໙. ທ຺ເວຘາວິຕກ຺ກສຸຕ຺ຕວຓ຺ຓນາ

໒໐໖. ເມ ສຸຕນ຺ຕິ ທ຺ເວຘາວິຕກ຺ກສຸຕ຺ຕໍ. ຕຕ຺ຖ ທ຺ວິຘາ ກຕ຺ວາ ທ຺ວິຘາ ກຕ຺ວາຕິ ທ຺ເວ ທ຺ເວ ຠາເຄ ກຕ຺ວາ. ກາມວິຕກ຺ໂກຕິ ກາມປຏິສໍຍຸຕ຺ໂຕ ວິຕກ຺ໂກ. ພ຺ຍາປາທວິຕກ຺ໂກຕິ ພ຺ຍາປາທປຏິສໍຍຸຕ຺ໂຕ ວິຕກ຺ໂກ. ວິຫິໍສາວິຕກ຺ໂກຕິ ວິຫິໍສາປຏິສໍຍຸຕ຺ໂຕ ວິຕກ຺ໂກ. ເອກໍ ຠາຄນ຺ຕິ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິໂກ ວາ ສຸຂຸໂມ ວາ ສພ຺ໂພ ປາຍໍ ວິຕກ຺ໂກ ອກຸສລປກ຺ຂິໂກເຍວາຕິ ຕໂຍປິ ກາມພ຺ຍາປາທວິຫິໍສາວິຕກ຺ເກ ເອກໍ ໂກຏ຺ຐາສມກາສິໍ. ກາເມຫິ ນິສ຺ສໂຏ ເນກ຺ຂມ຺ມປຏິສໍຍຸຕ຺ໂຕ ວິຕກ຺ໂກ ເນກ຺ຂມ຺ມວິຕກ຺ໂກ ນາມ, ໂສ ຍາວ ປຐມຊ຺ຌານາ ວຏ຺ຏຕິ. ອພ຺ຍາປາທປຏິສໍຍຸຕ຺ໂຕ ວິຕກ຺ໂກ ອພ຺ຍາປາທວິຕກ຺ໂກ, ໂສ ເມຕ຺ຕາປຸພ຺ພຠາຄໂຕ ປຏ຺ຐາຍ ຍາວ ປຐມຊ຺ຌານາ ວຏ຺ຏຕິ. ອວິຫິໍສາປຏິສໍຍຸຕ຺ໂຕ ວິຕກ຺ໂກ ອວິຫິໍສາວິຕກ຺ໂກ, ໂສ ກຣຸຓາປຸພ຺ພຠາຄໂຕ ປຏ຺ຐາຍ ຍາວ ປຐມຊ຺ຌານາ ວຏ຺ຏຕິ. ທຸຕິຍໍ ຠາຄນ຺ຕິ ສພ຺ໂພປາຍໍ ກຸສລປກ຺ຂິໂກເຍວາຕິ ທຸຕິຍໍ ໂກຏ຺ຐາສມກາສິໍ. ອິມິນາ ໂພຘິສຕ຺ຕສ຺ສ ວິຕກ຺ກນິຄ຺ຄຫຓກາໂລ ກຖິໂຕ.

ໂພຘິສຕ຺ຕສ຺ສ ຫິ ຉພ຺ພສ຺ສານິ ປຘານໍ ປທຫນ຺ຕສ຺ສ ເນກ຺ຂມ຺ມວິຕກ຺ກາທໂຍ ປຸຎ຺ຊປຸຎ຺ຊາ ມຫານທິຍໍ ໂອຆາ ວິຍ ປວຕ຺ຕິໍສຸ. ສຕິສມ຺ໂມເສນ ປນ ສຫສາ ກາມວິຕກ຺ກາທໂຍ ອຸປ຺ປຊ຺ຊິຕ຺ວາ ກຸສລວາຣໍ ປຈ຺ຉິນ຺ທິຕ຺ວາ ສຍໍ ອກຸສລຊວນວາຣາ ຫຸຕ຺ວາ ຕິຏ຺ຐນ຺ຕິ. ຕໂຕ ໂພຘິສຕ຺ໂຕ ຈິນ຺ເຕສິ – ‘‘ມຍ຺ຫໍ ອິເມ ກາມວິຕກ຺ກາທໂຍ ກຸສລວາຣໍ ປຈ຺ຉິນ຺ທິຕ຺ວາ ຕິຏ຺ຐນ຺ຕິ, ຫນ຺ທາຫໍ ອິເມ ວິຕກ຺ເກ ທ຺ເວ ຠາເຄ ກຕ຺ວາ ວິຫຣາມີ’’ຕິ ກາມວິຕກ຺ກາທໂຍ ອກຸສລປກ຺ຂິກາຕິ ເອກໍ ຠາຄໍ ກໂຣຕິ ເນກ຺ຂມ຺ມວິຕກ຺ກາທໂຍ ກຸສລປກ຺ຂິກາຕິ ເອກໍ. ອຖ ປຸນ ຈິນ຺ເຕສິ – ‘‘ອກຸສລປກ຺ຂໂຕ ອາຄຕໍ ວິຕກ຺ກໍ ມນ຺ເຕນ ກຓ຺ຫສປ຺ປໍ ອຸປ຺ປີເຬຕ຺ວາ ຄຓ຺ຫນ຺ໂຕ ວິຍ ອມິຕ຺ຕໍ ຄີວາຍ ອກ຺ກມນ຺ໂຕ ວິຍ ຈ ນິຄ຺ຄເຫສ຺ສາມິ, ນາສ຺ສ ວຑ຺ຒິຕຸໍ ທສ຺ສາມິ. ກຸສລປກ຺ຂໂຕ ອາຄຕໍ ວິຕກ຺ກໍ ເມຆສມເຍ ເມຆໍ ວິຍ ສຸເຂຕ຺ເຕ ສາລກລ຺ຍາຓິໂປຕກໍ ວິຍ ຈ ສີຆໍ ວຑ຺ເຒສ຺ສາມີ’’ຕິ. ໂສ ຕຖາ ກຕ຺ວາ ອກຸສລວິຕກ຺ເກ ນິຄ຺ຄຓ຺ຫິ, ກຸສລວິຕກ຺ເກ ວຑ຺ເຒສິ. ເອວໍ ອິມິນາ ໂພຘິສຕ຺ຕສ຺ສ ວິຕກ຺ກນິຄ຺ຄຫຓນກາໂລ ກຖິໂຕຕິ ເວທິຕພ຺ໂພ.

