄຕຏ຺ຐາເນ ໂລກິຍໍ ກຖິຕໍ, ໂລກຸຕ຺ຕຣສ຺ສ ອາຄຕຏ຺ຐາເນ ໂລກຸຕ຺ຕຣໍ ກຖິຕນ຺ຕິ. ເຖໂຣ ປນາຫ ‘‘ອຎ຺ຎຕ຺ຖ ເອວໍ ໂຫຕິ, ອິມສ຺ມິໍ ປນ ສຸຕ຺ເຕ ໂລກຸຕ຺ຕຣໍ ອຸປຣິ ອາຄຕໍ, ໂລກິຍາ ອານາປານາ ໂລກິຍສຕິປຏ຺ຐາເນ ປຣິປູເຣນ຺ຕິ, ໂລກິຍາ ສຕິປຏ຺ຐານາ ໂລກິເຍ ໂພຊ຺ຌງ຺ເຄ ປຣິປູເຣນ຺ຕິ, ໂລກິຍາ ໂພຊ຺ຌງ຺ຄາ ໂລກຸຕ຺ຕຣໍ ວິຊ຺ຊາວິມຸຕ຺ຕິຜລນິພ຺ພານໍ ປຣິປູເຣນ຺ຕິ, ວິຊ຺ຊາວິມຸຕ຺ຕິປເທນ ຫິ ອິຘ ວິຊ຺ຊາວິມຸຕ຺ຕິຜລນິພ຺ພານໍ ອຘິປ຺ເປຕ’’ນ຺ຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ອານາປານສ຺ສຕິສຸຕ຺ຕວຓ຺ຓນາ ນິຏ຺ຐິຕາ.