໘. ສມຓມຸຓ຺ຑິກສຸຕ຺ຕວຓ຺ຓນາ

໒໖໐. ເອວໍ ເມ ສຸຕນ຺ຕິ ສມຓມຸຓ຺ຑິກສຸຕ຺ຕໍ. ຕຕ຺ຖ ອຸຄ຺ຄາຫມາໂນຕິ ຕສ຺ສ ປຣິພ຺ພາຊກສ຺ສ ນາມໍ. ສຸມໂນຕິ ປກຕິນາມໍ. ກິຎ຺ຈິ ກິຎ຺ຈິ ປນ ອຸຄ຺ຄຫິຕຸໍ ອຸຄ຺ຄາເຫຕຸໍ ສມຕ຺ຖຕາຍ ອຸຄ຺ຄາຫມາໂນຕິ ນໍ ສຎ຺ຊານນ຺ຕິ. ສມຍໍ ປວທນ຺ຕິ ເອຕ຺ຖາຕິ ສມຍປ຺ປວາທກໍ. ຕສ຺ມິໍ ກິຣ ຐາເນ ຈງ຺ກີຕາຣຸກ຺ຂໂປກ຺ຂຣສາຕິປ຺ປຠຸຕໂຍ ພ຺ຣາຫ຺ມຓາ ນິຄຓ຺ຐາເຈລກປຣິພ຺ພາຊກາທໂຍ ຈ ປພ຺ພຊິຕາ ສນ຺ນິປຕິຕ຺ວາ ອຕ຺ຕໂນ ອຕ຺ຕໂນ ສມຍໍ ປວທນ຺ຕິ ກເຖນ຺ຕິ ທີເປນ຺ຕິ, ຕສ຺ມາ ໂສ ອາຣາໂມ ສມຍປ຺ປວາທໂກຕິ ວຸຈ຺ຈຕິ. ສ຺ເວວ ຕິນ຺ທຸກາຈີຣສງ຺ຂາຕາຍ ຕິມ຺ພຣູສກຣຸກ຺ຂປນ຺ຕິຍາ ປຣິກ຺ຂິຕ຺ຕຕ຺ຕາ ຕິນ຺ທຸກາຈີຣໍ. ຍສ຺ມາ ປເນຕ຺ຖ ປຐມໍ ເອກາ ສາລາ ອໂຫສິ, ປຈ຺ຉາ ມຫາປຸຎ຺ຎໍ ໂປຏ຺ຐປາທປຣິພ຺ພາຊກໍ ນິສ຺ສາຍ ພຫູ ສາລາ ກຕາ, ຕສ຺ມາ ຕເມວ ເອກໍ ສາລໍ ອຸປາທາຍ ລທ຺ຘນາມວເສນ ເອກສາລໂກຕິ ວຸຈ຺ຈຕິ. ມລ຺ລິກາຍ ປນ ປເສນທິຣຎ຺ໂຎ ເທວິຍາ ອຸຍ຺ຍານຠູໂຕ ໂສ ປຸປ຺ຜຜລສຎ຺ຉນ຺ໂນ ອາຣາໂມຕິ ກຕ຺ວາ ມລ຺ລິກາຍ ອາຣາໂມຕິ ສງ຺ຂໍ ຄໂຕ. ຕສ຺ມິໍ ສມຍປ຺ປວາທເກ ຕິນ຺ທຸກາຈີເຣ ເອກສາລເກ ມລ຺ລິກາຍ ອາຣາເມ. ປຏິວສຕີຕິ ວາສຜາສຸຕາຍ ວສຕິ. ທິວາ ທິວສ຺ສາຕິ ທິວສສ຺ສ ທິວາ ນາມ ມຊ຺ຌນ຺ຫາຕິກ຺ກໂມ, ຕສ຺ມິໍ ທິວສສ຺ສປິ ທິວາຠູເຕ ອຕິກ຺ກນ຺ຕມຕ຺ເຕ ມຊ຺ຌນ຺ຫິເກ ນິກ຺ຂມີຕິ ອຕ຺ໂຖ. ປຏິສລ຺ລີໂນຕິ ຕໂຕ ຕໂຕ ຣູປາທິໂຄຈຣໂຕ ຈິຕ຺ຕໍ ປຏິສໍຫຣິຕ຺ວາ ລີໂນ, ຌານຣຕິເສວນວເສນ ເອກີຠາວໍ ຄໂຕ. ມໂນຠາວນີຍານນ຺ຕິ ມນວຑ຺ຒນການໍ, ເຍ ອາວຊ຺ຊໂຕ ມນສິກໂຣໂຕ ຈິຕ຺ຕໍ ວິນີວຣຓໍ ໂຫຕິ ອຸນ຺ນມຕິ ວຑ຺ຒຕິ. ຍາວຕາຕິ ຍຕ຺ຕກາ. ອຍໍ ເຕສໍ ອຎ຺ຎຕໂຣຕິ ອຍໍ ເຕສໍ ອພ຺ຠນ຺ຕໂຣ ເອໂກ ສາວໂກ. ອປ຺ເປວ ນາມາຕິ ຕສ຺ສ ອຸປສງ຺ກມນໍ ປຕ຺ຖຍມາໂນ ອາຫ. ປຕ຺ຖນາກາຣຓໍ ປນ ສນ຺ທກສຸຕ຺ເຕ ວຸຕ຺ຕເມວ.

