໑. ອິສິທາສີເຖຣີຄາຖາວຓ຺ຓນາ

ຈຕ຺ຕາລີສນິປາເຕ ນຄຣມ຺ຫິ ກຸສຸມນາເມຕິອາທິກາ ອິສິທາສິຍາ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ປຸຣິສຕ຺ຕຠາເວ ຐຕ຺ວາ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ຈຣິມຠວໂຕ ສຕ຺ຕເມ ຠເວ ອກລ຺ຍາຓສນ຺ນິສ຺ສເຍນ ປຣທາຣິກກມ຺ມໍ ກຕ຺ວາ, ກາຍສ຺ສ ເຠທາ ນິຣເຍ ນິພ຺ພຕ຺ຕິຕ຺ວາ ຕຕ຺ຖ ພຫູນິ ວສ຺ສສຕານິ ນິຣເຍ ປຈ຺ຈິຕ຺ວາ, ຕໂຕ ຈຸຕາ ຕີສຸ ຊາຕີສຸ ຕິຣຈ຺ຉານໂຍນິຍໍ ນິພ຺ພຕ຺ຕິຕ຺ວາ ຕໂຕ ຈຸຕາ ທາສິຍາ ກຸຈ຺ຉິສ຺ມິໍ ນປຸໍສໂກ ຫຸຕ຺ວາ ນິພ຺ພຕ຺ຕິ. ຕໂຕ ປນ ຈຸຕາ ເອກສ຺ສ ທລິທ຺ທສ຺ສ ສາກຏິກສ຺ສ ຘີຕາ ຫຸຕ຺ວາ ນິພ຺ພຕ຺ຕິ. ຕໍ ວຍປ຺ປຕ຺ຕໍ ຄິຣິທາໂສ ນາມ ອຎ຺ຎຕຣສ຺ສ ສຕ຺ຖວາຫສ຺ສ ປຸຕ຺ໂຕ ອຕ຺ຕໂນ ຠຣິຍໍ ກຕ຺ວາ ເຄຫໍ ອາເນສິ. ຕສ຺ສ ຈ ຠຣິຍາ ອຕ຺ຖິ ສີລວຕີ ກລ຺ຍາຓຘມ຺ມາ. ຕສ຺ສໍ ອິສ຺ສາປກຕາ ສາມິໂນ ຕສ຺ສາ ວິທ຺ເທສນກມ຺ມໍ ອກາສິ. ສາ ຕຕ຺ຖ ຍາວຊີວໍ ຐຕ຺ວາ ກາຍສ຺ສ ເຠທາ ອິມສ຺ມິໍ ພຸທ຺ຘຸປ຺ປາເທ ອຸຊ຺ເຊນິຍໍ ກຸລປເທສສີລາຈາຣາທິຄຸເຓຫິ ອຠິສມ຺ມຕສ຺ສ ວິຠວສມ຺ປນ຺ນສ຺ສ ເສຏ຺ຐິສ຺ສ ຘີຕາ ຫຸຕ຺ວາ ນິພ຺ພຕ຺ຕິ, ອິສິທາສີຕິສ຺ສາ ນາມໍ ອໂຫສິ.

ຕໍ ວຍປ຺ປຕ຺ຕກາເລ ມາຕາປິຕໂຣ ກຸລຣູປວຍວິຠວາທິສທິສສ຺ສ ອຎ຺ຎຕຣສ຺ສ ເສຏ຺ຐິປຸຕ຺ຕສ຺ສ ອທໍສຸ. ສາ ຕສ຺ສ ເຄເຫ ປຕິເທວຕາ ຫຸຕ຺ວາ ມາສມຕ຺ຕໍ ວສິ. ອຖສ຺ສາ ກມ຺ມພເລນ ສາມິໂກ ວິຣຕ຺ຕຣູໂປ ຫຸຕ຺ວາ ຕໍ ຆຣໂຕ ນີຫຣິ. ຕໍ ສພ຺ພໍ ປາຬິໂຕ ເອວ ວິຎ຺ຎາຍຕິ. ເຕສໍ ເຕສໍ ປນ ສາມິການໍ ອຣຸຈ຺ຈເນຍ຺ຍຕາຍ ສໍເວຄຊາຕາ ປິຕຣໍ ອນຸຊານາເປຕ຺ວາ, ຊິນທຕ຺ຕາຍ ເຖຣິຍາ ສນ຺ຕິເກ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ຕີ ນຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ, ຜລສຸເຂນ ນິພ຺ພານສຸເຂນ ຈ ວີຕິນາເມນ຺ຕີ ເອກທິວສໍ ປາຏລິປຸຕ຺ຕນຄເຣ ປິຓ຺ຑາຍ ຈຣິຕ຺ວາ ປຈ຺ຉາຠຕ຺ຕໍ ປິຓ຺ຑປາຕປຏິກ຺ກນ຺ຕາ ມຫາຄງ຺ຄາຍໍ ວາລຸກປຸລິເນ ນິສີທິຕ຺ວາ ໂພຘິຕ຺ເຖຣິຍາ ນາມ ອຕ຺ຕໂນ ສຫາຍຕ຺ເຖຣິຍາ ປຸພ຺ພປຏິປຕ຺ຕິໍ ປຸຈ຺ຉິຕາ ຕມຕ຺ຖໍ ຄາຖາພນ຺ຘວເສນ ວິສ຺ສຊ຺ເຊສິ ‘‘ອຸຊ຺ເຊນິຍາ ປຸຣວເຣ’’ຕິອາທິນາ. ເຕສໍ ປນ ປຸຈ຺ຉາວິສ຺ສຊ຺ຊນານໍ ສມ຺ພນ຺ຘໍ ທສ຺ເສຕຸໍ –

໔໐໒. ‘‘ນຄຣມ຺ຫິ ກຸສຸມນາເມ, ປາຏລິປຸຕ຺ຕມ຺ຫິ ປຖວິຍາ ມຓ຺ເຑ;

ສກ຺ຍກຸລກຸລີນາໂຍ, ທ຺ເວ ຠິກ຺ຂຸນິໂຍ ຫິ ຄຸຓວຕິໂຍ.

໔໐໓. ‘‘ອິສິທາສີ ຕຕ຺ຖ ເອກາ, ທຸຕິຍາ ໂພຘີຕິ ສີລສມ຺ປນ຺ນາ ຈ;

ຌານຊ຺ຌາຍນຣຕາໂຍ, ພຫຸສ຺ສຸຕາໂຍ ຘຸຕກິເລສາໂຍ.

໔໐໔. ‘‘ຕາ ປິຓ຺ຑາຍ ຈຣິຕ຺ວາ, ຠຕ຺ຕຕ຺ຖໍ ກຣິຍ ໂຘຕປຕ຺ຕາໂຍ;

ຣຫິຕມ຺ຫິ ສຸຂນິສິນ຺ນາ, ອິມາ ຄິຣາ ອພ຺ຠຸທີເຣສຸ’’ນ຺ຕິ. –

ອິມາ ຕິສ຺ໂສ ຄາຖາ ສງ຺ຄີຕິກາເຣຫິ ຐປິຕາ.

