໘. ອຠຍຣາຊກຸມາຣສຸຕ຺ຕວຓ຺ຓນາ

໘໓. ເອວໍ ເມ ສຸຕນ຺ຕິ ອຠຍສຸຕ຺ຕໍ. ຕຕ຺ຖ ອຠໂຍຕິ ຕສ຺ສ ນາມໍ. ຣາຊກຸມາໂຣຕິ ພິມ຺ພິສາຣສ຺ສ ໂອຣສປຸຕ຺ໂຕ. ວາທໍ ອາໂຣເປຫີຕິ ໂທສໍ ອາໂຣເປຫິ. ເນຣຍິໂກຕິ ນິຣເຍ ນິພ຺ພຕ຺ຕໂກ. ກປ຺ປຏ຺ໂຐຕິ ກປ຺ປຏ຺ຐິຕິໂກ. ອເຕກິຈ຺ໂຉຕິ ພຸທ຺ຘສຫສ຺ເສນາປິ ຕິກິຈ຺ຉິຕຸໍ ນ ສກ຺ກາ. ອຸຄ຺ຄິລິຕຸນ຺ຕິ ທ຺ເວ ອນ຺ເຕ ໂມເຈຕ຺ວາ ກເຖຕຸໍ ອສກ຺ໂກນ຺ໂຕ ອຸຄ຺ຄິລິຕຸໍ ພຫິ ນີຫຣິຕຸໍ ນ ສກ຺ຂິຕິ. ໂອຄິລິຕຸນ຺ຕິ ປຸຈ຺ຉາຍ ໂທສໍ ທຕ຺ວາ ຫາເຣຕຸໍ ອສກ຺ໂກນ຺ໂຕ ໂອຄິລິຕຸໍ ອນ຺ໂຕ ປເວເສຕຸໍ ນ ສກ຺ຂິຕິ.

ເອວໍ, ຠນ຺ເຕຕິ ນິຄຓ຺ໂຐ ກິຣ ຈິນ຺ເຕສິ – ‘‘ສມໂຓ ໂຄຕໂມ ມຍ຺ຫໍ ສາວເກ ຠິນ຺ທິຕ຺ວາ ຄຓ຺ຫາຕິ, ຫນ຺ທາຫໍ ເອກໍ ປຎ຺ຫໍ ອຠິສງ຺ຂໂຣມິ, ຍໍ ປຸຏ຺ໂຐ ສມໂຓ ໂຄຕໂມ ອຸກ຺ກຸຏິໂກ ຫຸຕ຺ວາ ນິສິນ຺ໂນ ອຸຏ຺ຐາຕຸໍ ນ ສກ຺ຂິສ຺ສຕີ’’ຕິ. ໂສ ອຠຍສ຺ສ ເຄຫາ ນີຫຏຠຕ຺ໂຕ ສິນິທ຺ຘໂຠຊນໍ ຠຸຎ຺ຊນ຺ໂຕ ພຫູ ປຎ຺ເຫ ອຠິສງ຺ຂຣິຕ຺ວາ – ‘‘ເອຕ຺ຖ ສມໂຓ ໂຄຕໂມ ອິມໍ ນາມ ໂທສໍ ທສ຺ເສສ຺ສຕິ, ເອຕ຺ຖ ອິມໍ ນາມາ’’ຕິ ສພ຺ເພ ປຫາຍ ຈາຕຸມາສມຕ຺ຖເກ ອິມໍ ປຎ຺ຫໍ ອທ຺ທສ. ອຖສ຺ສ ເອຕທໂຫສິ – ‘‘ອິມສ຺ສ ປຎ຺ຫສ຺ສ ປຸຈ຺ຉາຍ ວາ ວິສ຺ສຊ຺ຊເນ ວາ ນ ສກ຺ກາ ໂທໂສ ທາຕຸໍ, ໂອວຏ຺ຏິກສາໂຣ ອຍໍ, ໂກ ນຸ ໂຂ ອິມໍ ຄເຫຕ຺ວາ ສມຓສ຺ສ ໂຄຕມສ຺ສ ວາທໍ ອາໂຣເປສ຺ສຕີ’’ຕິ. ຕໂຕ ‘‘ອຠໂຍ ຣາຊກຸມາໂຣ ປຓ຺ຑິໂຕ, ໂສ ສກ຺ຂິສ຺ສຕີຕິ ຕໍ ອຸຄ຺ຄຓ຺ຫາເປມີ’’ຕິ ນິຏ຺ຐໍ ຄນ຺ຕ຺ວາ ອຸຄ຺ຄຓ຺ຫາເປສິ. ໂສ ວາທຊ຺ຌາສຍຕາຍ ຕສ຺ສ ວຈນໍ ສມ຺ປຏິຈ຺ຉນ຺ໂຕ ‘‘ເອວໍ, ຠນ຺ເຕ,’’ຕິ ອາຫ.

