໗. ມຫາຈຕ຺ຕາຣີສກສຸຕ຺ຕວຓ຺ຓນາ

໑໓໖. ເອວໍ ເມ ສຸຕນ຺ຕິ ມຫາຈຕ຺ຕາຣີສກສຸຕ຺ຕໍ. ຕຕ຺ຖ ອຣິຍນ຺ຕິ ນິທ຺ໂທສໍ ໂລກຸຕ຺ຕຣໍ, ນິທ຺ໂທສຎ຺ຫິ ‘‘ອຣິຍ’’ນ຺ຕິ ວຸຈ຺ຈຕິ. ສມ຺ມາສມາຘິນ຺ຕິ ມຄ຺ຄສມາຘິໍ. ສອຸປນິສນ຺ຕິ ສປຈ຺ຈຍໍ. ສປຣິກ຺ຂາຣນ຺ຕິ ສປຣິວາຣໍ.

ປຣິກ຺ຂຕາຕິ ປຣິວາຣິຕາ. ສມ຺ມາທິຏ຺ຐິ ປຸພ຺ພງ຺ຄມາ ໂຫຕີຕິ ທ຺ວິຘາ ສມ຺ມາທິຏ຺ຐິ ປຸພ຺ພງ຺ຄມາ ໂຫຕິ ປຸເຣຈາຣິກາ ວິປສ຺ສນາສມ຺ມາທິຏ຺ຐິ ຈ ມຄ຺ຄສມ຺ມາທິຏ຺ຐິ ຈ. ວິປສ຺ສນາສມ຺ມາທິຏ຺ຐິ ເຕຠູມກສງ຺ຂາເຣ ອນິຈ຺ຈາທິວເສນ ປຣິວີມໍສຕິ; ມຄ຺ຄສມ຺ມາທິຏ຺ຐິ ປນ ປຣິວີມໍສນປຣິໂຍສາເນ ຠູມິລທ຺ຘໍ ວຏ຺ຏໍ ສມຸຄ຺ຆາຏຍມານາ ວູປສມຍມານາ ສີຕຸທກຆຏສຫສ຺ສໍ ມຕ຺ຖເກ ອາສິຎ຺ຈມານາ ວິຍ ອຸປ຺ປຊ຺ຊຕິ. ຍຖາ ຫິ ເຂຕ຺ຕໍ ກຸຣຸມາໂນ ກສ຺ສໂກ ປຐມໍ ອຣຎ຺ເຎ ຣຸກ຺ເຂ ຉິນ຺ທຕິ, ປຈ຺ຉາ ອຄ຺ຄິໍ ເທຕິ, ໂສ ອຄ຺ຄິ ປຐມໍ ຉິນ຺ເນ ຣຸກ຺ເຂ ອນວເສເສ ຌາເປຕິ, ເອວເມວ ວິປສ຺ສນາສມ຺ມາທິຏ຺ຐິ ປຐມໍ ອນິຈ຺ຈາທິວເສນ ສງ຺ຂາເຣ ວີມໍສຕິ, ມຄ຺ຄສມ຺ມາທິຏ຺ຐິ ຕາຍ ວີມໍສນຕ຺ຖໍ ສງ຺ຂາເຣ ປຸນ ອປ຺ປວຕ຺ຕິວເສນ ສມຸຄ຺ຆາຏຍມານາ ອຸປ຺ປຊ຺ຊຕິ, ສາ ທຸວິຘາປິ ອິຘ ອຘິປ຺ເປຕາ.

ມິຈ຺ຉາທິຏ຺ຐີຕິ ປຊານາຕີຕິ ມິຈ຺ຉາທິຏ຺ຐິໍ ອນິຈ຺ຈໍ ທຸກ຺ຂໍ ອນຕ຺ຕາຕິ ລກ຺ຂຓປຏິເວເຘນ ອາຣມ຺ມຓໂຕ ປຊານາຕິ, ສມ຺ມາທິຏ຺ຐິໍ ກິຈ຺ຈໂຕ ອສມ຺ໂມຫໂຕ ປຊານາຕິ. ສາສ຺ສ ໂຫຕິ ສມ຺ມາທິຏ຺ຐີຕິ ສາ ເອວໍ ປຊານນາ ອສ຺ສ ສມ຺ມາທິຏ຺ຐິ ນາມ ໂຫຕິ.

