໑໑. ຕິໍສມຕ຺ຕາເຖຣີຄາຖາວຓ຺ຓນາ

ມຸສລານິ ຄເຫຕ຺ວານາຕິອາທິກາ ຕິໍສມຕ຺ຕານໍ ເຖຣີນໍ ຄາຖາ. ຕາປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕິໂຍ ອນຸກ຺ກເມນ ອຸປຈິຕວິໂມກ຺ຂສມ຺ຠາຣາ ອິມສ຺ມິໍ ພຸທ຺ຘຸປ຺ປາເທ ສກກມ຺ມສຎ຺ໂຈທິຕາ ຕຕ຺ຖ ຕຕ຺ຖ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ວາ ປຏາຈາຣາຍ ເຖຣິຍາ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ຘາ ປພ຺ພຊິຕ຺ວາ ປຣິສຸທ຺ຘສີລາ ວຕ຺ຕປຏິວຕ຺ຕໍ ປຣິປູເຣນ຺ຕິໂຍ ວິຫຣນ຺ຕິ. ອເຖກທິວສໍ ປຏາຈາຣາເຖຣີ ຕາສໍ ໂອວາທໍ ເທນ຺ຕີ –

໑໑໗. ‘‘ມຸສລານິ ຄເຫຕ຺ວານ, ຘຎ຺ຎໍ ໂກຏ຺ເຏນ຺ຕິ ມາຓວາ;

ປຸຕ຺ຕທາຣານິ ໂປເສນ຺ຕາ, ຘນໍ ວິນ຺ທນ຺ຕິ ມາຓວາ.

໑໑໘. ‘‘ກໂຣຖ ພຸທ຺ຘສາສນໍ, ຍໍ ກຕ຺ວາ ນານຸຕປ຺ປຕິ;

ຂິປ຺ປໍ ປາທານິ ໂຘວິຕ຺ວາ, ເອກມນ຺ເຕ ນິສີທຖ;

ເຈໂຕສມຖມນຸຍຸຕ຺ຕາ, ກໂຣຖ ພຸທ຺ຘສາສນ’’ນ຺ຕິ. – ອິມາ ທ຺ເວ ຄາຖາ ອຠາສິ;