໘໔. ອກາໂລ ໂຂ ອຊ຺ຊາຕິ ອຍໍ ປຎ຺ໂຫ ຈຕູຫິ ມາເສຫິ ອຠິສງ຺ຂໂຕ, ຕຕ຺ຖ ອິທໍ ຄເຫຕ຺ວາ ອິທໍ ວິສ຺ສຊ຺ຊິຍມາເນ ທິວສຠາໂຄ ນປ຺ປໂຫສ຺ສຕີຕິ ມຎ຺ຎນ຺ໂຕ ເອວໍ ຈິນ຺ເຕສິ. ໂສ ທານີຕິ ສ຺ເວ ທານິ. ອຕ຺ຕຈຕຸຕ຺ໂຖຕິ ກສ຺ມາ ພຫູຫິ ສທ຺ຘິໍ ນ ນິມນ຺ເຕສິ? ເອວໍ ກິຣສ຺ສ ອໂຫສິ – ‘‘ພຫູສຸ ນິສິນ຺ເນສຸ ໂຖກໍ ທຕ຺ວາ ວທນ຺ຕສ຺ສ ອຎ຺ຎໍ ສຸຕ຺ຕໍ ອຎ຺ຎໍ ກາຣຓໍ ອຎ຺ຎໍ ຕຖາຣູປໍ ວຕ຺ຖຸໍ ອາຫຣິຕ຺ວາ ທສ຺ເສສ຺ສຕິ, ເອວໍ ສນ຺ເຕ ກລໂຫ ວາ ໂກລາຫລເມວ ວາ ຠວິສ຺ສຕິ. ອຖາປິ ເອກກໍເຍວ ນິມນ຺ເຕສ຺ສາມິ, ເອວມ຺ປິ ເມ ຄຣຫາ ອຸປ຺ປຊ຺ຊິສ຺ສຕິ ‘ຍາວມຈ຺ຉຣີ ວາຍໍ ອຠໂຍ, ຠຄວນ຺ຕໍ ທິວເສ ທິວເສ ຠິກ຺ຂູນໍ ສເຕນປິ ສຫສ຺ເສນປິ ສທ຺ຘິໍ ຈຣນ຺ຕໍ ທິສ຺ວາປິ ເອກກໍເຍວ ນິມນ຺ເຕສີ’’’ຕິ. ‘‘ເອວໍ ປນ ໂທໂສ ນ ຠວິສ຺ສຕີ’’ຕິ ອປເຣຫິ ຕີຫິ ສທ຺ຘິໍ ອຕ຺ຕຈຕຸຕ຺ຖໍ ນິມນ຺ເຕສິ.

