໒. ທຸຕິຍນິພ຺ພານປຏິສໍຍຸຕ຺ຕສຸຕ຺ຕວຓ຺ຓນາ

໗໒. ທຸຕິເຍ ອິມໍ ອຸທານນ຺ຕິ ອິມໍ ນິພ຺ພານສ຺ສ ປກຕິຍາ ຄມ຺ຠີຣຠາວໂຕ ທຸທ຺ທສຠາວທີປນໍ ອຸທານໍ ອຸທາເນສິ. ຕຕ຺ຖ ທຸທ຺ທສນ຺ຕິ ສຠາວຄມ຺ຠີຣຕ຺ຕາ ອຕິສຸຂຸມສຓ຺ຫສຠາວຕ຺ຕາ ຈ ອນຸປຈິຕຎາຓສມ຺ຠາເຣຫິ ປສ຺ສິຕຸໍ ນ ສກ຺ກາຕິ ທຸທ຺ທສໍ. ວຸຕ຺ຕຎ຺ເຫຕໍ – ‘‘ຕຎ຺ຫິ ເຕ, ມາຄຓ຺ຑິຍ, ອຣິຍໍ ປຎ຺ຎາຈກ຺ຂຸ ນຕ຺ຖິ, ເຍນ ຕ຺ວໍ ອາໂຣຄ຺ຍໍ ຊາເນຍ຺ຍາສິ, ນິພ຺ພານມ຺ປິ ປສ຺ເສຍ຺ຍາສີ’’ຕິ (ມ. ນິ. ໒.໒໑໘). ອປຣມ຺ປິ ວຸຕ຺ຕໍ – ‘‘ອິທມ຺ປິ ໂຂ ຐານໍ ທຸທ຺ທສໍ, ຍທິທໍ ສພ຺ພສງ຺ຂາຣສມໂຖ’’ຕິອາທິ (ມຫາວ. ໘; ມ. ນິ. ໑.໒໘໑; ໒.໓໓໗). ອນຕນ຺ຕິ ຣູປາທິອາຣມ຺ມເຓສຸ, ກາມາທີສຸ ຈ ຠເວສຸ ນມນໂຕ ຕນ຺ນິນ຺ນຠາເວນ ປວຕ຺ຕິໂຕ ສຕ຺ຕານຎ຺ຈ ຕຕ຺ຖ ນມນໂຕ ຕຓ຺ຫາ ນຕາ ນາມ, ນຕ຺ຖິ ເອຕ຺ຖ ນຕາຕິ ອນຕໍ, ນິພ຺ພານນ຺ຕິ ອຕ຺ໂຖ. ‘‘ອນນ຺ຕ’’ນ຺ຕິປິ ປຐນ຺ຕິ, ນິຈ຺ຈສຠາວຕ຺ຕາ ອນ຺ຕວິຣຫິຕໍ, ອຈວນຘມ຺ມໍ ນິໂຣຘໍ ອມຕນ຺ຕິ ອຕ຺ໂຖ. ເກຈິ ປນ ‘‘ອນນ຺ຕ’’ນ຺ຕິ ປທສ຺ສ ‘‘ອປ຺ປມາຓ’’ນ຺ຕິ ອຕ຺ຖໍ ວທນ຺ຕິ. ເອຕ຺ຖ ຈ ‘‘ທຸທ຺ທສ’’ນ຺ຕິ ອິມິນາ ປຎ຺ຎາຍ ທຸພ຺ພລີກຣເຓຫິ ຣາຄາທິກິເລເສຫິ ຈິຣກາລຠາວິຕຕ຺ຕາ ສຕ຺ຕານໍ ອປຈ຺ຈຍຠາວນາ ນ ສຸກຣາຕິ ນິພ຺ພານສ຺ສ ກິຈ຺ເຉນ ອຘິຄມນີຍຕໍ ທສ຺ເສຕິ. ນ ຫິ ສຈ຺ຈໍ ສຸທສ຺ສນນ຺ຕິ ອິມິນາປິ ຕເມວຕ຺ຖໍ ປາກຏໍ ກໂຣຕິ. ຕຕ຺ຖ ສຈ຺ຈນ຺ຕິ ນິພ຺ພານໍ. ຕຎ຺ຫິ ເກນຈິ ປຣິຍາເຍນ ອສນ຺ຕສຠາວາຠາວໂຕ ເອກນ຺ເຕເນວ ສນ຺ຕຕ຺ຕາ ອວິປຣີຕຏ຺ເຐນ ສຈ຺ຈໍ. ນ ຫິ ຕໍ ສຸທສ຺ສນໍ ນ ສຸເຂນ ປສ຺ສິຕພ຺ພໍ, ສຸຈິຣມ຺ປິ ກາລໍ ປຸຎ຺ຎຎາຓສມ຺ຠາເຣ ສມາເນນ຺ເຕຫິປິ ກສິເຣເນວ ສມຘິຄນ຺ຕພ຺ພໂຕ. ຕຖາ ຫິ ວຸຕ຺ຕໍ ຠຄວຕາ – ‘‘ກິຈ຺ເຉນ ເມ ອຘິຄຕ’’ນ຺ຕິ (ມຫາວ. ໘; ມ. ນິ. ໑.໒໘໑; ໒.໓໓໗).