໔໐໕. ‘‘ປາສາທິກາສິ ອຍ຺ເຍ, ອິສິທາສິ ວໂຍປິ ເຕ ອປຣິຫີໂນ;

ກິໍ ທິສ຺ວານ ພ຺ຍາລິກໍ, ອຖາສິ ເນກ຺ຂມ຺ມມນຸຍຸຕ຺ຕາ.

໔໐໖. ‘‘ເອວມນຸຍຸຎ຺ຊິຍມານາ ສາ, ຣຫິເຕ ຘມ຺ມເທສນາກຸສລາ;

ອິສິທາສີ ວຈນມພ຺ຣວິ, ສຸຓ ໂພຘິ ຍຖາມ຺ຫິ ປພ຺ພຊິຕາ.

ອິໂຕ ປຣໍ ວິສ຺ສຊ຺ຊນຄາຖາ.

໔໐໗. ‘‘ອຸຊ຺ເຊນິຍາ ປຸຣວເຣ, ມຍ຺ຫໍ ປິຕາ ສີລສໍວຸໂຕ ເສຏ຺ຐິ;

ຕສ຺ສມ຺ຫິ ເອກຘີຕາ, ປິຍາ ມນາປາ ຈ ທຍິຕາ ຈ.

໔໐໘. ‘‘ອຖ ເມ ສາເກຕໂຕ ວຣກາ, ອາຄຈ຺ຉຸມຸຕ຺ຕມກຸລີນາ;

ເສຏ຺ຐີ ປຫູຕຣຕໂນ, ຕສ຺ສ ມມໍ ສຸຓຸມທາສິ ຕາໂຕ.

໔໐໙. ‘‘ສສ຺ສຸຍາ ສສຸຣສ຺ສ ຈ, ສາຍໍ ປາຕໍ ປຓາມມຸປຄມ຺ມ;

ສິຣສາ ກໂຣມິ ປາເທ, ວນ຺ທາມິ ຍຖາມ຺ຫິ ອນຸສິຏ຺ຐາ.

໔໑໐. ‘‘ຍາ ມຍ຺ຫໍ ສາມິກສ຺ສ, ຠຄິນິໂຍ ຠາຕຸໂນ ປຣິຊໂນ ວາ;

ຕເມກວຣກມ຺ປິ ທິສ຺ວາ, ອຸພ຺ພິຄ຺ຄາ ອາສນໍ ເທມິ.

໔໑໑. ‘‘ອນ຺ເນນ ຈ ປາເນນ ຈ, ຂຊ຺ເຊນ ຈ ຍຎ຺ຈ ຕຕ຺ຖ ສນ຺ນິຫິຕໍ;

ຉາເທມິ ອຸປນຍາມິ ຈ, ເທມິ ຈ ຍໍ ຍສ຺ສ ປຕິຣູປໍ.

໔໑໒. ‘‘ກາເລນ ອຸປຏ຺ຐຫິຕ຺ວາ, ຆຣໍ ສມຸປຄມາມິ ອຸມ຺ມາເຣ;

ໂຘວນ຺ຕີ ຫຕ຺ຖປາເທ, ປຎ຺ຊລິກາ ສາມິກມຸເປມິ.

໔໑໓. ‘‘ໂກຈ຺ຉໍ ປສາທໍ ອຎ຺ຊນິຎ຺ຈ, ອາທາສກຎ຺ຈ ຄຓ຺ຫິຕ຺ວາ;

ປຣິກມ຺ມກາຣິກາ ວິຍ, ສຍເມວ ປຕິໍ ວິຠູເສມິ.

໔໑໔. ‘‘ສຍເມວ ໂອທນໍ ສາຘຍາມິ, ສຍເມວ ຠາຊນໍ ໂຘວນ຺ຕີ;

ມາຕາວ ເອກປຸຕ຺ຕກໍ, ຕຖາ ຠຕ຺ຕາຣໍ ປຣິຈຣາມິ.

໔໑໕. ‘‘ເອວໍ ມໍ ຠຕ຺ຕິກຕໍ, ອນຸຣຕ຺ຕໍ ກາຣິກໍ ນິຫຕມານໍ;

ອຸຏ຺ຐາຍິກໍ ອນລສໍ, ສີລວຕິໍ ທຸສ຺ສເຕ ຠຕ຺ຕາ.

໔໑໖. ‘‘ໂສ ມາຕຣຎ຺ຈ ປິຕຣຎ຺ຈ, ຠຓຕິ ອາປຸຈ຺ຉຫໍ ຄມິສ຺ສາມິ;

ອິສິທາສິຍາ ນ ສຫ ວຈ຺ຉໍ, ເອກາຄາເຣຫໍ ສຫ ວຕ຺ຖຸໍ.

໔໑໗. ‘‘ມາ ເອວໍ ປຸຕ຺ຕ ອວຈ, ອິສິທາສີ ປຓ຺ຑິຕາ ປຣິພ຺ຍຕ຺ຕາ;

ອຸຏ຺ຐາຍິກາ ອນລສາ, ກິໍ ຕຸຍ຺ຫໍ ນ ໂຣຈເຕ ປຸຕ຺ຕ.

໔໑໘. ‘‘ນ ຈ ເມ ຫິໍສຕິ ກິຎ຺ຈິ, ນ ຈຫໍ ອິສິທາສິຍາ ສຫ ວຈ຺ຉໍ;

ເທສ຺ສາວ ເມ ອລໍ ເມ, ອປຸຈ຺ຉາຫໍ ຄມິສ຺ສາມິ.

໔໑໙. ‘‘ຕສ຺ສ ວຈນໍ ສຸຓິຕ຺ວາ, ສສ຺ສຸ ສສຸໂຣ ຈ ມໍ ອປຸຈ຺ຉິໍສຸ;

ກິສ຺ສ ຕຍາ ອປຣທ຺ຘໍ, ຠຓ ວິສ຺ສຏ຺ຐາ ຍຖາຠູຕໍ.

໔໒໐. ‘‘ນປິຫໍ ອປຣຊ຺ຌໍ ກິຎ຺ຈິ, ນປິ ຫິໍເສມິ ນ ຠຓາມິ ທຸພ຺ພຈນໍ;

ກິໍ ສກ຺ກາ ກາຕຸຍ຺ເຍ, ຍໍ ມໍ ວິທ຺ເທສ຺ສເຕ ຠຕ຺ຕາ.

໔໒໑. ‘‘ເຕ ມໍ ປິຕຸຆຣໍ ປຏິນຍິໍສຸ, ວິມນາ ທຸເຂນ ອຘິຠູຕາ;

ປຸຕ຺ຕມນຸຣກ຺ຂມານາ, ຊິຕາມ຺ຫເສ ຣູປິນິໍ ລກ຺ຂິໍ.

໔໒໒. ‘‘ອຖ ມໍ ອທາສິ ຕາໂຕ, ອຑ຺ຒສ຺ສ ຆຣມ຺ຫິ ທຸຕິຍກຸລິກສ຺ສ;

ຕໂຕ ອຸປຑ຺ຒສຸງ຺ເກນ, ເຍນ ມໍ ວິນ຺ທຖ ເສຏ຺ຐິ.

໔໒໓. ‘‘ຕສ຺ສປິ ຆຣມ຺ຫິ ມາສໍ, ອວສິໍ ອຖ ໂສປິ ມໍ ປຏິຈ຺ຉຣຍິ;

ທາສີວ ອຸປຏ຺ຐຫນ຺ຕິໍ, ອທູສິກໍ ສີລສມ຺ປນ຺ນໍ.

