໑໐. ຈູຬປຸຓ຺ຓມສຸຕ຺ຕວຓ຺ຓນາ

໙໑. ເອວໍ ເມ ສຸຕນ຺ຕິ ຈູຬປຸຓ຺ຓມສຸຕ຺ຕໍ. ຕຕ຺ຖ ຕຸຓ຺ຫີຠູຕໍ ຕຸຓ຺ຫີຠູຕນ຺ຕິ ຍໍ ຍໍ ທິສໍ ອນຸວິໂລເກຕິ, ຕຕ຺ຖ ຕຕ຺ຖ ຕຸຓ຺ຫີຠູຕເມວ. ອນຸວິໂລເກຕ຺ວາຕິ ປຎ຺ຈປສາທປຏິມຓ຺ຑິຕານິ ອກ຺ຂີນິ ອຸມ຺ມີເລຕ຺ວາ ຕໂຕ ຕໂຕ ວິໂລເກຕ຺ວາ ອນ຺ຕມໂສ ຫຕ຺ຖກຸກ຺ກຸຈ຺ຈປາທກຸກ຺ກຸຈ຺ຈານມ຺ປິ ອຠາວໍ ທິສ຺ວາ. ອສປ຺ປຸຣິໂສຕິ ປາປປຸຣິໂສ. ໂນ ເຫຕໍ, ຠນ຺ເຕຕິ ຍສ຺ມາ ອນ຺ໂຘ ອນ຺ຘໍ ວິຍ ໂສ ຕໍ ຊານິຕຸໍ ນ ສກ຺ໂກຕິ, ຕສ຺ມາ ເອວມາຫໍສຸ. ເອເຕເນວ ນເຍນ ອິໂຕ ປເຣສຸປິ ວາເຣສຸ ອຕ຺ໂຖ ເວທິຕພ຺ໂພ. ອສ຺ສທ຺ຘສມນ຺ນາຄໂຕຕິ ປາປຘມ຺ມສມນ຺ນາຄໂຕ. ອສປ຺ປຸຣິສຠຕ຺ຕີຕິ ອສປ຺ປຸຣິສເສວໂນ. ອສປ຺ປຸຣິສຈິນ຺ຕີຕິ ອສປ຺ປຸຣິສຈິນ຺ຕາຍ ຈິນ຺ຕໂກ. ອສປ຺ປຸຣິສມນ຺ຕີຕິ ອສປ຺ປຸຣິສມນ຺ຕນໍ ມນ຺ເຕຕາ. ອສປ຺ປຸຣິສວາໂຈຕິ ອສປ຺ປຸຣິສວາຈໍ ຠາສິຕາ. ອສປ຺ປຸຣິສກມ຺ມນ຺ໂຕຕິ ອສປ຺ປຸຣິສກມ຺ມານໍ ກຕ຺ຕາ. ອສປ຺ປຸຣິສທິຏ຺ຐີຕິ ອສປ຺ປຸຣິສທິຏ຺ຐິຍາ ສມນ຺ນາຄໂຕ. ອສປ຺ປຸຣິສທານນ຺ຕິ ອສປ຺ປຸຣິເສຫິ ທາຕພ຺ພໍ ທານໍ. ຕ຺ຍາສ຺ສ ມິຕ຺ຕາຕິ ເຕ ອສ຺ສ ມິຕ຺ຕາ. ອຕ຺ຕພ຺ຍາພາຘາຍປິ ເຈເຕຕີຕິ ປາຓໍ ຫນິສ຺ສາມິ, ອທິນ຺ນໍ ອາທິຍິສ຺ສາມິ, ມິຈ຺ຉາ ຈຣິສ຺ສາມິ, ທສ ອກຸສລກມ຺ມປເຖ ສມາທາຍ ວຕ຺ຕິສ຺ສາມີຕິ ເອວໍ ອຕ຺ຕໂນ ທຸກ຺ຂຕ຺ຖາຍ ຈິນ຺ເຕຕິ. ປຣພ຺ຍາພາຘາຍາຕິ ຍຖາ ອສຸໂກ ອສຸກໍ ປາຓໍ ຫນ຺ຕິ, ອສຸກສ຺ສ ສນ຺ຕກໍ ອທິນ຺ນໍ ອາທິຍຕິ, ທສ ອກຸສລກມ຺ມປເຖ ສມາທາຍ ວຕ຺ຕຕິ, ເອວໍ ນໍ ອາຓາເປສ຺ສາມີຕິ ເອວໍ ປຣສ຺ສ ທຸກ຺ຂຕ຺ຖາຍ ຈິນ຺ເຕຕິ. ອຸຠຍພ຺ຍາພາຘາຍາຕິ ອຫໍ ອສຸກຎ຺ຈ ອສຸກຎ຺ຈ ຄເຫຕ຺ວາ ທສ ອກຸສລກມ຺ມປເຖ ສມາທາຍ ວຕ຺ຕິສ຺ສາມີຕິ ເອວໍ ອຸຠຍທຸກ຺ຂຕ຺ຖາຍ ຈິນ຺ເຕຕີຕິ.