໒໐໗. ອິທານິ ຍຖາສ຺ສ ເຕ ວິຕກ຺ກາ ອຸປ຺ປຊ຺ຊິໍສຸ, ຍຖາ ຈ ເນ ນິຄ຺ຄເຫສິ, ຕໍ ທສ຺ເສນ຺ໂຕ ຕສ຺ສ ມຍ຺ຫໍ, ຠິກ຺ຂເວຕິອາທິມາຫ. ຕຕ຺ຖ ອປ຺ປມຕ຺ຕສ຺ສາຕິ ສຕິຍາ ອວິປ຺ປວາເສ ຐິຕສ຺ສ. ອາຕາປິໂນຕິ ອາຕາປວີຣິຍວນ຺ຕສ຺ສ. ປຫິຕຕ຺ຕສ຺ສາຕິ ເປສິຕຈິຕ຺ຕສ຺ສ. ອຸປ຺ປຊ຺ຊຕິ ກາມວິຕກ຺ໂກຕິ ໂພຘິສຕ຺ຕສ຺ສ ຉພ຺ພສ຺ສານິ ປຘານໍ ປທຫໂຕ ຣຊ຺ຊສຸຂໍ ວາ ອາຣພ຺ຠ, ປາສາເທ ວາ ນາຏການິ ວາ ໂອໂຣເຘ ວາ ກິຎ຺ຈິເທວ ວາ ສມ຺ປຕ຺ຕິໍ ອາຣພ຺ຠ ກາມວິຕກ຺ໂກ ນາມ ນ ອຸປ຺ປນ຺ນປຸພ຺ໂພ. ທຸກ຺ກຣກາຣິກາຍ ປນສ຺ສ ອາຫາຣູປຈ຺ເຉເທນ ອຘິມຕ຺ຕກສິມານໍ ປຕ຺ຕສ຺ສ ເອຕທໂຫສິ – ‘‘ນ ສກ຺ກາ ອາຫາຣູປຈ຺ເຉເທນ ວິເສສໍ ນິພ຺ພຕ຺ເຕຕຸໍ, ຍໍນູນາຫໍ ໂອຬາຣິກໍ ອາຫາຣໍ ອາຫາເຣຍ຺ຍ’’ນ຺ຕິ. ໂສ ອຸຣຸເວລໍ ປິຓ຺ຑາຍ ປາວິສິ. ມນຸສ຺ສາ – ‘‘ມຫາປຸຣິໂສ ປຸພ຺ເພ ອາຫຣິຕ຺ວາ ທິນ຺ນມ຺ປິ ນ ຄຓ຺ຫິ, ອທ຺ຘາສ຺ສ ອິທານິ ມໂນຣໂຖ ມຕ຺ຖກໍ ປຕ຺ໂຕ, ຕສ຺ມາ ສຍເມວ ອາຄໂຕ’’ຕິ ປຓີຕປຓີຕໍ ອາຫາຣໍ ອຸປຫຣິໍສຸ. ໂພຘິສຕ຺ຕສ຺ສ ອຕ຺ຕຠາໂວ ນຈິຣສ຺ເສວ ປາກຕິໂກ ອໂຫສິ. ຊຣາຊິຓ຺ຓຕ຺ຕຠາໂວ ຫິ ສປ຺ປາຍໂຠຊນໍ ລຠິຕ຺ວາປິ ປາກຕິໂກ ນ ໂຫຕິ. ໂພຘິສຕ຺ໂຕ ປນ ທຫໂຣ. ເຕນສ຺ສ ສປ຺ປາຍໂຠຊນໍ ຠຸຎ຺ຊໂຕ ອຕ຺ຕຠາໂວ ນ ຈິຣສ຺ເສວ ປາກຕິໂກ ຊາໂຕ, ວິປ຺ປສນ຺ນານິ ອິນ຺ທ຺ຣິຍານິ, ປຣິສຸທ຺ໂຘ ຉວິວຓ຺ໂຓ, ສມຸຄ຺ຄຕຕາຣາຄຓໍ ວິຍ ນຠໍ ປຣິປຸຓ຺ຓທ຺ວຕ຺ຕິໍສມຫາປຸຣິສລກ຺ຂຓປ຺ປຏິມຓ຺ຑິຕສຣີຣໍ ອໂຫສິ. ໂສ ຕໍ ໂອໂລເກຕ຺ວາ ‘‘ຕາວ ກິລນ຺ໂຕ ນາມ ອຕ຺ຕຠາໂວ ເອວໍ ປຏິປາກຕິໂກ ຊາໂຕ’’ຕິ ຈິນ຺ເຕຕ຺ວາ ອຕ຺ຕໂນ ປຎ຺ຎາມຫນ຺ຕຕາຍ ເອວໍ ປຣິຕ຺ຕກມ຺ປິ ວິຕກ຺ກໍ ຄເຫຕ຺ວາ ກາມວິຕກ຺ໂກຕິ ອກາສິ.

ປຓ຺ຓສາລາຍ ປຸຣໂຕ ນິສິນ຺ໂນ ຈມຣປສທຄວຍໂຣຫິຕມິຄາທິເກ ມຄຄເຓ ມນຸຎ຺ຎສທ຺ທຣວເນ ໂມຣວນກຸກ຺ກຸຏາທິເກ ປກ຺ຂິຄເຓ ນີລຸປ຺ປລກຸມຸທກມລາທິສຎ຺ຉນ຺ນານິ ປລ຺ລລານິ ນານາກຸສຸມສຎ຺ຉນ຺ນວິຏປາ ວນຣາຊິໂຍ ມຓິກ຺ຂນ຺ຘນິມ຺ມລຊລປວາຫຎ຺ຈ ນທິໍ ເນຣຎ຺ຊຣໍ ປສ຺ສຕິ. ຕສ຺ສ ເອວໍ ໂຫຕິ ‘‘ໂສຠນາ ວຕິເມ ມິຄຊາຕາ ປກ຺ຂິຄຓາ ປລ຺ລລານິ ວນຣາຊິໂຍ ນທີ ເນຣຎ຺ຊຣາ’’ຕິ. ໂສ ຕມ຺ປິ ເອວໍ ປຣິຕ຺ຕກໍ ວິຕກ຺ກໍ ຄເຫຕ຺ວາ ກາມວິຕກ຺ກມກາສິ, ເຕນາຫ ‘‘ອຸປ຺ປຊ຺ຊຕິ ກາມວິຕກ຺ໂກ’’ຕິ.

