໑໒. ຈນ຺ທາເຖຣີຄາຖາວຓ຺ຓນາ

ທຸຄ຺ຄຕາຫໍ ປຸເຣ ອາສິນ຺ຕິອາທິກາ ຈນ຺ທາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ອນຸກ຺ກເມນ ສມ຺ຠຕວິໂມກ຺ຂສມ຺ຠາຣາ ປຣິປກ຺ກຎາຓາ ອິມສ຺ມິໍ ພຸທ຺ຘຸປ຺ປາເທ ອຎ຺ຎຕຣສ຺ມິໍ ພ຺ຣາຫ຺ມຓຄາເມ ອປຎ຺ຎາຕສ຺ສ ພ຺ຣາຫ຺ມຓສ຺ສ ເຄເຫ ປຏິສນ຺ຘິໍ ຄຓ຺ຫິ. ຕສ຺ສາ ນິພ຺ພຕ຺ຕິໂຕ ປຏ຺ຐາຍໍ ຕໍ ກຸລໍ ໂຠເຄຫິ ປຣິກ຺ຂຍໍ ຄຕໍ. ສາ ອນຸກ຺ກເມນ ວິຎ຺ຎຸຕໍ ປຕ຺ວາ ທຸກ຺ເຂນ ຊີວຕິ. ອຖ ຕສ຺ມິໍ ເຄເຫ ອຫິວາຕໂຣໂຄ ອຸປ຺ປຊ຺ຊິ. ເຕນສ຺ສາ ສພ຺ເພປິ ຎາຕກາ ມຣຓພ຺ຍສນໍ ປາປຸຓິໍສຸ. ສາ ຎາຕິກ຺ຂເຍ ຊາເຕ ອຎ຺ຎຕ຺ຖ ຊີວິຕຸໍ ອສກ຺ໂກນ຺ຕີ ກປາລຫຕ຺ຖາ ກຸເລ ກຸເລ ວິຈຣິຕ຺ວາ ລທ຺ຘລທ຺ເຘນ ຠິກ຺ຂາຫາເຣນ ຍາເປນ຺ຕີ ເອກທິວສໍ ປຏາຈາຣາຍ ເຖຣິຍາ ຠຕ຺ຕວິສ຺ສຄ຺ຄຏ຺ຐານໍ ອຄມາສິ. ຠິກ຺ຂຸນິໂຍ ຕໍ ທຸກ຺ຂິຕໍ ຂຸທ຺ທາຠິຠູຕໍ ທິສ຺ວານ ສຎ຺ຊາຕກາຣຸຎ຺ຎາ ປິຍສມຸທາຈາເຣນ ສງ຺ຄເຫຕ຺ວາ ຕຕ຺ຖ ວິຊ຺ຊມາເນນ ອຸປຈາຣມໂນຫເຣນ ອາຫາເຣນ ສນ຺ຕປ຺ເປສຸໍ. ສາ ຕາສໍ ອາຈາຣສີເລ ປສີທິຕ຺ວາ ເຖຣິຍາ ສນ຺ຕິກໍ ອຸປສງ຺ກມິຕ຺ວາ ວນ຺ທິຕ຺ວາ ເອກມນ຺ຕໍ ນິສີທິ. ຕສ຺ສາ ເຖຣີ ຘມ຺ມໍ ກເຖສິ. ສາ ຕໍ ຘມ຺ມໍ ສຸຕ຺ວາ ສາສເນ ອຠິປ຺ປສນ຺ນາ ສໍສາເຣ ຈ ສຎ຺ຊາຕສໍເວຄາ ປພ຺ພຊິ. ປພ຺ພຊິຕ຺ວາ ຈ ເຖຣິຍາ ໂອວາເທ ຐຕ຺ວາ ວິປສ຺ສນໍ ປຏ຺ຐເປຕ຺ວາ ຠາວນໍ ອນຸຍຸຎ຺ຊນ຺ຕີ ກຕາຘິກາຣຕາຍ ຎາຓສ຺ສ ຈ ປຣິປາກໍ ຄຕຕ຺ຕາ ນ ຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ –

໑໒໒. ‘‘ທຸຄ຺ຄຕາຫໍ ປຸເຣ ອາສິໍ, ວິຘວາ ຈ ອປຸຕ຺ຕິກາ;

ວິນາ ມິຕ຺ເຕຫິ ຎາຕີຫິ, ຠຕ຺ຕໂຈຬສ຺ສ ນາຘິຄໍ.

໑໒໓. ‘‘ປຕ຺ຕໍ ທຓ຺ຑຎ຺ຈ ຄຓ຺ຫິຕ຺ວາ, ຠິກ຺ຂມານາ ກຸລາ ກຸລໍ;

ສີຕຸຓ຺ເຫນ ຈ ຑຍ຺ຫນ຺ຕີ, ສຕ຺ຕ ວສ຺ສານິ ຈາຣິຫໍ.