ປຏິວິທ຺ຘາ ຕຓ຺ຫາ ຊານໂຕ ປສ຺ສໂຕ ນຕ຺ຖິ ກິຎ຺ຈນນ຺ຕິ ຕຎ຺ຈ ນິໂຣຘສຈ຺ຈໍ ສຈ຺ຉິກິຣິຍາຠິສມຍວເສນ ອຠິສເມນ຺ເຕນ ວິສຍໂຕ ກິຈ຺ຈໂຕ ຈ ອາຣມ຺ມຓໂຕ ຈ ອາຣມ຺ມຓປ຺ປຏິເວເຘນ ອສມ຺ໂມຫປ຺ປຏິເວເຘນ ຈ ປຏິວິທ຺ຘໍ, ຍຖາປຣິຎ຺ຎາຠິສມຍວເສນ ທຸກ຺ຂສຈ຺ຈໍ, ຠາວນາຠິສມຍວເສນ ມຄ຺ຄສຈ຺ຈຎ຺ຈ ອສມ຺ໂມຫໂຕ ປຏິວິທ຺ຘໍ ໂຫຕິ, ເອວໍ ປຫານາຠິສມຍວເສນ ອສມ຺ໂມຫໂຕ ຈ ປຏິວິທ຺ຘາ ຕຓ຺ຫາ ໂຫຕິ. ເອວຎ຺ຈ ຈຕ຺ຕາຣິ ສຈ຺ຈານິ ຍຖາຠູຕໍ ອຣິຍມຄ຺ຄປຎ຺ຎາຍ ຊານໂຕ ປສ຺ສໂຕ ຠວາທີສຸ ນຕຠູຕາ ຕຓ຺ຫາ ນຕ຺ຖິ, ຕທຠາເວ ສພ຺ພສ຺ສປິ ກິເລສວຏ຺ຏສ຺ສ ອຠາໂວ, ຕໂຕວ ກມ຺ມວິປາກວຏ຺ຏານໍ ອສມ຺ຠໂວເຍວາຕິ ເອວໍ ຠຄວາ ເຕສໍ ຠິກ຺ຂູນໍ ອນວເສສວຏ຺ຏທຸກ຺ຂວູປສມເຫຕຸຠູຕໍ ອມຕມຫານິພ຺ພານສ຺ສ ອານຸຠາວໍ ປກາເສສິ. ເສສໍ ວຸຕ຺ຕນຍເມວ.

ທຸຕິຍສຸຕ຺ຕວຓ຺ຓນາ ນິຏ຺ຐິຕາ.