໖. ອິສິຄິລິສຸຕ຺ຕວຓ຺ຓນາ

໑໓໓. ເອວໍ ເມ ສຸຕນ຺ຕິ ອິສິຄິລິສຸຕ຺ຕໍ. ຕຕ຺ຖ ອຎ຺ຎາວ ສມຎ຺ຎາ ອໂຫສີຕິ ອິສິຄິລິສ຺ສ ອິສິຄິລີຕິ ສມຎ຺ຎາຍ ອຸປ຺ປນ຺ນກາເລ ເວຠາໂຣ ນ ເວຠາໂຣຕິ ປຎ຺ຎາຍິຕ຺ຖ, ອຎ຺ຎາເຍວສ຺ສ ສມຎ຺ຎາ ອໂຫສິ. ອຎ຺ຎາ ປຎ຺ຎຕ຺ຕີຕິ ອິທໍ ປຸຣິມປທສ຺ເສວ ເວວຈນໍ. ເສເສສຸປິ ເອເສວ ນໂຍ.

ຕທາ ກິຣ ຠຄວາ ສາຍນ຺ຫສມເຍ ສມາປຕ຺ຕິໂຕ ວຸຏ຺ຐາຍ ຄນ຺ຘກຸຏິໂຕ ນິກ຺ຂມິຕ຺ວາ ຍສ຺ມິໍ ຐາເນ ນິສິນ຺ນານໍ ປຎ຺ຈ ປພ຺ພຕາ ປຎ຺ຎາຍນ຺ຕິ, ຕຕ຺ຖ ຠິກ຺ຂຸສງ຺ຆປຣິວຸໂຕ ນິສີທິຕ຺ວາ ອິເມ ປຎ຺ຈ ປພ຺ພເຕ ປຏິປາຏິຍາ ອາຈິກ຺ຂິ. ຕຕ຺ຖ ນ ຠຄວໂຕ ປພ຺ພເຕຫິ ອຕ຺ໂຖ ອຕ຺ຖິ, ອິຕິ ອິເມສຸ ປນ ປພ຺ພເຕສຸ ປຏິປາຏິຍາ ກຖິຍມາເນສຸ ອິສິຄິລິສ຺ສ ອິສິຄິລິຠາໂວ ກເຖຕພ຺ໂພ ໂຫຕິ. ຕສ຺ມິໍ ກຖິຍມາເນ ປທຸມວຕິຍາ ປຸຕ຺ຕານໍ ປຎ຺ຈສຕານໍ ປຈ຺ເຈກພຸທ຺ຘານໍ ນາມານິ ເຈວ ປທຸມວຕິຍາ ຈ ປຕ຺ຖນາ ກເຖຕພ຺ພາ ຠວິສ຺ສຕີຕິ ຠຄວາ ອິມໍ ປຎ຺ຈ ປພ຺ພຕປຏິປາຏິໍ ອາຈິກ຺ຂິ.

ປວິສນ຺ຕາ ທິສ຺ສນ຺ຕິ ປວິຏ຺ຐາ ນ ທິສ຺ສນ຺ຕີຕິ ຍຖາຜາສຸກຏ຺ຐາເນ ປິຓ຺ຑາຍ ຈຣິຕ຺ວາ ກຕຠຕ຺ຕກິຈ຺ຈາ ອາຄນ຺ຕ຺ວາ ເຈຕິຍຄພ຺ເຠ ຍມກມຫາທ຺ວາຣໍ ວິວຣນ຺ຕາ ວິຍ ຕໍ ປພ຺ພຕໍ ທ຺ເວຘາ ກຕ຺ວາ ອນ຺ໂຕ ປວິສິຕ຺ວາ ຣຕ຺ຕິຏ຺ຐານທິວາຏ຺ຐານານິ ມາເປຕ຺ວາ ຕຕ຺ຖ ວສິໍສຸ, ຕສ຺ມາ ເອວມາຫ. ອິເມ ອິສີຕິ ອິເມ ປຈ຺ເຈກພຸທ຺ຘອິສີ.