໔໒໔. ‘‘ຠິກ຺ຂາຍ ຈ ວິຈຣນ຺ຕໍ, ທມກໍ ທນ຺ຕໍ ເມ ປິຕາ ຠຓຕິ;

ໂຫຫິສິ ເມ ຊາມາຕາ, ນິກ຺ຂິປ ໂປຏ຺ຐິຎ຺ຈ ຆຏິກຎ຺ຈ.

໔໒໕. ‘‘ໂສປິ ວສິຕ຺ວາ ປກ຺ຂໍ, ອຖ ຕາຕໍ ຠຓຕິ ‘ເທຫິ ເມ ໂປຏ຺ຐິໍ;

ຆຏິກຎ຺ຈ ມລ຺ລກຎ຺ຈ, ປຸນປິ ຠິກ຺ຂໍ ຈຣິສ຺ສາມິ’.

໔໒໖. ‘‘ອຖ ນໍ ຠຓຕີ ຕາໂຕ, ອມ຺ມາ ສພ຺ໂພ ຈ ເມ ຎາຕິຄຓວຄ຺ໂຄ;

ກິໍ ເຕ ນ ກີຣຕິ ອິຘ, ຠຓ ຂິປ຺ປໍ ຕໍ ເຕ ກຣິຫິຕິ.

໔໒໗. ‘‘ເອວໍ ຠຓິໂຕ ຠຓຕິ, ຍທິ ເມ ອຕ຺ຕາ ສກ຺ໂກຕິ ອລໍ ມຍ຺ຫໍ;

ອິສິທາສິຍາ ນ ສຫ ວຈ຺ຉໍ, ເອກຆເຣຫໍ ສຫ ວຕ຺ຖຸໍ.

໔໒໘. ‘‘ວິສ຺ສຊ຺ຊິໂຕ ຄໂຕ ໂສ, ອຫມ຺ປິ ເອກາກິນີ ວິຈິນ຺ເຕມິ;

ອາປຸຈ຺ຉິຕູນ ຄຈ຺ຉໍ, ມຣິຕຸເຍ ວາ ປພ຺ພຊິສ຺ສໍ ວາ.

໔໒໙. ‘‘ອຖ ອຍ຺ຍາ ຊິນທຕ຺ຕາ, ອາຄຈ຺ຉີ ໂຄຈຣາຍ ຈຣມານາ;

ຕາຕ ກຸລໍ ວິນຍຘຣີ, ພຫຸສ຺ສຸຕາ ສີລສມ຺ປນ຺ນາ.

໔໓໐. ‘‘ຕໍ ທິສ຺ວານ ອມ຺ຫາກໍ, ອຸຏ຺ຐາຍາສນໍ ຕສ຺ສາ ປຎ຺ຎາປຍິໍ;

ນິສິນ຺ນາຍ ຈ ປາເທ, ວນ຺ທິຕ຺ວາ ໂຠຊນມທາສິໍ.

໔໓໑. ‘‘ອນ຺ເນນ ຈ ປາເນນ ຈ, ຂຊ຺ເຊນ ຈ ຍຎ຺ຈ ຕຕ຺ຖ ສນ຺ນິຫິຕໍ;

ສນ຺ຕປ຺ປຍິຕ຺ວາ ອວຈໍ, ອຍ຺ເຍ ອິຈ຺ຉາມິ ປພ຺ພຊິຕຸໍ.

໔໓໒. ‘‘ອຖ ມໍ ຠຓຕີ ຕາໂຕ, ອິເຘວ ປຸຕ຺ຕກ ຈຣາຫິ ຕ຺ວໍ ຘມ຺ມໍ;

ອນ຺ເນນ ຈ ປາເນນ ຈ, ຕປ຺ປຍ ສມເຓ ທ຺ວິຊາຕີ ຈ.

໔໓໓. ‘‘ອຖຫໍ ຠຓາມິ ຕາຕໍ, ໂຣທນ຺ຕີ ອຎ຺ຊລິໍ ປຓາເມຕ຺ວາ;

ປາປຎ຺ຫິ ມຍາ ປກຕໍ, ກມ຺ມໍ ຕໍ ນິຊ຺ຊເຣສ຺ສາມິ.

໔໓໔. ‘‘ອຖ ມໍ ຠຓຕີ ຕາໂຕ, ປາປຸຓ ໂພຘິຎ຺ຈ ອຄ຺ຄຘມ຺ມຎ຺ຈ;

ນິພ຺ພານຎ຺ຈ ລຠສ຺ສຸ, ຍໍ ສຈ຺ຉິກຣີ ທ຺ວິປທເສຏ຺ໂຐ.

໔໓໕. ‘‘ມາຕາປິຕູ ອຠິວາທ, ຍິຕ຺ວາ ສພ຺ພຎ຺ຈ ຎາຕິຄຓວຄ຺ຄໍ;

ສຕ຺ຕາຫໍ ປພ຺ພຊິຕາ, ຕິສ຺ໂສ ວິຊ຺ຊາ ອຜສ຺ສຍິໍ.

໔໓໖. ‘‘ຊານາມິ ອຕ຺ຕໂນ ສຕ຺ຕ, ຊາຕິໂຍ ຍສ຺ສຍໍ ຜລວິປາໂກ;

ຕໍ ຕວ ອາຈິກ຺ຂິສ຺ສໍ, ຕໍ ເອກມນາ ນິສາເມຫິ.

໔໓໗. ‘‘ນຄຣມ຺ຫິ ເອຣກຈ຺ເຉ, ສຸວຓ຺ຓກາໂຣ ອຫໍ ປຫູຕຘໂນ;

ໂຍພ຺ພນມເທນ ມຕ຺ໂຕ, ໂສ ປຣທາຣໍ ອເສວິຫໍ.

໔໓໘. ‘‘ໂສຫໍ ຕໂຕ ຈວິຕ຺ວາ, ນິຣຍມ຺ຫິ ອປຈ຺ຈິສໍ ຈິຣໍ;

ປກ຺ໂກ ຕໂຕ ຈ ອຸຏ຺ຐຫິຕ຺ວາ, ມກ຺ກຏິຍາ ກຸຈ຺ຉິໂມກ຺ກມິໍ.

໔໓໙. ‘‘ສຕ຺ຕາຫຊາຕກໍ ມໍ, ມຫາກປິ ຍູຖໂປ ນິລ຺ລຈ຺ເຉສິ;

ຕສ຺ເສຕໍ ກມ຺ມຜລໍ, ຍຖາປິ ຄນ຺ຕ຺ວານ ປຣທາຣໍ.

໔໔໐. ‘‘ໂສຫໍ ຕໂຕ ຈວິຕ຺ວາ, ກາລໍ ກຣິຕ຺ວາ ສິນ຺ຘວາຣຎ຺ເຎ;

ກາຓາຍ ຈ ຂຎ຺ຊາຍ ຈ, ເອຬກິຍາ ກຸຈ຺ຉິໂມກ຺ກມິໍ.