໘໕. ນ ຂ຺ເວຕ຺ຖ, ຣາຊກຸມາຣ, ເອກໍເສນາຕິ ນ ໂຂ, ຣາຊກຸມາຣ, ເອຕ຺ຖ ປຎ຺ເຫ ເອກໍເສນ ວິສ຺ສຊ຺ຊນໍ ໂຫຕິ. ເອວຣູປຎ຺ຫິ ວາຈໍ ຕຖາຄໂຕ ຠາເສຍ຺ຍາປິ ນ ຠາເສຍ຺ຍາປິ. ຠາສິຕປຈ຺ຈເຍນ ອຕ຺ຖໍ ປສ຺ສນ຺ໂຕ ຠາເສຍ຺ຍ, ອປສ຺ສນ຺ໂຕ ນ ຠາເສຍ຺ຍາຕິ ອຕ຺ໂຖ. ອິຕິ ຠຄວາ ມຫານິຄຓ຺ເຐນ ຈຕູຫິ ມາເສຫິ ອຠິສງ຺ຂຕໍ ປຎ຺ຫໍ ອສນິປາເຕນ ປພ຺ພຕກູຏໍ ວິຍ ເອກວຈເນເນວ ສໍຈຸຓ຺ເຓສິ. ອນສ຺ສຸໍ ນິຄຓ຺ຐາຕິ ນຏ຺ຐາ ນິຄຓ຺ຐາ.

໘໖. ອງ຺ເກ ນິສິນ຺ໂນ ໂຫຕີຕິ ອູຣູສຸ ນິສິນ຺ໂນ ໂຫຕິ. ເລສວາທິໂນ ຫິ ວາທໍ ປຏ຺ຐເປນ຺ຕາ ກິຎ຺ຈິເທວ ຜລໍ ວາ ປຸປ຺ຜໍ ວາ ໂປຕ຺ຖກໍ ວາ ຄເຫຕ຺ວາ ນິສີທນ຺ຕິ. ເຕ ອຕ຺ຕໂນ ຊເຍ ສຕິ ປຣໍ ອຊ຺ໂຌຕ຺ຖຣນ຺ຕິ, ປຣສ຺ສ ຊເຍ ສຕິ ຜລໍ ຂາທນ຺ຕາ ວິຍ ປຸປ຺ຜໍ ຆາຍນ຺ຕາ ວິຍ ໂປຕ຺ຖກໍ ວາເຈນ຺ຕາ ວິຍ ວິກ຺ເຂປໍ ທສ຺ເສນ຺ຕິ. ອຍໍ ປນ ຈິນ຺ເຕສິ – ‘‘ສມ຺ມາສມ຺ພຸທ຺ໂຘ ເອສ ໂອສຏສງ຺ຄາໂມ ປຣວາທມທ຺ທໂນ. ສເຈ ເມ ຊໂຍ ຠວິສ຺ສຕິ, ອິຈ຺ເຈຕໍ ກຸສລໍ. ໂນ ເຈ ຠວິສ຺ສຕິ, ທາຣກໍ ວິຊ຺ຌິຕ຺ວາ ໂຣທາເປສ຺ສາມິ. ຕໂຕ ປສ຺ສຖ, ໂຠ, ອຍໍ ທາຣໂກ ໂຣທຕິ, ອຸຏ຺ຐຫຖ ຕາວ, ປຈ຺ຉາປິ ຊານິສ຺ສາມາ’’ຕິ ຕສ຺ມາ ທາຣກໍ ຄເຫຕ຺ວາ ນິສີທິ. ຠຄວາ ປນ ຣາຊກຸມາຣໂຕ ສຫສ຺ສຄຸເຓນປິ ສຕສຫສ຺ສຄຸເຓນປິ ວາທີວຣຕໂຣ, ‘‘ອິມເມວສ຺ສ ທາຣກໍ ອຸປມໍ ກຕ຺ວາ ວາທໍ ຠິນ຺ທິສ຺ສາມີ’’ຕິ ຈິນ຺ເຕຕ຺ວາ ‘‘ຕໍ ກິໍ ມຎ຺ຎສິ ຣາຊກຸມາຣາ’’ຕິອາທິມາຫ.