ອຕ຺ຕພ຺ຍາພາຘາຍປິ ມນ຺ເຕຕີຕິອາທີສຸ ອຫໍ ທສ ອກຸສລກມ຺ມປເຖ ສມາທາຍ ວຕ຺ຕິສ຺ສາມີຕິ ມນ຺ເຕນ຺ໂຕ ອຕ຺ຕພ຺ຍາພາຘາຍ ມນ຺ເຕຕິ ນາມ. ອສຸກໍ ທສ ອກຸສລກມ຺ມປເຖ ສມາທເປສ຺ສາມີຕິ ມນ຺ເຕນ຺ໂຕ ປຣພ຺ຍາພາຘາຍ ມນ຺ເຕຕິ ນາມ. ອຎ຺ເຎນ ສທ຺ຘິໍ – ‘‘ມຍໍ ອຸໂຠປິ ເອກໂຕ ຫຸຕ຺ວາ ທສ ອກຸສລກມ຺ມປເຖ ສມາທາຍ ວຕ຺ຕິສ຺ສາມາ’’ຕິ ມນ຺ເຕນ຺ໂຕ ອຸຠຍພ຺ຍາພາຘາຍ ມນ຺ເຕຕິ ນາມ.

ອສກ຺ກຈ຺ຈໍ ທານໍ ເທຕີຕິ ເທຍ຺ຍຘມ຺ມມ຺ປິ ປຸຄ຺ຄລມ຺ປິ ນ ສກ຺ກໂຣຕິ. ເທຍ຺ຍຘມ຺ມໍ ນ ສກ຺ກໂຣຕິ ນາມ ອຸຕ຺ຕຓ຺ຑຸລາທິໂທສສມນ຺ນາຄຕໍ ອາຫາຣໍ ເທຕິ, ນ ປສນ຺ນໍ ກໂຣຕິ. ປຸຄ຺ຄລໍ ນ ສກ຺ກໂຣຕິ ນາມ ນິສີທນຏ຺ຐານໍ ອສມ຺ມຊ຺ຊິຕ຺ວາ ຍຕ຺ຖ ວາ ຕຕ຺ຖ ວາ ນິສີທາເປຕ຺ວາ ຍໍ ວາ ຕໍ ວາ ອາຘາຣກໍ ຐເປຕ຺ວາ ທານໍ ເທຕິ. ອສຫຕ຺ຖາຕິ ອຕ຺ຕໂນ ຫຕ຺ເຖນ, ນ ເທຕິ, ທາສກມ຺ມກາຣາທີຫິ ທາເປຕິ. ອຈິຕ຺ຕິກຕ຺ວາຕິ ເຫຏ຺ຐາ ວຸຕ຺ຕນເຍນ ເທຍ຺ຍຘມ຺ເມປິ ປຸຄ຺ຄເລປິ ນ ຈິຕ຺ຕີກາຣໍ ກຕ຺ວາ ເທຕິ. ອປວິທ຺ຘນ຺ຕິ ຉຑ຺ເຑຕຸກາໂມ ຫຸຕ຺ວາ ວມ຺ມິເກ ອຸຣຄໍ ປກ຺ຂິປນ຺ໂຕ ວິຍ ເທຕິ. ອນາຄມນທິຏ຺ຐິໂກຕິ ໂນ ຜລປາຏິກງ຺ຂີ ຫຸຕ຺ວາ ເທຕິ.

ຕຕ຺ຖ ອຸປປຊ຺ຊຕີຕິ ນ ທານໍ ທຕ຺ວາ ນິຣເຍ ອຸປປຊ຺ຊຕິ. ຍໍ ປນ ເຕນ ປາປລທ຺ຘິກາຍ ມິຈ຺ຉາທສ຺ສນໍ ຄຫິຕໍ, ຕາຍ ມິຈ຺ຉາທິຏ຺ຐິຍາ ນິຣເຍ ອຸປປຊ຺ຊຕິ. ສຸກ຺ກປກ຺ໂຂ ວຸຕ຺ຕປຏິປກ຺ຂນເຍນ ເວທິຕພ຺ໂພ. ເທວມຫຕ຺ຕຕາຕິ ຉກາມາວຈຣເທວາ. ມນຸສ຺ສມຫຕ຺ຕຕາຕິ ຕິຓ຺ຓໍ ກຸລານໍ ສມ຺ປຕ຺ຕິ. ເສສໍ ສພ຺ພຕ຺ຖ ອຸຕ຺ຕານເມວ. ອິທໍ ປນ ສຸຕ຺ຕໍ ສຸທ຺ຘວຏ຺ຏວເສເນວ ກຖິຕນ຺ຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ຈູຬປຸຓ຺ຓມສຸຕ຺ຕວຓ຺ຓນາ ນິຏ຺ຐິຕາ.

ປຐມວຄ຺ຄວຓ຺ຓນາ ນິຏ຺ຐິຕາ.