໔໔໑. ‘‘ທ຺ວາທສ ວສ຺ສານິ ອຫໍ, ນິລ຺ລຈ຺ຉິໂຕ ທາຣເກ ປຣິວຫິຕ຺ວາ;

ກິມິນາວຏ຺ໂຏ ອກລ຺ໂລ, ຍຖາປິ ຄນ຺ຕ຺ວານ ປຣທາຣໍ.

໔໔໒. ‘‘ໂສຫໍ ຕໂຕ ຈວິຕ຺ວາ, ໂຄວາຓິຊກສ຺ສ ຄາວິຍາ ຊາໂຕ;

ວຈ຺ໂຉ ລາຂາຕມ຺ໂພ, ນິລ຺ລຈ຺ຉິໂຕ ທ຺ວາທເສ ມາເສ.

໔໔໓. ‘‘ໂວຒູນ ນງ຺ຄລມຫໍ, ສກຏຎ຺ຈ ຘາຣຍາມິ;

ອນ຺ໂຘວຏ຺ໂຏ ອກລ຺ໂລ, ຍຖາປິ ຄນ຺ຕ຺ວານ ປຣທາຣໍ.

໔໔໔. ‘‘ໂສຫໍ ຕໂຕ ຈວິຕ຺ວາ, ວີຖິຍາ ທາສິຍາ ຆເຣ ຊາໂຕ;

ເນວ ມຫິລາ ນ ປຸຣິໂສ, ຍຖາປິ ຄນ຺ຕ຺ວານ ປຣທາຣໍ.

໔໔໕. ‘‘ຕິໍສຕິວສ຺ສມ຺ຫິ ມໂຕ, ສາກຏິກກຸລມ຺ຫິ ທາຣິກາ ຊາຕາ;

ກປຓມ຺ຫິ ອປ຺ປໂຠເຄ, ຘນິກປຸຣິສປາຕພຫຸລມ຺ຫິ.

໔໔໖. ‘‘ຕໍ ມໍ ຕໂຕ ສຕ຺ຖວາໂຫ, ອຸສ຺ສນ຺ນາຍ ວິປຸລາຍ ວຑ຺ຒິຍາ;

ໂອກຑ຺ຒຕິ ວິລປນ຺ຕິໍ, ອຈ຺ຉິນ຺ທິຕ຺ວາ ກຸລຆຣສ຺ມາ.

໔໔໗. ‘‘ອຖ ໂສຬສເມ ວສ຺ເສ, ທິສ຺ວາ ມໍ ປຕ຺ຕໂຍພ຺ພນໍ ກຎ຺ຎໍ;

ໂອຣຸນ຺ຘຕສ຺ສ ປຸຕ຺ໂຕ, ຄິຣິທາໂສ ນາມ ນາເມນ.

໔໔໘. ‘‘ຕສ຺ສປິ ອຎ຺ຎາ ຠຣິຍາ, ສີລວຕີ ຄຸຓວຕີ ຍສວຕີ ຈ;

ອນຸຣຕ຺ຕາ ຠຕ຺ຕາຣໍ, ຕສ຺ສາຫໍ ວິທ຺ເທສນມກາສິໍ.

໔໔໙. ‘‘ຕສ຺ເສຕໍ ກມ຺ມຜລໍ, ຍໍ ມໍ ອປກີຣິຕູນ ຄຈ຺ຉນ຺ຕິ;

ທາສີວ ອຸປຏ຺ຐຫນ຺ຕິໍ, ຕສ຺ສປິ ອນ຺ໂຕ ກໂຕ ມຍາ’’ຕິ.

ຕຕ຺ຖ ນຄຣມ຺ຫິ ກຸສຸມນາເມຕິ ‘‘ກຸສຸມປຸຣ’’ນ຺ຕິ ເອວໍ ກຸສຸມສທ຺ເທນ ຄຫິຕນາມເກ ນຄເຣ, ອິທານິ ຕໍ ນຄຣໍ ປາຏລິປຸຕ຺ຕມ຺ຫີຕິ ສຣູປໂຕ ທສ຺ເສຕິ. ປຖວິຍາ ມຓ຺ເຑຕິ ສກລາຍ ປຖວິຍາ ມຓ຺ຑຠູເຕ. ສກ຺ຍກຸລກຸລີນາໂຍຕິ ສກ຺ຍກຸເລ ກຸລຘີຕໂຣ, ສກ຺ຍປຸຕ຺ຕສ຺ສ ຠຄວໂຕ ສາສເນ ປພ຺ພຊິຕຕາຍ ເອວໍ ວຸຕ຺ຕໍ.

ຕຕ຺ຖາຕິ ຕາສຸ ທ຺ວີສຸ ຠິກ຺ຂຸນີສຸ. ໂພຘີຕິ ເອວໍນາມິກາ ເຖຣີ. ຌານຊ຺ຌາຍນຣຕາໂຍຕິ ໂລກິຍໂລກຸຕ຺ຕຣສ຺ສ ຌານສ຺ສ ຌາຍເນ ອຠິຣຕາ. ພຫຸສ຺ສຸຕາໂຍຕິ ປຣິຍຕ຺ຕິພາຫຸສຈ຺ເຈນ ພຫຸສ຺ສຸຕາ. ຘຸຕກິເລສາໂຍຕິ ອຄ຺ຄມຄ຺ເຄນ ສພ຺ພໂສ ສມຸຄ຺ຆາຕິຕກິເລສາ. ຠຕ຺ຕຕ຺ຖໍ ກຣິຍາຕິ ຠຕ຺ຕກິຈ຺ຈໍ ນິຏ຺ຐາເປຕ຺ວາ. ຣຫິຕມ຺ຫີຕິ ຊນຣຫິຕມ຺ຫິ ວິວິຕ຺ຕຏ຺ຐາເນ. ສຸຂນິສິນ຺ນາຕິ ປພ຺ພຊ຺ຊາສຸເຂນ ວິເວກສຸເຂນ ຈ ສຸຂນິສິນ຺ນາ. ອິມາ ຄິຣາຕິ ອິທານິ ວຸຈ຺ຈມານາ ສຸຂາ ລາປນາ. ອພ຺ຠຸທີເຣສຸນ຺ຕິ ປຸຈ຺ຉາວິສ຺ສຊ຺ຊນວເສນ ກຖຍິໍສຸ.

‘‘ປາສາທິກາສີ’’ຕິ ຄາຖາ ໂພຘິຕ຺ເຖຣິຍາ ປຸຈ຺ຉາວເສນ ວຸຕ຺ຕາ. ‘‘ເອວມນຸຍຸຎ຺ຊິຍມານາ’’ຕິ ຄາຖາ ສງ຺ຄີຕິກາເຣເຫວ ວຸຕ຺ຕາ. ‘‘ອຸຊ຺ເຊນິຍາ’’ຕິອາທິກາ ຫິ ສພ຺ພາປິ ອິສິທາສິຍາວ ວຸຕ຺ຕາ. ຕຕ຺ຖ ປາສາທິກາສີຕິ ຣູປສມ຺ປຕ຺ຕິຍາ ປສ຺ສນ຺ຕານໍ ປສາທາວຫາ ອສິ. ວໂຍປິ ເຕ ອປຣິຫີໂນຕິ ຕຸຍ຺ຫໍ ວໂຍປິ ນ ປຣິຫີໂນ, ປຐມວເຍ ຐິຕາສີຕິ ອຕ຺ໂຖ. ກິໍ ທິສ຺ວານ ພ຺ຍາລິກນ຺ຕິ ກີທິສໍ ພ຺ຍາລິກໍ ໂທສໍ ຆຣາວາເສ ອາທີນວໍ ທິສ຺ວາ. ອຖາສິ ເນກ຺ຂມ຺ມມນຸຍຸຕ຺ຕາຕິ ອຖາຕິ ນິປາຕມຕ຺ຕໍ, ເນກ຺ຂມ຺ມໍ ປພ຺ພຊ຺ຊໍ ອນຸຍຸຕ຺ຕາ ອສິ.