ທ຺ວາຍໍ ວທາມີຕິ ທ຺ວຍໍ ວທາມິ, ທຸວິຘໂກຏ຺ຐາສໍ ວທາມີຕິ ອຕ຺ໂຖ. ປຸຎ຺ຎຠາຄິຍາຕິ ປຸຎ຺ຎໂກຏ຺ຐາສຠູຕາ. ອຸປຘິເວປກ຺ກາຕິ ອຸປຘິສງ຺ຂາຕສ຺ສ ວິປາກສ຺ສ ທາຍິກາ.

ປຎ຺ຎາ ປຎ຺ຎິນ຺ທ຺ຣິຍນ຺ຕິອາທີສຸ ວິຠຊິຕ຺ວາ ວິຠຊິຕ຺ວາ ອມຕທ຺ວາຣໍ ປຎ຺ຎເປຕິ ທສ຺ເສຕີຕິ ປຎ຺ຎາ. ຕສ຺ມິໍ ອຕ຺ເຖ ອິນ຺ທຕ຺ຕໍ ກໂຣຕີຕິ ປຎ຺ຎິນ຺ທ຺ຣິຍໍ. ອວິຊ຺ຊາຍ ນ ກມ຺ປຕີຕິ ປຎ຺ຎາພລໍ. ໂພຊ຺ຌງ຺ຄປ຺ປຕ຺ຕາ ຫຸຕ຺ວາ ຈຕຸສຈ຺ຈຘມ຺ເມ ວິຈິນາຕີຕິ ຘມ຺ມວິຈຍສມ຺ໂພຊ຺ຌງ຺ໂຄ. ມຄ຺ຄສມ຺ປຕ຺ຕິຍາ ປສຏ຺ຐາ ໂສຠນາ ທິຏ຺ຐີຕິ ສມ຺ມາທິຏ຺ຐິ. ອຣິຍມຄ຺ຄສ຺ສ ອງ຺ຄນ຺ຕິ ມຄ຺ຄງ຺ຄໍ. ໂສຕິ ໂສ ຠິກ຺ຂຸ. ປຫານາຍາຕິ ປຊຫນຕ຺ຖາຍ. ອຸປສມ຺ປທາຍາຕິ ປຏິລາຠຕ຺ຖາຍ. ສມ຺ມາວາຍາໂມຕິ ນິຍ຺ຍານິໂກ ກຸສລວາຍາໂມ. ສໂຕຕິ ສຕິຍາ ສມນ຺ນາຄໂຕ ຫຸຕ຺ວາ. ອນຸປຣິຘາວນ຺ຕິ ອນຸປຣິວຕ຺ຕນ຺ຕີຕິ ສຫຊາຕາ ຈ ປຸເຣຊາຕາ ຈ ຫຸຕ຺ວາ ປຣິວາເຣນ຺ຕິ. ເອຕ຺ຖ ຫິ ສມ຺ມາວາຍາໂມ ຈ ສມ຺ມາສຕິ ຈ ໂລກຸຕ຺ຕຣສມ຺ມາທິຏ຺ຐິໍ ສຫຊາຕາ ປຣິວາເຣນ຺ຕິ ຣາຊານໍ ວິຍ ເອກຣເຖ ຐິຕາ ອສິຄ຺ຄາຫຉຕ຺ຕຄ຺ຄາຫາ. ວິປສ຺ສນາສມ຺ມາທິຏ຺ຐິ ປນ ປຸເຣຊາຕາ ຫຸຕ຺ວາ ປຣິວາເຣຕິ ຣຖສ຺ສ ປຸຣໂຕ ປຕ຺ຕິກາທໂຍ ວິຍ. ທຸຕິຍປພ຺ພໂຕ ປຏ຺ຐາຍ ປນ ສມ຺ມາສງ຺ກປ຺ປາທີນໍ ຕໂຍປິ ສຫຊາຕປຣິວາຣາວ ໂຫນ຺ຕີຕິ ເວທິຕພ຺ພາ.