ຕຕ຺ຖ ມຸເຂ ອາຫເຣຍ຺ຍາຕິ ມຸເຂ ຐເປຍ຺ຍ. ອາຫເຣຍ຺ຍສ຺ສາຫນ຺ຕິ ອປເນຍ຺ຍໍ ອສ຺ສ ອຫໍ. ອາທິເກເນວາຕິ ປຐມປໂຍເຄເນວ. ອຠູຕນ຺ຕິ ອຠູຕຕ຺ຖໍ. ອຕຈ຺ຉນ຺ຕິ ນ ຕຈ຺ຉໍ. ອນຕ຺ຖສໍຫິຕນ຺ຕິ ນ ອຕ຺ຖສໍຫິຕໍ ນ ວຑ຺ຒິນິສ຺ສິຕໍ. ອປ຺ປິຍາ ອມນາປາຕິ ເນວ ປິຍາ ນ ມນາປາ. ອິມິນາ ນເຍເນວ ສພ຺ພຕ຺ຖ ອຕ຺ໂຖ ທຏ຺ຐພ຺ໂພ.

ຕຕ຺ຖ ອປ຺ປິຍປກ຺ເຂ ປຐມວາຈາ ອໂຈຣໍເຍວ ໂຈໂຣຕິ, ອທາສໍເຍວ ທາໂສຕິ, ອທຸປ຺ປຍຸຕ຺ຕໍເຍວ ທຸປ຺ປຍຸຕ຺ໂຕຕິ ປວຕ຺ຕາ. ນ ຕໍ ຕຖາຄໂຕ ຠາສຕິ. ທຸຕິຍວາຈາ ໂຈຣໍເຍວ ໂຈໂຣ ອຍນ຺ຕິອາທິວເສນ ປວຕ຺ຕາ. ຕມ຺ປິ ຕຖາຄໂຕ ນ ຠາສຕິ. ຕຕິຍວາຈາ ‘‘ອິທານິ ອກຕປຸຎ຺ຎຕາຍ ທຸຄ຺ຄໂຕ ທຸພ຺ພຓ຺ໂຓ ອປ຺ເປສກ຺ໂຂ, ອິຘ ຐຕ຺ວາປິ ປຸນ ປຸຎ຺ຎໍ ນ ກໂຣສິ, ທຸຕິຍຈິຕ຺ຕວາເຣ ກຖໍ ຈຕູຫິ ອປາເຍຫິ ນ ມຸຈ຺ຈິສ຺ສສີ’’ຕິ ເອວໍ ມຫາຊນສ຺ສ ອຕ຺ຖປຸເຣກ຺ຂາເຣນ ຘມ຺ມປຸເຣກ຺ຂາເຣນ ອນຸສາສນີປຸເຣກ຺ຂາເຣນ ຈ ວຕ຺ຕພ຺ພວາຈາ. ຕຕ຺ຣ ກາລຎ຺ຎູ ຕຖາຄໂຕຕິ ຕສ຺ມິໍ ຕຕິຍພ຺ຍາກຣເຓ ຕສ຺ສາ ວາຈາຍ ພ຺ຍາກຣຓຕ຺ຖາຍ ຕຖາຄໂຕ ກາລຎ຺ຎູ ໂຫຕິ, ມຫາຊນສ຺ສ ອາທານກາລໍ ຄຫຓກາລໍ ຊານິຕ຺ວາວ ພ຺ຍາກໂຣຕີຕິ ອຕ຺ໂຖ.