໒໖໑. ເອຕທໂວຈາຕິ ທນ຺ທປຎ຺ໂຎ ອຍໍ ຄຫປຕິ, ຘມ຺ມກຖາຍ ນໍ ສງ຺ຄຓ຺ຫິຕ຺ວາ ອຕ຺ຕໂນ ສາວກໍ ກຣິສ຺ສາມີຕິ ມຎ຺ຎມາໂນ ເອຕໍ ‘‘ຈຕູຫິ ໂຂ’’ຕິອາທິວຈນໍ ອໂວຈ. ຕຕ຺ຖ ປຎ຺ຎເປມີຕິ ທສ຺ເສມິ ຐເປມິ. ສມ຺ປນ຺ນກຸສລນ຺ຕິ ປຣິປຸຓ຺ຓກຸສລໍ. ປຣມກຸສລນ຺ຕິ ອຸຕ຺ຕມກຸສລໍ. ອໂຍຊ຺ຌນ຺ຕິ ວາທຍຸທ຺ເຘນ ຍຸຊ຺ຌິຕ຺ວາ ຈາເລຕຸໍ ອສກ຺ກຸເຓຍ຺ຍໍ ອຈລໍ ນິກ຺ກມ຺ປໍ ຖິຣໍ. ນ ກໂຣຕີຕິ ອກຣຓມຕ຺ຕເມວ ວທຕິ, ເອຕ຺ຖ ປນ ສໍວຣປ຺ປຫານໍ ວາ ປຏິເສວນປ຺ປຫານໍ ວາ ນ ວທຕິ. ເສສປເທສຸປິ ເອເສວ ນໂຍ.

ເນວ ອຠິນນ຺ທີຕິ ຕິຕ຺ຖິຍາ ນາມ ຊານິຕ຺ວາປິ ອຊານິຕ຺ວາປິ ຍໍ ວາ ຕໍ ວາ ວທນ຺ຕີຕິ ມຎ຺ຎມາໂນ ນາຠິນນ຺ທິ. ນ ປຏິກ຺ໂກສີຕິ ສາສນສ຺ສ ອນຸໂລມໍ ວິຍ ປສນ຺ນາກາຣໍ ວິຍ ວທຕີຕິ ມຎ຺ຎມາໂນ ນ ປຏິເສເຘຕິ.