໑໓໗. ມິຈ຺ຉາສງ຺ກປ຺ໂປຕິ ປຊານາຕີຕິ ມິຈ຺ຉາສງ຺ກປ຺ປໍ ອນິຈ຺ຈໍ ທຸກ຺ຂໍ ອນຕ຺ຕາຕິ ລກ຺ຂຓປຏິເວເຘນ ອາຣມ຺ມຓໂຕ ປຊານາຕິ ສມ຺ມາສງ຺ກປ຺ປໍ ກິຈ຺ຈໂຕ ອສມ຺ໂມຫໂຕ ປຊານາຕິ. ອິໂຕ ອປເຣສຸ ສມ຺ມາວາຈາທີສຸປິ ເອວເມວ ໂຍຊນາ ເວທິຕພ຺ພາ. ກາມສງ຺ກປ຺ປາທໂຍ ທ຺ເວຘາວິຕກ຺ກສຸຕ຺ເຕ (ມ. ນິ. ໑.໒໐໖) ວຸຕ຺ຕາເຍວ.

ຕກ຺ໂກຕິອາທີສຸ ຕກ຺ກນວເສນ ຕກ຺ໂກ. ສ຺ເວວ ຈ ອຸປສຄ຺ເຄນ ປທໍ ວຑ຺ເຒຕ຺ວາ ວິຕກ຺ໂກຕິ ວຸຕ຺ໂຕ, ສ຺ເວວ ສງ຺ກປ຺ປນວເສນ ສງ຺ກປ຺ໂປ. ເອກຄ຺ໂຄ ຫຸຕ຺ວາ ອາຣມ຺ມເຓ ອປ຺ເປຕີຕິ ອປ຺ປນາ. ອຸປສຄ຺ເຄນ ປນ ປທໍ ວຑ຺ເຒຕ຺ວາ ພ຺ຍປ຺ປນາຕິ ວຸຕ຺ຕໍ. ເຈຕໂສ ອຠິນິໂຣປນາຕິ ຈິຕ຺ຕສ຺ສ ອຠິນິໂຣປນາ. ວິຕກ຺ກສ຺ມິຎ຺ຫິ ສຕິ ວິຕກ຺ໂກ ອາຣມ຺ມເຓ ຈິຕ຺ຕໍ ອຠິນິໂຣເປຕິ ວິຕກ຺ເກ ປນ ອສຕິ ອຕ຺ຕໂນເຍວ ຘມ຺ມຕາຍ ຈິຕ຺ຕໍ ອາຣມ຺ມຓໍ ອຠິຣຸຫຕິ ຊາຕິສມ຺ປນ຺ໂນ ອຠິຎ຺ຎາຕປຸຣິໂສ ວິຍ ຣາຊເຄຫໍ. ອນຠິຎ຺ຎາຕສ຺ສ ຫິ ປຏິຫາເຣນ ວາ ໂທວາຣິເກນ ວາ ອຕ຺ໂຖ ໂຫຕິ, ອຠິຎ຺ຎາຕໍ ຊາຕິສມ຺ປນ຺ນໍ ສພ຺ເພ ຣາຊຣາຊມຫາມຕ຺ຕາ ຊານນ຺ຕີຕິ ອຕ຺ຕໂນວ ຘມ຺ມຕາຍ ນິກ຺ຂມຕິ ເຈວ ປວິສຕິ ຈ, ເອວໍສມ຺ປທມິທໍ ເວທິຕພ຺ພໍ. ວາຈໍ ສງ຺ຂໂຣຕີຕິ ວຈີສງ຺ຂາໂຣ. ເອຕ຺ຖ ຈ ໂລກິຍວິຕກ຺ໂກ ວາຈໍ ສງ຺ຂໂຣຕິ, ນ ໂລກຸຕ຺ຕໂຣ. ກິຎ຺ຈາປິ ນ ສງ຺ຂໂຣຕິ, ວຈີສງ຺ຂາໂຣຕ຺ເວວ ຈ ປນສ຺ສ ນາມໍ ໂຫຕິ. ສມ຺ມາສງ຺ກປ຺ປໍ ອນຸປຣິຘາວນ຺ຕີຕິ ໂລກຸຕ຺ຕຣສມ຺ມາສງ຺ກປ຺ປໍ ປຣິວາເຣນ຺ຕິ. ເອຕ຺ຖ ຈ ຕໂຍປິ ເນກ຺ຂມ຺ມສງ຺ກປ຺ປາທໂຍ ປຸພ຺ພຠາເຄ ນານາຈິຕ຺ເຕສຸ ລພ຺ຠນ຺ຕິ, ມຄ຺ຄກ຺ຂເຓ ປນ ຕິຓ຺ຓມ຺ປິ ກາມສງ຺ກປ຺ປາທີນຎ຺ຈ ປທຈ຺ເຉທໍ ສມຸຄ຺ຆາຕໍ ກໂຣນ຺ໂຕ ມຄ຺ຄງ຺ຄໍ ປູຣຍມາໂນ ເອໂກວ ສມ຺ມາສງ຺ກປ຺ໂປ ອຸປ຺ປຊ຺ຊິຕ຺ວາ ເນກ຺ຂມ຺ມສງ຺ກປ຺ປາທິວເສນ ຕີຓິ ນາມານິ ລຠຕິ. ປຣໂຕ ສມ຺ມາວາຈາທີສຸປິ ເອເສວ ນໂຍ.

