໙. ທີປວິມານວຓ຺ຓນາ

ອຠິກ຺ກນ຺ເຕນ ວຓ຺ເຓນາຕິ ທີປວິມານໍ. ຕສ຺ສ ກາ ອຸປ຺ປຕ຺ຕິ? ຠຄວຕິ ສາວຕ຺ຖິຍໍ ວິຫຣນ຺ເຕ ອຸໂປສຖທິວເສ ສມ຺ພຫຸລາ ອຸປາສກາ ອຸໂປສຖິກາ ຫຸຕ຺ວາ ປຸເຣຠຕ຺ຕໍ ຍຖາວິຠວໍ ທານໍ ທຕ຺ວາ ກາລສ຺ເສວ ຠຸຎ຺ຊິຕ຺ວາ ສຸທ຺ຘວຕ຺ຖນິວຕ຺ຖາ ສຸທ຺ຘຸຕ຺ຕຣາສງ຺ຄາ ຄນ຺ຘມາລາທິຫຕ຺ຖາ ປຈ຺ຉາຠຕ຺ຕໍ ວິຫາຣໍ ຄນ຺ຕ຺ວາ ມໂນຠາວນີເຍ ຠິກ຺ຂູ ປຍິຣຸປາສິຕ຺ວາ ສາຍນ຺ເຫ ຘມ຺ມໍ ສຸຓນ຺ຕິ. ວິຫາເຣເຍວ ວສິຕຸກາມານໍ ເຕສໍ ຘມ຺ມໍ ສຸຓນ຺ຕານໍເຍວ ສູຣິໂຍ ອຕ຺ຖງ຺ຄໂຕ, ອນ຺ຘກາໂຣ ຊາໂຕ. ຕຕ຺ເຖກາ ອຎ຺ຎຕຣາ ອິຕ຺ຖີ ‘‘ອິທານິ ທີປາໂລກໍ ກາຕຸໍ ຍຸຕ຺ຕ’’ນ຺ຕິ ຈິນ຺ເຕຕ຺ວາ ອຕ຺ຕໂນ ເຄຫໂຕ ປທີເປຍ຺ຍໍ ອາຫຣາເປຕ຺ວາ ປທີປໍ ອຸຊ຺ຊາເລຕ຺ວາ ຘມ຺ມາສນສ຺ສ ປຸຣໂຕ ຐເປຕ຺ວາ ຘມ຺ມໍ ສຸຓິ. ສາ ເຕນ ປທີປທາເນນ ອຕ຺ຕມນາ ປີຕິໂສມນສ຺ສຊາຕາ ຫຸຕ຺ວາ ວນ຺ທິຕ຺ວາ ອຕ຺ຕໂນ ເຄຫໍ ຄຕາ. ສາ ອປຣຠາເຄ ກາລໍ ກຕ຺ວາ ຕາວຕິໍສຠວເນ ໂຊຕິຣສວິມາເນ ນິພ຺ພຕ຺ຕິ. ສຣີຣໂສຠາ ປນສ຺ສາ ອຕິວິຍ ປຠສ຺ສຣາ ອຎ຺ເຎ ເທເວ ອຠິຠວິຕ຺ວາ ທສ ທິສາ ໂອຠາສຍມານາ ຕິຏ຺ຐຕິ. ອເຖກທິວສໍ ອາຍສ຺ມາ ມຫາໂມຄ຺ຄລ຺ລາໂນ ເທວຈາຣິກໍ ຈຣນ຺ໂຕຕິ ສພ຺ພໍ ເຫຏ຺ຐາ ອາຄຕນເຍເນວ ເວທິຕພ຺ພໍ. ອິຘ ປນ –

໗໕. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໗໖. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໗໗. ‘‘ເກນ ຕ຺ວໍ ວິມໂລຠາສາ, ອຕິໂຣຈສິ ເທວຕາ;

ເກນ ເຕ ສພ຺ພຄຕ຺ເຕຫິ, ສພ຺ພາ ໂອຠາສເຕ ທິສາ.

໗໘. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ. –

ຈຕູຫິ ຄາຖາຫິ ປຸຈ຺ຉິ.