ອນຸຍຸຎ຺ຊິຍມານາຕິ ປຸຈ຺ຉິຍມານາ, ສາ ອິສິທາສີຕິ ໂຍຊນາ. ຣຫິເຕຕິ ສຸຎ຺ຎຏ຺ຐາເນ. ສຸຓ ໂພຘິ ຍຖາມ຺ຫິ ປພ຺ພຊິຕາຕິ ໂພຘິຕ຺ເຖຣິ ອຫໍ ຍຖາ ປພ຺ພຊິຕາ ອມ຺ຫິ, ຕໍ ຕໍ ປຸຣາຓໍ ສຸຓ ສຸຓາຫິ.

ອຸຊ຺ເຊນິຍາ ປຸຣວເຣຕິ ອຸຊ຺ເຊນີນາມເກ ອວນ຺ຕິຣຏ຺ເຐ ອຸຕ຺ຕມນຄເຣ. ປິຍາຕິ ເອກຘີຕຸຠາເວນ ປິຍາຍິຕພ຺ພາ. ມນາປາຕິ ສີລາຈາຣຄຸເຓນ ມນວຑ຺ຒນກາ. ທຍິຕາຕິ ອນຸກມ຺ປິຕພ຺ພາ.

ອຖາຕິ ປຈ຺ຉາ ມມ ວຍປ຺ປຕ຺ຕກາເລ. ເມ ສາເກຕໂຕ ວຣກາຕິ ສາເກຕນຄຣໂຕ ມມ ວຣກາ ມໍ ວາເຣນ຺ຕາ ອາຄຈ຺ຉຸໍ. ອຸຕ຺ຕມກຸລີນາຕິ ຕສ຺ມິໍ ນຄເຣ ອຄ຺ຄກຸລິກາ, ເຍນ ເຕ ເປສິຕາ, ໂສ ເສຏ຺ຐິ ປຫູຕຣຕໂນ. ຕສ຺ສ ມມໍ ສຸຓ຺ຫມທາສິ ຕາໂຕຕິ ຕສ຺ສ ສາເກຕເສຏ຺ຐິໂນ ສຸຓິສໍ ປຸຕ຺ຕສ຺ສ ຠຣິຍໍ ກຕ຺ວາ ມຍ຺ຫໍ ປິຕາ ມໍ ອທາສິ.

ສາຍໍ ປາຕນ຺ຕິ ສາຍນ຺ເຫ ປຸພ຺ພຓ຺ເຫ ຈ. ປຓາມມຸປຄມ຺ມ ສິຣສາ ກໂຣມີຕິ ສສ຺ສຸຍາ ສສຸຣສ຺ສ ຈ ສນ຺ຕິກໍ ອຸປຄນ຺ຕ຺ວາ ສິຣສາ ປຓາມໍ ກໂຣມິ, ເຕສໍ ປາເທ ວນ຺ທາມິ. ຍຖາມ຺ຫິ ອນຸສິຏ຺ຐາຕິ ເຕຫິ ຍຖາ ອນຸສິຏ຺ຐາ ອມ຺ຫິ, ຕຖາ ກໂຣມິ, ເຕສໍ ອນຸສິຏ຺ຐິໍ ນ ອຕິກ຺ກມາມິ.

ຕເມກວຣກມ຺ປີຕິ ເອກວລ຺ລຠມ຺ປິ. ອຸພ຺ພິຄ຺ຄາຕິ ຕສນ຺ຕາ. ອາສນໍ ເທມີຕິ ຍສ຺ສ ປຸຄ຺ຄລສ຺ສ ຍໍ ອນຸຈ຺ຉວິກໍ, ຕໍ ຕສ຺ສ ເທມິ.

ຕຕ຺ຖາຕິ ປຣິເວສນຏ຺ຐາເນ. ສນ຺ນິຫິຕນ຺ຕິ ສຊ຺ຊິຕໍ ຫຸຕ຺ວາ ວິຊ຺ຊມານໍ. ຉາເທມີຕິ ອຸປຈ຺ຉາເທມິ, ອຸປຈ຺ຉາເທຕ຺ວາ ອຸປນຍາມິ ຈ, ອຸປເນຕ຺ວາ ເທມິ, ເທນ຺ຕີປິ ຍໍ ຍສ຺ສ ປຕິຣູປໍ, ຕເທວ ເທມີຕິ ອຕ຺ໂຖ.

ອຸມ຺ມາເຣຕິ ທ຺ວາເຣ. ໂຘວນ຺ຕີ ຫຕ຺ຖປາເທຕິ ຫຕ຺ຖປາເທ ໂຘວິນີ ອາສິໍ, ໂຘວິຕ຺ວາ ຆຣໍ ສມຸປຄມາມີຕິ ໂຍຊນາ.

ໂກຈ຺ຉນ຺ຕິ ມສ຺ສູນໍ ເກສານຎ຺ຈ ອຸລ຺ລິຂນໂກຈ຺ຉໍ. ປສາທນ຺ຕິ ຄນ຺ຘຈຸຓ຺ຓາທິມຸຂວິເລປນໍ. ‘‘ປສາຘນ’’ນ຺ຕິປິ ປາໂຐ, ປສາຘນຠຓ຺ຑໍ. ອຎ຺ຊນິນ຺ຕິ ອຎ຺ຊນນາຬິໍ. ປຣິກມ຺ມກາຣິກາ ວິຍາຕິ ອຄ຺ຄກຸລິກາ ວິຠວສມ຺ປນ຺ນາປິ ປຕິປຣິຈາຣິກາ ເຈຏິກາ ວິຍ.

ສາຘຍາມີຕິ ປຈາມິ. ຠາຊນນ຺ຕິ ໂລຫຠາຊນຎ຺ຈ. ໂຘວນ຺ຕີ ປຣິຈຣາມີຕິ ໂຍຊນາ.

ຠຕ຺ຕິກຕນ຺ຕິ ກຕສາມິຠຕິກໍ. ອນຸຣຕ຺ຕນ຺ຕິ ອນຸຣຕ຺ຕວນ຺ຕິໍ. ກາຣິກນ຺ຕິ ຕສ຺ສ ຕສ຺ເສວ ອິຕິ ກຕ຺ຕພ຺ພສ຺ສ ກາຣິກໍ. ນິຫຕມານນ຺ຕິ ອປນີຕມານໍ. ອຸຏ຺ຐາຍິກນ຺ຕິ ອຸຏ຺ຐານວີຣິຍສມ຺ປນ຺ນໍ. ອນລສນ຺ຕິ ຕໂຕ ເອວ ອກຸສີຕໍ. ສີລວຕິນ຺ຕິ ສີລາຈາຣສມ຺ປນ຺ນໍ. ທຸສ຺ສເຕຕິ ທຸສ຺ສຕິ, ກຸຊ຺ຌິຕ຺ວາ ຠຓຕິ.