໑໓໘. ມຸສາວາທາ ເວຣມຓີຕິອາທີສຸ ວິຣຕິປິ ເຈຕນາປິ ວຏ຺ຏຕິ. ອາຣຕີຕິອາທີສຸ ວຈີທຸຈ຺ຈຣິເຕຫິ ອາຣກາ ຣມຕີຕິ ອາຣຕິ. ວິນາ ເຕຫິ ຣມຕີຕິ ວິຣຕິ. ຕໂຕ ຕໂຕ ປຏິນິວຕ຺ຕາວ ຫຸຕ຺ວາ ເຕຫິ ວິນາ ຣມຕີຕິ ປຏິວິຣຕິ. ອຸປສຄ຺ຄວເສນ ວາ ປທໍ ວຑ຺ຒິຕໍ, ສພ຺ພມິທໍ ໂອຣມນຠາວສ຺ເສວ ອຘິວຈນໍ. ເວຣໍ ມຓຕິ ວິນາເສຕີຕິ ເວຣມຓິ. ອິທມ຺ປິ ໂອຣມນສ຺ເສວ ເວວຈນໍ.

໑໓໙. ປາຓາຕິປາຕາ ເວຣມຓີຕິອາທີສຸປິ ເຈຕນາ ວິຣຕີຕິ ອຸຠຍມ຺ປິ ວຏ຺ຏຕິເຍວ.

໑໔໐. ກຸຫນາຕິອາທີສຸ ຕິວິເຘນ ກຸຫນວຕ຺ຖຸນາ ໂລກໍ ເອຕາຍ ກຸຫຍນ຺ຕິ ວິມ຺ຫາປຍນ຺ຕີຕິ ກຸຫນາ. ລາຠສກ຺ກາຣຕ຺ຖິກາ ຫຸຕ຺ວາ ເອຕາຍ ລປນ຺ຕີຕິ ລປນາ. ນິມິຕ຺ຕໍ ສີລເມເຕສນ຺ຕິ ເນມິຕ຺ຕິກາ, ເຕສໍ ຠາໂວ ເນມິຕ຺ຕິກຕາ. ນິປ຺ເປໂສ ສີລເມເຕສນ຺ຕິ ນິປ຺ເປສິກາ, ເຕສໍ ຠາໂວ ນິປ຺ເປສິກຕາ. ລາເຠນ ລາຠໍ ນິຊິຄີສນ຺ຕິ ມຄ຺ຄນ຺ຕິ ປຣິເຍສນ຺ຕີຕິ ລາເຠນ ລາຠໍ ນິຊິຄີສນາ, ເຕສໍ ຠາໂວ ລາເຠນ ລາຠໍ ນິຊິຄີສນຕາ. ອຍເມຕ຺ຖ ສງ຺ເຂໂປ, ວິຕ຺ຖາເຣນ ປເນຕາ ກຸຫນາທິກາ ວິສຸທ຺ຘິມຄ຺ເຄ ສີລນິທ຺ເທເສເຍວ ປາຬິຎ຺ຈ ອຏ຺ຐກຖຎ຺ຈ ອາຫຣິຕ຺ວາ ປກາສິຕາ. ມິຈ຺ຉາອາຊີວສ຺ສ ປຫານາຍາຕິ ເອຕ຺ຖ ນ ເກວລໍ ປາຬິຍໍ ອາຄໂຕວ ມິຈ຺ຉາອາຊີໂວ, ອາຊີວເຫຕຸ ປນ ປວຕ຺ຕິຕາ ປາຓາຕິປາຕາທໂຍ ສຕ຺ຕກມ຺ມປຖເຈຕນາປິ ມິຈ຺ຉາອາຊີໂວວ. ຕາສໍເຍວ ສຕ຺ຕນ຺ນໍ ເຈຕນານໍ ປທປຈ຺ເຉທໍ ສມຸຄ຺ຆາຕໍ ກຸຣຸມານໍ ມຄ຺ຄງ຺ຄໍ ປູຣຍມານາ ອຸປ຺ປນ຺ນາ ວິຣຕິ ສມ຺ມາອາຊີໂວ ນາມ.