ປິຍປກ຺ເຂ ປຐມວາຈາ ອຏ຺ຐານິຍກຖາ ນາມ. ສາ ເອວໍ ເວທິຕພ຺ພາ – ເອວໍ ກິຣ ຄາມວາສິມຫລ຺ລກໍ ນຄຣໍ ອາຄນ຺ຕ຺ວາ ປານາຄາເຣ ປິວນ຺ຕໍ ວຎ຺ເຈຕຸກາມາ ສມ຺ພຫຸລາ ຘຸຕ຺ຕາ ປີຕຏ຺ຐາເນ ຐຕ຺ວາ ເຕນ ສທ຺ຘິໍ ສຸຣໍ ປິວນ຺ຕາ ‘‘ອິມສ຺ສ ນິວາສນປາວຸຣຓມ຺ປິ ຫຕ຺ເຖ ຠຓ຺ຑກມ຺ປິ ສພ຺ພໍ ຄຓ຺ຫິສ຺ສາມາ’’ຕິ ຈິນ຺ເຕຕ຺ວາ ກຕິກໍ ອກໍສຸ – ‘‘ເອເກກໍ ອຕ຺ຕປຈ຺ຈກ຺ຂກຖໍ ກເຖມ, ໂຍ ‘ອຠູຕ’ນ຺ຕິ ກເຖສິ, ກຖິຕໍ ວາ ນ ສທ຺ທຫຕິ, ຕໍ ທາສໍ ກຕ຺ວາ ຄຓ຺ຫິສ຺ສາມາ’’ຕິ. ຕມ຺ປິ ມຫລ຺ລກໍ ປຸຈ຺ຉິໍສຸ ‘‘ຕຸມ຺ຫາກມ຺ປິ ຕາຕ ຣຸຈ຺ຈຕີ’’ຕິ. ເອວໍ ໂຫຕຸ ຕາຕາຕິ.

ເອໂກ ຘຸຕ຺ໂຕ ອາຫ – ມຍ຺ຫໍ, ໂຠ ມາຕຸ, ມຍິ ກຸຈ຺ຉິຄເຕ ກປິຏ຺ຐຜລໂທຫໂລ ອໂຫສິ. ສາ ອຎ຺ຎໍ ກປິຏ຺ຐຫາຣກໍ ອລພ຺ຠມານາ ມໍເຍວ ເປເສສິ. ອຫໍ ຄນ຺ຕ຺ວາ ຣຸກ຺ຂໍ ອຠິຣຸຫິຕຸໍ ອສກ຺ໂກນ຺ໂຕ ອຕ຺ຕນາວ ອຕ຺ຕານໍ ປາເທ ຄເຫຕ຺ວາ ມຸຄ຺ຄຣໍ ວິຍ ຣຸກ຺ຂສ຺ສ ອຸປຣິ ຂິປິໍ; ອຖ ສາຂໂຕ ສາຂໍ ວິຈຣນ຺ໂຕ ຜລານິ ຄເຫຕ຺ວາ ໂອຕຣິຕຸໍ ອສກ຺ໂກນ຺ໂຕ ຆຣໍ ຄນ຺ຕ຺ວາ ນິສ຺ເສຓິໍ ອາຫຣິຕ຺ວາ ໂອຣຸຍ຺ຫ ມາຕຸ ສນ຺ຕິກໍ ຄນ຺ຕ຺ວາ ຜລານິ ມາຕຸຍາ ອທາສິໍ; ຕານິ ປນ ມຫນ຺ຕານິ ໂຫນ຺ຕິ ຈາຏິປ຺ປມາຓານິ. ຕໂຕ ເມ ມາຕຣາ ເອກາສເນ ນິສິນ຺ນາຍ ສມສຏ຺ຐິຜລານິ ຂາທິຕານິ. ມຍາ ເອກຸຈ຺ຉງ຺ເຄນ ອານີຕຜເລສຸ ເສສການິ ກຸລສນ຺ຕເກ ຄາເມ ຂຸທ຺ທກມຫລ຺ລການໍ ອເຫສຸໍ. ອມ຺ຫາກໍ ຆຣໍ ໂສຬສຫຕ຺ຖໍ, ເສສປຣິກ຺ຂາຣຠຓ຺ຑກໍ ອປເນຕ຺ວາ ກປິຏ຺ຐຜເລເຫວ ຍາວ ຉທນໍ ປູຣິຕໍ. ຕໂຕ ອຕິເຣການິ ຄເຫຕ຺ວາ ເຄຫທ຺ວາເຣ ຣາສິໍ ອກໍສຸ. ໂສ ອສີຕິຫຕ຺ຖຸພ຺ເພໂຘ ປພ຺ພໂຕ ວິຍ ອໂຫສິ. ກິໍ ອີທິສໍ, ໂຠ ສກ຺ກາ, ສທ຺ທຫິຕຸນ຺ຕິ?