ຠຓຕິ ອາປຸຈ຺ຉຫໍ ຄມິສ຺ສາມີຕິ ‘‘ອຫໍ ຕຸມ຺ເຫ ອາປຸຈ຺ຉິຕ຺ວາ ຍຕ຺ຖ ກຕ຺ຖຈິ ຄມິສ຺ສາມີ’’ຕິ ໂສ ມມ ສາມິໂກ ອຕ຺ຕໂນ ມາຕຣຎ຺ຈ ປິຕຣຎ຺ຈ ຠຓຕິ. ກິໍ ຠຓຕີຕິ ເຈ ອາຫ – ‘‘ອິສິທາສິຍາ ນ ສຫ ວຈ຺ຉໍ, ເອກາຄາເຣຫໍ ສຫ ວຕ຺ຖຸ’’ນ຺ຕິ. ຕຕ຺ຖ ວຈ຺ຉນ຺ຕິ ວສິສ຺ສໍ.

ເທສ຺ສາຕິ ອປ຺ປິຍາ. ອລໍ ເມຕິ ປໂຍຊນໍ ເມ ຕາຍ ອິຕ຺ຖີຕິ ອຕ຺ໂຖ. ອປຸຈ຺ຉາຫໍ ຄມິສ຺ສາມີຕິ ຍທິ ເມ ຕຸມ຺ເຫ ຕາຍ ສທ຺ຘິໍ ສໍວາສໍ ອິຈ຺ຉຖ, ອຫໍ ຕຸມ຺ເຫ ອປຸຈ຺ຉິຕ຺ວາ ວິເທສໍ ປກ຺ກມິສ຺ສາມິ.

ຕສ຺ສາຕິ ມມ ຠຕ຺ຕຸໂນ. ກິສ຺ສາຕິ ກິໍ ອສ຺ສ ຕວ ສາມິກສ຺ສ. ຕຍາ ອປຣທ຺ຘໍ ພ຺ຍາລິກໍ ກຕໍ.

ນປິຫໍ ອປຣຊ຺ຌນ຺ຕິ ນປິ ອຫໍ ຕສ຺ສ ກິຎ຺ຈິ ອປຣຊ຺ຌິໍ. ອຍເມວ ວາ ປາໂຐ. ນປິ ຫິໍເສມີຕິ ນປິ ພາເຘມິ. ທຸພ຺ພຈນນ຺ຕິ ທຸຣຸຕ຺ຕວຈນໍ. ກິໍ ສກ຺ກາ ກາຕຸຍ຺ເຍຕິ ກິໍ ມຍາ ກາຕຸໍ ອຍ຺ເຍ ສກ຺ກາ. ຍໍ ມໍ ວິທ຺ເທສ຺ສເຕ ຠຕ຺ຕາຕິ ຍສ຺ມາ ອກາຣເຓເນວ ຠຕ຺ຕາ ມຍ຺ຫໍ ວິທ຺ເທສ຺ສເຕ ວິທ຺ເທສ຺ສໍ ຈິຕ຺ຕປ຺ປໂກປໍ ກໂຣຕິ.

ວິມນາຕິ ໂທມນສ຺ສິກາ. ປຸຕ຺ຕມນຸຣກ຺ຂມານາຕິ ອຕ຺ຕໂນ ປຸຕ຺ຕໍ ມຍ຺ຫໍ ສາມິກໍ ຈິຕ຺ຕມນຸຣກ຺ຂເຓນ ອນຸຣກ຺ຂນ຺ຕາ. ຊິຕາມ຺ຫເສ ຣູປິນິໍ ລກ຺ຂິນ຺ຕິ ຊິຕາ ອມ຺ຫເສ ຊິຕາ ວຕາມ຺ຫ ຣູປວຕິໍ ສິຣິໍ, ມນຸສ຺ສເວເສນ ຈຣນ຺ຕິຍາ ສິຣິເທວຕາຍ ປຣິຫີນາ ວຕາຕິ ອຕ຺ໂຖ.

ອຑ຺ຒສ຺ສ ຆຣມ຺ຫິ ທຸຕິຍກຸລິກສ຺ສາຕິ ປຐມສາມິກໍ ອຸປາທາຍ ທຸຕິຍສ຺ສ ອຑ຺ຒສ຺ສ ກຸລປຸຕ຺ຕສ຺ສ ຆຣມ຺ຫິ ມໍ ອທາສິ, ເທນ຺ໂຕ ຈ ຕໂຕ ປຐມສຸງ຺ກໂຕ ອຸປຑ຺ຒສຸງ຺ເກນ ອທາສິ. ເຍນ ມໍ ວິນ຺ທຖ ເສຏ຺ຐີຕິ ເຍນ ສຸງ຺ເກນ ມໍ ປຐມໍ ເສຏ຺ຐິ ວິນ຺ທຖ ປຏິລຠິ, ຕໂຕ ອຸປຑ຺ຒສຸງ຺ເກນາຕິ ໂຍຊນາ.

ໂສປີຕິ ທຸຕິຍສາມິໂກປິ. ມໍ ປຏິຈ຺ຉຣຍີຕິ ມໍ ນີຫຣິ, ໂສ ມໍ ເຄຫໂຕ ນິກ຺ກຑ຺ຒິ. ອຸປຏ຺ຐຫນ຺ຕິນ຺ຕິ ທາສີ ວິຍ ອຸປຏ຺ຐຫນ຺ຕິໍ ອຸປຏ຺ຐານໍ ກໂຣນ຺ຕິໍ. ອທູສິກນ຺ຕິ ອທຸພ຺ຠນກໍ.

ທມກນ຺ຕິ ກາຣຸຎ຺ຎາຘິຏ຺ຐານຕາຍ ປເຣສໍ ຈິຕ຺ຕສ຺ສ ທມກໍ. ຍຖາ ປເຣ ກິຎ຺ຈິ ທສ຺ສນ຺ຕິ, ເອວໍ ອຕ຺ຕໂນ ກາຍໍ ວາຈຎ຺ຈ ທນ຺ຕໍ ວູປສນ຺ຕໍ ກຕ຺ວາ ປຣທຕ຺ຕຠິກ຺ຂາຍ ວິຈຣຓກໍ. ຊາມາຕາຕິ ທຸຫິຕຸປຕິ. ນິກ຺ຂິປ ໂປຏ຺ຐິຎ຺ຈ ຆຏິກຎ຺ຈາຕິ ຕຍາ ປຣິທຫິຕໍ ປິໂລຕິກາຂຓ຺ຑຎ຺ຈ ຠິກ຺ຂາກປາລຎ຺ຈ ຉຑ຺ເຑຫິ.

ໂສປິ ວສິຕ຺ວາ ປກ຺ຂນ຺ຕິ ໂສປິ ຠິກ຺ຂໂກ ປຸຣິໂສ ມຍາ ສທ຺ຘິໍ ອທ຺ຘມາສມຕ຺ຕໍ ວສິຕ຺ວາ ປກ຺ກາມິ.