໒໖໒. ຍຖາ ອຸຄ຺ຄາຫມານສ຺ສາຕິ ຍຖາ ຕສ຺ສ ວຈນໍ, ເອວໍ ສນ຺ເຕ ອຸຕ຺ຕານເສຍ຺ຍໂກ ກຸມາໂຣ ອໂຍຊ຺ຌສມໂຓ ຖິຣສມໂຓ ຠວິສ຺ສຕິ, ມຍໍ ປນ ເອວໍ ນ ວທາມາຕິ ທີເປຕິ. ກາໂຍຕິປິ ນ ໂຫຕີຕິ ສກກາໂຍ ປຣກາໂຍຕິປິ ວິເສສຎາຓໍ ນ ໂຫຕິ. ອຎ຺ຎຕ຺ຣ ຜນ຺ທິຕມຕ຺ຕາຕິ ປຈ຺ຈຕ຺ຖຣເຓ ວລິສມ຺ຜສ຺ເສນ ວາ ມງ຺ຄຸລທຏ຺ເຐນ ວາ ກາຍຜນ຺ທນມຕ຺ຕໍ ນາມ ໂຫຕິ. ຕໍ ຐເປຕ຺ວາ ອຎ຺ຎໍ ກາເຍນ ກຣຓກມ຺ມໍ ນາມ ນຕ຺ຖິ. ຕມ຺ປິ ຈ ກິເລສສຫຄຕຈິຕ຺ເຕເນວ ໂຫຕິ. ວາຈາຕິປິ ນ ໂຫຕີຕິ ມິຈ຺ຉາວາຈາ ສມ຺ມາວາຈາຕິປິ ນານຕ຺ຕໍ ນ ໂຫຕິ. ໂຣທິຕມຕ຺ຕາຕິ ຊິຆຈ຺ຉາປິປາສາປເຣຕສ຺ສ ປນ ໂຣທິຕມຕ຺ຕໍ ໂຫຕິ. ຕມ຺ປິ ກິເລສສຫຄຕຈິຕ຺ເຕເນວ. ສງ຺ກປ຺ໂປຕິ ມິຈ຺ຉາສງ຺ກປ຺ໂປ ສມ຺ມາສງ຺ກປ຺ໂປຕິປິ ນານຕ຺ຕໍ ນ ໂຫຕິ. ວິກູຊິຕມຕ຺ຕາຕິ ວິກູຊິຕມຕ຺ຕໍ ໂຣທນຫສິຕມຕ຺ຕໍ ໂຫຕິ. ທຫຣກຸມາຣການຎ຺ຫິ ຈິຕ຺ຕໍ ອຕີຕາຣມ຺ມຓໍ ປວຕ຺ຕຕິ, ນິຣຍໂຕ ອາຄຕາ ນິຣຍທຸກ຺ຂໍ ສຣິຕ຺ວາ ໂຣທນ຺ຕິ, ເທວໂລກໂຕ ອາຄຕາ ຫສນ຺ຕິ, ຕມ຺ປິ ກິເລສສຫຄຕຈິຕ຺ເຕເນວ ໂຫຕິ. ອາຊີໂວຕິ ມິຈ຺ຉາຊີໂວ ສມ຺ມາຊີໂວຕິປິ ນານຕ຺ຕໍ ນ ໂຫຕິ. ອຎ຺ຎຕ຺ຣ ມາຕຸຖຎ຺ຎາຕິ ຖຎ຺ຎໂຈຣທາຣກາ ນາມ ໂຫນ຺ຕິ, ມາຕຣິ ຂີຣໍ ປາຍນ຺ຕິຍາ ອປິວິຕ຺ວາ ອຎ຺ຎວິຫິຕກາເລ ປິຏ຺ຐິປສ຺ເສນ ອາຄນ຺ຕ຺ວາ ຖຎ຺ຎໍ ປິວນ຺ຕິ. ເອຕ຺ຕກໍ ມຸຎ຺ຈິຕ຺ວາ ອຎ຺ໂຎ ມິຈ຺ຉາຊີໂວ ນຕ຺ຖິ. ອຍມ຺ປິ ກິເລສສຫຄຕຈິຕ຺ເຕເນວ ໂຫຕີຕິ ທສ຺ເສຕິ.

໒໖໓. ເອວໍ ປຣິພ຺ພາຊກວາທໍ ປຏິກ຺ຂິປິຕ຺ວາ ອິທານິ ສຍໍ ເສກ຺ຂຠູມິຍໍ ມາຕິກໍ ຐເປນ຺ໂຕ ຈຕູຫິ ໂຂ ອຫນ຺ຕິອາທິມາຫ. ຕຕ຺ຖ ສມຘິຄຍ຺ຫ ຕິຏ຺ຐຕີຕິ ວິເສເສຕ຺ວາ ຕິຏ຺ຐຕິ. ນ ກາເຍນ ປາປ ກມ຺ມນ຺ຕິອາທີສຸ ນ ເກວລໍ ອກຣຓມຕ຺ຕເມວ, ຠຄວາ ປນ ເອຕ຺ຖ ສໍວຣປ຺ປຫານປຏິສງ຺ຂາ ປຎ຺ຎເປຕິ. ຕໍ ສນ຺ຘາເຍວມາຫ. ນ ເຈວ ສມ຺ປນ຺ນກຸສລນ຺ຕິອາທິ ປນ ຂີຓາສວໍ ສນ຺ຘາຍ ວຸຕ຺ຕໍ.

