໙. ກາຍຄຕາສຕິສຸຕ຺ຕວຓ຺ຓນາ

໑໕໓-໔. ເອວໍ ເມ ສຸຕນ຺ຕິ ກາຍຄຕາສຕິສຸຕ຺ຕໍ. ຕຕ຺ຖ ເຄຫສິຕາຕິ ປຎ຺ຈກາມຄຸຓນິສ຺ສິຕາ. ສຣສງ຺ກປ຺ປາຕິ ຘາວນສງ຺ກປ຺ປາ. ສຣນ຺ຕີຕິ ຫິ ສຣາ, ຘາວນ຺ຕີຕິ ອຕ຺ໂຖ. ອຊ຺ຌຕ຺ຕເມວາຕິ ໂຄຈຣຊ຺ຌຕ຺ຕສ຺ມິໍເຍວ. ກາຍຄຕາສຕິນ຺ຕິ ກາຍປຣິຄ຺ຄາຫິກມ຺ປິ ກາຍາຣມ຺ມຓມ຺ປິ ສຕິໍ. ກາຍປຣິຄ຺ຄາຫິກນ຺ຕິ ວຸຕ຺ເຕ ສມໂຖ ກຖິໂຕ ໂຫຕິ, ກາຍາຣມ຺ມຓນ຺ຕິ ວຸຕ຺ເຕ ວິປສ຺ສນາ. ອຸຠເຍນ ສມຖວິປສ຺ສນາ ກຖິຕາ ໂຫນ຺ຕິ.

ປຸນ ຈປຣໍ…ເປ… ເອວມ຺ປິ, ຠິກ຺ຂເວ, ຠິກ຺ຂຸ ກາຍຄຕາສຕິໍ ຠາເວຕີຕິ ສຕິປຏ຺ຐາເນ ຈຸທ຺ທສວິເຘນ ກາຍານຸປສ຺ສນາ ກຖິຕາ.

໑໕໖. ອນ຺ໂຕຄຘາວາສ຺ສາຕິ ຕສ຺ສ ຠິກ຺ຂຸໂນ ຠາວນາຍ ອພ຺ຠນ຺ຕຣຄຕາວ ໂຫນ຺ຕິ. ວິຊ຺ຊາຠາຄິຍາຕິ ເອຕ຺ຖ ສມ຺ປໂຍຄວເສນ ວິຊ຺ຊໍ ຠຊນ຺ຕີຕິ ວິຊ຺ຊາຠາຄິຍາ. ວິຊ຺ຊາຠາເຄ ວິຊ຺ຊາໂກຏ຺ຐາເສ ວຕ຺ຕນ຺ຕີຕິປິ ວິຊ຺ຊາຠາຄິຍາ. ຕຕ຺ຖ ວິປສ຺ສນາຎາຓໍ, ມໂນມຍິທ຺ຘິ, ຉ ອຠິຎ຺ຎາຕິ ອຏ຺ຐ ວິຊ຺ຊາ. ປຸຣິເມນ ອຕ຺ເຖນ ຕາຫິ ສມ຺ປຍຸຕ຺ຕຘມ຺ມາປິ ວິຊ຺ຊາຠາຄິຍາ. ປຈ຺ຉິເມນ ອຕ຺ເຖນ ຕາສຸ ຍາ ກາຈິ ເອກາ ວິຊ຺ຊາ ວິຊ຺ຊາ, ເສສາ ວິຊ຺ຊາຠາຄິຍາຕິ ເອວໍ ວິຊ຺ຊາປິ ວິຊ຺ຊາຍ ສມ຺ປຍຸຕ຺ຕາ ຘມ຺ມາປິ ວິຊ຺ຊາຠາຄິຍາເຕວ ເວທິຕພ຺ພາ. ເຈຕສາ ຜຸໂຏຕິ ເອຕ຺ຖ ທຸວິຘໍ ຜຣຓໍ ອາໂປຜຣຓຎ຺ຈ, ທິພ຺ພຈກ຺ຂຸຜຣຓຎ຺ຈ, ຕຕ຺ຖ ອາໂປກສິຓໍ ສມາປຊ຺ຊິຕ຺ວາ ອາເປນ ຜຣຓໍ ອາໂປຜຣຓໍ ນາມ. ເອວໍ ຜຸເຏປິ ມຫາສມຸທ຺ເທ ສພ຺ພາ ສມຸທ຺ທງ຺ຄມາ ກຸນ຺ນທິໂຍ ອນ຺ໂຕຄຘາວ ໂຫນ຺ຕິ, ອາໂລກໍ ປນ ວຑ຺ເຒຕ຺ວາ ທິພ຺ພຈກ຺ຂຸນາ ສກລສມຸທ຺ທສ຺ສ ທສ຺ສນໍ ທິພ຺ພຈກ຺ຂຸຜຣຓໍ ນາມ. ເອວໍ ຜຣເຓປິ ມຫາສມຸທ຺ເທ ສພ຺ພາ ສມຸທ຺ທງ຺ຄມາ ກຸນ຺ນທິໂຍ ອນ຺ໂຕຄຘາວ ໂຫນ຺ຕິ.