ອຖ ນໍ ຠຓຕີ ຕາໂຕຕິ ຕໍ ຠິກ຺ຂກໍ ມມ ປິຕາ ມາຕາ ສພ຺ໂພ ຈ ເມ ຎາຕິຄໂຓ ວຄ຺ຄວຄ຺ໂຄ ຫຸຕ຺ວາ ຠຓຕິ. ກຖໍ? ກິໍ ເຕ ນ ກີຣຕິ ອິຘ ຕຸຍ຺ຫໍ ກິໍ ນາມ ນ ກິຣຕິ ນ ສາຘິຍຕິ, ຠຓ ຂິປ຺ປໍ. ຕໍ ເຕ ກຣິຫິຕີຕິ ຕໍ ຕຸຍ຺ຫໍ ກຣິສ຺ສຕິ.

ຍທິ ເມ ອຕ຺ຕາ ສກ຺ໂກຕີຕິ ຍທິ ມຍ຺ຫໍ ອຕ຺ຕາ ອຕ຺ຕາຘີໂນ ຠຸຊິສ຺ໂສ ຈ ໂຫຕິ, ອລໍ ມຍ຺ຫໍ ອິສິທາສິຍາ ຕາຍ ປໂຍຊນໍ ນຕ຺ຖິ, ຕສ຺ມາ ນ ສຫ ວຈ຺ຉໍ ນ ສຫ ວສິສ຺ສໍ, ເອກຆເຣ ອຫໍ ຕາຍ ສຫ ວຕ຺ຖຸນ຺ຕິ ໂຍຊນາ.

ວິສ຺ສຊ຺ຊິໂຕ ຄໂຕ ໂສຕິ ໂສ ຠິກ຺ຂໂກ ປິຕຣາ ວິສ຺ສຊ຺ຊິໂຕ ຍຖາຣຸຈິ ຄໂຕ. ເອກາກິນີຕິ ເອກິກາວ. ອາປຸຈ຺ຉິຕູນ ຄຈ຺ຉນ຺ຕິ ມຍ຺ຫໍ ປິຕຣໍ ວິສ຺ສຊ຺ເຊຕ຺ວາ ຄຈ຺ຉາມິ. ມຣິຕຸເຍຕິ ມຣິຕຸໍ. ວາຕິ ວິກປ຺ປຕ຺ເຖ ນິປາໂຕ.

ໂຄຈຣາຍາຕິ ຠິກ຺ຂາຍ, ຕາຕ-ກຸລໍ ອາຄຈ຺ຉີຕິ ໂຍຊນາ.

ຕນ຺ຕິ ຕໍ ຊິນທຕ຺ຕຕ຺ເຖຣິໍ. ອຸຏ຺ຐາຍາສນໍ ຕສ຺ສາ ປຎ຺ຎາປຍິນ຺ຕິ ອຸຏ຺ຐຫິຕ຺ວາ ອາສນໍ ຕສ຺ສາ ເຖຣິຍາ ປຎ຺ຎາເປສິໍ.

ອິເຘວາຕິ ອິມສ຺ມິໍ ເອວ ເຄເຫ ຐິຕາ. ປຸຕ຺ຕກາຕິ ສາມຎ຺ຎໂວຫາເຣນ ຘີຕຣໍ ອນຸກມ຺ເປນ຺ໂຕ ອາລປຕິ. ຈຣາຫິ ຕ຺ວໍ ຘມ຺ມນ຺ຕິ ຕ຺ວໍ ປພ຺ພຊິຕ຺ວາ ຈຣິຕພ຺ພໍ ພ຺ຣຫ຺ມຈຣິຍາທິຘມ຺ມໍ ຈຣ. ທ຺ວິຊາຕີຕິ ພ຺ຣາຫ຺ມຓຊາຕີ.

ນິຊ຺ຊເຣສ຺ສາມີຕິ ຊີຣາເປສ຺ສາມິ ວິນາເສສ຺ສາມິ.

ໂພຘິນ຺ຕິ ສຈ຺ຈາຠິສມ຺ໂພຘິໍ, ມຄ຺ຄຎາຓນ຺ຕິ ອຕ຺ໂຖ. ອຄ຺ຄຘມ຺ມນ຺ຕິ ຜລຘມ຺ມໍ, ອຣຫຕ຺ຕໍ. ຍໍ ສຈ຺ຉິກຣີ ທ຺ວິປທເສຏ຺ໂຐຕິ ຍໍ ມຄ຺ຄຜລນິພ຺ພານສຎ຺ຎິຕໍ ໂລກຸຕ຺ຕຣຘມ຺ມໍ ທ຺ວິປທານໍ ເສຏ຺ໂຐ ສມ຺ມາສມ຺ພຸທ຺ໂຘ ສຈ຺ຉິ ອກາສິ, ຕໍ ລຠສ຺ສູຕິ ໂຍຊນາ.

ສຕ຺ຕາຫໍ ປພ຺ພຊິຕາຕິ ປພ຺ພຊິຕາ ຫຸຕ຺ວາ ສຕ຺ຕາເຫນ. ອຜສ຺ສຍິນ຺ຕິ ຜຸສິໍ ສຈ຺ຉາກາສິໍ.

ຍສ຺ສຍໍ ຜລວິປາໂກຕິ ຍສ຺ສ ປາປກມ຺ມສ຺ສ, ອຍໍ ສາມິກສ຺ສ ອມນາປຠາວສງ຺ຂາໂຕ ນິສ຺ສນ຺ທຜລຠູໂຕ ວິປາໂກ. ຕໍ ຕວ ອາຈິກ຺ຂິສ຺ສນ຺ຕິ ຕໍ ກມ຺ມໍ ຕວ ກເຖສ຺ສາມິ. ຕນ຺ຕິ ອາຈິກ຺ຂິຍມານໍ ຕເມວ ກມ຺ມໍ, ຕໍ ວາ ມມ ວຈນໍ. ເອກມນາຕິ ເອກຄ຺ຄມນາ. ອຍເມວ ວາ ປາໂຐ.

ນຄຣມ຺ຫິ ເອຣກຈ຺ເຉຕິ ເອວໍນາມເກ ນຄເຣ. ໂສ ປຣທາຣໍ ອເສວິຫນ຺ຕິ ໂສ ອຫໍ ປຣສ຺ສ ທາຣໍ ອເສວິໍ.

ຈິຣໍ ປກ຺ໂກຕິ ພຫູນິ ວສ຺ສສຕສຫສ຺ສານິ ນິຣຍຄ຺ຄິນາ ທຑ຺ໂຒ. ຕໂຕ ຈ ອຸຏ຺ຐຫິຕ຺ວາຕິ ຕໂຕ ນິຣຍໂຕ ວຸຏ຺ຐິໂຕ ຈຸໂຕ. ມກ຺ກຏິຍາ ກຸຈ຺ຉິໂມກ຺ກມິນ຺ຕິ ວານຣິຍາ ກຸຈ຺ຉິມ຺ຫິ ປຏິສນ຺ຘິໍ ຄຓ຺ຫິໍ.