ອິທານິ ອເສກ຺ຂຠູມິຍໍ ມາຕິກໍ ຐເປນ຺ໂຕ ທສຫິ ໂຂ ອຫນ຺ຕິອາທິມາຫ. ຕຕ຺ຖ ຕີຓິ ປທານິ ນິສ຺ສາຍ ທ຺ເວ ປຐມຈຕຸກ຺ກາ ຐປິຕາ, ເອກໍ ປທໍ ນິສ຺ສາຍ ທ຺ເວ ປຈ຺ຉິມຈຕຸກ຺ກາ. ອຍໍ ເສກ຺ຂຠູມິຍໍ ມາຕິກາ.

໒໖໔. ອິທານິ ຕໍ ວິຠຊນ຺ໂຕ ກຕເມ ຈ ຖປຕິ ອກຸສລສີລາຕິອາທິມາຫ. ຕຕ຺ຖ ສຣາຄນ຺ຕິ ອຏ຺ຐວິຘໍ ໂລຠສຫຄຕຈິຕ຺ຕໍ. ສໂທສນ຺ຕິ ປຏິຆສມ຺ປຍຸຕ຺ຕຈິຕ຺ຕທ຺ວຍໍ. ສໂມຫນ຺ຕິ ວິຈິກິຈ຺ຉຸທ຺ຘຈ຺ຈສຫຄຕຈິຕ຺ຕທ຺ວຍມ຺ປິ ວຏ຺ຏຕິ, ສພ຺ພາກຸສລຈິຕ຺ຕານິປິ. ໂມໂຫ ສພ຺ພາກຸສເລ ອຸປ຺ປຊ຺ຊຕີຕິ ຫິ ວຸຕ຺ຕໍ. ອິໂຕສມຸຏ຺ຐານາຕິ ອິໂຕ ສຣາຄາທິຈິຕ຺ຕໂຕ ສມຸຏ຺ຐານໍ ອຸປ຺ປຕ຺ຕິ ເອເຕສນ຺ຕິ ອິໂຕສມຸຏ຺ຐານາ.

ກຸຫິນ຺ຕິ ກຕຣໍ ຐານໍ ປາປຸຓິຕ຺ວາ ອປຣິເສສາ ນິຣຸຊ຺ຌນ຺ຕິ. ເອຕ຺ເຖເຕຕິ ໂສຕາປຕ຺ຕິຜເລ ຠຸມ຺ມໍ. ປາຕິໂມກ຺ຂສໍວຣສີລຎ຺ຫິ ໂສຕາປຕ຺ຕິຜເລ ປຣິປຸຓ຺ຓໍ ໂຫຕິ, ຕໍ ຐານໍ ປຕ຺ວາ ອກຸສລສີລໍ ອເສສໍ ນິຣຸຊ຺ຌຕິ. ອກຸສລສີລນ຺ຕິ ຈ ທຸສ຺ສີລສ຺ເສຕໍ ອຘິວຈນນ຺ຕິ ເວທິຕພ຺ພໍ.

ອກຸສລານໍ ສີລານໍ ນິໂຣຘາຍ ປຏິປນ຺ໂນຕິ ເອຕ຺ຖ ຍາວ ໂສຕາປຕ຺ຕິມຄ຺ຄາ ນິໂຣຘາຍ ປຏິປນ຺ໂນ ນາມ ໂຫຕິ, ຜລປຕ຺ເຕ ປນ ເຕ ນິໂຣຘິຕາ ນາມ ໂຫນ຺ຕິ.

