໑. ສີສູປຈາລາເຖຣີຄາຖາວຓ຺ຓນາ

ອຏ຺ຐກນິປາເຕ ຠິກ຺ຂຸນີ ສີລສມ຺ປນ຺ນາຕິອາທິກາ ສີສູປຈາລາຍ ເຖຣິຍາ ຄາຖາ. ອິມິສ຺ສາປິ ວຕ຺ຖຸ ຈາລາຍ ເຖຣິຍາ ວຕ຺ຖຸມ຺ຫິ ວຸຕ຺ຕນຍເມວ. ອຍມ຺ປິ ຫິ ອາຍສ຺ມໂຕ ຘມ຺ມເສນາປຕິສ຺ສ ປພ຺ພຊິຕຠາວໍ ສຸຕ຺ວາ ສຍມ຺ປິ ອຸສ຺ສາຫຊາຕາ ປພ຺ພຊິຕ຺ວາ ກຕປຸພ຺ພກິຈ຺ຈາ ວິປສ຺ສນໍ ປຏ຺ຐເປຕ຺ວາ, ຆເຏນ຺ຕີ ວາຍມນ຺ຕີ ນຈິຣສ຺ເສວ ອຣຫຕ຺ຕໍ ປາປຸຓິ. ອຣຫຕ຺ຕໍ ປຕ຺ວາ ຜລສມາປຕ຺ຕິສຸເຂນ ວິຫຣນ຺ຕີ ເອກທິວສໍ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ກຕກິຈ຺ຈາຕິ ໂສມນສ຺ສຊາຕາ ອຸທານວເສນ –

໑໙໖. ‘‘ຠິກ຺ຂຸນີ ສີລສມ຺ປນ຺ນາ, ອິນ຺ທ຺ຣິເຍສຸ ສຸສໍວຸຕາ;

ອຘິຄຈ຺ເຉ ປທໍ ສນ຺ຕໍ, ອເສຈນກໂມຊວ’’ນ຺ຕິ. – ຄາຖມາຫ;

ຕຕ຺ຖ ສີລສມ຺ປນ຺ນາຕິ ປຣິສຸທ຺ເຘນ ຠິກ຺ຂຸນິສີເລນ ສມນ຺ນາຄຕາ ປຣິປຸຓ຺ຓາ. ອິນ຺ທ຺ຣິເຍສຸ ສຸສໍວຸຕາຕິ ມນຈ຺ຉຏ຺ເຐສຸ ອິນ຺ທ຺ຣິເຍສຸ ສຸຏ຺ຐຸ ສໍວຸຕາ, ຣູປາທິອາຣມ຺ມເຓ ອິຏ຺ເຐ ຣາຄໍ, ອນິຏ຺ເຐ ໂທສໍ, ອສມເປກ຺ຂເນ ໂມຫຎ຺ຈ ປຫາຍ ສຸຏ຺ຐຸ ປິຫິຕິນ຺ທ຺ຣິຍາ. ອເສຈນກໂມຊວນ຺ຕິ ເກນຈິ ອນາສິຕ຺ຕກໍ ໂອຊວນ຺ຕໍ ສຠາວມຘຸຣໍ ສພ຺ພສ຺ສາປິ ກິເລສໂຣຄສ຺ສ ວູປສມໂນສຘຠູຕໍ ອຣິຍມຄ຺ຄໍ, ນິພ຺ພານເມວ ວາ. ອຣິຍມຄ຺ຄມ຺ປິ ຫິ ນິພ຺ພານຕ຺ຖິເກຫິ ປຏິປຊ຺ຊິຕພ຺ພໂຕ ກິເລສປຣິຬາຫາຠາວໂຕ ຈ ປທໍ ສນ຺ຕນ຺ຕິ ວຕ຺ຕຸໍ ວຏ຺ຏຕິ.