ຍູຖໂປຕິ ຍູຖປຕິ. ນິລ຺ລຈ຺ເຉສີຕິ ປຸຣິສຠາວສ຺ສ ລກ຺ຂຓຠູຕານິ ພີຊການິ ນິລ຺ລຈ຺ເຉສິ ນີຫຣິ. ຕສ຺ເສຕໍ ກມ຺ມຜລນ຺ຕິ ຕສ຺ສ ມຍ຺ຫໍ ເອຕໍ ອຕີເຕ ກຕສ຺ສ ກມ຺ມສ຺ສ ຜລໍ. ຍຖາປິ ຄນ຺ຕ຺ວານ ປຣທາຣນ຺ຕິ ຍຖາ ຕໍ ປຣທາຣໍ ອຕິກ຺ກມິຕ຺ວາ.

ຕໂຕຕິ ມກ຺ກຏໂຍນິໂຕ. ສິນ຺ຘວາຣຎ຺ເຎຕິ ສິນ຺ຘວຣຏ຺ເຐ ອຣຎ຺ຎຏ຺ຐາເນ. ເອຬກິຍາຕິ ອຊິຍາ.

ທາຣເກ ປຣິວຫິຕ຺ວາຕິ ປິຏ຺ຐິໍ ອາຣຸຍ຺ຫ ກຸມາຣເກ ວຫິຕ຺ວາ. ກິມິນາວຏ຺ໂຏຕິ ອຠິຊາຕຏ຺ຐາເນ ກິມິປຣິຄໂຕວ ຫຸຕ຺ວາ ອຏ຺ໂຏ ອຏ຺ຏິໂຕ. ອກລ຺ໂລຕິ ຄິລາໂນ, ອໂຫສີຕິ ວຈນເສໂສ.

ໂຄວາຓິຊກສ຺ສາຕິ ຄາວິໂຍ ວິກ຺ກິຓິຕ຺ວາ ຊີວກສ຺ສ. ລາຂາຕມ຺ໂພຕິ ລາຂາຣສຣຕ຺ເຕຫິ ວິຍ ຕມ຺ເພຫິ ໂລເມຫິ ສມນ຺ນາຄໂຕ.

ໂວຒູນາຕິ ວຫິຕ຺ວາ. ນງ຺ຄລນ຺ຕິ ສີຣໍ, ສກຏຎ຺ຈ ຘາຣຍາມີຕິ ອຕ຺ໂຖ. ອນ຺ໂຘວຏ຺ໂຏຕິ ກາໂຓວ ຫຸຕ຺ວາ ອຏ຺ໂຏ ປີຬິໂຕ.

ວີຖິຍາຕິ ນຄຣວີຖິຍໍ. ທາສິຍາ ຆເຣ ຊາໂຕຕິ ຆຣທາສິຍາ ກຸຈ຺ຉິມ຺ຫິ ຊາໂຕ. ‘‘ວຓ຺ຓທາສິຍາ’’ຕິປິ ວທນ຺ຕິ. ເນວ ມຫິລາ ນ ປຸຣິໂສຕິ ອິຕ຺ຖີປິ ປຸຣິໂສປິ ນ ໂຫມິ, ຊາຕິນປຸໍສໂກຕິ ອຕ຺ໂຖ.

ຕິໍສຕິວສ຺ສມ຺ຫິ ມໂຕຕິ ນປຸໍສໂກ ຫຸຕ຺ວາ ຕິໍສວສ຺ສກາເລ ມໂຕ. ສາກຏິກກຸລມ຺ຫີຕິ ສູຕກກຸເລ. ຘນິກປຸຣິສປາຕພຫຸລມ຺ຫີຕິ ອິຓາຍິການໍ ປຸຣິສານໍ ອຘິປຕນພຫຸເລ ພຫູຫິ ອິຓາຍິເກຫິ ອຠິຠວິຕພ຺ເພ.

ອຸສ຺ສນ຺ນາຍາຕິ ອຸປຈິຕາຍ. ວິປຸລາຍາຕິ ມຫຕິຍາ. ວຑ຺ຒິຍາຕິ ອິຓວຑ຺ຒິຍາ. ໂອກຑ຺ຒຕີຕິ ອວກຑ຺ຒຕິ. ກຸລຆຣສ຺ມາຕິ ມມ ຊາຕກຸລເຄຫໂຕ.

ໂອຣຸນ຺ຘຕສ຺ສ ປຸຕ຺ໂຕຕິ ອສ຺ສ ສຕ຺ຖວາຫສ຺ສ ປຸຕ຺ໂຕ, ມຍິ ປຏິພທ຺ຘຈິຕ຺ໂຕ ນາເມນ ຄິຣິທາໂສ ນາມ ອວຣຸນ຺ຘຕິ ອຕ຺ຕໂນ ປຣິຄ຺ຄຫຠາເວນ ເຄເຫ ກໂຣຕິ.

ອນຸຣຕ຺ຕາ ຠຕ຺ຕາຣນ຺ຕິ ຠຕ຺ຕາຣໍ ອນຸວຕ຺ຕິກາ. ຕສ຺ສາຫໍ ວິທ຺ເທສນມກາສິນ຺ຕິ ຕສ຺ສ ຠຕ຺ຕຸໂນ ຕໍ ຠຣິຍໍ ສປຕ຺ຕິໍ ວິທ຺ເທສນກມ຺ມໍ ອກາສິໍ. ຍຖາ ຕໍ ໂສ ກຸຊ຺ຌຕິ, ເອວໍ ປຏິປຊ຺ຊິໍ.

ຍໍ ມໍ ອປກີຣິຕູນ ຄຈ຺ຉນ຺ຕີຕິ ຍໍ ທາສີ ວິຍ ສກ຺ກຈ຺ຈໍ ອຸປຏ຺ຐຫນ຺ຕິໍ ມໍ ຕຕ຺ຖ ຕຕ຺ຖ ປຕິໂນ ອປກິຣິຕ຺ວາ ຉຑ຺ເຑຕ຺ວາ ອນເປກ຺ຂາ ອປຄຈ຺ຉນ຺ຕິ. ເອຕໍ ຕສ຺ສາ ມຍ຺ຫໍ ຕທາ ກຕສ຺ສ ປຣທາຣິກກມ຺ມສ຺ສ ສປຕ຺ຕິໍ ວິທ຺ເທສນກມ຺ມສ຺ສ ຈ ນິສ຺ສນ຺ທຜລໍ. ຕສ຺ສປິ ອນ຺ໂຕ ກໂຕ ມຍາຕິ ຕສ຺ສປິ ຕຖາ ອນຸນຍປາປກກມ຺ມສ຺ສ ທາຣຸຓສ຺ສ ປຣິຍນ຺ໂຕ ອິທານິ ມຍາ ອຄ຺ຄມຄ຺ຄໍ ອຘິຄຈ຺ຉນ຺ຕິຍາ ກໂຕ, ອິໂຕ ປຣໍ ກິຎ຺ຈິ ທຸກ຺ຂໍ ນຕ຺ຖີຕິ. ຍໍ ປເນຕ຺ຖ ອນ຺ຕຣນ຺ຕຣາ ນ ວິຠຕ຺ຕໍ, ຕໍ ວຸຕ຺ຕນຍຕ຺ຕາ ອຸຕ຺ຕານຕ຺ຖເມວ.

ອິສິທາສີເຖຣີຄາຖາວຓ຺ຓນາ ນິຏ຺ຐິຕາ.

ຈຕ຺ຕາລີສນິປາຕວຓ຺ຓນາ ນິຏ຺ຐິຕາ.