ອຕ຺ຕພ຺ຍາພາຘາຍປີຕິ ອຕ຺ຕທຸກ຺ຂາຍປິ. ເອເສວນໂຍ ສພ຺ພຕ຺ຖ. ກິໍ ປນ ມຫາສຕ຺ຕສ຺ສ ອຸຠຍທຸກ຺ຂາຍ ສໍວຕ຺ຕນກວິຕກ຺ໂກ ນາມ ອຕ຺ຖີຕິ? ນຕ຺ຖິ. ອປຣິຎ຺ຎາຍໍ ຐິຕສ຺ສ ປນ ວິຕກ຺ໂກ ຍາວ ອຸຠຍພ຺ຍາພາຘາຍ ສໍວຕ຺ຕຕີຕິ ເອຕານິ ຕີຓິ ນາມານິ ລຠຕິ, ຕສ຺ມາ ເອວມາຫ. ປຎ຺ຎານິໂຣຘິໂກຕິ ອນຸປ຺ປນ຺ນາຍ ໂລກິຍໂລກຸຕ຺ຕຣາຍ ປຎ຺ຎາຍ ອຸປ຺ປຊ຺ຊິຕຸໍ ນ ເທຕິ, ໂລກິຍປຎ຺ຎໍ ປນ ອຏ຺ຐສມາປຕ຺ຕິປຎ຺ຈາຠິຎ຺ຎາວເສນ ອຸປ຺ປນ຺ນມ຺ປິ ສມຸຈ຺ຉິນ຺ທິຕ຺ວາ ຂິປຕີຕິ ປຎ຺ຎານິໂຣຘິໂກ. ວິຆາຕປກ຺ຂິໂກຕິ ທຸກ຺ຂໂກຏ຺ຐາສິໂກ. ອສງ຺ຂຕໍ ນິພ຺ພານໍ ນາມ, ຕໍ ປຈ຺ຈກ຺ຂໍ ກາຕຸໍ ນ ເທຕີຕິ ອນິພ຺ພານສໍວຕ຺ຕນິໂກ. ອພ຺ຠຕ຺ຖໍ ຄຈ຺ຉຕີຕິ ຂຍໍ ນຕ຺ຖິຠາວໍ ຄຈ຺ຉຕິ. ອຸທກປຸປ຺ຜຸຬໂກ ວິຍ ນິຣຸຊ຺ຌຕິ. ປຊຫເມວາຕິ ປຊຫິເມວ. ວິໂນທເມວາຕິ ນີຫຣິເມວ. ພ຺ຍນ຺ຕເມວ ນໍ ອກາສິນ຺ຕິ ວິຄຕນ຺ຕໍ ນິສ຺ເສສໍ ປຣິວຏຸມໍ ປຣິຈ຺ຉິນ຺ນເມວ ນໍ ອກາສິໍ.

໒໐໘. ພ຺ຍາປາທວິຕກ຺ໂກຕິ ນ ໂພຘິສຕ຺ຕສ຺ສ ປຣູປຆາຕປ຺ປຏິສໍຍຸຕ຺ໂຕ ນາມ ວິຕກ຺ໂກ ຈິຕ຺ເຕ ອຸປ຺ປຊ຺ຊຕິ, ອຖສ຺ສ ອຕິວສ຺ສອຈ຺ຈຸຓ຺ຫອຕິສີຕາທີນິ ປນ ປຏິຈ຺ຈ ຈິຕ຺ຕວິປຣິຓາມຠາໂວ ໂຫຕິ, ຕໍ ສນ຺ຘາຍ ‘‘ພ຺ຍາປາທວິຕກ຺ໂກ’’ຕິ ອາຫ. ວິຫິໍສາວິຕກ຺ໂກຕິ ນ ມຫາສຕ຺ຕສ຺ສ ປເຣສໍ ທຸກ຺ຂຸປ຺ປາທນປ຺ປຏິສໍຍຸຕ຺ໂຕ ວິຕກ຺ໂກ ອຸປ຺ປຊ຺ຊຕິ, ຈິຕ຺ເຕ ປນ ອຸທ຺ຘຕາກາໂຣ ອເນກຄ຺ຄຕາກາໂຣ ໂຫຕິ, ຕໍ ຄເຫຕ຺ວາ ວິຫິໍສາວິຕກ຺ກມກາສິ. ປຓ຺ຓສາລາທ຺ວາເຣ ນິສິນ຺ໂນ ຫິ ສີຫພ຺ຍຄ຺ຆາທິເກ ວາຬມິເຄ ສູກຣາທໂຍ ຂຸທ຺ທມິເຄ ວິຫິໍສນ຺ເຕ ປສ຺ສຕິ. ອຖ ໂພຘິສຕ຺ໂຕ ອິມສ຺ມິມ຺ປິ ນາມ ອກຸໂຕຠເຍ ອຣຎ຺ເຎ ອິເມສໍ ຕິຣຈ຺ຉານຄຕານໍ ປຈ຺ຈຕ຺ຖິກາ ອຸປ຺ປຊ຺ຊນ຺ຕິ, ພລວນ຺ໂຕ ທຸພ຺ພເລ ຂາທນ຺ຕິ, ພລວນ຺ຕຂາທິຕາ ວຕ຺ຕນ຺ຕີຕິ ກາຣຸຎ຺ຎໍ ອຸປ຺ປາເທຕິ. ອຎ຺ເຎປິ ພິຬາຣາທໂຍ ກຸກ຺ກຸຏມູສິກາທີນິ ຂາທນ຺ເຕ ປສ຺ສຕິ, ຄາມໍ ປິຓ຺ຑາຍ ປວິຏ຺ໂຐ ມນຸສ຺ເສ ຣາຊກມ຺ມິເກຫິ ອຸປທ຺ທຸເຕ ວຘພນ຺ຘາທີນິ ອນຸຠວນ຺ເຕ ອຕ຺ຕໂນ ກສິວຓິຊ຺ຊາທີນິ ກມ຺ມານິ ກຕ຺ວາ ຊີວິຕຸໍ ນ ລຠນ຺ຕີຕິ ກາຣຸຎ຺ຎໍ ອຸປ຺ປາເທຕິ, ຕໍ ສນ຺ຘາຍ ‘‘ອຸປ຺ປຊ຺ຊຕິ ວິຫິໍສາວິຕກ຺ໂກ’’ຕິ ອາຫ. ຕຖາ ຕຖາຕິ ເຕນ ເຕນ ອາກາເຣນ. ອິທໍ ວຸຕ຺ຕໍ ໂຫຕິ – ກາມວິຕກ຺ກາທີສຸ ຍໍ ຍໍ ວິຕກ຺ເກຕິ, ຍໍ ຍໍ ວິຕກ຺ກໍ ປວຕ຺ເຕຕິ, ເຕນ ເຕເນ ຈສ຺ສາກາເຣນ ກາມວິຕກ຺ກາທິຠາໂວ ເຈຕໂສ ນ ຫິ ໂຫຕີຕິ. ປຫາສິ ເນກ຺ຂມ຺ມວິຕກ຺ກນ຺ຕິ ເນກ຺ຂມ຺ມວິຕກ຺ກໍ ປຊຫຕິ. ພຫຸລມກາສີຕິ ພຫຸລໍ ກໂຣຕິ. ຕສ຺ສ ຕໍ ກາມວິຕກ຺ກາຍ ຈິຕ຺ຕນ຺ຕິ ຕສ຺ສ ຕໍ ຈິຕ຺ຕໍ ກາມວິຕກ຺ກຕ຺ຖາຍ. ຍຖາ ກາມວິຕກ຺ກສມ຺ປຍຸຕ຺ຕໍ ໂຫຕິ, ເອວເມວໍ ນມຕີຕິ ອຕ຺ໂຖ. ເສສປເທສຸປິ ເອເສວ ນໂຍ.