ກທາ ປນ ເຕ ຕຕ຺ຖ ວສິໍສຸ? ອຕີເຕ ກິຣ ອນຸປ຺ປນ຺ເນ ຕຖາຄເຕ ພາຣາຓສິໍ ອຸປນິສ຺ສາຍ ເອກສ຺ມິໍ ຄາມເກ ເອກາ ກຸລຘີຕາ ເຂຕ຺ຕໍ ຣກ຺ຂມານາ ເອກສ຺ສ ປຈ຺ເຈກພຸທ຺ຘສ຺ສ ປຎ຺ຈຫິ ລາຊາສເຕຫິ ສທ຺ຘິໍ ເອກໍ ປທຸມປຸປ຺ຜໍ ທຕ຺ວາ ປຎ຺ຈ ປຸຕ຺ຕສຕານິ ປຕ຺ເຖສິ. ຕສ຺ມິໍເຍວ ຈ ຂເຓ ປຎ຺ຈສຕາ ມິຄລຸທ຺ທກາ ມຘຸຣມໍສໍ ທຕ຺ວາ ‘‘ເອຕິສ຺ສາ ປຸຕ຺ຕາ ຠເວຍ຺ຍາມາ’’ຕິ ປຕ຺ຖຍິໍສຸ. ສາ ຍາວຕາຍຸກໍ ຐຕ຺ວາ ເທວໂລເກ ນິພ຺ພຕ຺ຕາ, ຕໂຕ ຈຸຕາ ຊາຕສ຺ສເຣ ປທຸມຄພ຺ເຠ ນິພ຺ພຕ຺ຕິ. ຕເມໂກ ຕາປໂສ ທິສ຺ວາ ປຏິຊຄ຺ຄິ, ຕສ຺ສາ ວິຈຣນ຺ຕິຍາວ ປາທຸທ຺ຘາເຣ ປາທຸທ຺ຘາເຣ ຠູມິໂຕ ປທຸມານິ ອຸຏ຺ຐຫນ຺ຕິ. ເອໂກ ວນຈຣໂກ ທິສ຺ວາ ພາຣາຓສິຣຎ຺ໂຎ ອາໂຣເຈສິ. ຣາຊາ ນໍ ອາຫຣາເປຕ຺ວາ ອຄ຺ຄມເຫສິໍ ອກາສິ, ຕສ຺ສາ ຄພ຺ໂຠ ສຓ຺ຐາສິ. ມຫາປທຸມກຸມາໂຣ ມາຕຸກຸຈ຺ຉິຍໍ ວສິ, ເສສາ ຄພ຺ຠມລໍ ນິສ຺ສາ ນິພ຺ພຕ຺ຕາ. ວຍປ຺ປຕ຺ຕາ ອຸຍ຺ຍາເນ ປທຸມສ຺ສເຣ ກີຬນ຺ຕາ ເອເກກສ຺ມິໍ ປທຸເມ ນິສີທິຕ຺ວາ ຂຍວຍໍ ປຏ຺ຐເປຕ຺ວາ ປຈ຺ເຈກໂພຘິຎາຓໍ ນິພ຺ພຕ຺ຕຍິໍສຸ. ອຍໍ ເຕສໍ ພ຺ຍາກຣຓຄາຖາ ອໂຫສິ –

‘‘ສໂຣຣຸຫໍ ປທຸມປລາສປຕ຺ຕຊໍ, ສຸປຸປ຺ຜິຕໍ ຠມຣຄຓານຸຈິຓ຺ຓໍ;

ອນິຈ຺ຈຕາຍຸປຄຕໍ ວິທິຕ຺ວາ, ເອໂກ ຈເຣ ຂຄ຺ຄວິສາຓກປ຺ໂປ’’ຕິ.

ຕສ຺ມິໍ ກາເລ ເຕ ຕຕ຺ຖ ວສິໍສຸ, ຕທາ ຈສ຺ສ ປພ຺ພຕສ຺ສ ອິສິຄິລີຕິ ສມຎ຺ຎາ ອຸທປາທິ.

໑໓໕. ເຍ ສຕ຺ຕສາຣາຕິ ອຣິຏ຺ໂຐ ອຸປຣິຏ຺ໂຐ ຕຄຣສິຂີ ຍສສ຺ສີ ສຸທສ຺ສໂນ ປິຍທສ຺ສີ ຄນ຺ຘາໂຣ ປິຓ຺ໂຑໂລ ອຸປາສໂຠ ນີໂຕ ຕໂຖ ສຸຕວາ ຠາວິຕຕ຺ໂຕຕິ ເຕຣສນ຺ນໍ ປຈ຺ເຈກພຸທ຺ຘານໍ ນາມານິ ວຕ຺ວາ ອິທານິ ເຕສຎ຺ຈ ອຎ຺ເຎສຎ຺ຈ ຄາຖາພນ຺ເຘນ ນາມານິ ອາຈິກ຺ຂນ຺ໂຕ ເຍ ສຕ຺ຕສາຣາຕິອາທິມາຫ. ຕຕ຺ຖ ສຕ຺ຕສາຣາຕິ ສຕ຺ຕານໍ ສາຣຠູຕາ. ອນີຆາຕິ ນິທ຺ທຸກ຺ຂາ. ນິຣາສາຕິ ນິຕ຺ຕຓ຺ຫາ.

ທ຺ເວ ຊາລິໂນຕິ ຈູຬຊາລິ ມຫາຊາລີຕິ ທ຺ເວ ຊາລິນາມກາ. ສນ຺ຕຈິຕ຺ໂຕຕິ ອິທມ຺ປິ ເອກສ຺ສ ນາມເມວ. ປສ຺ສິ ຊຫິ ອຸປຘິທຸກ຺ຂມູລນ຺ຕິ ເອຕ຺ຖ ປສ຺ສິ ນາມ ໂສ ປຈ຺ເຈກພຸທ຺ໂຘ, ທຸກ຺ຂສ຺ສ ປນ ມູລໍ ອຸປຘິໍ ຊຫີຕິ ອຍມສ຺ສ ຖຸຕິ. ອປຣາຊິໂຕຕິປິ ເອກສ຺ສ ນາມເມວ.