ຕຕ຺ຖາຍໍ ສງ຺ເຂປຕ຺ໂຖ – ອິເມ ສຕ຺ຕາ ຊີວິຕເຫຕຸ ມຸສລານິ ຄເຫຕ຺ວາ ປເຣສໍ ຘຎ຺ຎໍ ໂກຏ຺ເຏນ຺ຕິ, ອຸທຸກ຺ຂລກມ຺ມໍ ກໂຣນ຺ຕິ. ອຎ຺ຎມ຺ປິ ເອທິສໍ ນິຫີນກມ຺ມໍ ກຕ຺ວາ ປຸຕ຺ຕທາຣໍ ໂປເສນ຺ຕາ ຍຖາຣຫໍ ຘນມ຺ປິ ສໍຫຣນ຺ຕິ. ຕໍ ປນ ເນສໍ ກມ຺ມໍ ນິຫີນໍ ຄມ຺ມໍ ໂປຖຸຊ຺ຊນິກໍ ທຸກ຺ຂໍ ອນຕ຺ຖສຎ຺ຫິຕຎ຺ຈ. ຕສ຺ມາ ເອທິສໍ ສໍກິເລສິກປປຎ຺ຈໍ ວຊ຺ເຊຕ຺ວາ ກໂຣຖ ພຸທ຺ຘສາສນໍ ສິກ຺ຂຕ຺ຕຍສງ຺ຂາຕໍ ສມ຺ມາສມ຺ພຸທ຺ຘສາສນໍ ກໂຣຖ ສມ຺ປາເທຖ ອຕ຺ຕໂນ ສນ຺ຕາເນ ນິພ຺ພຕ຺ເຕຖ. ຕຕ຺ຖ ກາຣຓມາຫ – ‘‘ຍໍ ກຕ຺ວາ ນານຸຕປ຺ປຕີ’’ຕິ, ຍສ຺ສ ກຣຓເຫຕຸ ເອຕຣຫິ ອາຍຕິຎ຺ຈ ອນຸຕາປໍ ນາປຊ຺ຊຕິ. ອິທານິ ຕສ຺ສ ກຣເຓ ປຸພ຺ພກິຈ຺ຈໍ ອນຸໂຍຄວິຘິຎ຺ຈ ທສ຺ເສຕຸໍ, ‘‘ຂິປ຺ປໍ ປາທານິ ໂຘວິຕ຺ວາ’’ຕິອາທິ ວຸຕ຺ຕໍ. ຕຕ຺ຖ ຍສ຺ມາ ອໂຘວິຕປາທສ຺ສ ອວິກ຺ຂາລິຕມຸຂສ຺ສ ຈ ນິສຊ຺ຊສຸຂໍ ອຸຕຸສປ຺ປາຍລາໂຠ ຈ ນ ໂຫຕິ, ປາເທ ປນ ໂຘວິຕ຺ວາ ມຸຂຎ຺ຈ ວິກ຺ຂາເລຕ຺ວາ ເອກມນ຺ເຕ ນິສິນ຺ນສ຺ສ ຕທຸຠຍໍ ລຠຕິ, ຕສ຺ມາ ຂິປ຺ປໍ ອິມໍ ຍຖາລທ຺ຘໍ ຂຓໍ ອວິຣາເຘນ຺ຕິໂຍ ປາທານິ ອຕ຺ຕໂນ ປາເທ ໂຘວິຕ຺ວາ ເອກມນ຺ເຕ ວິວິຕ຺ເຕ ໂອກາເສ ນິສີທຖ ນິສຊ຺ຊຖ. ອຏ຺ຐຕິໍສາຍ ອາຣມ຺ມເຓສຸ ຍຕ຺ຖ ກຕ຺ຖຈິ ຈິຕ຺ຕຣຸຈິເກ ອາຣມ຺ມເຓ ອຕ຺ຕໂນ ຈິຕ຺ຕໍ ອຸປນິພນ຺ຘິຕ຺ວາ ເຈໂຕສມຖມນຸຍຸຕ຺ຕາ ສມາຫິເຕນ ຈິຕ຺ເຕນ ຈຕຸສຈ຺ຈກມ຺ມຏ຺ຐານຠາວນາວເສນ ພຸທ຺ຘສ຺ສ ຠຄວໂຕ ສາສນໍ ໂອວາທໍ ອນຸສິຏ຺ຐິໍ ກໂຣຖ ສມ຺ປາເທຖາຕິ.

ອຖ ຕາ ຠິກ຺ຂຸນິໂຍ ຕສ຺ສາ ເຖຣິຍາ ໂອວາເທ ຐຕ຺ວາ ວິປສ຺ສນໍ ປຏ຺ຐເປຕ຺ວາ ຠາວນາຍ ກມ຺ມໍ ກໂຣນ຺ຕິໂຍ ຎາຓສ຺ສ ປຣິປາກໍ ຄຕຕ຺ຕາ ເຫຕຸສມ຺ປນ຺ນຕາຍ ຈ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ໂອວາທຄາຖາຫິ ສທ຺ຘິໍ –

໑໑໙. ‘‘ຕສ຺ສາ ຕາ ວຈນໍ ສຸຕ຺ວາ, ປຏາຈາຣາຍ ສາສນໍ;

ປາເທ ປກ຺ຂາລຍິຕ຺ວານ, ເອກມນ຺ຕໍ ອຸປາວິສຸໍ;

ເຈໂຕສມຖມນຸຍຸຕ຺ຕາ, ອກໍສຸ ພຸທ຺ຘສາສນໍ.

໑໒໐. ‘‘ຣຕ຺ຕິຍາ ປຸຣິເມ ຍາເມ, ປຸພ຺ພຊາຕິມນຸສ຺ສຣຸໍ;

ຣຕ຺ຕິຍາ ມຊ຺ຌິເມ ຍາເມ, ທິພ຺ພຈກ຺ຂຸໍ ວິໂສຘຍຸໍ;

ຣຕ຺ຕິຍາ ປຈ຺ຉິເມ ຍາເມ, ຕໂມຂນ຺ຘໍ ປທາລຍຸໍ.