ອິທານິ ອຕ຺ຖທີປິກໍ ອຸປມໍ ທສ຺ເສນ຺ໂຕ ເສຍ຺ຍຖາປີ ຕິອາທິມາຫ. ຕຕ຺ຖ ກິຏ຺ຐສມ຺ພາເຘຕິ ສສ຺ສສມ຺ພາເຘ. ອາໂກເຏຍ຺ຍາຕິ ອຸຊຸກໍ ປິຏ຺ຐິຍໍ ປຫເຣຍ຺ຍ. ປຏິໂກເຏຍ຺ຍາຕິ ຕິຣິຍໍ ຜາສຸກາສຸ ປຫເຣຍ຺ຍ. ສນ຺ນິຣຸນ຺ເຘຍ຺ຍາຕິ ອາວຣິຕ຺ວາ ຕິຏ຺ເຐຍ຺ຍ. ສນ຺ນິວາເຣຍ຺ຍາຕິ ອິໂຕ ຈິໂຕ ຈ ຄນ຺ຕຸໍ ນ ທເທຍ຺ຍ. ຕໂຕນິທານນ຺ຕິ ເຕນ ກາຣເຓນ, ເອວໍ ອຣກ຺ຂິຕານໍ ຄຸນ຺ນໍ ປເຣສໍ ສສ຺ສຂາທນກາຣເຓນາຕິ ອຕ຺ໂຖ. ພາໂລ ຫິ ໂຄປາໂລໂກ ເອວໍ ຄາໂວ ອຣກ຺ຂມາໂນ ‘‘ອຍໍ ອມ຺ຫາກໍ ຠຕ຺ຕເວຕນໍ ຂາທຕິ, ອຸຊຸໍ ຄາໂວ ຣກ຺ຂິຕຸມ຺ປິ ນ ສກ຺ໂກຕິ, ກຸເລຫິ ສທ຺ຘິໍ ເວຣໍ ຄຓ຺ຫາເປຕີ’’ຕິ ໂຄສາມິການມ຺ປິ ສນ຺ຕິກາ ວຘາທີນິ ປາປຸຓາຕິ, ກິຏ຺ຐສາມິການມ຺ປິ. ປຓ຺ຑິໂຕ ປນ ອິມານິ ຈຕ຺ຕາຣິ ຠຍານິ ສມ຺ປສ຺ສນ຺ໂຕ ຄາໂວ ສາຘຸກໍ ຣກ຺ຂຕິ, ຕໍ ສນ຺ຘາເຍຕໍ ວຸຕ຺ຕໍ. ອາທີນວນ຺ຕິ ອຸປທ຺ທວໍ. ໂອກາຣນ຺ຕິ ລາມກໍ, ຂນ຺ເຘສຸ ວາ ໂອຕາຣໍ. ສໍກິເລສນ຺ຕິ ກິລິຏ຺ຐຠາວໍ. ເນກ຺ຂມ຺ເມຕິ ເນກ຺ຂມ຺ມມ຺ຫິ. ອານິສໍສນ຺ຕິ ວິສຸທ຺ຘິປກ຺ຂໍ. ໂວທານປກ຺ຂນ຺ຕິ ອິທໍ ຕສ຺ເສວ ເວວຈນໍ, ກຸສລານໍ ຘມ຺ມານໍ ເນກ຺ຂມ຺ມມ຺ຫິ ວິສຸທ຺ຘິປກ຺ຂໍ ອທ຺ທສນ຺ຕິ ອຕ຺ໂຖ.

໒໐໙. ເນກ຺ຂມ຺ມນ຺ຕິ ຈ ກາເມຫິ ນິສ຺ສຏໍ ສພ຺ພກຸສລໍ, ເອກຘມ຺ເມ ສງ຺ຄຍ຺ຫມາເນ ນິພ຺ພານເມວ. ຕຕ຺ຣິທໍ ໂອປມ຺ມສໍສນ຺ທນໍ – ກິຏ຺ຐສມ຺ພາຘໍ ວິຍ ຫິ ຣູປາທິອາຣມ຺ມຓໍ, ກູຏຄາໂວ ວິຍ ກູຏຈິຕ຺ຕໍ, ປຓ຺ຑິຕໂຄປາລໂກ ວິຍ ໂພຘິສຕ຺ໂຕ, ຈຕຸພ຺ພິຘຠຍໍ ວິຍ ອຕ຺ຕປຣູຠຍພ຺ຍາພາຘາຍ ສໍວຕ຺ຕນວິຕກ຺ໂກ, ປຓ຺ຑິຕໂຄປາລກສ຺ສ ຈຕຸພ຺ພິຘໍ ຠຍໍ ທິສ຺ວາ ກິຏ຺ຐສມ຺ພາເຘ ອປ຺ປມາເທນ ໂຄຣກ຺ຂຓໍ ວິຍ ໂພຘິສຕ຺ຕສ຺ສ ຉພ຺ພສ຺ສານິ ປຘານໍ ປທຫໂຕ ອຕ຺ຕພ຺ຍາພາຘາທິຠຍໍ ທິສ຺ວາ ຣູປາທີສຸ ອາຣມ຺ມເຓສຸ ຍຖາ ກາມວິຕກ຺ກາທໂຍ ນ ອຸປ຺ປຊ຺ຊນ຺ຕິ, ເອວໍ ຈິຕ຺ຕຣກ຺ຂຓໍ. ປຎ຺ຎາວຸທ຺ຘິໂກຕິອາທີສຸ ອນຸປ຺ປນ຺ນາຍ ໂລກິຍໂລກຸຕ຺ຕຣປຎ຺ຎາຍ ອຸປ຺ປາທາຍ, ອຸປ຺ປນ຺ນາຍ ຈ ວຸທ຺ຘິຍາ ສໍວຕ຺ຕຕີຕິ ປຎ຺ຎາວຸທ຺ຘິໂກ. ນ ທຸກ຺ຂໂກຏ຺ຐາສາຍ ສໍວຕ຺ຕຕີຕິ ອວິຆາຕປກ຺ຂິໂກ. ນິພ຺ພານຘາຕຸສຈ຺ຉິກິຣິຍາຍ ສໍວຕ຺ຕຕີຕິ ນິພ຺ພານສໍວຕ຺ຕນິໂກ. ຣຕ຺ຕິໍ ເຈປິ ນໍ, ຠິກ຺ຂເວ, ອນຸວິຕກ຺ເກຍ຺ຍນ຺ຕິ ສກລຣຕ຺ຕິໍ ເຈປິ ຕໍ ວິຕກ຺ກໍ ປວຕ຺ເຕຍ຺ຍໍ. ຕໂຕນິທານນ຺ຕິ ຕໍມູລກໍ. ໂອຫຎ຺ເຎຍ຺ຍາຕິ ອຸຄ຺ຆາຕີເຍຍ຺ຍ, ອຸທ຺ຘຈ຺ຈາຍ ສໍວຕ຺ເຕຍ຺ຍາຕິ ອຕ຺ໂຖ. ອາຣາຕິ ທູເຣ. ສມາຘິມ຺ຫາຕິ ອຸປຈາຣສມາຘິໂຕປິ ອປ຺ປນາສມາຘິໂຕປິ. ໂສ ໂຂ ອຫໍ, ຠິກ຺ຂເວ, ອຊ຺ຌຕ຺ຕເມວ ຈິຕ຺ຕນ຺ຕິ ໂສ ອຫໍ, ຠິກ຺ຂເວ, ມາ ເມ ຈິຕ຺ຕໍ ສມາຘິມ຺ຫາ ທູເຣ ໂຫຕູຕິ ອຊ຺ຌຕ຺ຕເມວ ຈິຕ຺ຕໍ ສຓ຺ຐເປມິ, ໂຄຈຣຊ຺ຌຕ຺ເຕ ຐເປມີຕິ ອຕ຺ໂຖ. ສນ຺ນິສາເທມີຕິ ຕຕ຺ເຖວ ຈ ນໍ ສນ຺ນິສີທາເປມິ. ເອໂກທິໍ ກໂຣມີຕິ ເອກຄ຺ຄໍ ກໂຣມິ. ສມາທຫາມີຕິ ສມ຺ມາ ອາທຫາມິ, ສຸຏ຺ຐຸ ອາໂຣເປມີຕິ ອຕ຺ໂຖ. ມາ ເມ ຈິຕ຺ຕໍ ອູຫຎ຺ຎີຕິ ມາ ມຍ຺ຫໍ ຈິຕ຺ຕໍ ອຸຄ຺ຆາຕີຍິຕ຺ຖ, ມາ ອຸທ຺ຘຈ຺ຈາຍ ສໍວຕ຺ຕຕູຕິ ອຕ຺ໂຖ.