໗໙. ‘‘ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ’’.

໘໐. ‘‘ອຫໍ ມນຸສ຺ເສສຸ ມນຸສ຺ສຠູຕາ, ປຸຣິມາຍ ຊາຕິຍາ ມນຸສ຺ສໂລເກ;

ຕມນ຺ຘກາຣມ຺ຫິ ຕິມີສິກາຍໍ, ປທີປກາລມ຺ຫິ ອທາສິ ທີປໍ.

໘໑. ‘‘ໂຍ ອນ຺ຘກາຣມ຺ຫິ ຕິມີສິກາຍໍ, ປທີປກາລມ຺ຫິ ທທາຕິ ທີປໍ;

ອຸປ຺ປຊ຺ຊຕິ ໂຊຕິຣສໍ ວິມານໍ, ປຫູຕມລ຺ຍໍ ພຫຸປຸຓ຺ຑຣີກໍ.

໘໒. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໘໓. ‘‘ເຕນາຫໍ ວິມໂລຠາສາ, ອຕິໂຣຈາມິ ເທວຕາ;

ເຕນ ເມ ສພ຺ພຄຕ຺ເຕຫິ, ສພ຺ພາ ໂອຠາສເຕ ທິສາ.

໘໔. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ. –

ວິສ຺ສຊ຺ເຊສິ.

໗໕. ຕຕ຺ຖ ອຠິກ຺ກນ຺ເຕນ ວຓ຺ເຓນາຕິ ເອຕ຺ຖ ອຠິກ຺ກນ຺ຕ-ສທ຺ໂທ ‘‘ອຠິກ຺ກນ຺ຕາ, ຠນ຺ເຕ, ຣຕ຺ຕິ, ນິກ຺ຂນ຺ໂຕ ປຐໂມ ຍາໂມ’’ຕິອາທີສຸ (ອ. ນິ. ໘.໒໐; ອຸທາ. ໔໕; ຈູຬວ. ໓໘໓) ຂເຍ ອາຄໂຕ. ‘‘ອຍໍ ອິເມສໍ ຈຕຸນ຺ນໍ ປຸຄ຺ຄລານໍ ອຠິກ຺ກນ຺ຕຕໂຣ ຈ ປຓີຕຕໂຣ ຈາ’’ຕິອາທີສຸ (ອ. ນິ. ໔.໑໐໐) ສຸນ຺ທເຣ. ‘‘ອຠິກ຺ກນ຺ຕໍ, ຠນ຺ເຕ, ອຠິກ຺ກນ຺ຕໍ, ຠນ຺ເຕ’’ຕິອາທີສຸ (ທີ. ນິ. ໑.໒໕໐; ປາຣາ. ໑໕) ອພ຺ຠນຸໂມທເນ. ‘‘ອຠິກ຺ກນ຺ເຕນ ວຓ຺ເຓນ, ສພ຺ພາ ໂອຠາສຍໍ ທິສາ’’ຕິອາທີສຸ (ວິ. ວ. ໘໕໗) ອຠິຣູເປ. ອິຘາປິ ອຠິຣູເປ ເອວ ທຏ຺ຐພ຺ໂພ. ຕສ຺ມາ ອຠິກ຺ກນ຺ເຕນາຕິ ອຕິກນ຺ເຕນ ອຕິມນາເປນ, ອຠິຣູເປນາຕິ ອຕ຺ໂຖ. ວຓ຺ເຓນາຕິ ຉວິວຓ຺ເຓນ. ໂອຠາເສນ຺ຕີ ທິສາ ສພ຺ພາຕິ ສພ຺ພາປິ ທສ ທິສາ ໂຊເຕນ຺ຕີ ເອກາໂລກໍ ກໂຣນ຺ຕີ. ກິໍ ວິຍາຕິ ອາຫ ‘‘ໂອສຘີ ວິຍ ຕາຣກາ’’ຕິ. ອຸສ຺ສນ຺ນາ ປຠາ ເອຕາຍ ຘີຍຕິ, ໂອສຘີນໍ ວາ ອນຸພລປ຺ປທາຍິກາຕິ ກຕ຺ວາ ‘‘ໂອສຘີ’’ຕິ ລທ຺ຘນາມາ ຕາຣກາ ຍຖາ ສມນ຺ຕໂຕ ອາໂລກໍ ກຸຣຸມານາ ຕິຏ຺ຐຕິ, ເອວເມວ ຕ຺ວໍ ສພ຺ພາ ທິສາ ໂອຠາສຍນ຺ຕີ ຕິຏ຺ຐສີຕິ.