໑໒໑. ‘‘ອຸຏ຺ຐາຍ ປາເທ ວນ຺ທິໍສຸ, ກຕາ ເຕ ອນຸສາສນີ;

ອິນ຺ທໍວ ເທວາ ຕິທສາ, ສງ຺ຄາເມ ອປຣາຊິຕໍ;

ປຸຣກ຺ຂຕ຺ວາ ວິຫສ຺ສາມ, ເຕວິຊ຺ຊາມ຺ຫ ອນາສວາ’’ຕິ. –

ອິມາ ຄາຖາ ອຠາສິໍສຸ.

ຕຕ຺ຖ ຕສ຺ສາ ຕາ ວຈນໍ ສຸຕ຺ວາ, ປຏາຈາຣາຍ ສາສນນ຺ຕິ ຕສ຺ສາ ປຏາຈາຣາຍ ເຖຣິຍາ ກິເລສປຏິສຕ຺ຕຸສາສນຏ຺ເຐນ ສາສນຠູຕໍ ໂອວາທວຈນໍ, ຕາ ຕິໍສມຕ຺ຕາ ຠິກ຺ຂຸນິໂຍ ສຸຕ຺ວາ ປຏິສ຺ສຸຕ຺ວາ ສິຣສາ ສມ຺ປຏິຈ຺ຉິຕ຺ວາ.

ອຸຏ຺ຐາຍ ປາເທ ວນ຺ທິໍສຸ, ກຕາ ເຕ ອນຸສາສນີຕິ ຍຖາສມ຺ປຏິຈ຺ຉິຕໍ ຕສ຺ສາ ສາສນໍ ອຏ຺ຐິໍ ກຕ຺ວາ ມນສິ ກຕ຺ວາ ຍຖາຜາສຸກຏ຺ຐາເນ ນິສີທິຕ຺ວາ ຠາເວນ຺ຕິໂຍ ຠາວນໍ ມຕ຺ຖກໍ ປາເປຕ຺ວາ ອຕ຺ຕນາ ອຘິຄຕວິເສສໍ ອາໂຣເຈຕຸໍ ນິສິນ຺ນາສນໂຕ ອຸຏ຺ຐາຍ ຕສ຺ສາ ສນ຺ຕິກໍ ຄນ຺ຕ຺ວາ ‘‘ມຫາເຖຣິ ຕວານຸສາສນີ ຍຖານຸສິຏ຺ຐໍ ອມ຺ເຫຫິ ກຕາ’’ຕິ ວຕ຺ວາ ຕສ຺ສາ ປາເທ ປຎ຺ຈປຕິຏ຺ຐິເຕນ ວນ຺ທິໍສຸ. ອິນ຺ທໍວ ເທວາ ຕິທສາ, ສງ຺ຄາເມ ອປຣາຊິຕນ຺ຕິ ເທວາສຸຣສງ຺ຄາເມ ອປຣາຊິຕໍ ວິຊິຕາວິໍ ອິນ຺ທໍ ຕາວຕິໍສາ ເທວາ ວິຍ ມຫາເຖຣິ, ມຍໍ ຕໍ ປຸຣກ຺ຂຕ຺ວາ ວິຫຣິສ຺ສາມ ອຎ຺ຎສ຺ສ ກຕ຺ຕພ຺ພສ຺ສ ອຠາວໂຕ. ຕສ຺ມາ ‘‘ເຕວິຊ຺ຊາມ຺ຫ ອນາສວາ’’ຕິ ອຕ຺ຕໂນ ກຕຎ຺ຎຸຠາວໍ ປເວເທນ຺ຕີ ອິທເມວ ຕາສໍ ອຎ຺ຎາພ຺ຍາກຣຓໍ ອໂຫສິ. ຍໍ ປເນຕ຺ຖ ອຕ຺ຖໂຕ ອວິຠຕ຺ຕໍ, ຕໍ ເຫຏ຺ຐາ ວຸຕ຺ຕນຍເມວ.

ຕິໍສມຕ຺ຕາເຖຣີຄາຖາວຓ຺ຓນາ ນິຏ຺ຐິຕາ.