໒໑໐. ອຸປ຺ປຊ຺ຊຕິ ອພ຺ຍາປາທວິຕກ຺ໂກ…ເປ… ອວິຫິໍສາວິຕກ຺ໂກຕິ ເອຕ຺ຖ ໂຍ ໂສ ອິມາຍ ເຫຏ຺ຐາ ວຸຕ຺ຕຕຣຸຓວິປສ຺ສນາຍ ສທ຺ຘິໍ ອຸປ຺ປນ຺ນວິຕກ຺ໂກ ກາມປຈ຺ຈນີກຏ຺ເຐນ ເນກ຺ຂມ຺ມວິຕກ຺ໂກຕິ ວຸຕ຺ໂຕ. ໂສເຍວ ພ຺ຍາປາທປຈ຺ຈນີກຏ຺ເຐນ ອພ຺ຍາປາທວິຕກ຺ໂກຕິ ຈ ວິຫິໍສາປຈ຺ຈນີກຏ຺ເຐນ ອວິຫິໍສາວິຕກ຺ໂກຕິ ຈ ວຸຕ຺ໂຕ.

ເອຕ຺ຕາວຕາ ໂພຘິສຕ຺ຕສ຺ສ ສມາປຕ຺ຕິໍ ນິສ຺ສາຍ ວິປສ຺ສນາປຏ຺ຐປນກາໂລ ກຖິໂຕ. ຍສ຺ສ ຫິ ສມາຘິປິ ຕຣຸໂຓ, ວິປສ຺ສນາປິ. ຕສ຺ສ ວິປສ຺ສນໍ ປຏ຺ຐເປຕ຺ວາ ອຕິຈິຣໍ ນິສິນ຺ນສ຺ສ ກາໂຍ ກິລມຕິ, ອນ຺ໂຕ ອຄ຺ຄິ ວິຍ ອຸຏ຺ຐຫຕິ, ກຈ຺ເຉຫິ ເສທາ ມຸຈ຺ຈນ຺ຕິ, ມຕ຺ຖກໂຕ ອຸສຸມວຏ຺ຏິ ວິຍ ອຸຏ຺ຐຫຕິ, ຈິຕ຺ຕໍ ຫຎ຺ຎຕິ ວິຫຎ຺ຎຕິ ວິປ຺ຜນ຺ທຕິ. ໂສ ປຸນ ສມາປຕ຺ຕິໍ ສມາປຊ຺ຊິຕ຺ວາ ຕໍ ປຣິທເມຕ຺ວາ ມຸທຸກໍ ກຕ຺ວາ ສມສ຺ສາເສຕ຺ວາ ປຸນ ວິປສ຺ສນໍ ປຏ຺ຐເປຕິ. ຕສ຺ສ ປຸນ ອຕິຈິຣໍ ນິສິນ຺ນສ຺ສ ຕເຖວ ໂຫຕິ. ໂສ ປຸນ ສມາປຕ຺ຕິໍ ສມາປຊ຺ຊິຕ຺ວາ ຕເຖວ ກໂຣຕິ. ວິປສ຺ສນາຍ ຫິ ພຫູປກາຣາ ສມາປຕ຺ຕິ.

ຍຖາ ໂຍຘສ຺ສ ຜລກໂກຏ຺ຐໂກ ນາມ ພຫູປກາໂຣ ໂຫຕິ, ໂສ ຕໍ ນິສ຺ສາຍ ສງ຺ຄາມໍ ປວິສຕິ, ຕຕ຺ຖ ຫຕ຺ຖີຫິປິ ອສ຺ເສຫິປິ ໂຍເຘຫິປິ ສທ຺ຘິໍ ກມ຺ມໍ ກຕ຺ວາ ອາວຸເຘສຸ ວາ ຂີເຓສຸ ຠຸຎ຺ຊິຕຸກາມຕາທິຠາເວ ວາ ສຕິ ນິວຕ຺ຕິຕ຺ວາ ຜລກໂກຏ຺ຐກໍ ປວິສິຕ຺ວາ ອາວຸຘານິປິ ຄຓ຺ຫາຕິ, ວິສ຺ສມຕິປິ, ຠຸຎ຺ຊຕິປິ, ປານີຍມ຺ປິ ປິວຕິ, ສນ຺ນາຫມ຺ປິ ປຏິສນ຺ນຍ຺ຫຕິ, ຕໍ ຕໍ ກຕ຺ວາ ປຸນ ສງ຺ຄາມໍ ປວິສຕິ, ຕຕ຺ຖ ກມ຺ມໍ ກຕ຺ວາ ປຸນ ອຸຈ຺ຈາຣາທິປີຬິໂຕ ວາ ເກນຈິເທວ ວາ ກຣຓີເຍນ ຜລກໂກຏ຺ຐກໍ ປວິສຕິ. ຕຕ຺ຖ ສນ຺ຖມ຺ຠິຕ຺ວາ ປຸນ ສງ຺ຄາມໍ ປວິສຕິ, ເອວໍ ໂຍຘສ຺ສ ຜລກໂກຏ຺ຐໂກ ວິຍ ວິປສ຺ສນາຍ ພຫູປກາຣາ ສມາປຕ຺ຕິ.

