໑໗. ຘມ຺ມາເຖຣີຄາຖາວຓ຺ຓນາ

ປິຓ຺ຑປາຕໍ ຈຣິຕ຺ວານາຕິ ຘມ຺ມາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນິຕ຺ວາ ສມ຺ຠຕປຸຎ຺ຎສມ຺ຠາຣາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ກຸລຆເຣ ນິພ຺ພຕ຺ຕິຕ຺ວາ ວຍປ຺ປຕ຺ຕາ ປຕິຣູປສ຺ສ ສາມິກສ຺ສ ເຄຫໍ ຄນ຺ຕ຺ວາ ສາສເນ ປຏິລທ຺ຘສທ຺ຘາ ປພ຺ພຊິຕຸກາມາ ຫຸຕ຺ວາ ສາມິເກນ ອນນຸຎ຺ຎາຕາ ປຈ຺ຉາ ສາມິເກ ກາລງ຺ກເຕ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ຕີ ເອກທິວສໍ ຠິກ຺ຂາຍ ຈຣິຕ຺ວາ ວິຫາຣໍ ອາຄຈ຺ຉນ຺ຕີ ປຣິປຕິຕ຺ວາ ຕເມວ ອາຣມ຺ມຓໍ ກຕ຺ວາ ວິປສ຺ສນໍ ວຑ຺ເຒຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ –

໑໗. ‘‘ປິຓ຺ຑປາຕໍ ຈຣິຕ຺ວານ, ທຓ຺ຑໂມລຸພ຺ຠ ທຸພ຺ພລາ;

ເວຘມາເນຫິ ຄຕ຺ເຕຫິ, ຕຕ຺ເຖວ ນິປຕິໍ ຉມາ;

ທິສ຺ວາ ອາທີນວໍ ກາເຍ, ອຖ ຈິຕ຺ຕໍ ວິມຸຈ຺ຈິ ເມ’’ຕິ. –

ອຸທານວເສນ ອິມໍ ຄາຖໍ ອຠາສິ.

ຕຕ຺ຖ ປິຓ຺ຑປາຕໍ ຈຣິຕ຺ວານ, ທຓ຺ຑໂມລຸພ຺ຠາຕິ ປິຓ຺ຑປາຕຕ຺ຖາຍ ຍຏ຺ຐິໍ ອຸປຕ຺ຖມ຺ເຠນ ນຄເຣ ວິຈຣິຕ຺ວາ ຠິກ຺ຂາຍ ອາຫິຓ຺ຑິຕ຺ວາ. ຉມາຕິ ຉມາຍໍ ຠູມິຍໍ, ປາທານໍ ອວເສນ ຠູມິຍໍ ນິປຕິນ຺ຕິ ອຕ຺ໂຖ. ທິສ຺ວາ ອາທີນວໍ ກາເຍຕິ ອສຸຠານິຈ຺ຈທຸກ຺ຂານຕ຺ຕຕາທີຫິ ນານປ຺ປກາເຣຫິ ສຣີເຣ ໂທສໍ ປຎ຺ຎາຈກ຺ຂຸນາ ທິສ຺ວາ. ອຖ ຈິຕ຺ຕໍ ວິມຸຈ຺ຈິ ເມຕິ ອາທີນວານຸປສ຺ສນາຍ ປຣໂຕ ປວຕ຺ເຕຫິ ນິພ຺ພິທານຸປສ຺ສນາທີຫິ ວິກ຺ຂມ຺ຠນວເສນ ມມ ຈິຕ຺ຕໍ ກິເລເສຫິ ວິມຸຈ຺ຈິຕ຺ວາ ປຸນ ມຄ຺ຄຜເລຫິ ຍຖາກ຺ກມໍ ສມຸຈ຺ເຉທວເສນ ເຈວ ປຏິປ຺ປສ຺ສທ຺ຘິວເສນ ຈ ສພ຺ພໂສ ວິມຸຈ຺ຈິ ວິມຸຕ຺ຕໍ, ນ ທານິສ຺ສາ ວິໂມເຈຕພ຺ພໍ ອຕ຺ຖີຕິ. ອິທເມວ ຈສ຺ສາ ອຎ຺ຎາພ຺ຍາກຣຓໍ ອໂຫສີຕິ.

ຘມ຺ມາເຖຣີຄາຖາວຓ຺ຓນາ ນິຏ຺ຐິຕາ.