໑໒໔. ‘‘ຠິກ຺ຂຸນິໍ ປຸນ ທິສ຺ວານ, ອນ຺ນປານສ຺ສ ລາຠິນິໍ;

ອຸປສງ຺ກມ຺ມໍ ອໂວຈໍ, ປພ຺ພຊ຺ຊໍ ອນຄາຣິຍໍ.

໑໒໕. ‘‘ສາ ຈ ມໍ ອນຸກມ຺ປາຍ, ປພ຺ພາເຊສິ ປຏາຈາຣາ;

ຕໂຕ ມໍ ໂອວທິຕ຺ວານ, ປຣມຕ຺ເຖ ນິໂຍຊຍິ.

໑໒໖. ‘‘ຕສ຺ສາຫໍ ວຈນໍ ສຸຕ຺ວາ, ອກາສິໍ ອນຸສາສນິໍ;

ອໂມໂຆ ອຍ຺ຍາໂຍວາໂທ, ເຕວິຊ຺ຊາມ຺ຫິ ອນາສວາ’’ຕິ. –

ອຸທານວເສນ ອິມາ ຄາຖາ ອຠາສິ.

ຕຕ຺ຖ ທຸຄ຺ຄຕາຕິ ທລິທ຺ທາ. ປຸເຣຕິ ປພ຺ພຊິຕໂຕ ປຸພ຺ເພ. ປພ຺ພຊິຕກາລໂຕ ປຏ຺ຐາຍ ຫິ ອິຘ ປຸຄ຺ຄໂລ ໂຠເຄຫິ ອຑ຺ໂຒ ວາ ທລິທ຺ໂທ ວາຕິ ນ ວຕ຺ຕພ຺ໂພ. ຄຸເຓຫິ ປນ ອຍໍ ເຖຣີ ອຑ຺ຒາເຍວ. ເຕນາຫ ‘‘ທຸຄ຺ຄຕາຫໍ ປຸເຣ ອາສິ’’ນ຺ຕິ. ວິຘວາຕິ ຘໂວ ວຸຈ຺ຈຕິ ສາມິໂກ, ຕທຠາວາ ວິຘວາ, ມຕປຕິກາຕິ ອຕ຺ໂຖ. ອປຸຕ຺ຕິກາຕິ ປຸຕ຺ຕຣຫິຕາ. ວິນາ ມິຕ຺ເຕຫີຕິ ມິຕ຺ເຕຫິ ພນ຺ຘເວຫິ ຈ ປຣິຫີນາ ຣຫິຕາ. ຠຕ຺ຕໂຈຬສ຺ສ ນາຘິຄນ຺ຕິ ຠຕ຺ຕສ຺ສ ໂຈຬສ຺ສ ຈ ປາຣິປູຣິໍ ນາຘິຄຈ຺ຉິໍ, ເກວລໍ ປນ ຠິກ຺ຂາປິຓ຺ຑສ຺ສ ປິໂລຕິກາຂຓ຺ຑສ຺ສ ຈ ວເສນ ຆາສຈ຺ຉາທນມຕ຺ຕເມວ ອລຕ຺ຖນ຺ຕິ ອຘິປ຺ປາໂຍ. ເຕນາຫ ‘‘ປຕ຺ຕໍ ທຓ຺ຑຎ຺ຈ ຄຓ຺ຫິຕ຺ວາ’’ຕິອາທິ.

ຕຕ຺ຖ ປຕ຺ຕນ຺ຕິ ມຕ຺ຕິກາຠາຊນໍ. ທຓ຺ຑນ຺ຕິ ໂຄຓສຸນຂາທິປຣິຫຣຓທຓ຺ຑກໍ. ກຸລາ ກຸລນ຺ຕິ ກຸລໂຕ ກຸລໍ. ສີຕຸຓ຺ເຫນ ຈ ຑຍ຺ຫນ຺ຕີຕິ ວສນເຄຫາຠາວໂຕ ສີເຕນ ຈ ອຸຓ຺ເຫນ ຈ ປີຬິຍມານາ.

ຠິກ຺ຂຸນິນ຺ຕິ ປຏາຈາຣາເຖຣິໍ ສນ຺ຘາຍ ວທຕິ. ປຸນາຕິ ປຈ຺ຉາ, ສຕ຺ຕສໍວຈ຺ຉຣໂຕ ອປຣຠາເຄ.

ປຣມຕ຺ເຖຕິ ປຣເມ ອຸຕ຺ຕເມ ອຕ຺ເຖ, ນິພ຺ພານຄາມິນິຍາ ປຏິປທາຍ ນິພ຺ພາເນ ຈ. ນິໂຍຊຍີຕິ ກມ຺ມຏ຺ຐານໍ ອາຈິກ຺ຂນ຺ຕີ ນິໂຍເຊສິ. ເສສໍ ວຸຕ຺ຕນຍເມວ.

ຈນ຺ທາເຖຣີຄາຖາວຓ຺ຓນາ ນິຏ຺ຐິຕາ.

ປຎ຺ຈກນິປາຕວຓ຺ຓນາ ນິຏ຺ຐິຕາ.