໑໔໑. ສມ຺ມາທິຏ຺ຐິສ຺ສາຕິ ມຄ຺ຄສມ຺ມາທິຏ຺ຐິຍໍ ຐິຕສ຺ສ ປຸຄ຺ຄລສ຺ສ. ສມ຺ມາສງ຺ກປ຺ໂປ ປໂຫຕີຕິ ມຄ຺ຄສມ຺ມາສງ຺ກປ຺ໂປ ປໂຫຕິ, ຜລສມ຺ມາທິຏ຺ຐິສ຺ສປິ ຜລສມ຺ມາສງ຺ກປ຺ໂປ ປໂຫຕີຕິ ເອວໍ ສພ຺ພປເທສຸ ອຕ຺ໂຖ ເວທິຕພ຺ໂພ. ສມ຺ມາຎາຓສ຺ສ ສມ຺ມາວິມຸຕ຺ຕີຕິ ເອຕ຺ຖ ປນ ມຄ຺ຄສມ຺ມາສມາຘິມ຺ຫິ ຐິຕສ຺ສ ມຄ຺ຄປຈ຺ຈເວກ຺ຂຓໍ ສມ຺ມາຎາຓໍ ປໂຫຕິ, ຜລສມ຺ມາສມາຘິມ຺ຫິ ຐິຕສ຺ສ ຜລປຈ຺ຈເວກ຺ຂຓໍ ສມ຺ມາຎາຓໍ ປໂຫຕິ. ມຄ຺ຄປຈ຺ຈເວກ຺ຂຓສມ຺ມາຎາເຓ ຈ ຐິຕສ຺ສ ມຄ຺ຄສມ຺ມາວິມຸຕ຺ຕິ ປໂຫຕິ, ຜລປຈ຺ຈເວກ຺ຂຓສມ຺ມາຎາເຓ ຐິຕສ຺ສ ຜລສມ຺ມາວິມຸຕ຺ຕິ ປໂຫຕີຕິ ອຕ຺ໂຖ. ເອຕ຺ຖ ຈ ຐເປຕ຺ວາ ອຏ຺ຐ ຜລງ຺ຄານິ ສມ຺ມາຎາຓໍ ປຈ຺ຈເວກ຺ຂຓໍ ກຕ຺ວາ ສມ຺ມາວິມຸຕ຺ຕິໍ ຜລໍ ກາຕຸໍ ວຏ຺ຏຕີຕິ ວຸຕ຺ຕໍ.

໑໔໒. ສມ຺ມາທິຏ຺ຐິສ຺ສ, ຠິກ຺ຂເວ, ມິຈ຺ຉາທິຏ຺ຐິ ນິຊ຺ຊິຓ຺ຓາ ໂຫຕີຕິອາທີສຸ ອວເສສນິກາຍຠາຓກາ ຜລໍ ກຖິຕນ຺ຕິ ວທນ຺ຕິ, ມຊ຺ຌິມຠາຓກາ ປນ ທສນ຺ນໍ ນິຊ຺ຊຣວຕ຺ຖູນໍ ອາຄຕຏ຺ຐາເນ ມຄ຺ໂຄ ກຖິໂຕຕິ ວທນ຺ຕິ. ຕຕ຺ຖ ທສ຺ສນຏ຺ເຐນ ສມ຺ມາທິຏ຺ຐິ ເວທິຕພ຺ພາ, ວິທິຕກຣຓຏ຺ເຐນ ສມ຺ມາຎາຓໍ, ຕທຘິມຸຕ຺ຕຏ຺ເຐນ ສມ຺ມາວິມຸຕ຺ຕິ.