ສຕ຺ຖາ ປວຕ຺ຕາ ສຣຠງ຺ໂຄ ໂລມຫໍໂສ ອຸຈ຺ຈງ຺ຄມາໂຍຕິ ອິເມ ປຎ຺ຈ ຊນາ. ອສິໂຕ ອນາສໂວ ມໂນມໂຍຕິ ອິເມປິ ຕໂຍ ຊນາ. ມານຈ຺ຉິໂທ ຈ ພນ຺ຘຸມາຕິ ພນ຺ຘຸມາ ນາມ ເອໂກ, ມານສ຺ສ ປນ ຉິນ຺ນຕ຺ຕາ ມານຈ຺ຉິໂທຕິ ວຸຕ຺ໂຕ. ຕທາຘິມຸຕ຺ໂຕຕິປິ ນາມເມວ.

ເກຕຸມ຺ຠຣາໂຄ ຈ ມາຕງ຺ໂຄ ອຣິໂຍຕິ ອິເມ ຕໂຍ ຊນາ. ອຖຈ຺ຈຸໂຕຕິ ອຖ ອຈ຺ຈຸໂຕ. ອຈ຺ຈຸຕຄາມພ຺ຍາມງ຺ໂກຕິ ອິເມ ທ຺ເວ ຊນາ. ເຂມາຠິຣໂຕ ຈ ໂສຣໂຕຕິ ອິເມ ທ຺ເວເຍວ.

ສຍ຺ໂຫ ອໂນມນິກ຺ກໂມຕິ ສຍ຺ໂຫ ນາມ ໂສ ພຸທ຺ໂຘ, ອໂນມວີຣິຍຕ຺ຕາ ປນ ອໂນມນິກ຺ກໂມຕິ ວຸຕ຺ໂຕ. ອານນ຺ໂທ ນນ຺ໂທ ອຸປນນ຺ໂທ ທ຺ວາທສາຕິ ຈຕ຺ຕາໂຣ ອານນ຺ທາ, ຈຕ຺ຕາໂຣ ນນ຺ທາ ຈຕ຺ຕາໂຣ ອຸປນນ຺ທາຕິ ເອວໍ ທ຺ວາທສ. ຠາຣທ຺ວາໂຊ ອນ຺ຕິມເທຫຘາຣີຕິ ຠາຣທ຺ວາໂຊ ນາມ ໂສ ພຸທ຺ໂຘ. ອນ຺ຕິມເທຫຘາຣີຕິ ຖຸຕິ.

ຕຓ຺ຫຈ຺ຉິໂທຕິ ສິຂຣິສ຺ສາຍໍ ຖຸຕິ. ວີຕຣາໂຄຕິ ມງ຺ຄລສ຺ສ ຖຸຕິ. ອຸສຠຈ຺ຉິທາ ຊາລິນິໍ ທຸກ຺ຂມູລນ຺ຕິ ອຸສໂຠ ນາມ ໂສ ພຸທ຺ໂຘ ທຸກ຺ຂມູລຠູຕໍ ຊາລິນິໍ ອຈ຺ຉິທາຕິ ອຕ຺ໂຖ. ສນ຺ຕໍ ປທໍ ອຊ຺ຌຄໂມປນີໂຕຕິ ອຸປນີໂຕ ນາມ ໂສ ພຸທ຺ໂຘ ສນ຺ຕໍ ປທໍ ອຊ຺ຌຄມາ. ວີຕຣາໂຄຕິປິ ເອກສ຺ສ ນາມເມວ. ສຸວິມຸຕ຺ຕຈິຕ຺ໂຕຕິ ອຍໍ ກຓ຺ຫສ຺ສ ຖຸຕິ.

ເອເຕ ຈ ອຎ຺ເຎ ຈາຕິ ເອເຕ ປາຬິຍໍ ອາຄຕາ ຈ ປາຬິຍໍ ອນາຄຕາ ອຎ຺ເຎ ຈ ເອເຕສໍ ເອກນາມກາເຍວ. ອິເມສຸ ຫິ ປຎ຺ຈສຸ ປຈ຺ເຈກພຸທ຺ຘສເຕສຸ ທ຺ເວປິ ຕໂຍປິ ທສປິ ທ຺ວາທສປິ ອານນ຺ທາທໂຍ ວິຍ ເອກນາມກາ ອເຫສຸໍ. ອິຕິ ປາຬິຍໍ ອາຄຕນາເມເຫວ ສພ຺ເພສໍ ນາມານິ ວຸຕ຺ຕານິ ໂຫນ຺ຕີຕິ ອິໂຕ ປຣໍ ວິສຸໍ ວິສຸໍ ອວຕ຺ວາ ‘‘ເອເຕ ຈ ອຎ຺ເຎ ຈາ’’ຕິ ອາຫ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ອິສິຄິລິສຸຕ຺ຕວຓ຺ຓນາ ນິຏ຺ຐິຕາ.