໒໖໕. ວີຕຣາຄນ຺ຕິອາທີຫິ ອຏ຺ຐວິຘໍ ກາມາວຈຣກຸສລຈິຕ຺ຕເມວ ວຸຕ຺ຕໍ. ເອເຕນ ຫິ ກຸສລສີລໍ ສມຸຏ຺ຐາຕິ.

ສີລວາ ໂຫຕີຕິ ສີລສມ຺ປນ຺ໂນ ໂຫຕິ ຄຸຓສມ຺ປນ຺ໂນ ຈ. ໂນ ຈ ສີລມໂຍຕິ ອລເມຕ຺ຕາວຕາ, ນຕ຺ຖິ ອິໂຕ ກິຎ຺ຈິ ອຸຕ຺ຕຣິ ກຣຓີຍນ຺ຕິ ເອວໍ ສີລມໂຍ ນ ໂຫຕິ. ຍຕ຺ຖສ຺ສ ເຕຕິ ອຣຫຕ຺ຕຜເລ ຠຸມ຺ມໍ. ອຣຫຕ຺ຕຜລຎ຺ຫິ ປຕ຺ວາ ອກຸສລສີລໍ ອເສສໍ ນິຣຸຊ຺ຌຕິ.

ນິໂຣຘາຍ ປຏິປນ຺ໂນຕິ ເອຕ຺ຖ ຍາວ ອຣຫຕ຺ຕມຄ຺ຄາ ນິໂຣຘາຍ ປຏິປນ຺ໂນ ນາມ ໂຫຕິ, ຜລປຕ຺ເຕ ປນ ເຕ ນິໂຣຘິຕາ ນາມ ໂຫນ຺ຕິ.

໒໖໖. ກາມສຎ຺ຎາທີສຸ ກາມສຎ຺ຎາ ອຏ຺ຐໂລຠສຫຄຕຈິຕ຺ຕສຫຊາຕາ, ອິຕຣາ ທ຺ເວ ໂທມນສ຺ສສຫຄຕຈິຕ຺ຕທ຺ວເຍນ ສຫຊາຕາ.

ປຐມໍ ຌານນ຺ຕິ ອນາຄາມິຜລປຐມຊ຺ຌານໍ. ເອຕ຺ເຖເຕຕິ ອນາຄາມິຜເລ ຠຸມ຺ມໍ. ອນາຄາມິຜລຎ຺ຫິ ປຕ຺ວາ ອກຸສລສງ຺ກປ຺ປາ ອປຣິເສສາ ນິຣຸຊ຺ຌນ຺ຕິ.

ນິໂຣຘາຍ ປຏິປນ຺ໂນຕິ ເອຕ຺ຖ ຍາວ ອນາຄາມິມຄ຺ຄາ ນິໂຣຘາຍ ປຏິປນ຺ໂນ ນາມ ໂຫຕິ, ຜລປຕ຺ເຕ ປນ ເຕ ນິໂຣຘິຕາ ນາມ ໂຫນ຺ຕິ. ເນກ຺ຂມ຺ມສຎ຺ຎາທໂຍ ຫິ ຕິສ຺ໂສປິ ອຏ຺ຐກາມາວຈຣກຸສລສຫຊາຕສຎ຺ຎາວ.

໒໖໗. ເອຕ຺ເຖເຕຕິ ອຣຫຕ຺ຕຜເລ ຠຸມ຺ມໍ. ທຸຕິຍຊ຺ຌານິກໍ ອຣຫຕ຺ຕຜລຎ຺ຫິ ປາປຸຓິຕ຺ວາ ກຸສລສງ຺ກປ຺ປາ ອປຣິເສສາ ນິຣຸຊ຺ຌນ຺ຕິ. ນິໂຣຘາຍ ປຏິປນ຺ໂນຕິ ເອຕ຺ຖ ຍາວ ອຣຫຕ຺ຕມຄ຺ຄາ ນິໂຣຘາຍ ປຏິປນ຺ໂນ ນາມ ໂຫຕິ, ຜລປຕ຺ເຕ ປນ ເຕ ນິໂຣຘິຕາ ນາມ ໂຫນ຺ຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ສມຓມຸຓ຺ຑິກສຸຕ຺ຕວຓ຺ຓນາ ນິຏ຺ຐິຕາ.