໑໙໗. ‘‘ຕາວຕິໍສາ ຈ ຍາມາ ຈ, ຕຸສິຕາ ຈາປິ ເທວຕາ;

ນິມ຺ມານຣຕິໂນ ເທວາ, ເຍ ເທວາ ວສວຕ຺ຕິໂນ;

ຕຕ຺ຖ ຈິຕ຺ຕໍ ປຓີເຘຫິ, ຍຕ຺ຖ ເຕ ວຸສິຕໍ ປຸເຣ’’ຕິ. –

ອຍໍ ຄາຖາ ກາມສຄ຺ເຄສຸ ນິກນ຺ຕິໍ ອຸປ຺ປາເທຫີຕິ ຕຕ຺ຖ ອຸຍ຺ໂຍຊນວເສນ ເຖຣິໍ ສມາປຕ຺ຕິຍາ ຈາເວຕຸກາເມນ ມາເຣນ ວຸຕ຺ຕາ.

ຕຕ຺ຖ ສຫປຸຎ຺ຎກາຣິໂນ ເຕຕ຺ຕິໍສ ຊນາ ຍຕ຺ຖ ອຸປປນ຺ນາ, ຕໍ ຐານໍ ຕາວຕິໍສນ຺ຕິ. ຕຕ຺ຖ ນິພ຺ພຕ຺ຕາ ສພ຺ເພປິ ເທວປຸຕ຺ຕາ ຕາວຕິໍສາ. ເກຈິ ປນ ‘‘ຕາວຕິໍສາຕິ ເຕສໍ ເທວານໍ ນາມເມວາ’’ຕິ ວທນ຺ຕິ. ທ຺ວີຫິ ເທວໂລເກຫິ ວິສິຏ຺ຐໍ ທິພ຺ພໍ ສຸຂໍ ຍາຕາ ອຸປຍາຕາ ສມ຺ປນ຺ນາຕິ ຍາມາ. ທິພ຺ພາຍ ສມ຺ປຕ຺ຕິຍາ ຕຸຏ຺ຐາ ປຫຏ຺ຐາຕິ ຕຸສິຕາ. ປກຕິປຏິຍຕ຺ຕາຣມ຺ມຓໂຕ ອຕິເຣເກນ ຣມິຕຸກາມຕາກາເລ ຍຖາຣຸຈິເຕ ໂຠເຄ ນິມ຺ມິນິຕ຺ວາ ຣມນ຺ຕີຕິ ນິມ຺ມານຣຕິໂນ. ຈິຕ຺ຕຣຸຈິໍ ຎຕ຺ວາ ປເຣຫິ ນິມ຺ມິເຕສຸ ໂຠເຄສຸ ວສໍ ວຕ຺ເຕນ຺ຕີຕິ ວສວຕ຺ຕິໂນ. ຕຕ຺ຖ ຈິຕ຺ຕໍ ປຓີເຘຫີຕິ ຕສ຺ມິໍ ຕາວຕິໍສາທິເກ ເທວນິກາເຍ ຕວ ຈິຕ຺ຕໍ ຐເປຫິ, ອຸປປຊ຺ຊນາຍ ນິກນ຺ຕິໍ ກໂຣຫິ. ຈາຕຸມຫາຣາຊິການໍ ໂຠຄາ ອິຕເຣຫິ ນິຫີນາຕິ ອຘິປ຺ປາເຍນ ຕາວຕິໍສາທໂຍວ ວຸຕ຺ຕາ. ຍຕ຺ຖ ເຕ ວຸສິຕໍ ປຸເຣຕິ ເຍສຸ ເທວນິກາເຍສຸ ຕຍາ ປຸພ຺ເພ ວຸຕ຺ຖໍ. ອຍໍ ກິຣ ປຸພ຺ເພ ເທເວສຸ ອຸປ຺ປຊ຺ຊນ຺ຕີ, ຕາວຕິໍສໂຕ ປຏ຺ຐາຍ ປຎ຺ຈກາມສຄ຺ເຄ ໂສເຘຕ຺ວາ ປຸນ ເຫຏ຺ຐໂຕ ໂອຕຣນ຺ຕີ, ຕຸສິເຕສຸ ຐຕ຺ວາ ຕໂຕ ຈວິຕ຺ວາ ອິທານິ ມນຸສ຺ເສສຸ ນິພ຺ພຕ຺ຕາ.