ວີສຕິ ກຸສລປກ຺ຂາຕິ ສມ຺ມາທິຏ຺ຐິອາທໂຍ ທສ, ‘‘ສມ຺ມາທິຏ຺ຐິປຈ຺ຈຍາ ຈ ອເນເກ ກຸສລາ ຘມ຺ມາ’’ຕິອາທິນາ ນເຍນ ວຸຕ຺ຕາ ທສາຕິ ເອວໍ ວີສຕິ ກຸສລປກ຺ຂາ ໂຫນ຺ຕິ. ວີສຕິ ອກຸສລປກ຺ຂາຕິ ‘‘ມິຈ຺ຉາທິຏ຺ຐິ ນິຊ຺ຊິຓ຺ຓາ ໂຫຕີ’’ຕິອາທິນາ ນເຍນ ວຸຕ຺ຕາ ມິຈ຺ຉາທິຏ຺ຐິອາທໂຍ ທສ, ‘‘ເຍ ຈ ມິຈ຺ຉາທິຏ຺ຐິປຈ຺ຈຍາ ອເນເກ ປາປກາ’’ຕິອາທິນາ ວຸຕ຺ຕາ ທສ ຈາຕິ ເອວໍ ວີສຕິ ອກຸສລປກ຺ຂາ ເວທິຕພ຺ພາ. ມຫາຈຕ຺ຕາຣີສໂກຕິ ມຫາວິປາກທາເນນ ມຫນ຺ຕານໍ ກຸສລປກ຺ຂິການຎ຺ເຈວ ອກຸສລປກ຺ຂິການຎ຺ຈ ຈຕ຺ຕາຣີສາຍ ຘມ຺ມານໍ ປກາສິຕຕ຺ຕາ ມຫາຈຕ຺ຕາຣີສໂກຕິ.

ອິມສ຺ມິຎ຺ຈ ປນ ສຸຕ຺ເຕ ປຎ຺ຈ ສມ຺ມາທິຏ຺ຐິໂຍ ກຖິຕາ ວິປສ຺ສນາສມ຺ມາທິຏ຺ຐິ ກມ຺ມສ຺ສກຕາສມ຺ມາທິຏ຺ຐິ ມຄ຺ຄສມ຺ມາທິຏ຺ຐິ ຜລສມ຺ມາທິຏ຺ຐິ ປຈ຺ຈເວກ຺ຂຓາສມ຺ມາທິຏ຺ຐີຕິ. ຕຕ຺ຖ ‘‘ມິຈ຺ຉາທິຏ຺ຐິໍ ມິຈ຺ຉາທິຏ຺ຐີຕິ ປຊານາຕີ’’ຕິອາທິນາ ນເຍນ ວຸຕ຺ຕາ ວິປສ຺ສນາສມ຺ມາທິຏ຺ຐິ ນາມ. ‘‘ອຕ຺ຖິ ທິນ຺ນ’’ນ຺ຕິອາທິນາ ນເຍນ ວຸຕ຺ຕາ ກມ຺ມສ຺ສກຕາສມ຺ມາທິຏ຺ຐິ ນາມ. ‘‘ສມ຺ມາທິຏ຺ຐິສ຺ສ, ຠິກ຺ຂເວ, ສມ຺ມາສງ຺ກປ຺ໂປ ປໂຫຕີ’’ຕິ ເອຕ຺ຖ ປນ ມຄ຺ຄສມ຺ມາທິຏ຺ຐິ ຜລສມ຺ມາທິຏ຺ຐີຕິ ທ຺ເວປິ ກຖິຕາ. ‘‘ສມ຺ມາຎາຓໍ ປໂຫຕີ’’ຕິ. ເອຕ຺ຖ ປນ ປຈ຺ຈເວກ຺ຂຓາສມ຺ມາທິຏ຺ຐິ ກຖິຕາຕິ ເວທິຕພ຺ພາ.