ຄາມິກມຫລ຺ລໂກ ຕຸຓ຺ຫີ ນິສີທິຕ຺ວາ ສພ຺ເພສໍ ກຖາປຣິໂຍສາເນ ປຸຈ຺ຉິໂຕ ອາຫ – ‘‘ເອວໍ ຠວິສ຺ສຕິ ຕາຕາ, ມຫນ຺ຕໍ ຣຏ຺ຐໍ, ຣຏ຺ຐມຫນ຺ຕຕາຍ ສກ຺ກາ ສທ຺ທຫິຕຸ’’ນ຺ຕິ. ຍຖາ ຈ ເຕນ, ເອວໍ ເສເສຫິປິ ຕຖາຣູປາສຸ ນິກ຺ກາຣຓກຖາສຸ ກຖິຕາສຸ ອາຫ – ມຍ຺ຫມ຺ປິ ຕາຕາ ສຸຓາຖ, ນ ຕຸມ຺ຫາກໍເຍວ ກຸລານິ, ອມ຺ຫາກມ຺ປິ ກຸລໍ ມຫາກຸລໍ, ອມ຺ຫາກໍ ປນ ອວເສສເຂຕ຺ເຕຫິ ກປ຺ປາສເຂຕ຺ຕໍ ມຫນ຺ຕຕຣໍ. ຕສ຺ສ ອເນກກຣີສສຕສ຺ສ ກປ຺ປາສເຂຕ຺ຕສ຺ສ ມຊ຺ເຌ ເອໂກ ກປ຺ປາສຣຸກ຺ໂຂ ມຫາ ອສີຕິຫຕ຺ຖຸພ຺ເພໂຘ ອໂຫສິ. ຕສ຺ສ ປຎ຺ຈ ສາຂາ, ຕາສຸ ອວເສສສາຂາ ຜລໍ ນ ຄຓ຺ຫິໍສຸ, ປາຈີນສາຂາຍ ເອກເມວ ມຫາຈາຏິມຕ຺ຕໍ ຜລໍ ອໂຫສິ. ຕສ຺ສ ຉ ອໍສິໂຍ, ຉສຸ ອໍສີສຸ ຉ ກປ຺ປາສປິຓ຺ຑິໂຍ ປຸປ຺ຜິຕາ. ອຫໍ ມສ຺ສຸໍ ກາເຣຕ຺ວາ ນ຺ຫາຕວິລິຕ຺ໂຕ ເຂຕ຺ຕໍ ຄນ຺ຕ຺ວາ ຕາ ກປ຺ປາສປິຓ຺ຑິໂຍ ປຸປ຺ຜິຕາ ທິສ຺ວາ ຐິຕໂກວ ຫຕ຺ຖໍ ປສາເຣຕ຺ວາ ຄຓ຺ຫິໍ. ຕາ ກປ຺ປາສປິຓ຺ຑິໂຍ ຖາມສມ຺ປນ຺ນາ ຉ ທາສາ ອເຫສຸໍ. ເຕ ສພ຺ເພ ມໍ ເອກກໍ ໂອຫາຍ ປລາຕາ. ເອຕ຺ຕເກ ອທ຺ຘາເນ ເຕ ນ ປສ຺ສາມິ, ອຊ຺ຊ ທິຏ຺ຐາ, ຕຸມ຺ເຫ ເຕ ຉ ຊນາ. ຕ຺ວໍ ນນ຺ໂທ ນາມ, ຕ຺ວໍ ປຸຓ຺ໂຓ ນາມ, ຕ຺ວໍ ວຑ຺ຒມາໂນ ນາມ, ຕ຺ວໍ ຈິຕ຺ໂຕ ນາມ ຕ຺ວໍ ມງ຺ຄໂລ ນາມ, ຕ຺ວໍ ໂປຏ຺ຐິໂຍ ນາມາຕິ ວຕ຺ວາ ອຸຏ຺ຐາຍ ນິສິນ຺ນເກເຍວ ຈູຬາສຸ ຄເຫຕ຺ວາ ອຏ຺ຐາສິ. ເຕ ‘‘ນ ມຍໍ ທາສາ’’ຕິປິ ວຕ຺ຕຸໍ ນາສກ຺ຂິໍສຸ. ອຖ ເນ ກຑ຺ຒນ຺ໂຕ ວິນິຈ຺ຉຍໍ ເນຕ຺ວາ ລກ຺ຂຓໍ ອາໂຣເປຕ຺ວາ ຍາວຊີວໍ ທາເສ ກຕ຺ວາ ປຣິຠຸຎ຺ຊິ. ເອວຣູປິໍ ກຖໍ ຕຖາຄໂຕ ນ ຠາສຕິ.