໗໗. ສພ຺ພຄຕ຺ເຕຫີຕິ ສພ຺ເພຫິ ສຣີຣາວຍເວຫິ, ສກເລຫິ ອງ຺ຄປຈ຺ຈງ຺ເຄຫິ ໂອຠາສຕີຕິ ອຘິປ຺ປາໂຍ, ເຫຕຸມ຺ຫິ ເຈຕໍ ກຣຓວຈນໍ. ສພ຺ພາ ໂອຠາສເຕ ທິສາຕິ ສພ຺ພາປິ ທສທິສາ ວິຊ຺ໂຊຕຕິ. ‘‘ໂອຠາສເຣ’’ຕິປິ ປຐນ຺ຕິ, ເຕສໍ ສພ຺ພາ ທິສາຕິ ພຫຸວຈນເມວ ທຏ຺ຐພ຺ພໍ.

໘໑. ປທີປກາລມ຺ຫີຕິ ປທີປກຣຓກາເລ, ປທີປຸຊ຺ຊລນໂຍຄ຺ເຄ ອນ຺ຘກາເຣຕິ ອຕ຺ໂຖ. ເຕນາຫ ‘‘ໂຍ ອນ຺ຘກາຣມ຺ຫິ ຕິມີສິກາຍ’’ນ຺ຕິ, ພຫເລ ມຫນ຺ຘກາເຣຕິ ອຕ຺ໂຖ. ທທາຕິ ທີປນ຺ຕິ ປທີປໍ ອຸຊ຺ຊາເລນ຺ໂຕ ວາ ອນຸຊ຺ຊາເລນ຺ໂຕ ວາ ປທີປທານໍ ທທາຕິ, ປທີໂປປກຣຓານິ ທກ຺ຂິເຓຍ຺ເຍ ອຸທ຺ທິສ຺ສ ປຣິຈ຺ຈຊຕິ. ອຸປປຊ຺ຊຕິ ໂຊຕິຣສໍ ວິມານນ຺ຕິ ປຏິສນ຺ຘິຄ຺ຄຫຓວເສນ ໂຊຕິຣສໍ ວິມານໍ ອຸປຄຈ຺ຉຕີຕິ. ເສສໍ ວຸຕ຺ຕນຍເມວ.

ອຖ ຍຖາປຸຈ຺ຉິເຕ ອຕ຺ເຖ ເທວຕາຍ ກຖິເຕ ເຖໂຣ ຕເມວ ກຖໍ ອຏ຺ຐຸປ຺ປຕ຺ຕິໍ ກຕ຺ວາ ທານາທິກຖາຍ ຕສ຺ສາ ກລ຺ລຈິຕ຺ຕາທິຠາວໍ ຎຕ຺ວາ ສຈ຺ຈານິ ປກາເສສິ, ສຈ຺ຈປຣິໂຍສາເນ ສປຣິວາຣາ ສາ ເທວຕາ ໂສຕາປຕ຺ຕິຜເລ ປຕິຏ຺ຐຫິ. ເຖໂຣ ຕໂຕ ອາຄນ຺ຕ຺ວາ ຕໍ ປວຕ຺ຕິໍ ຠຄວໂຕ ອາໂຣເຈສິ, ຠຄວາ ຕສ຺ມິໍ ວຕ຺ຖຸສ຺ມິໍ ສມ຺ປຕ຺ຕປຣິສາຍ ວິຕ຺ຖາເຣນ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ຊາຕາ, ມຫາຊໂນ ວິເສສໂຕ ທີປທາເນ ສກ຺ກຈ຺ຈກາຣີ ອໂຫສີຕິ.

ທີປວິມານວຓ຺ຓນາ ນິຏ຺ຐິຕາ.