໗. ວນປຕ຺ຖປຣິຍາຍສຸຕ຺ຕວຓ຺ຓນາ

໑໙໐. ເອວໍ ເມ ສຸຕນ຺ຕິ ວນປຕ຺ຖປຣິຍາຍໍ. ຕຕ຺ຖ ວນປຕ຺ຖປຣິຍາຍນ຺ຕິ ວນປຕ຺ຖກາຣຓໍ, ວນປຕ຺ຖເທສນໍ ວາ.

໑໙໑. ວນປຕ຺ຖໍ ອຸປນິສ຺ສາຍ ວິຫຣຕີຕິ ມນຸສ຺ສູປຈາຣາຕິກ຺ກນ຺ຕໍ ວນສຓ຺ຑເສນາສນໍ ນິສ຺ສາຍ ສມຓຘມ຺ມໍ ກໂຣນ຺ໂຕ ວິຫຣຕິ. ອນຸປຏ຺ຐິຕາຕິອາທີສຸ ປຸພ຺ເພ ອນຸປຏ຺ຐິຕາ ສຕິ ຕໍ ອຸປນິສ຺ສາຍ ວິຫຣໂຕປິ ນ ອຸປຏ຺ຐາຕິ, ປຸພ຺ເພ ອສມາຫິຕໍ ຈິຕ຺ຕໍ ນ ສມາຘິຍຕິ, ປຸພ຺ເພ ອປຣິກ຺ຂີຓາ ອາສວາ ນ ປຣິກ຺ຂຍໍ ຄຈ຺ຉນ຺ຕິ, ປຸພ຺ເພ ອນນຸປ຺ປຕ຺ຕໍ ອນຸຕ຺ຕຣໍ ໂຍຄກ຺ເຂມສງ຺ຂາຕໍ ອຣຫຕ຺ຕຎ຺ຈ ນ ປາປຸຓາຕີຕິ ອຕ຺ໂຖ. ຊີວິຕປຣິກ຺ຂາຣາຕິ ຊີວິຕສມ຺ຠາຣາ. ສມຸທາເນຕພ຺ພາຕິ ສມາຫຣິຕພ຺ພາ. ກສິເຣນ ສມຸທາຄຈ຺ຉນ຺ຕີຕິ ທຸກ຺ເຂນ ອຸປ຺ປຊ຺ຊນ຺ຕິ. ຣຕ຺ຕິຠາຄໍ ວາ ທິວສຠາຄໍ ວາຕິ ຣຕ຺ຕິໂກຏ຺ຐາເສ ວາ ທິວສໂກຏ຺ຐາເສ ວາ. ເອຕ຺ຖ ຈ ຣຕ຺ຕິຠາເຄ ປຏິສຎ຺ຈິກ຺ຂມາເນນ ຎຕ຺ວາ ຣຕ຺ຕິໍເຍວ ປກ຺ກມິຕພ຺ພໍ, ຣຕ຺ຕິໍ ຈຓ຺ຑວາຬາທີນໍ ປຣິພນ຺ເຘ ສຕິ ອຣຸຓຸຄ຺ຄມນໍ ອາຄເມຕພ຺ພໍ. ທິວສຠາເຄ ຎຕ຺ວາ ທິວາວ ປກ຺ກມິຕພ຺ພໍ, ທິວາ ປຣິພນ຺ເຘ ສຕິ ສູຣິຍຕ຺ຖງ຺ຄມນໍ ອາຄເມຕພ຺ພໍ.

໑໙໒. ສງ຺ຂາປີຕິ ເອວໍ ສມຓຘມ຺ມສ຺ສ ອນິປ຺ຜຊ຺ຊນຠາວໍ ຊານິຕ຺ວາ. ອນນ຺ຕຣວາເຣ ປນ ສງ຺ຂາປີຕິ ເອວໍ ສມຓຘມ຺ມສ຺ສ ນິປ຺ຜຊ຺ຊນຠາວໍ ຊານິຕ຺ວາ.

໑໙໔. ຍາວຊີວນ຺ຕິ ຍາວ ຊີວິຕໍ ປວຕ຺ຕຕິ, ຕາວ ວຕ຺ຖພ຺ພເມວ.

໑໙໕. ໂສ ປຸຄ຺ຄໂລຕິ ປທສ຺ສ ນານຸພນ຺ຘິຕພ຺ໂພຕິ ອິມິນາ ສມ຺ພນ຺ໂຘ. ອນາປຸຈ຺ຉາຕິ ອິຘ ປນ ຕໍ ປຸຄ຺ຄລໍ ອນາປຸຈ຺ຉາ ປກ຺ກມິຕພ຺ພນ຺ຕິ ອຕ຺ໂຖ.

໑໙໗. ສງ຺ຂາປີຕິ ເອວໍ ສມຓຘມ຺ມສ຺ສ ອນິປ຺ຜຊ຺ຊນຠາວໍ ຎຕ຺ວາ ໂສ ປຸຄ຺ຄໂລ ນານຸພນ຺ຘິຕພ຺ໂພ, ຕໍ ອາປຸຈ຺ຉາ ປກ຺ກມິຕພ຺ພໍ.

໑໙໘. ອປິ ປນຸຊ຺ຊມາເນນາປີຕິ ອປິ ນິກ຺ກຑ຺ຒີຍມາເນນາປິ. ເອວຣູໂປ ຫິ ປຸຄ຺ຄໂລ ສເຈປິ ທາຣຸກລາປສຕໍ ວາ ອຸທກຆຏສຕໍ ວາ ວາລິກມ຺ພຓສຕໍ ວາ ທຓ຺ຑໍ ອາຫຣາເປຕິ, ມາ ອິຘ ວສີຕິ ນິກ຺ກຑ຺ຒາເປຕິ ວາ, ຕໍ ຕໍ ຂມາເປຕ຺ວາ ຍາວຊີວໍ ວຕ຺ຖພ຺ພເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ວນປຕ຺ຖປຣິຍາຍສຸຕ຺ຕວຓ຺ຓນາ ນິຏ຺ຐິຕາ.