໔. ກຸມາຣກສຸຕ຺ຕວຓ຺ຓນາ

໔໔. ຈຕຸຕ຺ເຖ ກຸມາຣກາຕິ ຕຣຸຓປຸຄ຺ຄລາ. ເຍ ສຸຠາສິຕທຸພ຺ຠາສິຕສ຺ສ ອຕ຺ຖໍ ຊານນ຺ຕິ, ເຕ ອິຘ ກຸມາຣກາຕິ ອຘິປ຺ເປຕາ. ອິເມ ຫິ ສຕ຺ຕາ ຊາຕທິວສໂຕ ປຏ຺ຐາຍ ຍາວ ປຎ຺ຈທສວສ຺ສກາ, ຕາວ ‘‘ກຸມາຣກາ, ພາລາ’’ຕິ ຈ ວຸຈ຺ຈນ຺ຕິ, ຕໂຕ ປຣໍ ວີສຕິວສ຺ສານິ ‘‘ຍຸວາໂນ’’ຕິ. ມຈ຺ຉເກ ພາເຘນ຺ຕີຕິ ມຄ຺ຄສມີເປ ເອກສ຺ມິໍ ຕຬາເກ ນິທາຆກາເລ ອຸທເກ ປຣິກ຺ຂີເຓ ນິນ຺ນຏ຺ຐາເນ ຐິຕໍ ອຸທກໍ ອຸສ຺ສິຎ຺ຈິຕ຺ວາ ຂຸທ຺ທກມຈ຺ເຉ ຄຓ຺ຫນ຺ຕິ ເຈວ ຫນນ຺ຕິ ຈ ‘‘ປຈິຕ຺ວາ ຂາທິສ຺ສາມາ’’ຕິ. ເຕນຸປສງ຺ກມີຕິ ມຄ຺ຄໂຕ ໂຖກໍ ຕຬາກໍ ອຕິກ຺ກມິຕ຺ວາ ຐິໂຕ, ຕສ຺ມາ ‘‘ອຸປສງ຺ກມີ’’ຕິ ວທຕິ. ກສ຺ມາ ປນ ອຸປສງ຺ກມິ? ເຕ ກຸມາຣເກ ອຕ຺ຕນິ ວິສ຺ສາສໍ ຊເນຕຸໍ ອຸປສງ຺ກມິ. ຠາຍຖ ໂວຕິ ເອຕ຺ຖ ໂວຕິ ນິປາຕມຕ຺ຕໍ. ທຸກ຺ຂສ຺ສາຕິ ນິສ຺ສກ຺ເກ ສາມິວຈນໍ, ທຸກ຺ຂສ຺ມາຕິ ອຕ຺ໂຖ. ອປ຺ປິຍໍ ໂວ ທຸກ຺ຂນ຺ຕິ ‘‘ກິໍ ຕຸມ຺ຫາກໍ ສຣີເຣ ອຸປ຺ປຊ຺ຊນກທຸກ຺ຂໍ ອປ຺ປິຍໍ ອນິຏ຺ຐ’’ນ຺ຕິ ປຸຈ຺ຉຕິ.

ເອຕມຕ຺ຖໍ ວິທິຕ຺ວາຕິ ອິເມ ສຕ຺ຕາ ອຕ຺ຕໂນ ທຸກ຺ຂໍ ອນິຈ຺ຉນ຺ຕາ ເອວ ຫຸຕ຺ວາ ທຸກ຺ຂເຫຕຸໍ ປຏິປຊ຺ຊນ຺ຕາ ອຕ຺ຕໂນ ຕໍ ອິຈ຺ຉນ຺ຕາ ເອວ ນາມ ໂຫນ຺ຕີຕິ ເອຕມຕ຺ຖໍ ສພ຺ພາກາຣໂຕ ວິທິຕ຺ວາ. ອິມໍ ອຸທານນ຺ຕິ ອິມໍ ປາປກິຣິຍາຍ ນິເສຘນໍ ອາທີນວວິຠາວນຎ຺ຈ ອຸທານໍ ອຸທາເນສິ.

ຕສ຺ສຕ຺ໂຖ – ຍທິ ຕຸມ຺ຫາກໍ ສກລມາປາຍິກໍ, ສຸຄຕິຍຎ຺ຈ ອປ຺ປາຍຸກຕາມນຸສ຺ສໂທຠຄ຺ຄິຍາທິເຠທໍ ທຸກ຺ຂໍ ອປ຺ປິຍໍ ອນິຏ຺ຐໍ, ຍທິ ຕຸມ຺ເຫ ຕໂຕ ຠາຍຖ, ອາວິ ວາ ປເຣສໍ ປາກຏຠາວວເສນ ອປ຺ປຏິຈ຺ຉນ຺ນໍ ກຕ຺ວາ ກາເຍນ ວາ ວາຈາຍ ວາ ປາຓາຕິປາຕາທິປ຺ປເຠທໍ ຍທິ ວາ ຣໂຫ ອປາກຏຠາວວເສນ ປຏິຈ຺ຉນ຺ນໍ ກຕ຺ວາ ມໂນທ຺ວາເຣ ເອວ ອຠິຊ຺ຌາທິປ຺ປເຠທໍ ອຓຸມຕ຺ຕມ຺ປິ ປາປກໍ ລາມກຘມ຺ມໍ ມາກຕ຺ຖ ມາ ກຣິຕ຺ຖ, ອຖ ປນ ຕໍ ປາປກມ຺ມໍ ເອຕຣຫິ ກໂຣຖ, ອາຍຕິໍ ວາ ກຣິສ຺ສຖ, ນິຣຍາທີສຸ ຈຕູສຸ ອປາເຍສຸ ມນຸສ຺ເສສຸ ຈ ຕສ຺ສ ຜລຠູຕໍ ທຸກ຺ຂໍ ອິໂຕ ວາ ເອຕ຺ໂຕ ວາ ປລາຍນ຺ເຕ ອມ຺ເຫ ນານຸພນ຺ຘິສ຺ສຕີຕິ ອຘິປ຺ປາເຍນ ອຸເປຈ຺ຈ ອເປຈ຺ຈ ປລາຍຕມ຺ປິ ຕຸມ຺ຫາກໍ ຕໂຕ ມຸຕ຺ຕິ ໂມກ຺ໂຂ ນຕ຺ຖິ. ຄຕິກາລາທິປຈ຺ຈຍນ຺ຕຣສມວາເຍ ວິປຈ຺ຈິສ຺ສຕິເຍວາຕິ ທສ຺ເສຕິ. ‘‘ປລາຍເນ’’ຕິປິ ປຐນ຺ຕິ, ວຸຕ຺ຕນເຍນ ຍຕ຺ຖ ກຕ຺ຖຈິ ຄມເນ ປກ຺ກມເນ ສຕີຕິ ອຕ຺ໂຖ. ອຍຎ຺ຈ ອຕ຺ໂຖ ‘‘ນ ອນ຺ຕລິກ຺ເຂ ນ ສມຸທ຺ທມຊ຺ເຌ…ເປ… ປາປກມ຺ມາ’’ຕິ (ຘ. ປ. ໑໒໗; ມິ. ປ. ໔.໒.໔) ອິມາຍ ຄາຖາຍ ທີເປຕພ຺ໂພ.

ຈຕຸຕ຺ຖສຸຕ຺ຕວຓ຺ຓນາ ນິຏ຺ຐິຕາ.