ທຸຕິຍວາຈາ ອາມິສເຫຕຸຈາຏຸກມ຺ຍຕາທິວເສນ ນານປ຺ປກາຣາ ປເຣສໍ ໂຖມນວາຈາ ເຈວ, ໂຈຣກຖໍ ຣາຊກຖນ຺ຕິ ອາທິນຍປ຺ປວຕ຺ຕາ ຕິຣຈ຺ຉານກຖາ ຈ. ຕມ຺ປິ ຕຖາຄໂຕ ນ ຠາສຕິ. ຕຕິຍວາຈາ ອຣິຍສຈ຺ຈສນ຺ນິສ຺ສິຕກຖາ, ຍໍ ວສ຺ສສຕມ຺ປິ ສຸຓນ຺ຕາ ປຓ຺ຑິຕາ ເນວ ຕິຕ຺ຕິໍ ຄຈ຺ຉນ຺ຕິ. ອິຕິ ຕຖາຄໂຕ ເນວ ສພ຺ພມ຺ປິ ອປ຺ປິຍວາຈໍ ຠາສຕິ ນ ປິຍວາຈໍ. ຕຕິຍໍ ຕຕິຍເມວ ປນ ຠາສິຕພ຺ພກາລໍ ອນຕິກ຺ກມິຕ຺ວາ ຠາສຕິ. ຕຕ຺ຖ ຕຕິຍໍ ອປ຺ປິຍວາຈໍ ສນ຺ຘາຍ ເຫຏ຺ຐາ ທຫຣກຸມາຣອຸປມາ ອາຄຕາຕິ ເວທິຕພ຺ພໍ.

໘໗. ອຸທາຫຸ ຐານໂສເວຕນ຺ຕິ ອຸທາຫຸ ຐານຸປ຺ປຕ຺ຕິກຎາເຓນ ຕງ຺ຂຓໍເຍວ ຕໍ ຕຖາຄຕສ຺ສ ອຸປຏ຺ຐາຕີຕິ ປຸຈ຺ຉຕິ. ສຎ຺ຎາໂຕຕິ ຎາໂຕ ປຎ຺ຎາໂຕ ປາກໂຏ. ຘມ຺ມຘາຕູຕິ ຘມ຺ມສຠາໂວ. ສພ຺ພຎ຺ຎຸຕຎ຺ຎາຓສ຺ເສຕໍ ອຘິວຈນໍ. ຕໍ ຠຄວຕາ ສຸປ຺ປຏິວິທ຺ຘໍ, ຫຕ຺ຖຄຕໍ ຠຄວໂຕ. ຕສ຺ມາ ໂສ ຍໍ ຍໍ ອິຈ຺ຉຕິ, ຕໍ ຕໍ ສພ຺ພໍ ຐານໂສວ ປຏິຠາຕີຕິ. ເສສໍ ສພ຺ພຕ຺ຖ ອຸຕ຺ຕານເມວ. ອຍໍ ປນ ຘມ຺ມເທສນາ ເນຍ຺ຍປຸຄ຺ຄລວເສນ ປຣິນິຏ຺ຐິຕາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ອຠຍຣາຊກຸມາຣສຸຕ຺ຕວຓ຺ຓນາ ນິຏ຺ຐິຕາ.