ສມາປຕ຺ຕິຍາ ປນ ສງ຺ຄາມນິຕ຺ຖຣຓກໂຍຘສ຺ສ ຜລກໂກຏ຺ຐກໂຕປິ ວິປສ຺ສນາ ພຫູປກາຣຕຣາ. ກິຎ຺ຈາປິ ຫິ ສມາປຕ຺ຕິໍ ນິສ຺ສາຍ ວິປສ຺ສນໍ ປຏ຺ຐເປຕິ, ວິປສ຺ສນາ ປນ ຖາມຊາຕາ ສມາປຕ຺ຕິມ຺ປິ ຣກ຺ຂຕິ. ຖາມຊາຕໍ ກໂຣຕິ.

ຍຖາ ຫິ ຖເລ ນາວມ຺ປິ ນາວາຍ ຠຓ຺ຑມ຺ປິ ສກຏຠາຣໍ ກໂຣນ຺ຕິ. ອຸທກໍ ປຕ຺ວາ ປນ ສກຏມ຺ປິ ສກຏຠຓ຺ຑມ຺ປິ ຍຸຕ຺ຕໂຄເຓປິ ນາວາຠາຣໍ ກໂຣນ຺ຕິ. ນາວາ ຕິຣິຍໍ ໂສຕໍ ຉິນ຺ທິຕ຺ວາ ໂສຕ຺ຖິນາ ສຸປຏ຺ຏນໍ ຄຈ຺ຉຕິ, ເອວເມວໍ ກິຎ຺ຈາປິ ສມາປຕ຺ຕິໍ ນິສ຺ສາຍ ວິປສ຺ສນໍ ປຏ຺ຐເປຕິ, ວິປສ຺ສນາ ປນ ຖາມຊາຕາ ສມາປຕ຺ຕິມ຺ປິ ຣກ຺ຂຕິ, ຖາມຊາຕໍ ກໂຣຕິ. ຖລໍ ປຕ຺ວາ ສກຏໍ ວິຍ ຫິ ສມາປຕ຺ຕິ. ອຸທກໍ ປຕ຺ວາ ນາວາ ວິຍ ວິປສ຺ສນາ. ອິຕິ ໂພຘິສຕ຺ຕສ຺ສ ເອຕ຺ຕາວຕາ ສມາປຕ຺ຕິໍ ນິສ຺ສາຍ ວິປສ຺ສນາປຏ຺ຐປນກາໂລ ກຖິໂຕຕິ ເວທິຕພ຺ໂພ.

ຍຎ຺ຎເທວາຕິອາທິ ກຓ຺ຫປກ຺ເຂ ວຸຕ຺ຕານຸສາເຣເນວ ເວທິຕພ຺ພໍ, ອິຘາປິ ອຕ຺ຖທີປິກໍ ອຸປມໍ ທສ຺ເສຕຸໍ ເສຍ຺ຍຖາປີຕິອາທິມາຫ. ຕຕ຺ຖ ຄາມນ຺ຕສມ຺ຠເຕສູຕິ ຄາມນ຺ຕໍ ອາຫເຏສຸ. ສຕິກຣຓີຍເມວ ໂຫຕີຕິ ເອຕາ ຄາໂວຕິ ສຕິອຸປ຺ປາທນມຕ຺ຕເມວ ກາຕພ຺ພໍ ໂຫຕິ. ອິໂຕ ຈິໂຕ ຈ ຄນ຺ຕ຺ວາ ອາໂກຏນາທິກິຈ຺ຈໍ ນຕ຺ຖິ. ເອເຕ ຘມ຺ມາຕິ ເອເຕ ສມຖວິປສ຺ສນາ ຘມ຺ມາຕິ ສຕຸປ຺ປາທນມຕ຺ຕເມວ ກາຕພ຺ພໍ ໂຫຕິ. ອິມິນາ ໂພຘິສຕ຺ຕສ຺ສ ສມຖວິປສ຺ສນານໍ ຖາມຊາຕກາໂລ ກຖິໂຕ. ຕທາ ກິຣສ຺ສ ສມາປຕ຺ຕິໍ ອປ຺ປນຕ຺ຖາຍ ນິສິນ຺ນສ຺ສ ອຏ຺ຐ ສມາປຕ຺ຕິໂຍ ເອກາວຊ຺ຊເນນ ອາປາຖໍ ອາຄຈ຺ຉນ຺ຕິ, ວິປສ຺ສນໍ ປຏ຺ຐເປຕ຺ວາ ນິສິນ຺ໂນ ສຕ຺ຕ ອນຸປສ຺ສນາ ເອກປ຺ປຫາເຣເນວ ອາຣຸຬ຺ໂຫ ໂຫຕິ.

໒໑໕. ເສຍ຺ຍຖາປີຕິ ອິຘ ກິໍ ທສ຺ເສຕິ? ອຍໍ ປາຏິເຍກ຺ໂກ ອນຸສນ຺ຘິ, ສຕ຺ຕານຎ຺ຫິ ຫິຕູປຈາຣໍ ອຕ຺ຕໂນ ສຕ຺ຖຸຠາວສມ຺ປທຎ຺ຈ ທສ຺ເສນ຺ໂຕ ຠຄວາ ອິມໍ ເທສນໍ ອາຣຠິ. ຕຕ຺ຖ ອຣຎ຺ເຎຕິ ອຏວິຍໍ. ປວເນຕິ ວນສຓ຺ເຑ. ອຕ຺ຖໂຕ ຫິ ອິທໍ ທ຺ວຍໍ ເອກເມວ, ປຐມສ຺ສ ປນ ທຸຕິຍໍ ເວວຈນໍ. ອໂຍຄກ຺ເຂມກາໂມຕິ ຈຕູຫິ ໂຍເຄຫິ ເຂມໍ ນິພ຺ຠຍຏ຺ຐານໍ ອນິຈ຺ຉນ຺ໂຕ ຠຍເມວ ອິຈ຺ຉນ຺ໂຕ. ໂສວຕ຺ຖິໂກຕິ ສຸວຕ຺ຖິຠາວາວໂຫ. ປີຕິຄມນີໂຍຕິ ຕຸຏ຺ຐິໍ ຄມນີໂຍ. ‘‘ປີຕຄມນີໂຍ’’ຕິ ວາ ປາໂຐ. ປິທເຫຍ຺ຍາຕິ ສາຂາທີຫິ ຖເກຍ຺ຍ. ວິວເຣຍ຺ຍາຕິ ວິສທມຸຂໍ ກຕ຺ວາ ວິວຏໍ ກເຣຍ຺ຍ. ກຸມ຺ມຄ຺ຄນ຺ຕິ ອຸທກວນປພ຺ພຕາທີຫິ ສນ຺ນິຣຸທ຺ຘໍ ອມຄ຺ຄໍ. ໂອທເຫຍ຺ຍ ໂອກຈຣນ຺ຕິ ເຕສໍ ໂອເກ ຈຣມານໍ ວິຍ ເອກໍ ທີປກມິຄໍ ເອກສ຺ມິໍ ຐາເນ ຐເປຍ຺ຍ. ໂອກຈາຣິກນ຺ຕິ ທີຆຣຊ຺ຊຸຍາ ພນ຺ຘິຕໍເຍວ ມິຄິໍ.