ໂອຕາຣນ຺ຕິ ວິວຣໍ ຉິທ຺ທໍ. ອາຣມ຺ມຓນ຺ຕິ ກິເລສຸປ຺ປຕ຺ຕິປຈ຺ຈຍໍ. ລເຠຖ ໂອຕາຣນ຺ຕິ ລເຠຍ຺ຍ ປເວສນໍ, ວິນິວິຊ຺ຌິຕ຺ວາ ຍາວ ປຣິໂຍສານາ ຄຈ຺ເຉຍ຺ຍາຕິ ອຕ຺ໂຖ. ນິກ຺ເຂປນນ຺ຕິ ນິກ຺ຂິປນຏ຺ຐານໍ.

໑໕໗. ເອວໍ ອຠາວິຕກາຍຄຕາສຕິໍ ປຸຄ຺ຄລໍ ອລ຺ລມຕ຺ຕິກປຸຎ຺ຊາທີຫິ ອຸປເມຕ຺ວາ ອິທານິ ຠາວິຕກາຍຄຕາສຕິໍ ສາຣຜລກາທີຫິ ອຸປເມຕຸໍ ເສຍ຺ຍຖາປີຕິອາທິມາຫ. ຕຕ຺ຖ ອຄ຺ຄຬຜລກນ຺ຕິ ກວາຏໍ.

໑໕໘. ກາກເປຍ຺ໂຍຕິ ມຸຂວຏ຺ຏິຍໍ ນິສີທິຕ຺ວາ ກາເກນ ຄີວໍ ອນາເມຕ຺ວາວ ປາຕພ຺ໂພ. ອຠິຎ຺ຎາສຈ຺ຉິກຣຓີຍສ຺ສາຕິ ອຠິຎ຺ຎາຍ ສຈ຺ຉິກາຕພ຺ພສ຺ສ. ສກ຺ຂິຠພ຺ພຕໍ ປາປຸຓາຕີຕິ ປຈ຺ຈກ຺ຂຠາວໍ ປາປຸຓາຕິ. ສຕິ ສຕິ ອາຍຕເນຕິ ສຕິສຕິ ກາຣເຓ. ກິໍ ປເນຕ຺ຖ ກາຣຓນ຺ຕິ? ອຠິຎ຺ຎາວ ກາຣຓໍ. ອາຬິພນ຺ຘາຕິ ມຣິຍາທພທ຺ຘາ.

ຍານີກຕາຍາຕິ ຍຸຕ຺ຕຍານໍ ວິຍ ກຕາຍ. ວຕ຺ຖຸກຕາຍາຕິ ປຕິຏ຺ຐາກຕາຍ. ອນຸຏ຺ຐິຕາຍາຕິ ອນຸປ຺ປວຕ຺ຕິຕາຍ. ປຣິຈິຕາຍາຕິ ປຣິຈຍກຕາຍ. ສຸສມາຣທ຺ຘາຍາຕິ ສຸຏ຺ຐຸ ສມາຣທ຺ຘາຍ ສຸສມ຺ປຄ຺ຄຫິຕາຍ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ກາຍຄຕາສຕິສຸຕ຺ຕວຓ຺ຓນາ ນິຏ຺ຐິຕາ.