໑໔໓. ສມ຺ມາທິຏ຺ຐິໍ ເຈ ຠວໍ ຄຣຫຕີຕິ ມິຈ຺ຉາທິຏ຺ຐິ ນາມາຍໍ ໂສຠນາຕິ ວທນ຺ໂຕປິ ສມ຺ມາທິຏ຺ຐິ ນາມາຍໍ ນ ໂສຠນາຕິ ວທນ຺ໂຕປິ ສມ຺ມາທິຏ຺ຐິໍ ຄຣຫຕິ ນາມ. ໂອກ຺ກລາຕິ ໂອກ຺ກລຊນປທວາສິໂນ. ວສ຺ສຠຎ຺ຎາຕິ ວສ຺ໂສ ຈ ຠຎ຺ໂຎ ຈາຕິ ທ຺ເວ ຊນາ. ອເຫຕຸວາທາຕິ ນຕ຺ຖິ ເຫຕຸ ນຕ຺ຖິ ປຈ຺ຈໂຍ ສຕ຺ຕານໍ ວິສຸທ຺ຘິຍາຕິ ເອວມາທິວາທິໂນ. ອກິຣິຍວາທາຕິ ກໂຣໂຕ ນ ກຣີຍຕິ ປາປນ຺ຕິ ເອວໍ ກິຣິຍປຏິກ຺ເຂປວາທິໂນ. ນຕ຺ຖິກວາທາຕິ ນຕ຺ຖິ ທິນ຺ນນ຺ຕິອາທິວາທິໂນ. ເຕ ອິເມສຸ ຕີສຸປິ ທສ຺ສເນສຸ ໂອກ຺ກນ຺ຕນິຍາມາ ອເຫສຸໍ. ກຖໍ ປເນເຕສຸ ນິຍາໂມ ໂຫຕີຕິ. ໂຍ ຫິ ເອວຣູປໍ ລທ຺ຘິໍ ຄເຫຕ຺ວາ ຣຕ຺ຕິຏ຺ຐານທິວາຏ຺ຐາເນ ນິສິນ຺ໂນ ສຊ຺ຌາຍຕິ ວີມໍສຕິ, ຕສ຺ສ ‘‘ນຕ຺ຖິ ເຫຕຸ ນຕ຺ຖິ ປຈ຺ຈໂຍ ກໂຣໂຕ ນ ກຣີຍຕິ ປາປໍ, ນຕ຺ຖິ ທິນ຺ນໍ, ກາຍສ຺ສ ເຠທາ ອຸຈ຺ຉິຊ຺ຊຕີ’’ຕິ ຕສ຺ມິໍ ອາຣມ຺ມເຓ ມິຈ຺ຉາສຕິ ສນ຺ຕິຏ຺ຐຕິ, ຈິຕ຺ຕໍ ເອກຄ຺ຄໍ ໂຫຕິ, ຊວນານິ ຊວນ຺ຕິ. ປຐມຊວເນ ສເຕກິຈ຺ໂຉ ໂຫຕິ, ຕຖາ ທຸຕິຍາທີສຸ. ສຕ຺ຕເມ ພຸທ຺ຘານມ຺ປິ ອເຕກິຈ຺ໂຉ ອນິວຕ຺ຕີ ອຣິຏ຺ຐກຓ຺ຑກສທິໂສ ໂຫຕິ.

ຕຕ຺ຖ ໂກຈິ ເອກໍ ທສ຺ສນໍ ໂອກ຺ກມຕິ, ໂກຈິ ທ຺ເວ, ໂກຈິ ຕີຓິປິ, ນິຍຕມິຈ຺ຉາທິຏ຺ຐິໂກວ ໂຫຕິ, ປຕ຺ໂຕ ສຄ຺ຄມຄ຺ຄາວຣຓຎ຺ເຈວ ໂມກ຺ຂມຄ຺ຄາວຣຓຎ຺ຈ. ອຠພ຺ໂພ ຕສ຺ສ ອຕ຺ຕຠາວສ຺ສ ອນນ຺ຕຣໍ ສຄ຺ຄມ຺ປິ ຄນ຺ຕຸໍ, ປເຄວ ໂມກ຺ຂໍ, ວຏ຺ຏຂາຓຸ ນາເມສ ສຕ຺ໂຕ ປຖວີໂຄປໂກ, ເຍຠຸຍ຺ເຍນ ເອວຣູປສ຺ສ ຠວໂຕ ວຸຏ຺ຐານໍ ນຕ຺ຖິ. ວສ຺ສຠຎ຺ຎາປິ ເອທິສາ ອເຫສຸໍ. ນິນ຺ທາພ຺ຍາໂຣສອຸປາຣມ຺ຠຠຍາຕິ ອຕ຺ຕໂນ ນິນ຺ທາຠເຍນ ຆຏ຺ຏນຠເຍນ ອຸປວາທຠເຍນ ຈາຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ມຫາຈຕ຺ຕາຣີສກສຸຕ຺ຕວຓ຺ຓນາ ນິຏ຺ຐິຕາ.