ມິຄລຸທ຺ທໂກ ຫິ ອຣຎ຺ຎໍ ມິຄານໍ ວສນຏ຺ຐານໍ ຄນ຺ຕ຺ວາ ‘‘ອິຘ ວສນ຺ຕິ, ອິມິນາ ມຄ຺ເຄນ ນິກ຺ຂມນ຺ຕິ, ເອຕ຺ຖ ຈຣນ຺ຕິ, ເອຕ຺ຖ ປິວນ຺ຕິ, ອິມິນາ ມຄ຺ເຄນ ປວິສນ຺ຕີ’’ຕິ ສລ຺ລກ຺ເຂຕ຺ວາ ມຄ຺ຄໍ ປິຘາຍ ກຸມ຺ມຄ຺ຄໍ ວິວຣິຕ຺ວາ ໂອກຈຣຎ຺ຈ ໂອກຈາຣິກຎ຺ຈ ຐເປຕ຺ວາ ສຍໍ ປຏິຈ຺ຉນ຺ນຏ຺ຐາເນ ສຕ຺ຕິໍ ຄເຫຕ຺ວາ ຕິຏ຺ຐຕິ. ອຖ ສາຍນ຺ຫສມເຍ ມິຄາ ອກຸໂຕຠເຍ ອຣຎ຺ເຎ ຈຣິຕ຺ວາ ປານີຍໍ ປິວິຕ຺ວາ ມິຄໂປຕເກຫິ ສທ຺ຘິໍ ກີຬມານາ ວສນຏ຺ຐານສນ຺ຕິກໍ ອາຄນ຺ຕ຺ວາ ໂອກຈຣຎ຺ຈ ໂອກຈາຣິກຎ຺ຈ ທິສ຺ວາ ‘‘ສຫາຍກາ ໂນ ອາຄຕາ ຠວິສ຺ສນ຺ຕີ’’ຕິ ນິຣາສງ຺ກາ ປວິສນ຺ຕິ, ເຕ ມຄ຺ຄໍ ປິຫິຕໍ ທິສ຺ວາ ‘‘ນາຍໍ ມຄ຺ໂຄ, ອຍໍ ມຄ຺ໂຄ ຠວິສ຺ສຕີ’’ຕິ ກຸມ຺ມຄ຺ຄໍ ປຏິປຊ຺ຊນ຺ຕິ. ມິຄລຸທ຺ທໂກ ນ ຕາວ ກິຎ຺ຈິ ກໂຣຕິ, ປວິຏ຺ເຐສຸ ປນ ສພ຺ພປຈ຺ຉິມໍ ສຓິກໍ ປຫຣຕິ. ໂສ ອຸຕ຺ຕສຕິ, ຕໂຕ ສພ຺ເພ ອຸຕ຺ຕສິຕ຺ວາ ‘‘ຠຍໍ ອຸປ຺ປນ຺ນ’’ນ຺ຕິ ປຸຣໂຕ ໂອໂລເກນ຺ຕາ ອຸທເກນ ວາ ວເນນ ວາ ປພ຺ພເຕນ ວາ ສນ຺ນິຣຸທ຺ຘໍ ມຄ຺ຄໍ ທິສ຺ວາ ອຸໂຠຫິ ປສ຺ເສຫິ ອງ຺ຄຸລິສງ຺ຂລິກໍ ວິຍ ຄຫນວນໍ ປວິສິຕຸໍ ອສກ຺ໂກນ຺ຕາ ປວິຏ຺ຐມຄ຺ເຄເນວ ນິກ຺ຂມິຕຸໍ ອາຣຠນ຺ຕິ. ລຸທ຺ທໂກ ເຕສໍ ນິວຕ຺ຕນຠາວໍ ຎຕ຺ວາ ອາທິໂຕ ປຏ຺ຐາຍ ຕິໍສມ຺ປິ ຈຕ຺ຕາລີສມ຺ປິ ມິເຄ ຆາເຕຕິ. ອິທໍ ສນ຺ຘາຍ ເອວຎ຺ຫິ ໂສ, ຠິກ຺ຂເວ, ມຫາມິຄສງ຺ໂຆ ອປເຣນ ສມເຍນ ອນຍພ຺ຍສນໍ ອາປຊ຺ເຊຍ຺ຍາຕິ ວຸຕ຺ຕໍ.

‘‘ນນ຺ທີຣາຄສ຺ເສຕໍ ອຘິວຈນໍ, ອວິຊ຺ຊາເຍຕໍ ອຘິວຈນ’’ນ຺ຕິ ເອຕ຺ຖ ຍສ຺ມາ ອິເມ ສຕ຺ຕາ ອວິຊ຺ຊາຍ ອຎ຺ຎາຓາ ຫຸຕ຺ວາ ນນ຺ທີຣາເຄນ ອາພນ຺ຘິຕ຺ວາ ຣູປາຣມ຺ມຓາທີນິ ອຸປນີຕາ ວຏ຺ຏທຸກ຺ຂສຕ຺ຕິຍາ ຆາຕໍ ລຠນ຺ຕິ. ຕສ຺ມາ ຠຄວາ ໂອກຈຣໍ ນນ຺ທີຣາໂຄຕິ, ໂອກຈາຣິກໍ ອວິຊ຺ຊາຕິ ກຕ຺ວາ ທສ຺ເສສິ.