ຕໍ ສຸຕ຺ວາ ເຖຣີ – ‘‘ຕິຏ຺ຐຕຸ, ມາຣ, ຕຍາ ວຸຕ຺ຕກາມໂລໂກ. ອຎ຺ໂຎປິ ສພ຺ໂພ ໂລໂກ ຣາຄຄ຺ຄິອາທີຫິ ອາທິຕ຺ໂຕ ສມ຺ປຊ຺ຊລິໂຕ. ນ ຕຕ຺ຖ ວິຎ຺ຎູນໍ ຈິຕ຺ຕໍ ຣມຕີ’’ຕິ ກາມໂຕ ຈ ໂລກໂຕ ຈ ອຕ຺ຕໂນ ວິນິວຕ຺ຕິຕມານສຕໍ ທສ຺ເສຕ຺ວາ ມາຣໍ ຕຊ຺ເຊນ຺ຕີ –

໑໙໘. ຍາມາ ຈ‘‘ຕາວຕິໍສາ ຈ ຍາມາ ຈ, ຕຸສິຕາ ຈາປິ ເທວຕາ;

ນິມ຺ມານຣຕິໂນ ເທວາ, ເຍ ເທວາ ວສວຕ຺ຕິໂນ.

໑໙໙. ‘‘ກາລໍ ກາລໍ ຠວາ ຠວໍ, ສກ຺ກາຍສ຺ມິໍ ປຸຣກ຺ຂຕາ;

ອວີຕິວຕ຺ຕາ ສກ຺ກາຍໍ, ຊາຕິມຣຓສາຣິໂນ.

໒໐໐. ‘‘ສພ຺ໂພ ອາທີປິໂຕ ໂລໂກ, ສພ຺ໂພ ໂລໂກ ປທີປິໂຕ;

ສພ຺ໂພ ປຊ຺ຊລິໂຕ ໂລໂກ, ສພ຺ໂພ ໂລໂກ ປກມ຺ປິໂຕ.

໒໐໑. ‘‘ອກມ຺ປິຍໍ ອຕຸລິຍໍ, ອປຸຖຸຊ຺ຊນເສວິຕໍ;

ພຸທ຺ໂຘ ຘມ຺ມມເທເສສິ, ຕຕ຺ຖ ເມ ນິຣໂຕ ມໂນ.

໒໐໒. ‘‘ຕສ຺ສາຫໍ ວຈນໍ ສຸຕ຺ວາ, ວິຫຣິໍ ສາສເນ ຣຕາ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໒໐໓. ‘‘ສພ຺ພຕ຺ຖ ວິຫຕາ ນນ຺ທີ, ຕໂມກ຺ຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກາ’’ຕິ. –

ອິມາ ຄາຖາ ອຠາສິ.

ຕຕ຺ຖ ກາລໍ ກາລນ຺ຕິ ຕໍ ຕໍ ກາລໍ. ຠວາ ຠວນ຺ຕິ ຠວໂຕ ຠວໍ. ສກ຺ກາຍສ຺ມິນ຺ຕິ ຂນ຺ຘປຎ຺ຈເກ. ປຸຣກ຺ຂຕາຕິ ປຸຣກ຺ຂາຣກາຣິໂນ. ອິທໍ ວຸຕ຺ຕໍ ໂຫຕິ – ມາຣ, ຕຍາ ວຸຕ຺ຕາ ຕາວຕິໍສາທໂຍ ເທວາ ຠວໂຕ ຠວໍ ອຸປຄຈ຺ຉນ຺ຕາ ອນິຈ຺ຈຕາທິອເນກາທີນວາກຸເລ ສກ຺ກາເຍ ປຕິຏ຺ຐິຕາ, ຕສ຺ມາ ຕສ຺ມິໍ ຠເວ ອຸປ຺ປຕ຺ຕິກາເລ, ເວມຊ຺ຌກາເລ, ປຣິໂຍສານກາເລຕິ ຕສ຺ມິໍ ຕສ຺ມິໍ ກາເລ ສກ຺ກາຍເມວ ປຸຣກ຺ຂຕ຺ວາ ຐິຕາ. ຕໂຕ ເອວ ອວີຕິວຕ຺ຕາ ສກ຺ກາຍໍ ນິສ຺ສຣຓາຠິມຸຂາ ອຫຸຕ຺ວາ ສກ຺ກາຍຕີຣເມວ ອນຸປຣິຘາວນ຺ຕາ ຊາຕິມຣຓສາຣິໂນ ຣາຄາທີຫິ ອນຸຄຕຕ຺ຕາ ປຸນປ຺ປຸນໍ ຊາຕິມຣຓເມວ ອນຸສ຺ສຣນ຺ຕິ, ຕໂຕ ນ ວິມຸຈ຺ຈນ຺ຕີຕິ.

