໘. ປຐມສູຈິວິມານວຓ຺ຓນາ

ອຸຈ຺ຈມິທໍ ມຓິຖູຓໍ ວິມານນ຺ຕິ ສູຈິວິມານໍ. ຕສ຺ສ ກາ ອຸປ຺ປຕ຺ຕິ? ຠຄວາ ຣາຊຄເຫ ວິຫຣຕິ ເວຬຸວເນ. ເຕນ ສມເຍນ ອາຍສ຺ມໂຕ ສາຣິປຸຕ຺ຕສ຺ສ ຈີວຣກມ຺ມໍ ກາຕພ຺ພໍ ໂຫຕິ, ອຕ຺ໂຖ ຈ ໂຫຕິ ສູຈິຍາ. ໂສ ຣາຊຄເຫ ປິຓ຺ຑາຍ ຈຣນ຺ໂຕ ກມ຺ມາຣສ຺ສ ເຄຫທ຺ວາເຣ ອຏ຺ຐາສິ. ຕໍ ທິສ຺ວາ ກມ຺ມາໂຣ ອາຫ ‘‘ເກນ, ຠນ຺ເຕ, ອຕ຺ໂຖ’’ຕິ? ‘‘ຈີວຣກມ຺ມໍ ກາຕພ຺ພໍ ອຕ຺ຖິ, ສູຈິຍາ ອຕ຺ໂຖ’’ຕິ. ກມ຺ມາໂຣ ປສນ຺ນມານໂສ ກຕປຣິໂຍສິຕາ ທ຺ເວ ສູຈິໂຍ ທຕ຺ວາ ‘‘ປຸນປິ, ຠນ຺ເຕ, ສູຈິຍາ ອຕ຺ເຖ ສຕິ ມມ ອາຈິກ຺ເຂຍ຺ຍາຖາ’’ຕິ ວຕ຺ວາ ປຎ຺ຈປຕິຏ຺ຐິເຕນ ວນ຺ທິ. ເຖໂຣ ຕສ຺ສ ອນຸໂມທນໍ ກຕ຺ວາ ປກ຺ກາມິ. ໂສ ອປຣຠາເຄ ກາລໍ ກຕ຺ວາ ຕາວຕິໍເສສຸ ອຸປ຺ປຊ຺ຊິ. ອຖ ອາຍສ຺ມາ ມຫາໂມຄ຺ຄລ຺ລາໂນ ເທວຈາຣິກໍ ຈຣນ຺ໂຕ ຕໍ ເທວປຸຕ຺ຕໍ ອິມາຫິ ຄາຖາຫິ ປຸຈ຺ຉິ –

໙໔໔. ‘‘ອຸຈ຺ຈມິທໍ ມຓິຖູຓໍ ວິມານໍ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໙໔໘. ‘‘ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ’’.

໙໔໙. ‘‘ຍໍ ທທາຕິ ນ ຕໍ ໂຫຕິ, ຍຎ຺ເຈວ ທຊ຺ຊາ ຕຎ຺ເຈວ ເສຍ຺ໂຍ;

ສູຈິ ທິນ຺ນາ ສູຈິເມວ ເສຍ຺ໂຍ.

໙໕໐. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໙໔໙. ຕຕ຺ຖ ຍໍ ທທາຕີຕິ ຍາທິສໍ ເທຍ຺ຍຘມ຺ມໍ ທທາຕິ. ນ ຕໍ ໂຫຕີຕິ ຕສ຺ສ ຕາທິສເມວ ຜລໍ ນ ໂຫຕິ. ອຖ ໂຂ ເຂຕ຺ຕສມ຺ປຕ຺ຕິຍາ ຈ ຈິຕ຺ຕສມ຺ປຕ຺ຕິຍາ ຈ ຕໂຕ ວິປຸລຕຣໍ ອຸຬາຣຕຣເມວ ຜລໍ ໂຫຕິ. ຕສ຺ມາ ຍຎ຺ເຈວ ທຊ຺ຊາ ຕຎ຺ເຈວ ເສຍ຺ໂຍຕິ ຍໍກິຎ຺ຈິເທວ ວິຊ຺ຊມານໍ ທຊ຺ຊາ ທເທຍ຺ຍ, ຕຎ຺ເຈວ ຕເທວ ເສຍ຺ໂຍ, ຍສ຺ສ ກສ຺ສຈິ ອນວຊ຺ຊສ຺ສ ເທຍ຺ຍຘມ຺ມສ຺ສ ທານເມວ ເສຍ຺ໂຍ, ກສ຺ມາ? ມຍາ ຫິ ສູຈິ ທິນ຺ນາ ສູຈິເມວ ເສຍ຺ໂຍ, ສູຈິທານເມວ ມຍ຺ຫໍ ເສຍ຺ຍໍ ຊາຕໍ, ຍໂຕ ອຍມີທິສີ ສມ຺ປຕ຺ຕິ ລທ຺ຘາຕິ ອຘິປ຺ປາໂຍ.

ສູຈິວິມານວຓ຺ຓນາ ນິຏ຺ຐິຕາ.