ມິຄລຸທ຺ທໂກ ຫິ ເອກທາປິ ເຕສໍ ສາຂາຠງ຺ເຄນ ສຣີຣໍ ປຸຎ຺ຉິຕ຺ວາ ມນຸສ຺ສຄນ຺ຘໍ ອປເນຕ຺ວາ ໂອກຈຣໍ ເອກສ຺ມິໍ ຐາເນ ຐເປຕ຺ວາ ໂອກຈາຣິກໍ ສຫ ຣຊ຺ຊຸຍາ ວິສ຺ສຊ຺ເຊຕ຺ວາ ອຕ຺ຕານໍ ປຏິຈ຺ຉາເທຕ຺ວາ ສຕ຺ຕິໍ ອາທາຍ ໂອກຈຣສ຺ສ ສນ຺ຕິເກ ຕິຏ຺ຐຕິ, ໂອກຈາຣິກາ ມິຄຄຓສ຺ສ ຈຣຓຏ຺ຐານາຠິມຸຂີ ຄຈ຺ຉຕິ. ຕໍ ທິສ຺ວາ ມິຄາ ສີສານິ ອຸກ຺ຂິປິຕ຺ວາ ຕິຏ຺ຐນ຺ຕິ, ສາປິ ສີສໍ ອຸກ຺ຂິປິຕ຺ວາ ຕິຏ຺ຐຕິ, ເຕ ‘‘ອມ຺ຫາກໍ ສມຊາຕິກາ ອຍ’’ນ຺ຕິ ໂຄຈຣໍ ຄຓ຺ຫນ຺ຕິ. ສາປິ ຕິຓານິ ຂາທນ຺ຕີ ວິຍ ສຓິກໍ ອຸປຄຈ຺ຉຕິ. ອາຣຎ຺ຎິໂກ ຍູຖປຕິມິໂຄ ຕສ຺ສາ ວາຕໍ ລຠິຕ຺ວາ ສກຠຣິຍໍ ວິສ຺ສຊ຺ເຊຕ຺ວາ ຕທຠິມຸໂຂ ໂຫຕິ.

ສຕ຺ຕານຎ຺ຫິ ນວນວເມວ ປິຍໍ ໂຫຕິ. ໂອກຈາຣິກາ ອາຣຎ຺ຎິກສ຺ສ ມິຄສ຺ສ ອຈ຺ຈາສນ຺ນຠາວໍ ອທຕ຺ວາ ຕທຠິມຸຂີວ ປຈ຺ຉໂຕ ປຏິກ຺ກມິຕ຺ວາ ໂອກຈຣສ຺ສ ສນ຺ຕິກໍ ຄຈ຺ຉຕິ, ຍຕ຺ຖ ຍຕ຺ຖສ຺ສາ ຣຊ຺ຊຸ ລຄ຺ຄຕິ, ຕຕ຺ຖ ຕຕ຺ຖ ຂຸເຣນ ປຫຣິຕ຺ວາ ໂມເຈຕິ, ອາຣຎ຺ຎິໂກ ມິໂຄ ໂອກຈຣໍ ທິສ຺ວາ ໂອກຈາຣິກາຍ ສມ຺ມຕ຺ໂຕ ຫຸຕ຺ວາ ໂອກຈເຣ ອຸສູຍໍ ກຕ຺ວາ ປິຏ຺ຐິໍ ນາເມຕ຺ວາ ສີສໍ ກມ຺ເປນ຺ໂຕ ຕິຏ຺ຐຕິ, ຕສ຺ມິໍ ຂເຓ ສຕ຺ຕິໍ ຊິວ຺ຫາຍ ເລຫນ຺ໂຕປິ ‘‘ກິໍ ເອຕ’’ນ຺ຕິ ນ ຊານາຕິ, ໂອກຈໂຣປິ ສຈສ຺ສ ອຸປຣິຠາເຄນ ຕໍ ມິຄໍ ປຫຣິຕຸໍ ສຸຂໍ ໂຫຕິ, ປິຏ຺ຐິໍ ນາເມຕິ. ສຈສ຺ສ ເຫຏ຺ຐາຠາເຄນ ປຫຣິຕຸໍ ສຸຂໍ ໂຫຕິ, ຫທຍໍ ອຸນ຺ນາເມຕິ. ອຖ ລຸທ຺ທໂກ ອາຣຎ຺ຎິກໍ ມິຄໍ ສຕ຺ຕິຍາ ປຫຣິຕ຺ວາ ຕຕ຺ເຖວ ຆາເຕຕ຺ວາ ມໍສໍ ອາທາຍ ຄຈ຺ຉຕິ. ເອວເມວ ຍຖາ ໂສ ມິໂຄ ໂອກຈາຣິກາຍ ສມ຺ມຕ຺ໂຕ ໂອກຈເຣ ອຸສູຍໍ ກຕ຺ວາ ສຕ຺ຕິໍ ຊິວ຺ຫາຍ ເລຫນ຺ໂຕປິ ກິຎ຺ຈິ ນ ຊານາຕິ, ຕຖາ ອິເມ ສຕ຺ຕາ ອວິຊ຺ຊາຍ ສມ຺ມຕ຺ຕາ ອນ຺ຘຠູຕາ ກິຎ຺ຈິ ອຊານນ຺ຕາ ຣູປາທີສຸ ນນ຺ທີຣາຄໍ ອຸປຄມ຺ມ ວຏ຺ຏທຸກ຺ຂສຕ຺ຕິຍາ ວຘໍ ລຠນ຺ຕີຕິ ຠຄວາ ໂອກຈຣໍ ນນ຺ທີຣາໂຄຕິ, ໂອກຈາຣິກໍ ອວິຊ຺ຊາຕິ ກຕ຺ວາ ທສ຺ເສສິ.

ອິຕິ ໂຂ, ຠິກ຺ຂເວ, ວິວໂຏ ມຍາ ເຂໂມ ມຄ຺ໂຄຕິ ອິຕິ ໂຂ, ຠິກ຺ຂເວ, ມຍາ ອິເມສໍ ສຕ຺ຕານໍ ຫິຕຈຣເຓນ ສມ຺ມາສມ຺ໂພຘິໍ ປຕ຺ວາ ອຫໍ ພຸທ຺ໂຘສ຺ມີຕິ ຕຸຓ຺ຫີຠູເຕນ ອນິສີທິຕ຺ວາ ຘມ຺ມຈກ຺ກປ຺ປວຕ຺ຕນໂຕ ປຏ຺ຐາຍ ຘມ຺ມໍ ເທເສນ຺ເຕນ ວິວໂຏ ເຂໂມ ອຣິໂຍ ອຏ຺ຐງ຺ຄິໂກ ມຄ຺ໂຄ, ປິຫິໂຕ ກຸມ຺ມຄ຺ໂຄ, ອຎ຺ຎາຕໂກຓ຺ຑຎ຺ຎາທີນໍ ຠພ຺ພປຸຄ຺ຄລານໍ ອູຫໂຕ ໂອກຈໂຣ ນນ຺ທີຣາໂຄ ທ຺ເວຘາ ເຉຕ຺ວາ ປາຕິໂຕ, ນາສິຕາ ໂອກຈາຣິກາ ອວິຊ຺ຊາ ສພ຺ເພນ ສພ຺ພໍ ສມຸຄ຺ຆາຕິຕາຕິ ອຕ຺ຕໂນ ຫິຕູປຈາຣໍ ທສ຺ເສສິ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ທ຺ເວຘາວິຕກ຺ກສຸຕ຺ຕວຓ຺ຓນາ ນິຏ຺ຐິຕາ.