ສພ຺ໂພ ອາທີປິໂຕ ໂລໂກຕິ, ມາຣ, ນ ເກວລໍ ຕຍາ ວຸຕ຺ຕກາມໂລໂກເຍວ ຘາຕຸຕ຺ຕຍສຎ຺ຎິໂຕ, ສພ຺ໂພປິ ໂລໂກ ຣາຄຄ຺ຄິອາທີຫິ ເອກາທສຫິ ອາທິຕ຺ໂຕ. ເຕຫິເຍວ ປຸນປ຺ປຸນໍ ອາທີປິຕຕາຍ ປທີປິໂຕ. ນິຣນ຺ຕຣໍ ເອກຊາລີຠູຕຕາຍ ປຊ຺ຊລິໂຕ. ຕຓ຺ຫາຍ ສພ຺ພກິເລເສຫິ ຈ ອິໂຕ ຈິໂຕ ຈ ກມ຺ປິຕຕາຍ ຈລິຕຕາຍ ປກມ຺ປິໂຕ.

ເອວໍ ອາທິຕ຺ເຕ ປຊ຺ຊລິເຕ ປກມ຺ປິເຕ ຈ ໂລເກ ເກນຈິປິ ກມ຺ເປຕຸໍ ຈາເລຕຸໍ ອສກ຺ກຸເຓຍ຺ຍຕາຍ ອກມ຺ປິຍໍ, ຄຸຓໂຕ ‘‘ເອຕ຺ຕໂກ’’ຕິ ຕຸເລຕຸໍ ອສກ຺ກຸເຓຍ຺ຍຕາຍ ອຕ຺ຕນາ ສທິສສ຺ສ ອຠາວໂຕ ຈ ອຕຸລິຍໍ. ພຸທ຺ຘາທີຫິ ອຣິເຍຫິ ເອວ ໂຄຈຣຠາວນາຠິຄມໂຕ ເສວິຕຕ຺ຕາ ອປຸຖຸຊ຺ຊນເສວິຕໍ. ພຸທ຺ໂຘ ຠຄວາ ມຄ຺ຄຜລນິພ຺ພານປ຺ປເຠທໍ ນວວິຘໍ ໂລກຸຕ຺ຕຣຘມ຺ມໍ ມຫາກຣຸຓາຍ ສຎ຺ໂຈທິຕມານໂສ ອເທເສສິ ສເທວກສ຺ສ ໂລກສ຺ສ ກເຖສິ ປເວເທສິ. ຕຕ຺ຖ ຕສ຺ມິໍ ອຣິຍຘມ຺ເມ ມຍ຺ຫໍ ມໂນ ນິຣໂຕ ອຠິຣໂຕ, ນ ຕໂຕ ວິນິວຕ຺ຕຕີຕິ ອຕ຺ໂຖ. ເສສໍ ເຫຏ຺ຐາ ວຸຕ຺ຕນຍເມວ.

ສີສູປຈາລາເຖຣີຄາຖາວຓ຺ຓນາ ນິຏ຺ຐິຕາ.

ອຏ຺ຐກນິປາຕວຓ຺ຓນາ ນິຏ຺ຐິຕາ.